Azərbaycançılıq ideologiyası milli vətənpərvərliyin gücləndirilməsində mühüm rol oynayır

“Yeni Azərbaycan” qəzetində “Azərbaycançılıq ideologiyasının milli vətənpərvərlik ruhunun yüksəldilməsindəki rolu” mövzusunda onlayn formatda keçirilən “dəyirmi masa”da da bildirildiyi kimi, gənclərin sağlam, milli vətənpərvərlik ruhunda, azərbaycançılıq ideologiyasını dərindən dərk edərək yetişməsi olduqca vacibdir

(əvvəli ötən sayımızda)

Eyni zamanda, 1993-cü il 2 noyabr tarixində Ümummilli Liderimizin xalqa müraciətindən sonra Azərbaycan gəncləri Vətənin müdafiəsi və torpaqlarımızın işğaldan azad edilməsi uğrunda döyüşə qalxdı. Qısa müddətdə həyata keçirilən Horadiz əməliyyatı ilə bir sıra torpaqlarımız düşmən işğalından azad edildi.

Emin Həsənli onu da əlavə edib ki, müstəqillik dövründə də ordu quruculuğu məsələsi hər zaman ön planda olub və 1993-cü ildən sonra da gənclərimizin dünyanın aparıcı hərbi məktəblərində təhsil almaları üçün imkanlar yaradılıb. Eyni zamanda, ölkə daxilində gənclərin dövlətin idarəçiliyində rol alması məsələsi aktuallaşıb, gənclərin forumları keçirilib. Emin Həsənli bildirib ki, Ulu Öndər Heydər Əliyev tərəfindən yaradılan Gənclər və İdman Nazirliyi gənclərimizin koordinasiyalı fəaliyyətinə imkan verdi. Həmçinin həmin dövrdə Milli Olimpiya Komitəsi gənc nəslin sağlam yetişməsində əsaslı rol oynadı: “Beləliklə, dövlət tərəfindən hərtərəfli diqqət və qayğı ilə əhatə olunan Azərbaycan gəncliyi bir çox sahələrdə böyük nailiyyətlər əldə etdi. Həm idman, həm mədəniyyət sahəsində uğurlar qazanıldı, bir sıra təhsil olimpiadalarından ölkəmizə medallar gətirildi. Bütün bunlar isə gənclərimizin milli vətənpərvərlik ruhunun daha da güclənməsinə yol açdı”.

Müasir dövrə gənclərimizin milli vətənpərvərlik ruhunda yetişməsinin fonunda ordumuzun düşmənə sarsıdıcı zərbələr vurmasına da toxunan Emin Həsənli “Azərbaycan cəmiyyəti hər zaman deyirdi ki, bizim güclü ordumuz və vətənpərvər gəncliyimiz var. 2016-cı ilin aprel hadisələrində isə bunu bütün dünya gördü. Düşmən bir daha əmin oldu ki, Azərbaycan ordusu torpaqlarını işğaldan azad etməyə qadirdir. Və Azərbaycanda elə bir vətənpərvər gənclik yetişib ki, torpaqlarımızı düşmən işğalından azad etmək üçün hər an döyüşə atılmağa hazırdı”, - deyib.

O, əlavə edib ki, 2016-cı ilin aprel hadisələrində Azərbaycan xalqı səfərbər oldu, bütün Azərbaycan gəncliyi ayağa qalxdı və döyüşə getməyə hazır olduğunu bildirdi. Biz eyni halı 2020-ci ilin iyulunda da müşahidə etdik. Belə ki, Azərbaycan-Ermənistan dövlət sərhədinin Tovuz rayonu istiqamətində baş verən erməni təxribatı zamanı da ölkəmizdə gənclər səfərbər oldular. Cənab Prezidentimizin bir müraciəti ilə qısa müddət ərzində 50 mindən artıq Azərbaycan gənci müvafiq dövlət strukturlarına müraciətlər etdilər ki, onlar könüllü olaraq cəbhədə döyüşməyə hazırdırlar: “Bu, Ulu Öndərin əsasını qoyduğu və cənab Prezidentimizin davam etdirdiyi siyasətin nəticəsidir. Artıq Azərbaycan gəncliyi 1990-cı illərin əvvəlindəki ümidsiz gənclik deyil. Bu gün Azərbaycan yerləşdiyi regionun lider dövlətidir və gənclərimiz bu güclü dövlətə, öz Prezidentinə arxalanır”.

Emin Həsənli onu da qeyd edib ki, bu gün yalnız hərbi sahədə çalışan, hərbi mundir daşıyan gənclər deyil, digər sahələrdə fəaliyyət göstərən gənclər də Vətəninə, dövlətinə bağlı, vətənpərvərdirlər: “Ümummilli Liderimiz Heydər Əliyev hər zaman deyirdi ki, kim hansı peşə ilə məşğul olursa, o peşəni yüksək səviyyədə bilməlidir. Bu mənada, azərbaycançılıq ideologiyası həm də gənclərimiz üçün qarşıya qoyulan hədəfləri sistemləşdirmiş oldu. Təbii ki, Vətən uğrunda əldə silah canından keçmək olduqca qürurvericidir. Bu gün Azərbaycan cəmiyyəti şəhidlərimizin ruhuna böyük ehtiram nümayiş etdirir və bu da olduqca böyük amildir. Şəhidlərimizin izdihamlı dəfn mərasimləri dediklərmizə sübutdur. Gənclər öz dədə-babalarının bu torpaqlar uğrunda apardığı mübarizəni davam eitdirirlər. Təmsil etdiyim qeyri-hökumət təşkilatının xətti ilə keçirilən, eləcə də digər tədbirlərdə tez-tez gənclərlə görüşürük və müzakirələr aparırıq. Əminliklə deyə bilərəm ki, bu gün gənclərimizin idealı, simvolu məhz Mübariz İbrahimov, Polad Həşimov, Murad Mirzəyev, Samit İmanov, Raquf Orucov və digər qəhrəmanlarımızdır”.

“Mən bir məsələyə xüsusi toxunmaq istəyirəm ki, 2016-cı ilin Aprel döyüşlərində cəbhənin ön xəttində əsgərlərlə yanaşı zabit-gizir heyətimiz də qəhrəmanlıqla döyüşdü və şəhid oldu. Eyni zamanda, Tovuz hadisələri zamanı general-mayor Polad Həşimovun səngərdə əsgəri ilə çiyin çiyinə dayanması dünyaya bir mesaj idi ki, milli vətənpərvərlik ruhu budur. Bu gün sosial şəbəkələrdə gənclərimiz məhz bizim şəhidlərimizin şəkillərini paylaşır, onlar haqqında məlumatlar yayır və onları özləri üçün ideal seçirlər. Bu Vətənə bağlılıqdır və çox sevindiricidir ki, gənclərimizin seçimi məhz Polad Həşimov kimi qəhərəmanlardır”, - deyən E.Həsənli onu da vurğulayıb ki, azərbaycançılıq ideologiyası milli birliyimizin ən əsas konsepsiyasıdır. O qeyd edib ki, Azərbaycan çoxmillətli ölkədir və ölkəmizdə yaşayan bütün xalqların nümayəndələri bu torpaq uğrunda canlarını qurban verməyə hər an hazırdırlar.

Emin Həsənli onu da bildirib ki, Azərbaycan gəncliyi Dağlıq Qarabağı, digər işğal altında olan torpaqlarımızı unutmayıblar: “2016-cı ilin Aprel döyüşləri və son Tovuz hadisələri bunu bir daha sübut etdi. Azərbaycanın düşmənləri, eləcə də içimizdəki bəzi düşmən qüvvələr iddia edirdilər ki, gənclik Dağlıq Qarabağı, işğal altındakı digər torpaqlarımızı unudur, laqeydlik, biganəlik yaranır. Bu, yalandır. Baxsaq, görərik ki, Dağlıq Qarabağda son döyüşlərdə şəhid olanların böyük əksəriyyəti məhz müstəqillik dövründə, 1994-cü ildən sonra anadan olan gənclərdir. Bu, o deməkdir ki, Azərbaycan gəncliyi Dağlıq Qarabağı unutmayıb və heç bir zaman unutmayacaq. Düşmənlərimizin bu çirkin iftirası bir daha ifşa olundu. Eləcə də iddia edirdilər ki, Dağlıq Qarabağ azad olunsa belə, oraya heç kim qayıtmayacaq. 2016-cı ildə Cocuq Mərcanlı qəsəbəsi tam şəkildə Azərbaycan Silahlı Qüvvələrinin nəzarətinə keçdikdən sonra orada qısa zaman ərzində abadlıq-quruculuq işləri görüldü və bu qəsəbədə həyat yenidən canlandı. Oraya qayıdanlar arasında böyük çoxluq təşkil edən məhz gənclərdir. Çünki Azərbaycan gəncliyi öz torpağına, Vətəninə bağlıdır. Bu düşmənə bir mesajdır ki, Azərbaycan xalqı, Azərbaycan gəncliyi öz dədə-baba yurduna, Dağlıq Qarabağa, Şuşaya, Xankəndinə və digər işğal altında olan rayonlarımıza qayıdacaq”.

“Dəyirmi masa”dakı çıxışında digər bir vacib məqama da toxunan Milli Məclisin deputatı Azər Badamov isə qeyd edib ki, azərbaycançılıq ideologiyasının təməlində, eyni zamanda, Azərbaycanda yaşayan bütün etnik qrupların, xalqların bir ideya ətrafında birləşməsi dayanır. Millət vəkili 1990-cı illərin əvvəllərində ölkəmizin XX əsrdə ikinci dəfə qazandığı müstəqilliyinə ən böyük təhdidin ölkənin daxilindəki parçalanmalar olduğunu xatırladıb. O qeyd edib ki, məhz Ulu Öndər Heydər Əliyevin 1993-cü ilin iyununda xalqın təkidli tələbi ilə yenidən hakimiyyətə qayıdışı və azərbaycançılıq ideologiyasının əsasını qoyması, qısa zaman kəsiyində bu ideologiyanın təməl şərtlərinin milli Kontitusiyamızda öz əksini tapması ölkədaxili sabitliyin təmin olunmasına yol açdı: “Ölkəmizdə yaşayan bütün milli azlıqlar, dinindən, dilindən asılı olmayaraq hər kəs vahid Vətənimiz-Azərbaycan uğrunda birləşdi. Bu gün Azərbaycanda yaşayan bütün xalqların nümayəndələri səngərlərdə xalqımızın vahid düşməninə qarşı-ermənilərə qarşı çiyin-çiyinə mübarizə aparır, qəhrəmanlıq göstərirlər. Onların hər biri Vətənimiz uğrunda canlarını verməyə hazırdırlar. Biz bunun həm 2016-cı ilin Aprel döyüşlərində, həm də 2020-ci ilin iyul döyüşlərində şahidi olduq. Bizim milli birliyimiz ölkəmizin yenilməzliyini, müstəqilliyimizin əbədiliyini təmin edir”.

Öz növbəsində, YAP Hacıqabul rayon təşkilatının sədri Hafis Bəşirov da vətənpərvərlik mövzusunun hər zaman öz aktuallığını qoruduğunu və təbliğinə zərurət olduğunu deyib. Onun sözlərinə görə, artıq yüz illərdir ölkəmizə qarşı erməni təcavüzü, işğalçı siyasət, xalqımıza qarşı törədilən soyqırım cinayətləri davam edir. Bu mənada gənclərimizin milli vətənpərvərlik ruhunda yetişməsinin, tərbiyə almasının olduqca vacib şərt olduğunu söyləyən H.Bəşirov deyib ki, gənclərimiz arasında bu mövzuda geniş maarifləndirmə işləri aparılmalıdır. “Gənclərimiz dədə-baba yurdumuz olan Dağlıq Qarabağın tarixi keçmişi ilə bağlı məlumatlarını daha da zənginləşdirməlidirlər. Bu gün texnologiyanın verdiyi imkanlardan maksimum istifadə olunmalı və sosial şəbəkələrdə Azərbaycan tarixi ilə bağlı müxtəlif dillərdə mühüm paylaşımlar edilməlidir. Hazırki pandemiya dövründə gənclər arasında onlayn formatda konfranslar təşkil etmək, müzakirələr açmaq, geniş disskusiyalar aparmaq mümkündür. Azərbaycan gəncliyi son dərəcə fəal gənclikdir və bu gün səngərdəki əsgərlərimizlə yanaşı sosial şəbəkələrdə də düşmənə layiqli cavablar verilir, onların yalanları ifşa edilir”, - deyən H.Bəşirov əlavə edib ki, bununla yanaşı, gənclərimiz hər an əldə silah Vətənimizi düşmən işğalından azad etməyə hazırdır. O bildirib ki, bu ilin iyulunda Azərbaycan-Ermənistan sərhədinin Tovuz rayonu istiqamətində baş verən hadisələr zamanı bütün bölgələrdə orduya, ölkə Prezidentinə dəstək aksiyaları keçirildi və bu aksiyalarda gənclər birmənalı olaraq ölkənin Ali Baş Komandanın əmrinə hər an hazır olduqlarını bildirdilər. Bu, olduqca qürurvericidir: “Düşmən ölkədə bu gün hərbi xidmətdən yayınma, o cümlədən ordu daxilində hərc-mərclik halları baş alıb gedir. Azərbaycan gəncliyi isə Vətəni uğrunda canından keçməyə hazır olduğunu bildirir. Təbii ki, bu məsələdə milli vətənpərvərlik tərbiyəsi olduqca önəmli yer tutur. Düşünürəm ki, Azərbaycan gəncliyi hər zaman sağlam, Vətəni uğrunda dövləti uğrunda mübarizəyə hazır bir gənclikdir. Bu, Azərbaycanda həyata keçirilən uğurlu gənclər siyasətinin nəticəsidir. Hər birimiz gənclərimizin dövlətimizin yaratdığı şəraitdən daha da yaxşı istifadə etməsi, həyatda düzgün mövqe tutması, vətənpərvər, sağlam düşüncədə böyüməsi üçün hər cür köməyimizi göstərməliyik”.

Pərviz SADAYOĞLU

Yeni Azərbaycan .- 2020.- 2 sentyabr.- S.7.