Azərbaycanın malik olduğu iqtisadi imkanlar nəticəsində 44 günlük müharibə dövründə də ölkəmizdə tikinti-quruculuq və abadlıq işləri davam etdirilib

Bu ilin oktyabr-noyabr aylarında regionlarda sözügedən istiqamətdə davamlı addımların atılması da deyilənləri təsdiqləyir

Öz inkişafına görə regionun lider dövləti olan Azərbaycan bu gün həm də qlobal layihələrin iştirakçısıdır və xarici ölkələr, o cümlədən beynəlxalq qurumlar tərəfindən etibarlı tərəfdaş kimi qəbul edilir. Heç şübhəsiz ölkəmiz bu uğurları məhz düşünülmüş daxili və xarcici siyasət, həmçinin həyata keçirilən genişmiqyaslı islahatlar nəticəsində əldə edib. Onu da qeyd edək ki, əldə edilən uğurlardan ölkəmizin regionlarında da pay düşüb. Bir sözlə, əsası xalqımızın Ümummilli Lideri Heydər Əliyev tərəfindən qoyulan və Prezident İlham Əliyevin rəhbərliyi ilə davam etdirilən sosial-iqtisadi siyasət respublikamızın hərtərəfli inkişafını təmin edib.

Təbii ki, ölkəmizdə, xüsusilə son 17 ildə bütün sahələrdə əldə edilən uğurlarda 2004-cü ildən etibarən reallaşdırılan regionların sosial-iqtisadi inkişafına dair müvafiq Dövlət proqramlarının xüsusi payı var. Çünki indiyə qədər üçünün icrasının tamamlandığı, dördüncüsünün icrasının isə uğurla davam etdiyi sözügedən Dövlət proqramları çərçivəsində görülən işlər, həyata keçirilən genişmiqyaslı layihələr ölkəmizin bütün regionlarının ümumi inkişaf dinamikasını təmin edib. Onu da vurğulamaq yerinə düşər ki, sözügedən Dövlət proqramları çərçivəsində regionlarda reallaşdırılan ən vacib işlərdən biri də müxtəlif sahələr üzrə müasir infrastrukturun yaradılması, infrastruktur layihələrinin icra edilməsidir. Məhz bu məqsədlə hazırda da bir sıra bölgələrdə tikinti-quruculuq və abadlıq işləri uğurla davam etməkdədir.

Daha dəqiq desək, regionlarda tikinti-quruculuq və abadlıq işlərinin uğurla davam etdirilməsi bölgələrin sosial-iqtisadi inkişafında mühüm rol oynayır və davamlı xarakter daşıyır. Elə bu ilin oktyabr-noyabr ayları ərzində ayrı-ayrı rayonların timsalında müşahidə edilən reallıqlar da bunu deməyə əsas verir. Bununla bağlı konkret faktlara keçməzdən öncə isə bir məqamı xüsusi olaraq qeyd etməliyik. Söhbət ölkəmizin iqtisadi imkanlarından gedir. Belə ki, əksər ekspertlərin də vurğuladıqları kimi respublikamızda vaxtında atılan məqsədyönlü addımlar nəticəsində əldə edilən iqtisadi uğurlar bu gün bir daha öz sözünü dedi.

Məlum olduğu kimi, sentyabrın 27-də işğalçı Ermənistanın ölkəmizə qarşı həyata kerçirdiyi növbəti genişmiqyaslı hərbi təxribata cavab olaraq ordumuz tərəfindən əks-hücum əməliyyatlarına başlandı. 44 günlük Vətən müharbəsi torpaqlarımızın işğaldan azad edilməsi, düşmən ölkənin sarsıdıcı məğlubiyyəti və kapitulyasiya aktını imzalaması ilə nəticələndi. Bu müddət ərzində ölkəmiz cənab Ali Baş Komandan İlham Əliyevin rəhbərliyi ilə həm ön cabhədə, həm diplomatiya cəbhəsində, həm də informasiya cəbhəsində düşməni diz çökdürdü. Ekspertlərin vurğuladıqları kimi, bu müharibənin ortaya çıxardığı daha bir reallıq isə Azərbaycan iqtisadiyyatının gücü ilə bağlıdır. Belə ki, hətta ölkəmizin müharibə apardığı dövrdə belə regionlarda bütün sosial layihələr, o cümlədən tikinti-quruculuq və abadlıq işləri bir anlıq da olsa dayanmadı. Hər halda 2020-ci ilin oktyabr və noyabr ayı üzrə əldə edilən statistika da deyilənləri təsdiqləyir.

Beləliklə, qeyd olunduğu kimi, bu günə kimi üçünün icrası başa çatan, dördüncüsünün icrası isə davam edən regionların sosial-iqtisadi inkişafına dair Dövlət proqramları çərçivəsində görülən işlər, reallaşdırılan müvafiq layihələr respublikanın bölgələrinin hərtərəfli inkişafını təmin edib və hər bir rayonda əldə edilən uğurlarla müşayiət olunub. Təsadüfi deyil ki, məhz bu proqramlar çərçivəsində regionlarda, eyni zamanda, genişmiqyaslı tikinti-quruculuq və abadlıq işləri görülüb və hazırda da bu istiqamətdə işlər davam etdirilir.

Quba və Qusar rayonlarında tikinti-quruculuq işləri davamlı xarakter daşıyır

Məsələn, verilən məlumata əsasən, ölkənin şimal regionunda yerləşən Quba rayonunda da tikinti-quruculuq və abadlıq işləri davamlı xarakter daşıyır. Belə ki, Quba rayonunun Zərdabi qəsəbəsində inşa olunan 850 şagird yerlik yeni məktəb binasının tikintisi davam etdirilir.

Məlumatda qeyd olunur ki, Bayram Şixəmirov adına tam orta məktəb üçün tikilən yeni bina üçmərtəbəlidir. Hazırda təhsil ocağının binasında hörgü və suvaq işləri aparılır. Beş korpusdan ibarət məktəbdə sinif, gənclərin çağırışaqədər hazırlığı, əmək təlimi və kompüter otaqları, laboratoriyalar, idman, akt, oxu zalları, kitabxana və yeməkxana olacaq. İş icraçısı Afiq İbişov KİV-ə açıqlamasında bildirib ki, təhsil müəssisəsi müasir istilik və işıqlandırma sistemi ilə təchiz ediləcək. Yeni məktəb binasının həyətində qazanxana və su çənləri də tikiləcək.

Məlumat üçün bildirək ki, Zərdabi qəsəbə Bayram Şixəmirov adına tam orta məktəbin köhnə binası 45 il öncə istifadəyə verilib. Bina istismar müddətini başa vurduğundan yenisi ilə əvəz olunmasına ehtiyac yaranmışdı.

Şimal regionundakı Qusar rayonunun Qullar kəndində isə yeni modul tipli məktəb quraşdırılır. Bununla bağlı məlumatda vurğulandığı kimi, beş sinif və müəllimlər otağından ibarət məktəbin tikintisinə sentyabrda başlanılıb. Məlumatda o da deyilir ki, Qullar kəndində 80 ailə yaşayır. Kənddəki yeni tədris ocağında 40 şagirdin təhsil alması üçün şərait yaradılacaq.

Məktəb direktoru Çəmən Əkbərova KİV-ə açıqlamasında bildirib ki, yeni məktəb müasir istilik sistemi ilə təchiz olunacaq. Modul məktəbin quraşdırılması noyabr ayında yekunlaşacaq.

İş icraçısı Tariel Ağamirzəyevin sözlərinə görə, bu binaların üstünlükləri azməsrəfli olması ilə yanaşı, qısa müddət ərzində istənilən relyefdə quraşdırılması, asan daşınması, şagirdlərin sayına uyğun olaraq, sinif otaqlarının rahatlıqla azaldılıb artırılmasındadır.

Yeri gəlmişkən, Qusarın Qullar kəndi ilə yanaşı, Langu və Torpaqkörpü kəndlərində də 40 yerlik modul tipli məktəblər quraşdırılır.

Quxuroba kənd tam orta məktəbində isə əsaslı təmir-bərpa işləri aparılır. İşlər yekunlaşdıqdan sonra 464 şagirdin təhsil alması üçün lazımi şərait yaradılacaq. Məktəbin direktoru Rasid Tahirov bildirib ki, 1989-cu ildə istifadəyə verilən təhsil ocağı köhnəldiyindən keyfiyyətli tədris üçün yararsız idi. Təmirdən sonra üçmərtəbəli məktəb binası tamamilə yenidən qurularaq müasir tələblərə uyğun təhsil ocağı kimi fəaliyyətini davam etdirəcək.

Hazırda binanın həyətinin abadlaşdırılması, elektrik sisteminin quraşdırılması və daxili tərtibat işləri həyata keçirilir. Tədris ocağında fənn kabinetləri, kitabxana, kompüter otağı, akt və idman zalları fəaliyyət göstərəcək. Təhsil müəssisəsi müasir istilik və işıqlandırma sistemi ilə təchiz ediləcək. Yeni məktəb binasının həyətində qazanxana və su çənləri də inşa olunub.

Ümumiyyətlə, Qusardakı 86 məktəbdən iyirmisi son 5 il ərzində tikilib. Yeni məktəblərin 11-i modul tiplidir. Ümumilikdə son illərdə rayon məktəblərinin 65 faizi yenidən tikilib və ya təmir olunub.

Tikinti-quruculuq işləri Siyəzəndə də davam etdirlir. Belə ki, Siyəzən şəhərində 960 şagird yerlik dördmərtəbəli məktəb binası inşa olunur. Mikayıl Müşfiq adına Siyəzən şəhər 2 saylı tam orta məktəb üçün yeni binanın inşasına iyun ayından başlanılıb.

Bununla bağlı məlumatda bildirilidiyi kimi, dördmərtəbəli tədris ocağında bütün fənn kabinetləri, kitabxana, kompüter otağı, akt və idman zalları fəaliyyət göstərəcək. Təhsil müəssisəsi müasir istilik və işıqlandırma sistemi ilə təchiz ediləcək. İş icraçısı Samir Pirmətov KİV-ə açıqlamasında deyib ki, tikinti işləri plana əsasən və karantin rejiminin qaydalarına uyğun davam etdirilir. Hazırda bloklarda beton və hörgü işləri yekunlaşmaq üzrədir.

Məktəbin direktoru Rəşad Rəhmanov isə bildirib ki, orta məktəbin köhnə binası 64 il öncə istifadəyə verilib. Bina istismar müddətini başa vurduğundan yenisi ilə əvəz olunmasına ehtiyac yaranmışdı. Tikinti işləri başa çatdıqdan sonra məktəb binası müasir tələblərə uyğun təhsil ocağı kimi fəaliyyət göstərəcək. Yeni məktəb binasının həyətində qazanxana və su çənləri də inşa olunacaq.

Şimal bölgəsindəki Xaçmaz rayonunda isə beş körpələr evi-uşaq bağçası əsaslı təmir olunur, biri isə tamamilə yenidən tikilir. Qusarçay kəndində əsaslı təmir olunan bağçada işlər yekunlaşmaq üzrədir. Binada yalnız daxili tərtibat, inventar və avadanlıqların quraşdırılması işləri qalıb.

Bağçanın müdiri Nahidə Səbzəliyeva KİV-ə açıqlamasında bildirib ki, azyaşlı sakinlərin zövqünə uyğun qurulan bağçada müxtəlif yaş qrupları üçün məşğələ və yataq otaqları, yeməkxana, həyətdə isə istirahət guşələri yaradılır. Bağça körpələrin rahatlığını, istirahətini və ilkin biliklərə yiyələnməsini təmin etmək üçün lazımı inventarlarla təchiz olunacaq.

Məlumat üçün bildirək ki, 1956-cı ildə istifadəyə verilən əvvəlki binada körpələrin təlim-tərbiyəsi ilə müasir tələblərə uyğun məşğul olmaq mümkün deyildi. Bundan başqa, binada mərkəzləşdirilmiş istilik sistemi də olmayıb. İyirmi yerlik bağçada yenidənqurma işləri çərçivəsində müasir standartlara uyğun dərs şəraiti yaradılır.

Bununla yanaşı, hazırda Xaçmaz şəhərində 3 və 6 saylı, həmçinin rayonun Həsənqala, Yalama kəndlərindəki uşaq bağçalarında da əsaslı təmir işləri aparılıb. Ağtala kəndində isə yeni bağçanın inşasına başlanılıb.

Dövlət Proqramında müəyyən edilmiş tədbirlər Masallıda uğurla icra edilir

Bəhs edilən dövrdə ölkənin şimal bölgəsində olduğu kimi, cənub rayonlarında, o cümlədən Masallıda da tikinti-quruculuq və abadlıq işləri davam etdirlib. Bununla bağlı verilən məlumatda deyilir ki, regionların sosial-iqtisadi inkişafına dair üçüncü Dövlət Proqramında müəyyən edilmiş tədbirlərə müvafiq olaraq Viləş çayın Masallı şəhəri ərazisindən keçən hissəsində inşasına başlanılan park-bulvar kompleksinin tikintisi davam etdirilir.

Yeni istirahət mərkəzində bir sıra obyektlər, o cümlədən uşaq əyləncə mərkəzi, istirahət guşələri, mini-futbol və voleybol meydançaları tikilərək sakinlərin ixtiyarına veriləcək. Parkın bir hissəsində qədim Masallının tarixini əks etdirən guşə də olacaq. Artıq layihədə nəzərdə tutulan tikinti işlərinin bir qismi başa çatdırılıb.

(davamı növbəti sayımızda)

Nadir AZƏRİ

Yeni Azərbaycan.- 2020.-26 noyabr.- S.-8.