Bu ilin ilk aylarında da regionlarda tikinti, abadlıq və quruculuq işləri davam etdirilib

Regionların sosial-iqtisadi inkişafı ilə bağlı qəbul edilmiş Dövlət Proqramı çərçivəsində bölgələrdə infrastruktur layihələri uğurla reallaşdırılır

Məlum olduğu kimi, əsası Ulu Öndər Heydər Əliyev tərəfindən qoyulan və Prezident İlham Əliyevin rəhbərliyi ilə davam etdirilən sosial-iqtisadi siyasət respublikamızın hərtərəfli inkişafını təmin edib. Təbii ki, ölkəmizdə xüsusilə son on altı ildə bütün sahələrdə əldə edilən uğurlarda 2004-cü ildən etibarən reallaşdırılan regionların sosial-iqtisadi inkişafına dair müvafiq Dövlət proqramlarının xüsusi payı var. Çünki indiyə qədər üçünün icrasının tamamlandığı, dördüncüsünün icrasının isə davam etdiyi bu Dövlət proqramları çərçivəsində görülən işlər, həyata keçirilən genişmiqyaslı layihələr ölkəmizin bütün regionlarının ümumi inkişaf dinamikasını təmin edib. Onu da vurğulamaq yerinə düşər ki, sözügedən Dövlət proqramları çərçivəsində regionlarda reallaşdırılan ən vacib işlərdən biri də müxtəlif sahələr üzrə müasir infrastrukturun yaradılması, infrastruktur layihələrinin icra edilməsidir. Məhz bu məqsədlə hazırda da bir sıra bölgələrdə tikinti-quruculuq və abadlıq işləri uğurla davam etməkdədir.

Həmin işlərə keçməzdən öncə bildirək ki, bu məsələyə Prezident İlham Əliyevin yanında keçirilən 2019-cu ilin yekunlarına həsr olunmuş müşavirədə də geniş toxunulub. Dövlət başçısı müşavirədəki çıxışında “İnfrastruktur layihələrinə gəldikdə, demək olar ki, əsas infrastruktur layihələri Azərbaycanda icra edilib. Düzdür, növbəti illərdə bu layihələrin icrasına ehtiyac var. Çünki bir daha qeyd etmək istəyirəm, əhalinin artımı bunu diktə edir. O ölkələrdəki əhali artmır, orada yeni infrastruktur layihələrinə də ehtiyac qalmır. Amma bizdə əhali artır, ona görə yeni məktəblər, uşaq bağçaları, xəstəxanalar, yol infrastrukturu, kommunikasiyalar - bütün bunlar daim diqqət tələb edir. Ona görə birinci vəzifə budur. İkinci vəzifə ondan ibarətdir ki, investisiya proqramımız infrastruktur layihələrinin icrası ilə paralel olaraq iqtisadiyyatın real sektoruna dəstək verməlidir. O cümlədən bu infrastruktur layihələrinin real sektora olan təsiri də bir növ təhlil edilməli və mənə məlumat təqdim edilməlidir”, - deyə bildirib.

Beləliklə, yuxarıda da vurğulandığı kimi, bu günə kimi üçünün icrası başa çatan, dördüncüsüsün icrası isə davam edən regionların sosial-iqtisadi inkişafına dair Dövlət proqramları çərçivəsində görülən işlər, reallaşdırılan müvafiq layihələr respublikanın bölgələrinin hərtərəfli inkişafını təmin edib və hər bir rayonda əldə edilən uğurlarla müşayiət olunub. Təsadüfi deyil ki, məhz bu proqramlar çərçivəsində regionlarda eyni zamanda, genişmiqyaslı tikinti-quruculuq işləri görülüb və hazırda da bu istiqamətdə işlər davam etdirilir.

Məsələn, son illər Salyan rayonunda təhsil, səhiyyə, mədəniyyət, məktəbəqədər tərbiyə və digər müəssisələrin tikintisi və təmiri ilə bağlı mühüm işlər görülüb, onların maddi-texniki bazası gücləndirilib. Rayon memarlıq və tikinti şöbəsindən müxbirinə bildirilib ki, Salyan rayonunda ötən il tikinti, abadlıq və quruculuq işləri davamlı olaraq aparılıb. Belə ki, rayonun Qarabağlı kəndində 100, Salyan şəhər Babazanlı yaşayış massivində 60, N.Babayev küçəsində 60 yerlik uşaq bağçası və körpələr evinin tikintisi aparılıb, 7 saylı uşaq bağçasında təmir işləri görülüb, Uşaq İncəsənət Məktəbi və Salyan Dövlət Kukla Teatrı əsaslı təmir edilib. Həmçinin rayon Mərkəzi Xəstəxanasının Doğum evinin və Uşaq Xəstəxanasının əsaslı təmiri və zəruri tibbi avadanlıqlarla təchiz olunması işləri davam etdirilib.

“Yeniləşən Azərbaycana yeni məktəb” layihəsi çərçivəsində Ərəbqardaşbəyli kənd tam orta məktəbi üçün 180 yerlik yeni binanın tikintisi başa çatdırılaraq müəllim və şagirdlərin istifadəsinə verilib, Aşağı Kürtkənd kəndində 360, Qızılağac kəndində isə 1000 şagird yerlik yeni məktəb binasının tikintisinə başlanılıb, Sarvan və Küsəngi kənd tam orta məktəbləri əsaslı təmir edilib.

Ötən il, həmçinin Kənd Təsərrüfatı Nazirliyi tərəfindən rayonun Qaraçala kəndi ərazisində Salyan Regional Aqrar Elm və İnnovasiya Mərkəzi üçün mini pambıq emalı müəssisəsinin, Kürqaraqaşlı kəndində isə müasir tələblərə cavab verən Dövlət Sort-Sınaq Məntəqəsi üçün yeni inzibati binanın tikintisi davam etdirilib. Bu işlərlə yanaşı, ötən il şəhərin Taleh Davudzadə küçəsində 4 kommunal binanın dam örtüyü dəyişdirilib, 8 küçəyə asfalt və piyada səkilərinə tamet döşənib. Hazırda rayonda yarımçıq tikinti və təmir işləri və yeni tikililərin inşasının vaxtında başa çatdırılması istiqamətində işlər görülür.

Bu istiqamətdə işlər 2020-ci ilin ilk aylarında da davam etdirilir. Belə ki, Salyan şəhərinin Babazanlı yaşayış massivində 60 yerlik uşaq bağçası-körpələr evinin inşası başa çatıb. Artıq binanın dam örtüyü vurulub, qapı və pəncərələr quraşdırılıb, elektrik, su kanalizasiya xətləri çəkilib, divarlar rənglənib, kafel-metlax işləri görülüb. Bağçada su anbarı tikilib, davamlı enerji təminatı üçün transformator yarımstansiyası və istilik sistemi quraşdırılıb. Məktəbəqədər müəssisədə yataq, oyun, tədris, tibb, mətbəx və digər yardımçı otaqlar var. Hazırda həyətdə abadlıq işləri aparılır, yaşıllıq salınır. Ərazidə uşaqların əylənmələri üçün oyun meydançaları və müxtəlif qurğular tikilib, otaqlarda yeni inventar və texniki vasitələr quraşdırılıb.

Prezident İlham Əliyevin Goranboy şəhərində əhalinin mənzil-məişət şəraitinin yaxşılaşdırılmasına dair tədbirlər haqqında 2018-ci il 5 iyun tarixli Sərəncamına əsasən Dəliməmmədli şəhərində abadlıq-quruculuq işlərinin davam etdirilməsi, habelə qəzalı vəziyyətdə olan binanın sakinlərinin mənzil-məişət şəraitinin yaxşılaşdırılması məqsədi ilə yeni yaşayış binası tikilir. Bu barədə verilən məlumatda deyilir ki, yaşayış binası 2 mərtəbədən, 8 mənzildən ibarətdir. Binanın dəmir-beton işləri başa çatıb. Hazırda binada arakəsmələr arasında hörgü işləri davam etdirilir.

2019-cu ildə Qəbələ rayonunda iqtisadi və sosial sahələrin inkişafına bütün maliyyə mənbələri hesabına 80 milyon 708 min manat investisiya yönəldilib. Əsas kapitala yönəldilmiş vəsaitlərin 77,7 faizi dövlət, 22,3 faizi isə qeyri-dövlət sektorunun payına düşür.

Bu barədə Qəbələ rayon Statistika İdarəsindən məlumat verilib. Bildirilib ki, 2019-cu ildə əsas kapitala yönəldilmiş vəsaitlərin 78 milyon 821 min manatı və ya 97,6 faizi tikinti-quraşdırma işlərinə sərf olunub. Bu, əvvəlki illə müqayisədə 15 milyon 528 min manat və ya 24,5 faiz çoxdur. Ötən il rayonda əhalinin şəxsi vəsaiti hesabına dəyəri 9,3 milyon manat olan 17 min 200 kvadratmetr mənzil tikilib istifadəyə verilib.

Tikinti, abadlıq və quruculuq işləri Tovuz rayonunda da geniş vüsət alıb. Belə ki, Prezident İlham Əliyevin “Azərbaycan Respublikasının regionlarında uşaq bağçalarının tikintisi ilə bağlı tədbirlər haqqında” 2018-ci il 12 fevral tarixli Sərəncamı ilə Tovuz rayonunun Qovlar şəhərində tikilmiş 100 yerlik körpələr evi-uşaq bağçası istifadəyə verilib. Açılış mərasimində çıxış edən Tovuz Rayon İcra Hakimiyyətinin başçısı Məmməd Məmmədov son illərdə ölkədə məktəbəqədər təhsil müəssisələrinin inkişafı istiqamətində mühüm addımların atıldığını, müxtəlif şəhər və rayonlarda məktəbəqədər təhsil müəssisələrinin tikintisi, əsaslı təmiri və bərpası istiqamətində uğurlu işlər görüldüyünü bildirib.

Qeyd edilib ki, Prezident İlham Əliyev yetişməkdə olan gənc nəslin hərtərəfli inkişafı, onların layiqli vətəndaş kimi yetişməsi üçün mühüm tədbirlər həyata keçirir. Birinci vitse-prezident Mehriban Əliyeva da sosialyönümlü dövlət siyasətinin həyata keçirilməsində böyük xidmətlər göstərir. Tovuzda açılışı olan və hər cür invertar və avadanlıqlarla təmin edilmiş körpələr evi-uşaq bağçası da dövlət başçısının regionlara göstərdiyi hərtərəfli qayğının ən yaxşı nümunələrindəndir.

Öz növbəsində Naxçıvan Muxtar Respublikasında da tikinti, abadlıq və quruculuq işləri uğurla davam etdirilir. Bütün bunların nəticəsində qədim diyarın yaşayış məntəqələri müasir görkəm alır, kəndlərdə yaradılan infrastruktur məskunlaşmanı daha da artırır. Ötən ay abadlaşan yaşayış məntəqələrinin sırasına Ordubad rayonunun Vənənd kəndi də qoşulub.

Belə ki, yanvarın 13-də Naxçıvan Muxtar Respublikası Ali Məclisinin Sədri Vasif Talıbovun iştirakı ilə Vənənd kəndində yeni sosial obyektlər istifadəyə verilib. Həmin obyektlərdən biri də müasir tədris şəraiti ilə təmin olunmuş kənd tam orta məktəbidir. Yeni məktəbdə yaradılan şərait bundan sonra da tədrisin yüksək səviyyədə təşkilinə və nailiyyətlərin artmasına imkan verəcək. Bunun üçün hər cür imkan var. Çünki vaxt var idi ki, lövhəyə yazmaq üçün təbaşirin tapılmadığı bir yerdə bu gün elektron lövhəli sinif yaradılıb və həmin sinifdə mədəniyyət, elm müəssisələri ilə ümumtəhsil məktəbləri arasında keçirilən interaktiv dərs izlənilir. Bu, əldə edilən inkişafın, nailiyyətin, təhsilə göstərilən böyük diqqətin nəticəsidir.

Bunun da əsaslı səbəbləri vardır. Belə ki, son 25 ildə muxtar respublikada təhsil quruculuğu inkişafın əsas istiqaməti kimi müəyyənləşdirilib. Ötən dövrdə şəhər və rayon mərkəzləri ilə yanaşı, ucqar dağ kəndlərində də yeni məktəb binaları inşa olunub. Buna görə də Naxçıvan təhsili artıq yeni inkişaf dövrünü yaşayır.

Açılış tədbirində bu məsələlərə toxunan Ali Məclisin Sədri təhsilin, elmin inkişafının əhəmiyyətini qeyd edərək deyib: “Bu gün dünyada qəbul olunmuş “elmdən istehsalata” təcrübəsi Azərbaycanda uğurla tətbiq olunur. Gənclər təhsilin bütün pillələri üzrə hərtərəfli təhsil almaq imkanlarına malikdirlər. Muxtar respublikada da bu sahədə görülən işlər təhsilin inkişafını təmin etmişdir. Artıq Naxçıvan Muxtar Respublikasında təhsilin inkişaf göstəriciləri ümumi Azərbaycan üzrə orta səviyyədən yüksəkdir”.

(davamı növbəti sayımızda)

Nadir AZƏRİ

Yeni Azərbaycan.-2020.- 3 mart.- S.7.