Kamal Kurnaz: Azərbaycan-Türkiyə qardaşlığı gələcək nəsillər üçün örnəkdir

Türkiyə-Azərbaycan müttəfiqliyi böyük bir coğrafiyaya sülh, əmin-amanlıq, inkişaf və tərəqqi vəd edir. Bunun real göstəriciləri hazırda uğurla fəaliyyət göstərən beynəlxalq layihələrdir. Azərbaycan Türkiyə xalqının qəlbinin bir parçasıdır. Canımız və malımızla bundan sonra da Azərbaycanın yanında olacağıq.

Bu fikirləri AZƏRTAC-a açıqlamasında Avrasiya İqtisadi Əlaqələr Dərnəyi (EkoAvrasya) sədrinin birinci müavini Kamal Kurnaz ifadə edib.

Ermənistan ordusunun iyulun 12-dən başlayaraq Azərbaycanın Tovuz rayonu istiqamətindən hücuma keçməsini dünyanın gözü qarşısında törədilən vandalizm aktı kimi dəyərləndirən Kamal Kurnaz deyib: “Ermənistanın Dağlıq Qarabağ daxil olmaqla Azərbaycan ərazisinin iyirmi faizini işğal altında saxlaması bütün türk dünyasının iradəsinə, həmçinin beynəlxalq hüquqa ziddir. Tarixin bütün dövrlərində fərqli güclərin əlində alət olan ermənilər anlamalıdırlar ki, müstəqil dövlət olan Azərbaycanın Silahlı Qüvvələri bölgədə ən güclüdür. Tovuz hadisələrindən sonra baş verənlər bütün dünyaya göstərdi ki, Azərbaycan xalqı heç vaxt bir qarış torpağını da yağıya güzəştə getməyəcək. Bu mübarizədə bütün Türkiyə Azərbaycanın yanındadır”.

Azərbaycan ilə Türkiyənin quru qoşunları və hərbi hava qüvvələrinin respublikamızda keçirilən növbəti genişmiqyaslı təlimlərini bütün dünya üçün sülh və inkişaf mesajı kimi dəyərləndirən Kamal Kurnaz deyib ki, iki qardaş ölkənin bütün sahələrdə yüksək nəticə verən əməkdaşlığı bu günümüz və gələcəyimiz üçün böyük əhəmiyyət kəsb edir. Nazir Hulusi Akarın rəhbərliyi ilə Türkiyənin ali hərbi heyətinin Azərbaycanda yüksək qonaqpərvərliklə qarşılanması, onların hərbi təlimləri izləməsi bir daha göstərir ki, Azərbaycan-Türkiyə qardaşlığı əbədidir. İki qardaş ölkənin hazırkı münasibətləri gələcək nəsillər üçün örnəkdir.

Yeni Azərbaycan.- 2020.- 18 avqust.- S.5.