Bu ilin arxada qalan aylarında da regionlarda tikinti-quruculuq və abadlıq işləri davam etdirilib

Ayrı-ayrı rayonlarda yeni sosial obyektlər tikilir, infrastruktur layihələri həyata keçirilir, çoxmərtəbəli yaşayış binaları və yollar əsaslı təmir olunur

Bu gün öz inkişafına görə regionun lider dövləti olan Azərbaycan ötən hər gün ərzində yeni-yeni uğurlar əldə edir. Bu nailiyyətlərin əsasında isə düşünülmüş və bütün sahələri əhatə edən siyasət, həmçinin uğurla reallaşdırılan müvafiq Dövlət proqramları dayanır. Öz növbəsində regionların sosial-iqtisadi inkişafına dair Dövlət proqramlarının reallaşdırılması respublikanın bölgələrinin hərtərəfli inkişafını təmin edib və hər bir rayonda əldə edilən uğurlarla müşayiət olunub. Təsadüfi deyil ki, məhz bu proqramlar çərçivəsində regionlarda genişmiqyaslı tikinti-quruculuq və abadlıq işləri görülüb. Bu ilin geridə qalan ayları ərzində də bu istiqamətdə işlər davam etdirilib. Bunu ayrı-ayrı rayonların timsalında da görmək olar.

Məsələn, Ağcabədi rayonunda yeni sosial obyektlər tikilir, infrastruktur layihələri həyata keçirilir, çoxmərtəbəli yaşayış binaları və yollar əsaslı təmir olunur. Cari ildə Ağcabədi şəhərinin Üzeyir Hacıbəyli prospekti və Vaqif küçəsində üç ədəd çoxmənzilli yaşayış binası təmir olunub. Hazırda Ağcabədi şəhər 2 nömrəli körpələr evi-uşaq bağçasının, avtovağzal kompleksinin, “ASAN xidmət” mərkəzinin, Salmanbəyli kəndində 432 şagird yerlik, Qaradolaq kəndində 264 şagird yerlik məktəb binalarının, Hüsülü kəndi ərazisində dənli bitki toxumlarının emalı müəssisəsinin, Boyat-Biləyən-Hacılar-Qaraxanlı kəndlərarası avtomobil yolunun tikintisi aparılır. Bu obyektlərdə tikinti işləri tezliklə başa çatdırılacaq.

Bundan başqa, Ağcabədi şəhərinin Heydər Əliyev, Üzeyir Hacıbəyli prospektlərində, Nəriman Nərimanov, Hüsü Hacıyev, Səməd Vurğun və Xəlfərəddin küçələrində də abadlıq işləri davam etdirilir.

Eyni zamanda, Ağcabədi şəhər 2 saylı körpələr evi-uşaq bağçası üçün inşa edilən 100 yerlik yeni binada son tamamlanma işləri aparılır. Tikinti sahəsi 556 kvadratmetr olan ikimərtəbəli bina yataq, oyun, tibb, məşğələ, yemək, geyinib-soyunma, kompüter otaqları, musiqi və idman zalı, mətbəx və anbardan ibarətdir. Bağçanın həyətində abadlıq işləri aparılıb, oyun meydançası, söhbətgahlar tikilib.Uşaq bağçasının bu il istifadəyə verilməsi nəzərdə tutulur.

İmişlidə də bu istiqamətdə işlər davam etdirilir. Verilən məlumata görə, əhalinin mənzil şəraitinin daha da yaxşılaşdırılması məqsədilə şəhərin Abbasqulu bəy Şadlinski küçəsində inşa olunan 48 mənzilli yaşayış binasının tikintisində işlərin 85 faizi başa çatıb. Prezident İlham Əliyevin imzaladığı Sərəncamla ayrılan vəsait hesabına inşa olunan dördmərtəbəli binanın tikintisinə ötən ilin dekabrında başlanılıb. Artıq binada hörgü işləri başa çatıb, dam örtüyü vurulub, qapı-pəncərələr yerləşdirilib, elektrik, qaz, su xətləri çəkilib, suvaq işləri görülüb. Hazırda otaqların döşəməsi vurulur. Bu başa çatdıqdan sonra mənzillərdə kombi quraşdırılacaq, rənglənmə işləri görüləcək. Binanın dayanıqlı elektrik və su ilə təmin olunması üçün transformator qoyulacaq və 100 tonluq su anbarı tikiləcək. Yaxın vaxtlarda ərazidə abadlıq işlərinə başlanılacaq, asfalt döşənəcək, yaşıllıqlar salınacaq. Yaşayış binasının bu ilin sonlarında istifadəyə verilməsi nəzərdə tutulub.

Qax şəhərində isə istismar müddəti başa çatmış 3 ədəd ikimərtəbəli binanın sakinlərinin mənzil-məişət şəraitinin yaxşılaşdırılması məqsədilə ucaldılan 48 mənzilli yaşayış binasının tikintisi davam etdirilir. Bina Prezident İlham Əliyevin ötən il oktyabrın 29-da imzaladığı Sərəncama əsasən tikilir.

İnşasına bu ilin fevralında başlanan 4 blokdan ibarət dördmərtəbəli binada hörgü işləri artıq yekunlaşıb, binanın dam örtüyü quraşdırılıb. İş icraçısı Elman Səfərovun sözlərinə görə, hazırda daxili mühəndis-kommunikasiya və bəzək işləri görülür, binanın fasadına suvaq vurulur. Yardımçı tikililərin, o cümlədən hər biri 108 kubmetrlik iki ədəd yanğın əleyhinə və içməli su anbarının inşası başa çatıb, nasosxana binasının tikintisi isə davam etdirilir. Yaşayış binasının tikintisinin bu il noyabrın sonunadək tam başa çatdırılması nəzərdə tutulur.

Ölkənin Qərb regionunda yerləşən Qazax rayonunun Daş Salahlı kəndində “Mətanət A” şirkəti tərəfindən yaradılan əhəng zavodunun tikintisi başa çatıb. İllik istehsal gücü 50 min ton olan zavodun tikintisi nəzərdə tutulduğu vaxtda yekunlaşıb. Yeni zavod yüksək texnologiya ilə təmin olunub. Zavodun istehsal hissəsi test yoxlamasından keçib və məhsul buraxmağa tam hazırdır.

Tikinti-quruculuq və abadlıq işləri Şamaxıda da uğurla davam etdirilir. Belə ki, Azərbaycan Respublikası Prezidentinin “Şamaxı şəhərində əhalinin mənzil-məişət şəraitinin yaxşılaşdırılmasına dair tədbirlər haqqında” 2018-ci il 27 avqust tarixli Sərəncamı ilə Şamaxı şəhərində istismar müddəti başa çatan 3 ədəd ikimərtəbəli binanın yerinə Aşıq Məmmədağa küçəsində yeni 48 mənzilli ictimai yaşayış binası tikilir. Bu məqsədlə Prezidentin ehtiyat fondundan rayon İcra Hakimiyyətinə 3 milyon manat ayrılıb.

Yeni binanın tikintisinə bu ilin iyununda başlanılıb. Çoxmərtəbəli ictimai binada artıq beşinci mərtəbənin inşası aparılır. Habelə, digər mərtəbələrdə mənzillərarası hörgü işləri görülür.

Şəhər sakinləri KİV-ə açıqlamalarında dövlətimizin başçısının insanlara, onların qayğı və problemlərinə göstərdiyi diqqətə görə razılıqlarını bildirirlər. Şəhərin Aşıq Məmmədağa küçəsində istismar müddəti başa çatan çoxmənzilli binanın sakini Səidə Eldarova tikilən yeni mənzilə görə Prezident İlham Əliyevə minnətdarlığını ifadə edib, dövlət tərəfindən həyata keçirilən sosial proqramların onların yaşayış səviyyəsinin daha da yaxşılaşmasına, gəlirlərinin artmasına kömək etdiyini söyləyib: “Yaşadığımız ictimai binanın istismar müddəti qurtarıb. Seysmik zonada yerləşən Şamaxıda bu cür binalar təhlükəlidir. Prezidentimizə çox-çox minnətdarıq. Artıq bizim üçün yeni çoxmənzilli bina tikilir. İnşallah, yaxın aylarda bina hazır olacaq”.

Qeyd edək ki, yeni binanın ərazisində abadlıq işləri görüləcək, asfalt döşənəcək, yaşıllıqlar salınacaq, uşaq meydançası qurulacaq.

Şimal bölgəsində yerləşən Quba şəhərində istismar müddəti başa çatan çoxmənzilli binaların sakinlərinin mənzil-məişət şəraitini yaxşılaşdırmaq məqsədilə tikilən 48 mənzilli yeni yaşayış binası gələn il sakinlərin istifadəsinə veriləcək.

Prezident İlham Əliyevin “Quba şəhərində əhalinin mənzil-məişət şəraitinin yaxşılaşdırılmasına dair tədbirlər haqqında” Sərəncamı ilə inşa olunan bina 4 mərtəbəlidir. İki girişdən ibarət çoxmənzilli binanın ümumi sahəsi 980 kvadratmetrdir.

Molla Pənah Vaqif küçəsində inşa olunan çoxmənzilli binanın tikintisinə apreldən başlanılıb. Hazırda binanın 3-cü mərtəbəsində dəmir konstruksiyaların quraşdırılması və betonlama işləri aparılır. 48 mənzildən 20-si üç, 16-sı iki, 12-si isə bir otaqlıdır. Mənzillərin hər biri müasir standartlara uyğun istilik və elektrik sistemi ilə təchiz olunacaq və tam təmirli şəkildə əhalinin istifadəsinə veriləcək.

Tikintidə əsasən yerli tikinti materiallarından istifadə olunur. İnşaat işlərində 60-dək rayon sakini işlə təmin edilib. Binanın həyətində müasir qazanxana, avtomobil dayanacağı və sakinlərin istirahəti üçün park yaradılacaq.

Bu məqamda vurğulamaq yerinə düşər ki, tikinti-quruculuq işləri Naxçıvan Muxtar Respublikasında da uğurla davam etdirilir. Məsələn, muxtar respublikada gənc ailələrin mənzil-məişət şəraitinin yaxşılaşdırılması istiqamətində həyata keçirilən tədbirlərin davamı olaraq, Ordubad şəhərində 28 mənzilli, Şahbuz şəhərində isə 40 mənzilli yaşayış binaları inşa edilir.

Ordubad şəhərində tikilən yaşayış binası 8 mərtəbədən ibarət olacaq. Hazırda inşaat işləri davam etdirilir. Binanın zirzəmisində xidmət sahələri yaradılacaq, bərbərxana, gözəllik salonu, dərzi, ərzaq və sənaye malları mağazaları istifadəyə veriləcək. Binanın həyətində də abadlıq işləri görülür.

Ordubad rayonunun Vənənd kəndində də bu ilin əvvəlindən kompleks quruculuq işləri aparılır. Kənddə 3 mərtəbədən ibarət 432 şagird yerlik məktəb binasının qapı və pəncərələri, döşəməsi, elektrik və rabitə xətləri, dam örtüyü yenilənib. Yaşayış məntəqəsində Uşaq Musiqi Məktəbi üçün yeni bina da tikilir. Bina 3 mərtəbədən ibarət olacaq.

Vənənd kəndində inşa olunan Kənd Mərkəzi də yaşayış məntəqəsinin simasına gözəllik qatacaq. Burada icra nümayəndəliyi, bələdiyyə, Yeni Azərbaycan Partiyası Ordubad rayon təşkilatının ərazi ilk təşkilatı, baytarlıq, poçt, mədəniyyət evi, kitabxana, rabitə evi, polis sahə məntəqəsi üçün hər cür şərait yaradılacaq.

Əhaliyə nümunəvi ticarət, məişət və tibb xidmətləri göstərilməsi üçün kənddə müasirtipli xidmət mərkəzi və müasir ambulatoriya da inşa olunur.

Şahbuz şəhərində inşa olunan altımərtəbəli yaşayış binasında isə əsas tikinti işləri yekunlaşıb. Mənzillərdən 20-si üçotaqlı, 20-si isə ikiotaqlıdır. Üçotaqlı mənzillərin ümumi sahəsi 90 və 83, ikiotaqlı mənzillərin ümumi sahəsi isə 63 və 70 kvadratmetr olacaq. Binanın zirzəmisində xidmət mərkəzi, bərbərxana, gözəllik salonu, dərzi, ərzaq və təsərrüfat malları mağazaları yerləşəcək. Dövlət vəsaiti ilə tikilən binalardakı mənzillər gənc ailələrə münasib qiymətə təklif edilir.

Şahbuzdan söz düşmüşkən, cari ilin mart ayından etibarən Şahbuz rayonunun Türkeş kəndində kompleks quruculuq işlərinə başlanılıb. Yaşayış məntəqəsində kənd yolu əsaslı surətdə yenidən qurulur, kənd və xidmət mərkəzləri inşa olunur.

(davamı növbəti sayımızda)

Nadir AZƏRİ

Yeni Azərbaycan.- 2019.- 10 sentyabr.- S.-7.