Abutalıb Səmədov: Hazırda İtaliya ölkəmizin əsas ticarət tərəfdaşlarından biridir

“Cənubi Qafqazın ən güclü dövləti olan Azərbaycanı İtaliya ilə sıx əlaqələr bağlayır. Belə ki, İtaliya ilə münasibətlərimizin inkişaf dinamikası olduqca yüksəkdir və iki ölkə arasında müxtəlif sahələr üzrə əməkdaşlıq əlaqələri daim genişlənir”. Bu fikirləri qəzetimizə açıqlamasında Azərbaycan Naminə Alyans Partiyasının sədri Abutalıb Səmədov deyib.

Partiya sədrinin sözlərinə görə, hazırda İtaliya ölkəmizin əsas ticarət tərəfdaşlarından biridir: “Azərbaycanda sənaye, tikinti, ticarət, kənd təsərrüfatı, rabitə və digər sektorlarda İtaliyanın 100-dən çox şirkəti fəaliyyət göstərir. Azərbaycan Prezidenti İlham Əliyev bu günlərdə İtaliyanın “Maire Tecnimont Group” şirkətinin rəhbərliyini videoformatda qəbul edərkən bu əməkdaşlığa yüksək qiymət verib. İtaliya şirkətinin Azərbaycanda dəyəri 1,6 milyard avrodan çox olan layihələrə cəlb edilməsi, onun Azərbaycan filialında yerli kadrların sayının 70 faizdən çox olması məmnunluqla qeyd olunub. Dövlət başçısı bildirib ki, erməni işğalından azad olunmuş ərazilərin bərpa və tikinti işlərinə yalnız dost ölkələrdən olan şirkətlər dəvət olunacaqlar və artıq ilk dəvət alanlar içərisində bir neçə İtaliya şirkəti də yer alır”.

A.Səmədov onu da əlavə edib ki, İtaliya hökuməti tərəfindən Azərbaycanın oktyabrın 30-31 tarixlərində Romada keçiriləcək “Böyük iyirmilik” (G20) ölkələrin zirvə görüşünə dəvət edilməsi də böyük önəm kəsb edir: “Bu, dövlətimizin mötəbər G20 sammitində ikinci dəfə iştirakı olacaq. 2015-ci ildə Türkiyənin dəvəti ilə Antalyada “Böyük iyirmilik” ölkələri liderlərinin sammitində də dövlət başçımız Azərbaycanı yüksək səviyyədə təmsil etmişdi”.

Qaşqay

Yeni Azərbaycan.- 2021.- 12 fevral.- S.7