Ölkəmizdə təhsil infrastrukturunun yenilənməsi istiqamətində işlər pandemiya dövründə də davam etdirilib

Regionlarda təhsilin maddi-texniki bazasının möhkəmləndirilməsi məqsədilə yeni məktəb binaları inşa olunur, yaxud əsaslı təmir edilir

(əvvəli ötən sayımızda)

Məktəbin həyətində qazanxana, generator, içməli, çirkab və yanğın əleyhinə su anbarları tikiləcək, idman meydançası yaradılacaq, abadlıq və yaşıllıq işləri həyata keçiriləcək. Tikinti işlərinin 2021-ci ilin may ayında başa çatdırılması nəzərdə tutulur.

Öz növbəsində, Xaçmaz rayonunda da təhsil müəssisələrinin infrastrukturunun yaxşılaşdırılması, maddi-texniki bazanın müasirləşdirilməsi istiqamətində işlər davam etdirilir. Verilən məlumata sasən, hazırda 480 şagird yerlik Şəmsəddin Sədiyev adına Qımılqışlaq kənd tam orta məktəbində əsaslı təmir işləri aparılır. Məktəbdə müasir laboratoriya, kitabxana, yeməkxana, müasir avadanlıqla təchiz edilən kompüter otaqları, emalatxana, idman zalları və istilik sisteminin yaradılması nəzərdə tutulub.

Xaçmaz rayonunun Xudat şəhərində isə 432 şagird yerlik ikimərtəbəli məktəb binası inşa olunur. Telman Fərzəliyev adına Xudat şəhər 1 nömrəli tam orta məktəb üçün yeni binanın tikintisinə ötən ilin dekabr ayından başlanılıb. Binada sinif otaqları, laboratoriyalar, gənclərin çağırışaqədər hazırlığı, əmək təlimi və kompüter otaqları, idman, 260 yerlik akt zalı, kitabxana və 144 yerlik yeməkxana olacaq. Yeni təhsil müəssisəsinin inşası təhsilin keyfiyyətinin yaxşılaşdırılmasında mühüm rol oynayacaq. Əvvəlki bina 93 il öncə istifadəyə verildiyindən müasir tələblərə cavab vermirdi. Üç korpusdan ibarət təhsil müəssisəsi müasir istilik və işıqlandırma sistemi ilə təchiz olunacaq. Yeni məktəb binasının həyətində qazanxana və su çənləri də tikiləcək.

Bundan başqa, Prezident İlham Əliyevin müvafiq sərəncamları ilə 2020-ci il ərzində Xaçmaz rayonunun Tikanoba, Qədimalıqışlaq, Əbilyataq, Xanoba, Xanlıqoba, Çuxuroba və Hacıməmmədoba kəndlərində, ümumilikdə, 7 modul tipli məktəb quraşdırılır. Heydər Əliyev Fondu tərəfindən bir məktəb binası əsaslı təmir olunub, eyni zamanda, “Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı” çərçivəsində bir məktəb binası əsaslı təmir olunur və bir məktəb binası isə yenidən tikilib.

Cənub bölgəsinə gəlincə, Təhsil Nazirliyinin sifarişi ilə Masallı rayonunun Boradigah qəsəbəsindəki İnqilab Nağıyev adına 2 nömrəli tam orta məktəb üçün yeni üçmərtəbəli bina inşa olunur. Verilən məlumata əsasən, ötən ilin noyabr ayında tikintisinə başlanılan 600 şagird yerlik yeni məktəb binasında şagirdlərin yüksək səviyyədə təhsil almaları üçün lazımi şərait yaradılacaq.

Müasir istilik və su sistemi ilə təmin ediləcək təhsil ocağının yeni binasında geniş sinif otaqları, kimya, fizika, biologiya laboratoriyaları, kompüter otağı, kitabxana, yeməkxana, akt və idman zalları müəllim və şagirdlərin ixtiyarına veriləcək. Yeni məktəb binasının bu ilin sonunadək istifadəyə verilməsi nəzərdə tutulub.

Dağlıq ərazidə yerləşən Lerik rayonunda təhsilin maddi-texniki bazasını möhkəmləndirmək məqsədilə yeni məktəb binaları tikilərək müəllim və şagirdlərin ixtiyarına verilir. Ötən tədris ilində rayonun Orand kənd tam orta məktəbi üçün tikilmiş 180 şagird yerlik yeni, üçmərtəbəli məktəb binası tədris və idman korpusundan ibarətdir. Tədris korpusunda on bir sinif otağı, informatika, texnologiya, fizika, kimya, çağırışaqədərki hazırlıq kabinetləri, kitabxana və oxu zalı, məktəbəhazırlıq qrupu və tibb otaqları, bufet var.

Məktəb binasında videomüşahidə, yanğın əleyhinə xəbərdarlıq sistemləri, internet xətti mövcuddur. Binanın istiliklə təmin olunması üçün təbii qazla və ya elektriklə işləyən, müasir tələblərə cavab verən qazanxana və nasosxana quraşdırılıb.

Məktəbin elektrik enerjisi ilə təminatı üçün 100 kilovoltluq transformator yarımstansiyası quraşdırılaraq generatorla təmin edilib.

Ötən il Lerikdə, həmçinin Təhsil Nazirliyi tərəfindən 20 yeni modul tipli məktəb binası tikilərək müəllim və şagirdlərin ixtiyarına verilib. Rayonun Siyov kənd tam orta məktəbi üçün inşa edilən 180 şagird yerlik yeni məktəb binasının tikintisi başa çatıb. Təhsil müəssisəsinin binası yeni dərs ilində istifadəyə veriləcək.

Qeyd edək ki, Prezident İlham Əliyevin 2020-ci il 8 avqust tarixli “Azərbaycan Respublikasında təhsil infrastrukturunun inkişafı ilə əlaqədar tədbirlər haqqında” Sərəncamına əsasən 13 rayonda 26 modul tipli məktəb binasının quraşdırılması nəzərdə tutulub. Bu məqsədlə Təhsil Nazirliyinə 7 milyon manat vəsait ayrılıb.

Həmin Sərəncama əsasən Lerik rayonunda dörd ədəd modul tipli məktəb binasının quraşdırılmasına başlanılıb. Andurma, Aşağı Çayrud və Laman kənd ümumi orta məktəblərinin hər biri üçün 40, Loda kənd ibtidai məktəbi üçün 20 şagird yerlik modul tipli məktəb binaları quraşdırılır.

Ümumiyyətlə vurğulamaq yerinə düşər ki, son illərdə respublikamızda ənənəvi məktəb binalarının inşası ilə yanaşı, modul tipli məktəblərin quraşdırılması da həyata keçirilir. Modul tipli məktəblərin üstünlüyü onların azməsrəfli olması, qısa müddət ərzində istənilən relyefdə quraşdırılması, asan daşınması, sinif otaqlarının sayının şagirdlərin sayına uyğun olaraq rahatlıqla azaldılıb-artırılmasıdır. Modul tipli məktəblərin tikintisində əsasən yerli istehsal məhsullarında istifadə edilir.

Bütövlükdə, yeni tədris ilinin əvvəlində Təhsil Nazirliyi tərəfindən təmir-tikinti işləri yekunlaşdırılmış 47 məktəb binası şagirdlərin istifadəsinə veriləcək. Onlardan 8-i yeni tikilən, 5-i əsaslı təmir olunan, 34-ü isə modul tipli məktəbdir. Təhsil Nazirliyindən bildirilib ki, 2020-ci ilin sonunadək qurum tərəfindən təmir-tikinti işləri yekunlaşdırılmış 100-ə yaxın məktəb binası şagirdlərin istifadəsinə veriləcək ki, onlardan da 60-ı modul tipli məktəbdir. Qeyd olunduğu kimi, Prezident İlham Əliyevin son aylarda imzaladığı sərəncamlara əsasən, ölkəmizin ayrı-ayrı bölgələrində yeni modul tipli məktəblərin inşasına əlavə vəsait ayrılıb. Qarşıya qoyulan hədəf isə budur ki, dağ kəndlərində və ucqar kəndlərdə modul tipli məktəblərin tikintisi layihəsi də yaxın iki il ərzində başa çatmalıdır.

Yeri gəlmişkən, verilən məlumata əsasən, ölkəmizin hər yerində olduğu kimi şimal bölgəsində də modul tipli məktəblərin tikintisi davam etdirlir. Belə ki, son üç ildə şimal regionunda 48 modul tipli məktəb binası istifadəyə verilib. 2020-2021-ci tədris ilində isə bölgədə daha 30 məktəb binasının istifadəyə verilməsi nəzərdə tutulub. Bunlardan 26-sı modul tipli məktəblərdir.

Məsələn, Xaçmaz rayon İlqar Məmmədov adına Xanlıqoba kənd ümumi orta məktəbi 1963-cü ildə istifadəyə verilib. Təhsil müəssisəsi istismar müddətini başa vurduğundan yenisi ilə əvəz olunur. Yeni qurulan modul tipli məktəb binası 80 şagird yerlikdir. Məktəbin direktoru Əlican Əliyev KİV-ə açıqlamasında bildirib ki, yeni məktəb müasir avadanlıqlar və mərkəzləşdirilmiş istilik sistemi ilə təmin ediləcək. Bu məktəblərin üstünlükləri azməsrəfli olması ilə yanaşı, qısa müddət ərzində istənilən relyefdə quraşdırılması, asan daşınması, şagirdlərin sayına uyğun olaraq sinif otaqlarının rahatlıqla azaldılıb-artırılmasıdır.

Məlumat üçün onu da bildirək ki, Xanlıqoba kəndi ilə yanaşı, 2020-2021-ci tədris ilində Xaçmazın daha 8 yaşayış məntəqəsində yeni modul tipli məktəb binası qapılarını şagirdlərin üzünə açacaq. Bundan başqa, Xudat şəhərində 432 şagird yerlik təhsil müəssisəsi də bu il istifadəyə veriləcək.

Tezliklə Füzuli rayon 17 nömrəli köçkün tam orta məktəbi üçün quraşdırılan modul tipli bina müəllim və şagirdlərin istifadəsinə veriləcək. Binanın tikinti-quraşdırma işləri Prezident İlham Əliyevin “Azərbaycan Respublikasında təhsil infrastrukturunun inkişafı ilə əlaqədar əlavə tədbirlər haqqında” 2020-ci il 6 may tarixli Sərəncamı ilə ayrılan vəsait hesabına həyata keçirilib.

Beyləqan rayonunun Şərq qəsəbəsində quraşdırılan 96 şagird yerlik məktəb binası 11 sinif otağı, direktor və müəllimlər otağı, sanitar qovşaqdan ibarətdir. Binaya istilik sistemi, qaz və su xətləri çəkilib. Məktəbin inventar və avadanlıqları da gətirilib. Hazırda məktəbin həyətində abadlıq işləri aparılır.

Düşmən işğalına məruz qalmış Ağdam rayon 9 nömrəli köçkün tam orta məktəbi üçün isə Bərdə rayonunda modul tipli məktəb binası quraşdırılır. Binanın tikinti-quraşdırma işləri Prezident İlham Əliyevin “Azərbaycan Respublikasında təhsil infrastrukturunun inkişafı ilə əlaqədar əlavə tədbirlər haqqında” 2020-ci il 6 may tarixli Sərəncamı ilə ayrılan vəsait hesabına həyata keçirilir.

96 şagird yerlik məktəb binası 10 sinif otağı, müəllimlər otağı, kitabxana və sanitar qovşaqdan ibarətdir. Hazırda binada son tamamlanma işləri aparılır. Məktəb binasının yeni tədris ilində istifadəyə verilməsi nəzərdə tutulur.

Regionların sosial-iqtisadi inkişafına dair dördüncü Dövlət Proqramının icrası istiqamətində Yardımlı rayonunda təhsilin maddi-texniki bazasının möhkəmləndirilməsi məqsədilə yeni məktəb binaları inşa edilir. Prezident İlham Əliyevin müvafiq Sərəncamına əsasən, Yardımlı rayonunun Çanaxbulaq kəndində 56, Peştəsər kəndində isə 80 şagird yerlik modul tipli tam orta məktəb binalarının quraşdırılması başa çatdırılıb. Yeni dərs ilində hər iki məktəb binası müəllim və şagirdlərin ixtiyarına veriləcək.

Rayonun Qaraqaya kəndindəki tam orta məktəb üçün inşa edilən 120 şagird yerlik ikimərtəbəli yeni məktəb binasında da tikinti işləri başa çatmaq üzrədir.Yardımlı şəhər 4 nömrəli tam orta məktəb üçün inşa edilən 180 şagird yerlik ikimərtəbəli məktəb binası isə qapılarını bu ilin sonunadək müəllim və şagirdlərin üzünə açacaq.

Qeyd edək ki, son 20 ildə Yardımlıda 50-yə yaxın yeni məktəb binası tikilib.

Tezliklə Bərdə rayon Mollaisalar kənd tam orta məktəbi üçün quraşdırılan modul tipli bina da müəllim və şagirdlərin istifadəsinə veriləcək. Binanın tikinti-quraşdırma işləri Prezident İlham Əliyevin “Azərbaycan Respublikasında təhsil infrastrukturunun inkişafı ilə əlaqədar əlavə tədbirlər haqqında” 2020-ci il 6 may tarixli Sərəncamı ilə ayrılan vəsait hesabına həyata keçirilib. 96 şagird yerlik məktəb binası 10 sinif otağı, müəllimlər otağı, kitabxana və sanitar qovşaqdan ibarətdir.

Nadir AZƏRİ

Yeni Azərbaycan.- 2020.- 15 sentyabr.- S.7.