Milli Məclisin növbəti iclası keçirilib

Sahibə Qafarova: Avropa İttifaqı ilə əməkdaşlıq Azərbaycanın xarici siyasətinin əsas prioritetlərindən biridir

İyunun 19-da Milli Məclisin növbəti iclası keçirilib. İclası açan parlamentin Sədri Sahibə Qafarova iyunun 18-də Şərq Tərəfdaşlığı ölkələrinin videokonfrans formatında keçirilmiş Sammitindən danışıb. O, Avropa İttifaqı ilə əməkdaşlığın Azərbaycanın xarici siyasətinin əsas prioritetlərindən biri olduğunu vurğulayıb. Spiker bildirib ki, Azərbaycan ilə Avropa İttifaqının 9 üzv ölkəsi arasında strateji tərəfdaşlıq haqqında sənəd imzalanıb. “Prezident İlham Əliyev sammitdə vurğuladı ki, biz Avropa İttifaqı ilə yeni tərəfdaşlıq sazişinə dair danışıqların yekun mərhələsindəyik, mətnin 90 faizi artıq razılaşdırılıb. Ona görə də belə bir mərhələdə sammitin keçirilməsi Avropa İttifaqı ilə Azərbaycan arasında münasibətlərin gələcək inkişafı baxımından çox əhəmiyyətlidir”, - deyə Sahibə Qafarova qeyd edib.

Spiker Azərbaycan Prezidentinin sammitdə növbəti dəfə işğalçı Ermənistanın baş nazirini ifşa etdiyini vurğulayıb. O əlavə edib ki, dövlətimizin başçısı Ermənistan-Azərbaycan Dağlıq Qarabağ münaqişəsinin həlli barədə ölkəmizin qəti və ədalətli mövqeyini bir daha beynəlxalq ictimaiyyətə çatdırdı. Prezident Ermənistan hakimiyyətinin danışıqları pozmaq cəhdlərini açıq şəkildə ifşa edərək dedi ki, Ermənistan beynəlxalq təşkilatlar tərəfindən münaqişəyə dair qəbul edilmiş müvafiq sənədlərə əməl etmir və işğal olunmuş ərazilərdə qeyri-qanuni məskunlaşma siyasəti həyata keçirir. Ermənistan danışıqların mahiyyətini və formatını məhv etməyə çalışır. Prezident İlham Əliyevin səsləndirdiyi təkzibedilməz faktlar və dəlillər qarşısında Ermənistanın baş naziri yenə də beynəlxalq ictimaiyyətin gözü önündə aciz vəziyyətə düşdü. Dövlətimizin başçısının irqçilik və terrorizmlə bağlı məsələlər ətrafında müzakirə gedəndə “ona sakit oturmağı tövsiyə edərdim”, - deməsi həm də Ermənistanın işğalçılıq siyasətinin, terrorizmi dəstəkləməsinin ifşası oldu. Nikol Paşinyan isə daha bir beynəlxalq səviyyəli tədbirdə Azərbaycan Prezidentinin tarixi həqiqətə əsaslanan faktları qarşısında heç bir cavab verə bilmədi. Bunu işğalçı dövlətin aldığı növbəti diplomatik zərbə kimi dəyərləndirmək olar.

Milli Məclisin Sədri bildirib ki, hələ ötən ilin oktyabr ayında Soçi şəhərində “Valday” Diskussiya Klubunun toplantısında, daha sonra Aşqabad şəhərində MDB Dövlət Başçıları Şurasının iclasında, bu ilin fevral ayında isə Münxen Təhlükəsizlik Konfransı çərçivəsində keçirilən müzakirələrdə dövlətimizin başçısı öz zəngin biliyi və cəsarəti ilə işğalçı ölkəni ifşa etmişdi. Azərbaycan Prezidenti bir daha sübut etdi ki, ölkəmizin maraqlarını, ədalətli mövqeyini bütün platformalarda ən yüksək səviyyədə və cəsarətlə müdafiə edir. Bu, Milli Məclisin deputatları olaraq hər birimiz üçün bir örnəkdir.

Sonra parlamentin Sədri Sahibə Qafarova iclasın gündəliyi barədə məlumat verib. O, gündəliyə 17 məsələnin daxil edildiyini deyib. Gündəlik təsdiq olunduqdan sonra deputatlar cari məsələlərdən danışıblar.

Mili Məclisin deputatı Arzu Nağıyev parlamentin beynəlxalq fəaliyyətinin əhəmiyyətindən danışıb.

Milli Məclisin deputatı Soltan Məmmədov isə Azərbaycanın Ermənistan tərəfindən işğal edilmiş Dağlıq Qarabağ bölgəsində çəkilmiş və Kann Festivalına təqdim olunmuş Nora Martirosyanın “Külək sakitləşərsə” (Si le vent tombe) filmi ilə bağlı Azərbaycan ictimaiyyətinin etirazını diqqətə çatdırıb. Soltan Məmmədov işğal olunmuş Azərbaycan torpaqlarında çəkilmiş bu filmin münaqişənin bütün tarixini, səbəblərini və məğzini təhrif etmək məqsədinə xidmət etdiyini bildirib. O, həmin filmin ərsəyə gəlməsində Fransa şirkətinin də iştirakını, eyni zamanda, Kann festivalına təqdim olunmasını təəssüf hissi ilə qeyd edib: “İlk növbədə, onu vurğulamaq istərdim ki, bu və buna bənzər təşəbbüslər sürətlə inkişaf edən Azərbaycan-Fransa münasibətlərinin bugünkü ruhuna, xalqlarımız arasındakı dostluq əlaqələrinə, habelə ATƏT-in Minsk qrupunun həmsədri olan Fransanın vasitəçilik missiyasının məqsədinə adekvat deyil. Xüsusilə ona görə ki, hər iki ölkə iqtisadi, siyasi, humanitar və mədəni sahələrdə qarşılıqlı faydalı münasibətlərin inkişafına böyük önəm verir. Azərbaycan Respublikasının Fransa Respublikasındakı səfirliyi də Fransanın müvafiq qurumlarına məsələ ilə bağlı öz etirazını bildirib. Qeyd etmək istərdim ki, Fransanın iki regionu tərəfindən filmin çəkilişinə maliyyə və maddi-texniki yardım göstərilib. Eyni zamanda, Kann festivalının sponsor tərəfdaşı olan Provence Alpes Cote d’Azur regionu da filmin istehsalına dəstək verib. Bu cür fəaliyyətlər Fransa qanunvericiliyi ilə tənzimlənən ərazi vahidlərinin beynəlxalq əməkdaşlıqda davranış və nəzarət qaydaları üzrə hüquqi çərçivədə müəyyən edilmiş prinsiplərə ziddir.

Azərbaycan-Fransa parlamentlərarası əlaqələr üzrə işçi qrupun rəhbəri kimi Fransanın Azərbaycandakı səfirliyinə müraciət edərək bu məsələ ilə bağlı mövqeyini ifadə etməyə dəvət edirəm. Səfirlikdən bu cür addımların Azərbaycan və Fransa xalqları arasında dostluq münasibətlərinin ruhuna zidd olduğu, münaqişə tərəfləri arasında qarşılıqlı etimada xidmət etmədiyi, tarixi həqiqətləri yanlış təqdim etdiyi barədə fikirlərimizi bölüşəcəyini gözləyirəm və əminəm ki, səfirlik səslənən fikirləri anlayışla qarşılayacaq. Fürsətdən istifadə edərək deputat həmkarlarıma, Azərbaycan kino sənayesi işçilərinə, incəsənət adamlarına, kütləvi informasiya vasitələrinə müraciət edərək bu cür hallara kəskin etirazını bildirməyə çağırıram. Qəti şəkildə inanıram ki, Ermənistan-Azərbaycan Dağlıq Qarabağ münaqişəsi və bu qəbildən olan digər mübahisəli mövzulara həsr olunmuş belə filmlər tarixi faktların təhrif olunmasına və beləliklə də ziddiyyətlərin dərinləşməsinə deyil, əksinə, sülh və qarşılıqlı etimad atmosferinin yaradılması məqsədinə xidmət etməlidir”.

“Türkiyə Böyük Millət Məclisinin Xarici əlaqələr komissiyasının sədri Volkan Bozkır Birləşmiş Millətlər Təşkilatı (BMT) Baş Assambleyasının 75-ci sessiyasının sədri seçilib. Bu, tarixdə ilk dəfə olaraq, Türkiyə nümayəndə heyətinin həmin posta seçilməsidir”. Bu fikirləri isə Milli Məclisin Müdafiə, təhlükəsizlik və korrupsiya ilə mübarizə komitəsinin sədri Ziyafət Əsgərov deyib. Komitə sədri bu münasibətlə V.Bozkırı təbrik edib. Milli Məclisin Sədri Sahibə Qafarova da təbrikə qoşularaq qeyd edib ki, V.Bozkır Türkiyə xalqının ləyaqətli oğludur.

Vitse-spiker Adil Əlyev isə vətənpərvərlik duyğularından uzaqlaşmış bəzi şəxslərin sosial şəbəkələrdə, KİV-lərdə şəhidlərimizlə bağlı xoşagəlməz ifadələr işlətmələrindən narahatlığını ifadə edib. O bildirib ki, ölkə başçısının və Birinci vitse-prezidentin şəhid ailələrinə daim qayğısı var: “Şəhidlərimiz, qazilərimiz insan üçün ən uca nemət olan canlarında üçrəngli bayrağın daim dalğalanması üçün keçiblər. Cinayət Məcəlləsində təhqir edilən şəxslərlə bağlı xüsusi maddə var. Qeyd olunan proses isə kifayət qədər ağrılıdır. Bununla o ailəyə ikiqat əziyyət olur. Təklif edirəm ki, Cinayət Məcəlləsinə şəhid olmuş şəxslərin şərəf və ləyaqətinin qorunması ilə bağlı xüsusi maddə əlavə edilsin”.

Cari məsələlərlə bağlı, həmçinin parlamentin İnsan hüquqları komitəsinin sədri Zahid Oruc, millət vəkilləri Kamran Bayramov, Fazil Mustafa, Əli Məsimli, Nizami Cəfərov, Müşfiq Cəfərov və Fəzail Ağamalı çıxış edərək müxtəlif məsələlərlə bağlı fikir və təkliflərini bildiriblər.

Sonra gündəliyə daxil olan məsələlər müzakirə edilib.

Milli Məclisin İqtisadi siyasət, sənaye və sahibkarliq komitəsinin sədri Tahir Mirkişili “Azərbaycan Respublikasının 2019-cu il dövlət büdcəsinin icrası haqqında” qanun layihəsini üçüncü oxunuşda təqdim edib. Komitə sədri layihənin birinci və ikinci oxunuşlarda müzakirəsi zamanı 34 deputatın çıxış etdiyini, qeyd və təkliflərini verdiyini, bir sıra məsələlərə Maliyyə naziri Samir Şərifovun aydınlıq gətirdiyini xatırladıb. O qeyd edib ki, 2019-cu il Azərbaycanda ən sürətli, əhatəli islahatlar ili kimi yadda qalıb. Həyata keçirilən iqtisadi islahatlar sürətli və inklüziv iqtisadi inkişafla nəticələnib. Vurğulanıb ki, ötən ilin dövlət büdcəsi Azərbaycan Prezidenti İlham Əliyevin müəyyənləşdirdiyi strateji inkişaf prioritetləri və sosial-iqtisadi siyasət istiqamətləri ilə uzlaşdırılaraq qlobal iqtisadiyyatda gedən proseslərin icmal və dövlət büdcələrinin əsas parametrlərinə ehtimal olunan təsirləri nəzərə alınmaqla icra edilib. Bütün sosial proqramlar və xüsusilə də iki böyük sosial paket icra edilib, nəzərdə tutulan hədəflərə nail olunub.

İclasda iştirak edən Maliyyə naziri Samir Şərifov deputatları maraqlandıran bir sıra məqamlara aydınlıq gətirib.

Qanun layihəsi üçüncü oxunuşda səsə qoyularaq qəbul edilib.

Hüquq siyasəti və dövlət quruculuğu komitəsinin üzvü Əminə Ağazadə “Məhkəmə-Hüquq Şurası haqqında” Qanunda dəyişiklik edilməsi barədə sənədlə (üçüncü oxunuş) bağlı məlumat verib. O, layihə barədə birinci və ikinci oxunuşlarda ətraflı məlumat verildiyini qeyd edib. Bu dəyişikliyin ədalət mühakiməsinin keyfiyyətinin və səmərəliliyinin artırılması sahəsində görülən tədbirlər çərçivəsində məhkəmələrin fəaliyyətinin monitorinq sisteminin təkmilləşdirilməsi məqsədini daşıdığı diqqətə çatdırılıb. Layihə səsə qoyularaq təsdiqlənib.

Milli Məclis Sədrinin birinci müavini, Hüquq siyasəti və dövlət quruculuğu komitəsinin sədri Əli Hüseynli “Mediasiya haqqında” Qanunda dəyişiklik edilməsi barədə məlumat verib. Bildirib ki, qanunun bir neçə maddəsinə əsasən sənədin qüvvəyə minmə tarixi dəyişdirilir. 2020-ci il 1 iyul tarixindən etibarən iqtisadi, ailə və əmək münasibətlərindən irəli gələn mübahisələr üzrə məhkəməyə müraciət etməzdən öncə ilkin mediasiya sessiyasında iştirak etmək nəzərdə tutulmuşdur. Ölkədə koronavirus pandemiyası ilə bağlı xüsusi karantin rejimi tətbiq edildiyindən “Mediasiya haqqında” Qanunun ilkin mediasiya sessiyalarında məcburi iştirakı nəzərdə tutulan müddəalarının qüvvəyə minmə tarixinin 2021-ci il 1 yanvar tarixinədək təxirə salınması məqsədəuyğun hesab edilir. Sənəd səsə qoyularaq qəbul olunub.

İnzibati Xətalar Məcəlləsinə və “Yol hərəkəti haqqında” Qanuna təklif edilən dəyişikliklə bağlı Hüquq siyasəti və dövlət quruculuğu komitəsinin üzvü Bəhruz Məhərrəmov məlumat verib. O deyib ki, sənədlərdə “dərman qutuları” sözlərinin “ilk tibbi yardım qutusu” sözləri ilə əvəz edilməsi təklif olunur. Belə ki, əksər xarici dövlətlərin də təcrübəsi nəzərə alınaraq ilkin tibbi yardım zamanı zərərçəkənlərə ixtisasca həkim olmayan şəxslər tərəfindən hər hansı dərman vasitələrinin verilməsi məqbul hesab edilmədiyinə və dərman vasitəsinin avtomobildə saxlanması şəraitinin (temperatur, rütubətlik və sairə amillər baxımdan) onun keyfiyyətinin pozulmasına səbəb ola biləcəyinə görə nəqliyyat vasitələrində (avtobusda, minik və yük avtomobillərində, təkərli traktorda) dərman vasitələrinin saxlanılması məqsədəmüvafiq hesab olunmur. Bunu nəzərə alaraq ilk tibbi yardım qutusunda yol-nəqliyyat hadisələri zamanı ilkin tibbi yardım göstərilməsinə kifayət edə biləcək qədər və çeşiddə tibbi ləvazimatlar və dərman vasitələri nəzərdə tutulmalıdır. Sənəd səsə qoyularaq qəbul olunub.

“Bələdiyyələrin fəaliyyətinə inzibati nəzarət haqqında” (birinci oxunuş) Qanunda dəyişiklik edilməsinə dair məlumatı Regional məsələlər komitəsinin üzvü Kamran Bayramov təqdim edib. O bildirib ki, təklif olunan dəyişikliklər bələdiyyələrin fəaliyyətinə inzibati nəzarəti həyata keçirən orqan tərəfindən bələdiyyələrin yol verdiyi pozuntularla yanaşı, onları yaradan səbəb və şəraitin aradan qaldırılmasını, bələdiyyə aktlarına 15 iş günü müddətində baxılmasını, inzibati nəzarət icraatı zamanı dövlət orqanları və qurumlarına sorğuların göndərilməsini və məlumatların alınmasını, habelə bələdiyyələrin fəaliyyətinə inzibati nəzarəti həyata keçirən orqanın apardığı araşdırma zamanı bələdiyyələrin vəzifəli şəxslərindən, bələdiyyə qulluqçularından yazılı məlumatlar və arayışlar almaq hüququnun verilməsini nəzərdə tutur. Bu dəyişikliklər orqanın fəaliyyətinin təkmilləşdirilməsi, inzibati nəzarət icraatının daha səmərəli, dolğun və hərtərəfli şəkildə həyata keçirilməsi üçün şərait yaradacaq. Qanun layihəsi səsə qoyularaq təsdiq edilib.

“Azərbaycan Respublikasının 1996-cı il 17 may tarixli 74-IQ nömrəli Qanunu ilə təsdiq edilmiş “Azərbaycan Respublikası Milli Məclisinin Daxili Nizamnaməsi”ndə dəyişiklik edilməsi barədə məlumat verən Əli Hüseynli deyib ki, dəyişiklik qanunvericiliyin təkmilləşdirilməsi məqsədilə aparılıb. Bələdiyyələrin fəaliyyətinə nəzarəti həyata keçirən qurum ilin yekunu üzrə öz fəaliyyəti barədə hesabatı parlamentə təqdim edəcək. Sənəd səsvermə yolu ilə qəbil olunub.

Sonra Kamran Bayramov bildirib ki, “Bələdiyyələrin statusu haqqında” və “Bələdiyyə torpaqlarının idarə edilməsi haqqında” qanunlara təklif olunan dəyişikliklər bələdiyyələr tərəfindən qəbul edilən qərarların surətlərinin bələdiyyələrin fəaliyyətinə inzibati nəzarəti həyata keçirən orqana göndərilməsi müddətinin 15 gün müddətindən 5 iş günü müddətinə qədər azaldılmasını nəzərdə tutur. Bu dəyişikliklərə əsasən bələdiyyə qərarlarına bələdiyyələrin fəaliyyətinə inzibati nəzarəti həyata keçirən orqan tərəfindən baxılması prosesinin operativliyi və səmərəsi artacaq.

Müzakirələr zamanı çıxış edən Milli Məclisin deputatı Cavanşir Paşazadə bildirib ki, bələdiyyə torpaqları çox ucuz qiymətə 100,200 bəzən isə 1000 hektarlarla fermerlərə verilir. Depuatat qeyd edib ki, vaxtı ilə kənd fonduna daxil olan yəni sovxoz və kolxoz torpaqları var idi: “Bu gün artıq kənd fonduna daxil olan torpaqlar yoxdur. Sovxoz və kolxoz torpaqları pay torpaqlarına bölündü. Qalan hissəsi isə bələdiyyə torpaqlarının tabeliyinə verildi. Hesab edirəm ki, bələdiyyə torpaqları ilk öncə yerli sakinlərə təklif edilməlidir. Yerli sakinlər o torpaqları istəməsə digər insanlara təklif edilsin. Bələdiyyə torpaqları çox ucuz qiymətə 100, 200 bəzən isə 1000 hektarlarla fermerlərə verilir. O fermerlərdə torpaqlardan bəzən heç təyinatı üzrə istifadə də etmir. Hətta onların arasında Azərbaycanda yaşamayanlar da var. Araşdırma aparılsa görərik ki, o insanların ölkə ərazisinin bir neçə yerində bu cür torpaqları var. Onlar kənd camaatını qeyri-qanuni yolla, muzdla işlədirlər. Mən təklif edirəm ki, qanunda dəyişiklik edilsin və hər 40-50 ilə verilən torpaqlardan istifadə edərkən fermerlər hər 1 və ya 2 hektara insanları qanuni şəkildə işə götürüb, gələcəkdə onları pensiya ilə təmin etsinlər. Çünki o torpaqlarda işləyənlərin çoxusu kimsəsiz və imkanı olmayan qadınlardır. Biz bu yolla həmin qadınların gələcəyini də təmin etmiş olarıq. Bilirsiniz ki, bu gün fermerlərə dövlət tərəfindən güzəştlər edilir. Buna görə də fermerlər də çalışdırdıqları insanların sosial rifahını yaxşılaşdırmağa çalışmalı və onların qayğısına qalmalıdırlar. Düşünürəm ki, bu addımla biz həm cənab Prezidentin ölkə ərazisində işsizliyin azadılması ilə bağlı atdığı addımlara dəstək vermiş olarıq, həm də bu yolla insanların şəhərlərə axının qarşısı alarıq”.

Müzakirələrdən sonra qanun layihələri ayrı-ayrılıqda səsə qoyularaq təsdiqlənib.

Sonra İqtisadi siyasət, sənaye və sahibkarlıq komitəsinin üzvü Aydın Hüseynov “Dövlət rüsumu haqqında”, “Dövlət qulluğu haqqında”, “Peşə təhsili haqqında”, “Ümumi təhsil haqqında”, “Məktəbəqədər təhsil haqqında” qanunlarda dəyişikliklər edilməsi barədə sənədlərin təqdimatı zamanı qeyd edib ki, qanun layihələri “Təhsil haqqında”, “Lisenziyalar və icazələr haqqında” qanunlarda dəyişiklik edilməsi haqqında 2020-ci il 24 aprel tarixli 58-VIQD nömrəli qanunun icrası ilə əlaqədar hazırlanıb. Sənəd səsə qoyularaq təsdiq olunub.

“İcra məmurları haqqında” Qanunda dəyişiklik edilməsi barədə (birinci oxunuş) sənədi Əli Hüseynli təqdim edib. O diqqətə çatdırıb ki, 2017-ci il fevralın 10-da Ədliyyə Nazirliyinin tərkibində Probasiya Xidməti yaradılıb və bu xidmətin vəzifəsi cəmiyyətdən təcridetmə ilə əlaqədar olmayan cəzaların icrasına nəzarəti təşkil etməkdir. Bu məqsədlə cərimə və islah işləri növlərində cəzaların, habelə hüquqi şəxslərə tətbiq edilən cərimə növündə cinayət-hüquqi tədbirlərin icrası ilə əlaqədar daxil olan vəsaitin 43 faizinin Ədliyyə Nazirliyinin hesabına köçürülməsi təklif olunur. Müvafiq dəyişiklik xidmət əməkdaşlarının maddi və sosial müdafiəsinin gücləndirilməsi, habelə xidmətin maddi-texniki təminatının yaxşılaşdırılması üçün nəzərdə tutulub. Qanun layihəsi səsə qoyularaq qəbul edilib.

İnzibati Xətalar Məcəlləsinə təklif olunan dəyişikliklər barədə isə Hüquq siyasəti və dövlət quruculuğu komitəsinin üzvü Kamal Cəfərov məlumat verib. Bildirib ki, təklif olunan dəyişikliklər “Telekommunikasiya haqqında” Qanuna əsasən telekommunikasiya operatorları və provayderlər tərəfindən hüquq-mühafizə orqanlarının sorğularına cavabların gecikdirilməsinə və tələb olunan məlumatların təqdim edilməməsinə görə tətbiq ediləcək cərimələrin məbləğini və inzibati məsuliyyət növlərini özündə ehtiva edir.

Cəzaların İcrası, Cinayət və İnzibati Xətalar məcəllələrinə edilən dəyişiklikləri şərh edən Kamal Cəfərov deyib ki, dəyişikliklər Prezident İlham Əliyevin penitensiar sahədə fəaliyyətin təkmilləşdirilməsi, cəza siyasətinin humanistləşdirilməsi, cəmiyyətdən təcrid etmədən alternativ cəzaların tətbiqinin genişləndirilməsi ilə bağlı 2017-ci il 10 fevral tarixli Sərəncamının icrası və Ədliyyə Nazirliyinin Probasiya xidmətinin daha geniş tətbiqi məqsədilə aparılıb. Belə ki, barəsində ictimai cəza və inzibati tənbeh qərarı çıxarılmış şəxslər də elektron nəzarət vasitəsi gəzdirəcək. Məhkəmə tərəfindən ictimai işlərə məhkum edilmiş şəxslərin üzərinə ictimai işlərin yerinə yetirildiyi yerlərdə elektron nəzarət vasitəsini gəzdirmək və həmin vasitənin işlək vəziyyətdə saxlanılması üçün ona xidmət etmək vəzifəsi qoyulur. Sənədlər ayrı-ayrılıqda səsə qoyularaq təsdiqlənib.

Daha sonra Tahir Mirkişili “Telekommunikasiya haqqında” Qanunda dəyişiklik edilməsi barədə sənədi (birinci oxunuş) təqdim edərək bildirib ki, qanunda “az” ölkə kodlu, yüksək səviyyəli domen adlarının tənzimlənməsinə dair müddəalar nəzərdə tutulub. Sənədə “az” ölkə kodlu yüksək səviyyəli domen zonasında onların qeydiyyatı və texniki xidmət üzrə ödənişin hüquqi əsasının yaradılması, həmin ödənişin məbləğinin razılaşdırılacağı qurumun müəyyənləşdirilməsi ilə bağlı maddə əlavə edilib. Qanun layihəsi səsə qoyularaq qəbul edilib.

İqtisadi siyasət, sənaye və sahibkarlıq komitəsinin üzvü Anar Məmmədov “Dövlət rüsumu haqqında” Qanunda dəyişiklik edilməsi barədə qanun layihəsi haqqında (ikinci oxunuş) məlumat verib. Bildirib ki, sənədə təklif olunan dəyişikliklər “Əhalinin sağlamlığının qorunması haqqında” Qanunda dəyişiklik edilməsi barədə” 27 iyun 2019-cu il tarixli qanuna uyğunlaşdırma məqsədi daşıyır. Layihə tibb müəssisələrinin akkreditasiyasının keçirilməsi qaydalarını və buna görə tutulan dövlət rüsumunun dərəcələrini müəyyən edəcək. Qanun layihəsi səsə qoyularaq təsdiqlənib.

Nardar BAYRAMLI

Yeni Azərbaycan. - 2020.-20 iyun.- S.3.