Regionlarda təhsil ocaqlarının təmir və tikintisi sistemli şəkildə davam etdirilir

Artıq təmiri başa çatmış və yeni inşa edilmiş çox sayda məktəb binası “Bilik günü”ndə şagird və müəllimlərin istifadəsinə veriləcək

(əvvəli ötən sayımızda)

Məktəbin binası tam sökülərək yerində müasir tələblərə cavab verən yeni bina inşa olunur. Hazırda tikinti işləri yüksək sürətlə davam edir. Dörd korpusdan ibarət yeni məktəb binasında 69 sinif otağı olacaq. Təhsil ocağı müasir istilik sistemi ilə təchiz ediləcək və burada fənn kabinetləri, laboratoriyalar, yeməkxana, qapalı idman və akt zalı, kompüter otaqları fəaliyyət göstərəcək. Bir sözlə, məktəbdə şagirdlərin yüksək səviyyədə təhsil almaları üçün hər cür şərait yaradılacaq.

Ölkənin şimal-qərb rayonlarında məktəblərin tikintisi və əsaslı təmiri üzrə işlər müvəffəqiyyətlə davam etdirilir

Cari ildə Tovuz rayonunda məktəblərin tikintisi və əsaslı təmiri sahəsində işlər müvəffəqiyyətlə davam etdirilir. Belə ki, hazırda Alakol kəndində inşa olunan 624 şagird yerlik məktəb binasının tikintisi tamamlanmaq üzrədir, Şamlıq və Güvəndik kəndlərində isə modul tipli məktəb binaları quraşdırılır.

İ.Mürşüdov adına Aşağı Quşçu kənd tam orta məktəbin və Ş.İ.Xətai adına Köhnəqala kənd tam orta məktəb binalarının əsaslı təmir işləri davam edir. Bu məktəblər ötən əsrin 70-80-ci illərində birtipli layihələr əsasında inşa edilib. Uzun müddət əsaslı təmir işləri aparılmadığına görə hər iki bina tədris üçün yararsız vəziyyətdə olub.

Prezident İlham Əliyevin 2019-cu il 29 yanvar tarixli Fərmanı ilə təsdiq edilmiş “Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı”na əsasən bu il Samux rayonunda 2360 şagird yerlik üç məktəb binasının tikintisinə başlanılacaq.

Birinci məktəb binası 960 şagird yerlik olmaqla rayonun İnstitut qəsəbəsində inşa olunacaq. İkinci məktəb binası 800 şagird yerlik olmaqla, Sərkar kənd tam orta məktəbi üçün tikiləcək. Üçüncü məktəb binası isə Çobanabdallı kənd tam orta məktəbi üçün inşa ediləcək. Bu məktəb binası 600 şagird yerlik olacaq.

Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramının tədbirlər planında Qazax rayonu üzrə 11 məktəb binasının əsaslı təmiri nəzərdə tutulub. Həmin məktəblərdən biri də məhz Kosalar kənd tam orta məktəbidir.

Əsas binada, eləcə də təmir müddətində şagirdlərin dərsi üçün nəzərdə tutulan, məktəbin yaxınlığında yerləşən yardımçı binada bütün işlər paralel aparılır.

Birinci mərtəbəsində 8, ikinci mərtəbəsində isə 9 otaq yerləşən ikimərtəbəli yardımçı binanın dam örtüyü vurulub, pəncərələr qoyulub, daxili və xarici fasadda suvaq işləri başa çatıb.

Üçmərtəbəli əsas binanın 2-ci və 3-cü mərtəbələrində suvaq işləri tam yekunlaşıb. Birinci mərtəbədə isə bu iş başa çatmaq üzrədir. Bundan əlavə, məktəbin kənarına hasar çəkilməsi (hörgü və suvaq işləri) demək olar ki, 80 faiz yerinə yetirilib. Eyni zamanda, idman və akt zalları, yeməkxana üçün nəzərdə tutulan binalarda da söküntü və suvaq işlərinə start verilib.

Qazaxda Xalq yazıçısı İsmayıl Şıxlının adını daşıyan 1176 şagird yerlik Kosalar kənd tam orta məktəbinin binası əsaslı təmir olunur. Məktəbdə təmir işləri başa çatdıqdan sonra Xalq yazıçısı İsmayıl Şıxlının 100 illik yubileyi ilə əlaqədar büstü qoyulacaq.

Yeni tədris ilində yeni məktəb binaları istifadəyə veriləcək

Kürdəmir rayonunun Bağman, Öyləqulu və Təklə kəndlərində məktəblər üçün modul tipli yeni binalarda tikinti-quraşdırma işləri başa çatdırılıb.

Hər 3 tədris ocağı Təhsil Nazirliyindən ayrılan vəsait hesabına tikilib. Məktəblərin hər biri 80 şagird yerlikdir. Bağman kəndində tam orta, digər iki kənddə isə ümumi orta məktəblər fəaliyyət göstərəcək. Hazırda təhsil ocaqlarının həyətlərində abadlıq işləri aparılır.

Qeyd edək ki, yeni dərs ilinə hazırlıq çərçivəsində Kürdəmir şəhər 1 nömrəli tam orta məktəbinin binasında da əsaslı təmir işləri aparılıb. Təmir işləri Təhsil Nazirliyinin sifarişi ilə həyata keçirilib.

Biləsuvarda Nizami Gəncəvi adına şəhər 1 saylı tam orta məktəb yeni dərs ilinə tam hazır vəziyyətə gətirilib. Tikinti işləri Prezident İlham Əliyevin ötən ilin sentyabr ayında Biləsuvara tarixi səfərindən sonra imzaladığı Sərəncama əsasən həyata keçirilib.

13 min 400 kvadratmetr ərazidə salınan 4 mərtəbəli tədris müəssisəsi 5 korpusdan ibarətdir. Məktəb binasında 54 sinif otağı, 500 nəfərlik akt zalı, laboratoriyalar, kitabxana, hərbi hazırlıq kabineti, informatika və hesablama texnikası kabineti, 218 yerlik yeməkxana inşa olunub. Tikinti işləri başa çatdıqdan sonra məktəb ərazisində geniş yaşıllıq sahəsi salınacaq.

Tikintidə iş icraçısı Xalid Həsənov görülən işlər barədə məlumat verərək bildirib ki, köhnə bina tədris üçün yararsız olduğundan, Prezident İlham Əliyev rayona səfərindən sonra yeni binanın tikintisi ilə bağlı Sərəncam imzalayıb və müvafiq vəsait ayrılıb. Artıq binada son tamamlama işləri görülür. Hazırda binanın daxilində suvaq işləri aparılır, döşəmə vurulur, elektrik xətləri çəkilir, qapılar quraşdırılır.

Yeni tədris ilində Ağcabədi rayonunda 1096 şagird yerlik iki məktəb binası istifadəyə veriləcək. Salmanbəyli kənd tam orta məktəbi üçün inşa edilən 432 şagird yerlik binada tikinti işləri yekunlaşır. Məktəbdə biologiya, fizika, kimya laboratoriyaları, informatika kabineti, sinif otaqları, əmək təlimi, məktəbəhazırlıq, linqafon və xidməti otaqlar, kitabxana, yeməkxana, bufet, akt və idman zalları yaradılıb, istilik və müşahidə sistemi qurulub. Məktəbin həyətində transformator qoyulub, qazanxana, nasosxana, içməli və çirkab su anbarları inşa edilib.

Qaradolaq kənd 1 nömrəli tam orta məktəbi üçün inşa edilən bina isə 264 şagird yerlikdir. Bu binada da tikinti işləri başa çatır. İkimərtəbəli məktəbdə fizika, kimya laboratoriyaları, sinif otaqları, akt və idman zalları, informatika kabineti, tibb otağı, mətbəx, bufet yerləşir. Məktəb binası istilik sistemi ilə təchiz edilib, həyətində idman meydançası yaradılıb. Hazırda abadlıq işləri aparılır, yaşıllıqlar salınır.

Regionların kəndlərində çox sayda modul tipli məktəb binaları quraşdırılıb

Son illərdə respublikamızda ənənəvi məktəb binalarının inşası ilə yanaşı, modul tipli məktəblərin quraşdırılması da həyata keçirilir. Modul tipli məktəblərin üstünlüyü onların azməsrəfli olması, qısa müddət ərzində istənilən relyefdə quraşdırılması, asan daşınması, sinif otaqlarının sayının şagirdlərin sayına uyğun rahatlıqla azaldılıb-artırılmasıdır. Modul tipli məktəb binalarının tikintisində əsasən yerli istehsal məhsullarında istifadə edilir.

Tərtər rayonunun Kovdadıq və Zolgəran kəndlərində quraşdırılan modul tipli binalar yeni tədris ilində müəllim və şagirdlərin istifadəsinə veriləcək. Məktəblərin tikinti-quraşdırma işləri Prezident İlham Əliyevin “Ağdam, Laçın, Füzuli və Tərtər rayonlarında təhsil infrastrukturunun inkişafı ilə əlaqədar tədbirlər haqqında” 16 fevral 2018-ci il tarixli Sərəncamı ilə ayrılan vəsait hesabına həyata keçirilib. Kovdadıq kənd ibtidai məktəbi üçün quraşdırılan bina 20, Zolgəran kənd ümumi orta məktəbi üçün qurulan bina isə 56 şagird yerlikdir.

Qeyd edək ki, ötən il Tərtər rayonunun Bayandur və Poladlı kəndlərində də modul tipli məktəblər quraşdırılıb.

Balakən rayonunun Gərəkli kəndində tam orta məktəb üçün Təhsil Nazirliyi tərəfindən tezliklə 260 şagird yerlik yeni binanın tikintisinə başlanılacaq. Məktəbin tikintisi məqsədilə müvafiq torpaq sahəsi ayrılıb, layihə-smeta sənədləri hazırlanır. Qəzalı vəziyyətdə olan köhnə məktəb binasında artıq söküntü işlərinə də başlanılıb. Bu barədə Balakən Rayon İcra Hakimiyyətindən məlumat verilib.

Bildirilib ki, yeni bina inşa edilənədək şagirdlər məktəbin əlavə tədris korpusunda dərs keçəcəklər. Təhsil müəssisələrinin maddi-texniki bazasının möhkəmləndirilməsi məqsədilə son illər Balakən rayonunda da davamlı tədbirlər həyata keçirilir. Belə ki, ötən dövrdə rayonda 32 yeni məktəb binası tikilib istifadəyə verilib, 3 məktəb əsaslı təmir olunub. Bundan əlavə, kəndlərdə 2 modul tipli məktəb binası da quraşdırılıb.

Bəzi məktəblərin tikintisinin ilin sonuna qədər başa çatdırılması nəzərdə tutulur

Salyanda Ərəbqardaşbəyli kənd tam orta məktəbi üçün ikimərtəbəli yeni bina inşa olunur. 180 şagird yerlik binanın tikintisinə bu ilin iyun ayında başlanılıb. Qısa vaxt ərzində binanın birinci mərtəbəsində hörgü işləri başa çatıb, pəncərələr quraşdırılıb. Hazırda ikinci mərtəbədə işlər davam etdirilir. Yeni inşa olunan təhsil ocağında tədrisin yüksək səviyyədə təşkili üçün hər cür şərait yaradılacaq. Binada sinif otaqları ilə yanaşı laboratoriya, tibb və kompüter otaqları, yeməkxana, idman və akt zalları və fənn kabinetləri olacaq. Təhsil ocağı müasir istilik sistemi, yeni inventar və texniki vasitələrlə təchiz ediləcək. Binanın tikintisinin bu ilin oktyabr ayının sonunadək başa çatdırılması nəzərdə tutulur.

Təhsil Nazirliyinin sifarişi ilə Saatlıda Orta Muğan kənd tam orta məktəbi üçün ikimərtəbəli yeni məktəb binası inşa olunur. 432 şagird yerlik binanın tikintisinə bu ilin əvvəlində başlanılıb. Artıq binanın birinci mərtəbəsində hörgü işləri başa çatıb. Hazırda ikinci mərtəbədə işlər davam etdirilir. Müasir arxitektura üslubunda inşa olunan təhsil ocağında tədrisin yüksək səviyyədə təşkili üçün hər cür şərait yaradılacaq. Binada 21 sinif otağı, 3 laboratoriya, hərbi, tibb və kompüter otaqları, idman və akt zalları və fənn kabinetləri olacaq. Təhsil ocağı müasir istilik sistemi, yeni inventar və texniki vasitələrlə təchiz ediləcək. Binanın tikintisinin bu ilin sonunadək başa çatdırılması nəzərdə tutulur.

Ağdam rayonu Birinci Yüzbaşılı kənd tam orta məktəbi üçün 132 şagird yerlik yeni binanın inşası yekunlaşmaq üzrədir. Tikinti işləri Prezident İlham Əliyevin “Ağdam rayonunun Birinci Yüzbaşılı kəndində yeni ümumtəhsil məktəbi binasının tikintisi haqqında” 2018-ci il 5 noyabr tarixli Sərəncamına əsasən aparılır.

Nadir AZƏRİ

Yeni Azərbaycan.- 2019.- 14 sentyabr.- S.7.