Yaşayan, döyüşən, qədim mədəniyyət mərkəzi Bərdə güclü mübarizə əzmi və sarsılmaz iradə nümayiş etdirir

Erməni terroruna məruz qalan Bərdə ictimaiyyəti Ali Baş Komandanımızın qətiyyətli siyasətini dəstəkləyir, milli ordumuzun zəfər yürüşünə hərtərəfli dəstək göstərir və işğal altında olan bütün torpaqlarımızın tezliklə azad olunacağına inanır

30 ilə yaxındır ki, Azərbaycan torpaqlarını işğal altında saxlayan Ermənistan bu gün də öz cinayətkar, faşist və təcavüzkar əməllərindən əl çəkmir. Dağlıq Qarabağ münaqişəsinin beynəlxalq hüquq normaları əsasında həllində maraqlı olmayan işğalçı Ermənistan işğal məhsulu olan status-kvonu saxlamaq üçün zaman-zaman müxtəlif təxribatlara əl atıb. Düşmən ölkə tərəfindən növbəti təcavüzkar, təxribatçı addım isə sentyabrın 27-də atılıb. Belə ki, həmin gün səhər Ermənistan silahlı qüvvələri bir neçə istiqamətdən müxtəlif növ silahlardan, o cümlədən ağır artilleriyadan istifadə edərək Azərbaycanın yaşayış məntəqələrini, eyni zamanda, hərbi mövqelərimizi atəşə tutub. Ermənistanın həm mülki əhalini və yaşayış məntəqələrini, həm də hərbçilərimizi hədəfə alan bu cinayətkar əməlinə cavab olaraq düşmənə sarsıdıcı zərbələr vuran Azərbaycan Ordusu ötən müddət ərzində xeyli sayda yaşayış məntəqəsini işğaldan azad edib. Bu müddət ərzində düşmənin ordusu canlı qüvvə və silah-sursat baxımından da sarsıdıcı məğlubiyyətə uğrayıb. Azərbaycan Ordusunun qətiyyətli zərbələri nəticəsində bütün cəbhəboyu sürətlə geriyə çəkilməyə məcbur olan Ermənistan rəhbərliyi çıxış yolunu dinc əhalidən qisas almaqda görərək bir sıra yaşayış məntəqələrini, o cümlədən döyüş bölgəsindən xeyli uzaq olan şəhərlərimizi atəşə tutub. Bunun nəticəsində xeyli sayda mülki şəxs həlak olub və yaralanıb. Belə ki, Baş Prokurorluğun oktyabrın 30-a olan məlumatına əsasən, sentyabrın 27-dən hazırkı vaxtadək Ermənistan ordusunun yaşayış məntəqələrini atəşə tutması nəticəsində 1-i körpə, 10-u uşaq, 27-si qadın, 53-ü kişi olmaqla 91 nəfər həlak olub. Həlak olanlardan 15-i ahıl şəxslərdir. Xəsarət alan 400 nəfərdən 14-ü körpə, 36-sı uşaq, 101-i qadın, 249-u isə kişidir. Onlardan 45-i ahıl şəxslərdir. Ermənistanın hərbi cinayətləri nəticəsində bu günə qədər 7 ailə tamamilə məhv olub. Nəticədə 4 uşaq hər iki valideynini itirib. Bundan başqa, 428 mülki obyekt, 92 çoxmənzilli yaşayış binası və 2 442 yaşayış evi yararsız vəziyyətə düşüb.

Bərdə qətliamı erməni faşizminin növbəti bariz nümunəsidir

Ermənistanın hərbi-siyasi rəhbərliyinin göstərişi ilə Azərbaycanın yaşayış məntəqələrinə, mülki əhalisinə qarşı həyata keçirilən bu hərbi cinayətlərin əsasında cəbhədə uğursuzluq, Azərbaycan Ordusunun zəfəri qarşısında acizlik dayanır. Qeyd etdiyimiz kimi, düşmən ölkənin silahlı qüvvələri həm cəbhə bölgəsinə yaxın, həm də cəbhə bölgəsindən uzaqda yerləşən rayon və şəhərləri, yaşayış məntəqələrini atəşə tutmaqda davam edir. Bununla da Ermənistanın hərbi-siyasi rəhbərliyi bəşəri dəyərləri, humanizm prinsiplərini ayaqlar altına atır, beynəlxalq qanunvericiliyi, Cenevrə konvensiyalarının tələblərini kobud şəkildə pozur.

Vurğuladığımız kimi, erməni faşizminin növbəti təzahürü olan bu cinayətkar əməldən ən çox zərər görən regionlardan biri də döyüş bölgəsindən xeyli uzaqda yerləşən Bərdə şəhəridir. Sentyabrın 27-dən etibarən düşmən Bərdə rayonunun bir sıra kəndlərini və rayon mərkəzini dəfələrlə atəşə tutub. Bərdə şəhərinə ilk raket hücumu zamanı 1 mülki şəxs dünyasını dəyişib, xeyli sayda yaralanan olub. Daha sonra oktyabrın 27-də rayonun Qarayusifli kəndinə edilən raket hücumu 4 nəfərin həyatına son qoyub. Həlak olanlardan biri azyaşlı qız uşağı idi.

Miqyası baxımından Bərdəyə ən qanlı və qəddar raket hücumu isə oktyabrın 28-də gündüz saatlarında olub. Humanitar atəşkəsi kobud şəkildə pozan Ermənistan hərbi birləşmələri tərəfindən Bərdə şəhərinin dinc sakinlərinin sıx hərəkətdə olduğu və ticarət obyektlərinin kompakt yerləşdiyi əraziyə hər birinin içərisində 72 ədəd 9N235 saylı, ümumilikdə 144 bombacıq olan “Smerç” tipli əməliyyat-taktiki təyinatlı 9M525 qəlpəli böyük dağıdıcı qüvvəyə malik ballistik “claster” tipli 2 ədəd raket zərbələrinin endirilməsi nəticəsində 5-i qadın olmaqla, 21 nəfər həlak olub, 8-i uşaq, 15-i qadın olmaqla 70 şəxs isə müxtəlif dərəcəli bədən xəsarətləri alıb. Bundan başqa, raket zərbələrinin təsirindən 30-dan artıq mülki infrastruktur obyektinə, dinc sakinlərə məxsus 20-dən artıq fərdi yaşayış evinə və 22 nəqliyyat vasitəsinə külli miqdarda ziyan dəyib. Faktla bağlı Azərbaycan Respublikasının Baş prokuroru Kamran Əliyev tərəfindən Cinayət Məcəlləsinin 120.2.1-ci (cinayətkar birlik-təşkilat tərəfindən qəsdən adam öldürmə), 120.2.4-cü (xüsusi amansızlıqla və ya ümumi təhlükəli üsulla qəsdən adam öldürmə), 120.2.12-ci (milli, irqi, dini ədavət və ya düşmənçilik niyyəti ilə qəsdən adam öldürmə), 100.2-ci (təcavüzkar müharibəni aparma) və digər maddələri ilə cinayət işi başlanaraq ibtidai istintaqın aparılması Baş Prokurorluğun İstintaq İdarəsinə həvalə edilib. Hazırda prokurorluq əməkdaşları tərəfindən mövcud şəraitdə mümkün olan istintaq-əməliyyat tədbirləri həyata keçirilir. Azərbaycan Respublikasının Baş Prokurorluğu bəyan edib ki, Ermənistanın işğalçı və təcavüzkar mahiyyətinin beynəlxalq müstəvidə bir daha ifşa edilməsi, beynəlxalq və milli qanunvericiliyə əsasən, təqsirkar şəxslərin məsuliyyətə cəlb edilməsi və sanksiyaların tətbiq olunması məqsədilə beynəlxalq qurumlara müraciət edilməklə mümkün olan bütün tədbirlər görüləcək.

Oktyabrın 29-da Azərbaycan Prezidentinin köməkçisi Hikmət Hacıyevin və Birinci vitse-prezidentin köməkçisi Elçin Əmirbəyovun müşayiəti ilə ölkəmizdə fəaliyyət göstərən diplomatik korpusun nümayəndələri hadisə yerində olub, erməni vəhşiliyini öz gözləri ilə görüblər. Eləcə də hadisə yerində olan xarici jurnalistlər də Bərdə qətliamını beynəlxalq mediada təkzibolunmaz faktlarla işıqlandırıblar. Hətta “Human Rights Watch” və “Amnesty İnternational” təşkilatları da Bərdədə mülki əhaliyə qadağan olunmuş silahlarla hücum edildiyini bəyan edib.

Ümumilikdə, bu cinayətlər işğalçı Ermənistanın humanitar atəşkəsə riayət etmədiyinin, hərbi təcavüzü və Azərbaycan ərazilərinin qanunsuz işğalını davam etdirmək niyyətinin növbəti bariz təzahürüdür. Amma belə qanlı əməllər Bərdə əhalisini qətiyyən qorxutmur. Tarixən qəhrəmanlar yurdu olan Bərdənin sakinləri bu dəfə də düşmənin qarşısında mərdliklə dayanırlar.

Ermənistanın terror aktı barədə məlumatlar dünya ictimaiyyətinə çatdırılır, erməni yalanları ifşa olunur

Məsələ ilə bağlı Yeni Azərbaycan Partiyasının (YAP) Bərdə rayon təşkilatının sədri Fəqət Şadlinskaya bildirib ki, Ermənistanın faşist hakimiyyəti məqsədinə çata bilmədi. Onun sözlərinə görə, Bərdə sakinləri düşmən terrorundan, təxribatından çəkinmədən öz işinə-gücünə davam edir, şanlı ordumuzun uğurlarından daha da ruhlanır və əmindirlər ki, tezliklə Azərbaycan haqq mübarizəsində qalib olacaq: “Sentyabrın 27-dən başlayaraq erməni silahlı birləşmələrinin təxribat əməllərinə tutarlı cavab verən Azərbaycan Ordusunun Ali Baş Komandan İlham Əliyevin rəhbərliyi ilə yağı tapdağı altında qalan torpaqlarımızı işğaldan azad etməsi xalqımızda ruh yüksəkliyi yaradıb. Artıq bir aydan çoxdur ki, güclü Azərbaycan Ordusunun, rəşadətli əsgərlərimizin şücaəti nəticəsində hər gün cəbhədən sevindirici xəbərlər alırıq. Ölkə Prezidentinin hər zaman vurğuladığı kimi, “Bizim işimiz haqq işidir. Azərbaycan Ordusu hazırda öz torpaqları uğrunda döyüşür”. Ermənistanın təbliğat maşını nə qədər yalan informasiyalar yaysa da, cəbhənin bütün istiqamətlərində Azərbaycan Ordusu düşməni darmadağın edərək irəliləyir. İndiyə kimi 200-ə yaxın yaşayış məntəqəsi işğaldan azad olunub. Vətən müharibəsi şanlı Azərbaycan Ordusunun uğurları ilə davam edir. Hər gün cəbhədən aldığımız sevindirici xəbərlərlə yanaşı, ölkə Prezidenti, Ali Baş Komandan İlham Əliyev işğalçı Ermənistanı siyasi-diplomatik müstəvidə də məğlubiyyətə uğradır”.

Rayon təşkilatının sədri bildirib ki, Azərbaycana qarşı törədilən bu terror aktını - hərbi cinayəti, onun mahiyyətini dövlətimiz dünya ictimaiyyətinə lazımınca təqdim edə bildi: “Erməni vəhşiliyinin beynəlxalq mediada işıqlandırılmasına nail olduq. Bütün kanallarla - həm Prezident Administrasiyası, həm XİN, həm Baş Prokurorluq, həm də Milli Məclis xətti ilə bütün diplomatik korpuslara, beynəlxalq təşkilatlara gərəkli informasiyalar çatdırıldı. Dünyanın erməni vəhşiliyi haqqında ətraflı məlumatlandırılması, beynəlxalq mediada Azərbaycan həqiqətlərinin daha çox yayılması baxımından ciddi addımlar atılır. Gələcəkdə də dünya ictimaiyyətinin baş verənlər haqqında dəqiq və qərəzsiz məlumat alması üçün Respublika Prokurorluğu ermənilərin yaşayış məntəqələrində törətdiyi terror aktı ilə bağlı fransız, ispan, alman, rus, ingilis dillərində video hazırlayıb. Ermənilərin bu terror aktının dünya ictimaiyyətinə çatdırılması nəticəsində beynəlxalq birlik əsl həqiqətləri görür”.

“Gözün arxada qalmasın, igid əsgər!”

F.Şadlinskayanın sözlərinə görə, işğalçı Ermənistan hakimiyyətinin silahlı qüvvələrinin Bərdə şəhərini ağır artilleriya və raketlərdən atəşə tutmasına baxmayaraq, şəhər sakinləri arasında heç bir ruh düşkünlüyü yoxdur. Bərdə sakinləri erməni təxribatından qorxmur, raket zərbələri nəticəsində xəsarət alanlara maddi və mənəvi dəstəklərini nümayiş etdirirlər. O deyib ki, bu işdə rayon sakinləri ilə yanaşı, YAP Bərdə rayon təşkilatının əməkdaşları, fəalları, könüllü gəncləri fəallıq göstərirlər: “Belə ki, sentyabrın 27-də erməni işğalında olan torpaqlarımızın azad olunması ilə əlaqədar əks-hücum əməliyyatlarının başladığı gündən gənclərimiz sinəsini düşmənə sipər etmək üçün könüllü olaraq ordu sıralarına yazıldılar. YAP Bərdə rayon təşkilatının əməkdaşları, fəal gəncləri hadisə baş verən gündən etibarən terror aktından ziyan görmüş mülki vətəndaşların yanında olaraq onlara dəstək göstərməyə çalışırlar. Rayon təşkilatının təşəbbüsü ilə fəal gənclər Ermənistan silahlı qüvvələri tərəfindən rayonda törədilən vandalizm aktının baş verdiyi məkanın yaxınlığında yerləşən mənzillərə baş çəkiblər. Terrordan zərər görmüş insanlara hərtərəfli dəstək göstərilir, şəhid ailələri daim ziyarət olunur. Eyni zamanda, “Gözün arxada qalmasın, igid əsgər!” layihəsi ilə çıxış edən YAP Bərdə rayon təşkilatı mənfur düşmənin təcavüzünə qarşı əks-hücum əməliyyatları başlanan ilk gündən ön cəbhədə döyüşlərə atılmış əsgər ailələri ilə görüşlərini davam etdirir”.

Qeyd etdiyimiz kimi, Bərdə şəhərinin Ermənistan silahlı qüvvələri tərəfindən raket atəşinə tutulması nəticəsində yaralananlar arasında məktəblilər də var. YAP Bərdə rayon təşkilatının gənc fəalları həmin məktəblilərə, azyaşlılara da baş çəkirlər.

Bərdə sakinləri böyük ruh yüksəkliyinə malikdir

Əlbəttə ki, bu itkilər nə qədər ağır, ağrılı olsa da, xalqımızın mübarizlik ruhunu qıra bilməz. Vətəndaşlar yüksək vətənpərvərlik, həmrəylik, qətiyyət, mübarizə əzmi və sarsılmaz iradə nümayiş etdirir, milli ordumuzun uğurlarına və zəfər yürüşünə hərtərəfli dəstək göstərirlər. İnsanlar Ali Baş Komandan, Azərbaycan Prezidenti İlham Əliyevin ətrafında sıx birləşərək Onun qəbul etdiyi qərarları tam dəstəkləyir, ölkə Prezidentinin arxasında durduqlarını bəyan edirlər.

Bu gün Ermənistan tərəfindən hərbi cinayətə və dövlət səviyyəsində həyata keçirilən terror siyasətinə məruz qalmış Bərdə əhalisi, ümumilikdə, bütün xalqımız heç vaxt olmadığı kimi nikbindir, torpaqlarımızın azad olunması uğrunda aparılan hərbi əməliyyatların məntiqi sonluğadək davam etdirilməsini istəyir. Əminliklə demək olar ki, bu gün qədim mədəniyyət mərkəzi olan, zəngin tarixi keçmişi ilə fərqlənən Bərdə Ermənistanın dövlət terroruna qarşı mübarizədə mərdliklə dayanır.

Şübhə yoxdur ki, Ermənistanın hərbi-siyasi rəhbərliyi törətdiyi hərbi cinayətlərə görə cavab verməlidir və verəcək. Azərbaycan xalqına qarşı törədilmiş hərbi cinayətlərə görə Ermənistan döyüş meydanında böyük itkilərə məruz qalır, mülki əhalimizə qarşı qatı qəddarlığın qisası düşməndən alınır. Hazırda Ermənistan Ordusu bütün müqavimət imkanlarını itirib, nizamsız dəstələrə parçalanıb, şəxsi heyət arasında böyük ruh düşkünlüyü, inamsızlıq hökm sürür. Ermənistan hakimiyyəti və ordu rəhbərliyi prosesi idarə etmək imkanında deyillər.

Bütün bunların fonunda beynəlxalq ictimaiyyət Ermənistanın Azərbaycanın mülki əhalisinə qarşı törətdiyi cinayətlərə laqeyd qalmamalı, bu ölkənin cinayətkar rəhbərliyi məsuliyyətə cəlb olunmalı və törətdiyi qəddar əməllərə görə cavab verməlidir.

Beləliklə, ölkə Prezidenti, Ali Baş Komandan İlham Əliyevin qətiyyətli addımları, rəşadətli ordumuzun uğurları cəmiyyətimizi, dünyanın harasında yaşamağından asılı olmayaraq qəlbi Azərbaycanla döyünən hər kəsi böyükdən kiçiyə daxilən səfərbər edib. 30 ildir ki, düşmən tapdağında qalan torpaqların azadlığı uğrunda mübarizəyə qalxmış xalqımız bu haqq savaşında öz Prezidentinə inanır, arxalanır, Ondan güc alır. Bu baxımdan, Bərdə ictimaiyyətində də böyük ruh yüksəkliyi var.

Nardar BAYRAMLI

Yeni Azərbaycan.- 2020.- 31 oktyabr.- S.5.