“Yeni Azərbaycan” qəzeti 28 yaşında

Söz və məlumat azadlığı, fikir plüralizmi müasir cəmiyyətlərin demokratik inkişafının əsas parametrlərindən birini təşkil edir. Azərbaycan Respublikası da demokratik dəyərlərə sadiqlik nümayiş etdirən bir dövlət kimi söz və məlumat azadlığının tam təmin olunmasını, müstəqil mətbuatın inkişafını strateji prioritetlərdən biri kimi müəyyənləşdirib. Lakin çox təəssüf hissi ilə qeyd etmək lazımdır ki, müstəqilliyin ilk illərində bu ümdə amala çatmaq, mətbuatın azadlığını təmin etmək mümkün olmamışdı.

“Yeni Azərbaycan” qəzeti Ulu Öndər Heydər Əliyevin xeyir-duası ilə yaranıb

Bu gün 28 yaşını qeyd edən “Yeni Azərbaycan” qəzeti də məhz belə bir çətin dövrdə - 10 aprel 1993-cü ildə nəşr olunmağa başladı. Qəzetimiz Azərbaycanın müstəqillik dövrünün salnaməsini yaradan nəşrlərdən biri olduğuna görə onun keçdiyi tarixi yola nəzər yetirmək məqsədəuyğun olardı.

“Yeni Azərbaycan” qəzetinin ilk nömrəsi respublikamızın çox çətin zamanlarında, mürəkkəb şərtlər fonunda işıq üzü gördü. Məlum olduğu kimi, 1992-ci il noyabrın 21-də Naxçıvanda müasir Azərbaycan dövlətinin taleyində çox mühüm rol oynayan, dövlətçiliyimizin möhkəmləndirilməsi və müstəqilliyimizin qorunmasında müstəsna xidmətlər göstərən Yeni Azərbaycan Partiyasının təsis konfransı keçirildi. Həmin dövrdə müxalifətdə olan Yeni Azərbaycan Partiyasının təşkilatlanması və fəaliyyətinin ictimaiyyətə çatdırılması üçün kütləvi informasiya vasitələrinə çıxış vacib idi. Ona görə də partiyanın rəsmi mətbu orqanının yaradılması ideyası ortaya çıxdı. Təşəbbüskarlar bu ideyanı gerçəkləşdirmək məqsədilə partiyanın yaradıcısı Ulu Öndər Heydər Əliyevlə məsləhətləşmək üçün Naxçıvana yola düşdülər. 1993-cü il mart ayının 26-da Azərbaycan xalqının Ümummilli Lideri Heydər Əliyevlə görüşən və Onun xeyir-duasını alan redaksiya heyəti aprel ayının 10-da qəzetin ilk nömrəsinin işıq üzü görməsinə nail oldu. Təsadüfi deyil ki, qəzetin ilk nömrəsinin manşetində də məhz Ulu Öndər Heydər Əliyevin təbriki yer almışdı. Dahi şəxsiyyətin məsləhətləri, Onun siyasi sistemin inkişafı və ölkəmizdə mövcud problemlərin aradan qaldırılması ilə bağlı dəyərli fikirləri “Yeni Azərbaycan”ın ideya mənbəyini və fəaliyyət istiqamətini təşkil etdi. İlk gündən partiyanın və onun ətrafında birləşməyə başlayan onminlərlə insanın real tribunasına çevrilən, ölkə həqiqətlərini ictimaiyyətə doğru-dürüst çatdıran “Yeni Azərbaycan” qəzeti çox qısa zamanda böyük nüfuz qazandı, respublikada aparıcı mətbu orqanlardan biri olmağı bacardı. Siyasi konyukturanın yaratdığı əngəllərə baxmayaraq, qəzetin ilk dövrlərdə həftədə bir nömrəsi nəşr etdirilə bilirdi. Lakin ona olan marağın artması və qəzetin maddi-texniki imkanlarının genişlənməsi “Yeni Azərbaycan” qəzetinin bir müddət sonra gündəlik nəşrinə şərait yaratdı.

“Yeni Azərbaycan” qəzeti dövlətçiliyimizin və müstəqilliyimizin qorunması istiqamətində öz üzərinə düşən vəzifələri layiqincə yerinə yetirir

“Yeni Azərbaycan” qəzeti daim Heydər Əliyev ideyalarına sadiq qalaraq dövlətçiliyimizin və müstəqilliyimizin qorunması istiqamətində öz üzərinə düşən vəzifələri ləyaqətlə yerinə yetirir. Yeni Azərbaycan Partiyasının fəaliyyətini geniş şəkildə işıqlandıran qəzet ideoloji işin effektiv həyata keçirilməsində də müsbət rol oynayır. Bu gün minlərlə oxucu hər gün obyektiv və doğru xəbərləri həm də “Yeni Azərbaycan” qəzetindən alır. Jurnalistikanın dəyişməz prinsiplərinə və dövlətçiliyə, xalqımızın milli maraqlarına sadiqliyin göstəricisidir ki, siyasi əqidəsindən və baxışlarından asılı olmayaraq, ictimaiyyətin bütün kəsimlərindən olan vətəndaşlar “Yeni Azərbaycan” qəzetinə hörmətlə yanaşır, onun fəaliyyətini yüksək qiymətləndirirlər.

Bütövlükdə, “Yeni Azərbaycan” qəzeti 1993-cü ildə yaradılarkən öz qarşısına qoyduğu məqsədlərə, üzərinə götürdüyü vəzifələrə bu gün də sadiqdir. “Yeni Azərbaycan” qəzeti Ulu Öndər Heydər Əliyevin ideyalarına söykənərək Prezident İlham Əliyevin və Birinci vitse-prezident Mehriban xanım Əliyevanın rəhbərliyi ilə Azərbaycan dövlətinin inkişafı, xalqımızın rifahı yönündə həyata keçirilən siyasətə informasiya dəstəyi verir, bu siyasətin geniş ictimaiyyət arasında təbliği istiqamətində öz üzərinə düşən missiyanı layiqincə yerinə yetirməyə çalışır.

“Yeni Azərbaycan” qəzeti partiya həyatını geniş işıqlandırır

Əlbəttə, “Yeni Azərbaycan” qəzetinin bu cür populyarlıq qazanması və özünəməxsus ciddi imic formalaşdırmasında Yeni Azərbaycan Partiyasının rəhbərliyinin tövsiyələri mühüm rol oynayır. Yuxarıda vurğuladığımız kimi, qəzet partiya həyatını geniş işıqlandırır. Partiyanın bütün tədbirləri “Yeni Azərbaycan”ın səhifələrində dolğun surətdə əks olunur. Eyni zamanda, müxtəlif rubrika və layihələr çərçivəsində YAP-ın rayon və şəhər təşkilatlarının fəaliyyəti, o cümlədən partiyanın gənc və qadın üzvlərinin fikir və ideyaları ictimai rəyə geniş təqdim olunur.

Xüsusi olaraq qeyd etmək lazımdır ki, Yeni Azərbaycan Partiyasının VII qurultayında ölkə Prezidenti, partiyamızın Sədri cənab İlham Əliyev müasir dövrün reallıqları və çağırışlarına uyğun olaraq partiyanın qarşısında yeni vəzifələr qoydu. Ümumiyyətlə, Yeni Azərbaycan Partiyasının VII qurultayının əhəmiyyətindən bəhs edərkən onu da qeyd etmək lazımdır ki, YAP daxili struktur etibarilə yeni keyfiyyət dəyişikliyinə nail oldu və siyasi təşkilat olaraq daha da gücləndi. Eyni zamanda, qeyd etdiyimiz kimi, partiyamız ölkənin gələcəyi baxımdan yeni prioritet məqsəd və vəzifələri müəyyənləşdirmiş oldu, monolit siyasi güc kimi ölkənin perspektiv inkişafında da mühüm rol oynayacağını nümayiş etdirdi. Bütövlükdə, həm Yeni Azərbaycan Partiyasının fəaliyyətində, həm də ölkəmizin gələcək inkişafı baxımından yeni mərhələnin əsası qoyulmuş oldu. Əlbəttə, “Yeni Azərbaycan” qəzeti də bəhs olunan strateji məqsədlərin uğurla həyata keçirilməsi üçün ümumxalq partiyası olan YAP-ın rəsmi orqanı kimi öz üzərinə düşən vəzifələri bundan sonra da layiqincə yerinə yetirəcək.

“Yeni Azərbaycan” ölkəmizdə sağlam ictimai rəyin formalaşmasına mühüm töhfələr verir

Yeni Azərbaycan Partiyasının rəsmi orqanı olan qəzet bütövlükdə ötən illər ərzində ölkəmizin ən çox oxunan və sevilən ictimai-siyasi qəzetlərindən birinə çevrilib. “Yeni Azərbaycan” qəzeti fəaliyyət göstərdiyi illər ərzində ölkəmizdə sağlam ictimai rəyin formalaşması işinə mühüm töhfələr verib və bu gün də verməkdədir. Eyni zamanda, “Yeni Azərbaycan” qəzeti milli mətbu orqanlarımız içərisində obyektivliyi və milli-mənəvi dəyərlərimizi geniş təbliğ etməsi ilə seçilib, dünyada baş verən hadisələri analitik təfəkkürün süzgəcindən keçirərək Azərbaycan ictimaiyyətinə ötürmə missiyasını uğurla yerinə yetirib. “Yeni Azərbaycan” hazırda sayı 760 mindən çox olan Yeni Azərbaycan Partiyasının üzvləri ilə bərabər, həm də bütövlükdə Azərbaycan xalqının qəzetidir. Qəzet ümumi-kütləvi auditoriyaya müraciət edən çoxtirajlı qəzetlərdən, milli media nümunələrindən biridir.

“Yeni Azərbaycan” qəzeti dövlətin mediaya hərtərəfli qayğısını daim öz üzərində hiss edir

Bu gün milli mediamız məhz Azərbaycan Prezidentinin hərtərəfli diqqəti və qayğısı ilə əhatə olunub. Əsası Azərbaycan xalqının Ümummilli Lideri Heydər Əliyev tərəfindən qoyulmuş milli mətbuatımıza diqqət və qayğı siyasəti bu gün Prezident İlham Əliyevin rəhbərliyi ilə uğurla həyata keçirilir. Jurnalistlərin peşə nüfuzunun artırılması üçün tədbirlər həyata keçirilir, onların məişət və maddi problemlərinin həlli, redaksiyaların maddi-texniki təminatının gücləndirilməsi, media təmsilçilərinin peşəkarlığının artırılması istiqamətində ardıcıl işlər görülür. “Yeni Azərbaycan” qəzeti də digər media nümunələri kimi bu qayğını öz üzərində hiss edir.

Milli mediamız öz missiyasını təkcə kağız üzərində deyil, internet resursları üzərində də həyata keçirir. Əlbəttə ki, əgər qəzet dünyada baş verən proseslərlə ayaqlaşmaq istəyirsə, mütləq mövcud texnologiyaların imkanlarını, hazırkı operativ oxucu tələbatını nəzərə almalıdır. “Yeni Azərbaycan” qəzeti də hazırda elektron səhifəsi olan internet qəzetlərdən biridir. Həmçinin qəzetin sosial şəbəkələrdə səhifələri də fəaliyyət göstərir.

Vətən müharibəsi zamanı “Yeni Azərbaycan” qəzeti də öz fəaliyyətini ümummilli mübarizəmizin fəlsəfəsinə uyğun surətdə çevik və effektiv surətdə davam etdirdi

Xüsusilə qeyd etməliyik ki, 44 günlük Vətən müharibəsi zamanı “Yeni Azərbaycan” qəzeti də öz fəaliyyətini milli maraqlara, ümummilli mübarizəmizin fəlsəfəsinə uyğun surətdə çevik və effektiv surətdə davam etdirdi. Bu dövr ərzində hadisə və proseslərin mahiyyətinə müvafiq olaraq “Yeni Azərbaycan” qəzetinin səhifələrində analitik məqalələr, müsahibələr və ekspert rəyləri yer aldı. Eyni zamanda, Azərbaycanın haqlı mövqeyini, ardıcıl qələbələrini əks etdirən, Ermənistanın təcavüzkar simasını - işğalçı mahiyyətini, erməni yalanlarını ifşa edən faktlar və məlumatlar tərəfimizdən tirajlandı.

Bunlarla yanaşı, qəzetimizin səhifələrində Azərbaycan xalqının Müzəffər Ali Baş Komandanımıza, şanlı ordumuza qətiyyətli dəstək göstərməsi, ölkəmizdə siyasi birliyin, milli həmrəyliyin hökm sürməsi və digər məsələlərlə bağlı təhlil xarakterli yazılar və müsahibələr geniş əksini tapdı. Dünyanın nüfuzlu nəşrlərinin Azərbaycanın ardıcıl hərbi qələbələri barədə materiallarının xülasələri, gənclərin, ziyalıların mövqeyi də xüsusi rubrikalarımız vasitəsilə oxucularımıza çatdırıldı.

“Yeni Azərbaycan” bundan sonra da milli missiyasını uğurla icra etməyə çalışacaq

Gələcək planlarımıza gəldikdə isə, hər şeydən əvvəl, əsas vəzifə bir milli media nümunəsi kimi dövlətimizin informasiya təhlükəsizliyinin keşiyində durmaqdan, ölkəmizin, xalqımızın maraqlarını informasiya platformasında qorumaqdan ibarətdir. Eyni zamanda, “Yeni Azərbaycan” qəzeti olaraq kifayət qədər rəngarəng olan milli media məkanında oxucu auditoriyasının tələblərinə cavab verən informasiyalar və analitik yazılarımızla ictimai-siyasi proseslərin düzgün təhlili, ölkəmizin bütün sferalarda qazandığı nailiyyətlərin obyektiv şəkildə işıqlandırılması işində üzərimizə düşən vəzifəni bundan sonra da layiqincə yerinə yetirməyə, milli missiyamızı uğurla icra etməyə çalışacağıq.

Yeni Azərbaycan.- 2021.- 10 aprel.- S.4.