Azərbaycançılıq ideologiyası xalqımızın zəngin milli-mənəvi dəyərlərinin qorunmasında müstəsna rola malikdir

Azərbaycanda milli və dini mənsubiyyətindən asılı olmayaraq, bütün vətəndaşların, bütün sosial təbəqələrin mənafeyi nəzərə alınmaqla həyata keçirilən ardıcıl siyasət ölkəmizin gücünü artırır və davamlı inkişaf üçün möhkəm zəmin formalaşdırır

Azərbaycan əlamətdar tarix ərəfəsindədir. Ölkəmiz öz müstəqilliyinin 30-cu ilini qeyd etməyə hazırlaşır. Üç onillik dövlət quruculuğu baxımından elə də böyük zaman kəsiyi deyil. Ancaq qısa müstəqillik tarixində respublikamız möhtəşəm uğurlara imza atıb. Xüsusilə, Prezident İlham Əliyevin rəhbərliyi ilə keçən son 18 ilə yaxın müddət ölkəmizin inkişafında ayrıca bir mərhələ təşkil edir. Respublikamız müstəqilliyinin 30-cu ilinə artıq yalnız regionda deyil, ümumilikdə, dünyada çəkisi və rolu artan, bütün sahələrdə sürətli tərəqqiyə nail olmuş, öz milli maraqlarının müdafiəsində və tarixi ədalətin bərpa edilməsində uğur qazanmış dövlət kimi daxil olub.

Təbii ki, uğurlar barədə söhbət açarkən onların əldə olunmasını şərtləndirən amillərə də nəzər salmaq lazımdır. Azərbaycanın qısa zaman kəsiyində real müstəqilliyə nail olmasını, özünü dünyaya güclü dövlət kimi təqdim etməsini şərtləndirən amillər hansılardır? Sualın cavabı olaraq ekspertlər çoxsaylı amillər sırasında Azərbaycan dövlətinin ideoloji əsaslarının möhkəm təməllər üzərində qurulmasının önəmini xüsusi vurğulayırlar. Məlum olduğu kimi, azərbaycançılıq müasir, müstəqil dövlətimizin ideoloji əsasını təşkil edir. Bu ideologiyanın təməlini isə 1993-cü ilin iyununda xalqın təkidli tələbi ilə ikinci dəfə respublikamızın siyasi rəhbərliyinə gələn Ulu Öndər Heydər Əliyev qoyub. Həmin dövrdə respublikamızda vəziyyət heç də ürəkaçan deyildi. AXC-“Müsavat” iqtidarının səriştəsizliyi, dövlət siyasətini korporativ maraqlar üzərində qurması ölkəmizi uçurumun kənarına gətirib çıxarmışdı. Müdrik dövlət xadimi olan Ulu Öndər Heydər Əliyev aldığı qərarlarla qısa müddətdə respublikamızdakı hərc-mərcliyi, anarxiyanı aradan qaldırmağa nail oldu, ölkə sabitliyə qovuşdu və tədricən inkişafa istiqamətləndi.

“Müstəqilliyimizin ilk illərində Azərbaycana rəhbərliyi qeyri-legitim yolla ələ keçirən AXC-“Müsavat” iqtidarının ən böyük günahı cəmiyyətimizin enerjisini parçalaması oldu. Həmin dövrdə hakimiyyətdə olan qüvvələrin apardığı siyasət cəmiyyətin ayrı-ayrı təbəqələrinin və ölkəmizdə yaşayan müxtəlif xalqların mənafeyinə qətiyyən çavab vermirdi. Bu da təbii ki, narazılıqlara yol açırdı, siyasi partiyalar arasında ziddiyyətlər günbəgün dərinləşirdi. İş o yerə çatmışdı ki, ön xətdəki silahlı birləşmələr belə ayrı-ayrı “liderlər”in ambisiyalarının girovuna çevrilmişdilər. Məkrli düşmən də bundan istifadə edərək torpaqlarımızı öz işğalı altına alırdı. Respublikada milli zəmində separatizm meyillərinin baş qaldırması da olduqca təhlükəli idi. Bütün bunların qarşısını Ulu Öndər Heydər Əliyev Öz müdrikliyi sayəsində aldı. Ulu Öndər azərbaycançılığı gənc dövlətimizin ideoloji əsas kimi müəyyənləşdirdi. Bu ideologiya vasitəsilə Ümummilli Liderimiz sosial və milli-dini mənsubiyyətindən asılı olmayaraq, ölkənin bütün vətəndaşlarını vahid amal, doğma Vətənə bağlılıq ruhunda birləşdirməyə nail oldu. Son 18 ilə yaxın müddət ərzində isə Ulu Öndərimizin layiqli siyasi varisi olan Prezident İlham Əliyev azərbaycançılıq ideologiyasını qlobal miqyasda meydana çıxan yeni çağırışları nəzərə almaqla daha da zənginləşdirib”.

Bu fikirləri “Yeni Azərbaycan”a açıqlamasında Milli Məclisin deputatı Rauf Əliyev ifadə edib. Azərbaycanın müasir mənzərəsinin qürur doğurduğunu diqqətə çatdıran R.Əliyev deyib: “Son 18 ilə yaxın müddət ərzində dövlət başçımızın siyasi iradəsi əsasında inkişafla bağlı müasir və yeni yanaşmaların ehtiva olunduğu ardıcıl tədbirlərin reallaşdırılması Azərbaycanın milli gücünü artırıb. Bəhs olunan dövrdə Azərbaycanın özünün iqtisadi müstəqilliyini tam təmin etməsi böyük nailiyyətdir. Otuz il ərzində milli iqtisadiyyatımız 3 dəfədən çox genişlənib ki, bu da bütün dünya üzrə ən yaxşı göstəricilərdən biridir. Bu gün republikamızın xarici borcu kifayət qədər aşağı səviyyədədir. Azərbaycan heç bir beynəlxalq maliyyə qurumundan, kredit təşkilatından asılı deyil, əksinə özu dünyanın ayrı-ayrı ölkələrində uğurlu investisiya siyasəti həyata keçirir. Qısa müstəqillik tarixində ölkəmizin dünya kosmos ailəsinin azsaylı üzvlərindən birinə çevrilməsi hər bir azərbaycanlı üçün son dərəcə qürurverici bir haldır. Azərbaycanın inkişafı ardıcıl və hərtərəfli səciyyə daşıyır. Ölkəmiz güclü iqtisadi əsaslar üzərində özünün siyasi müstəqilliyini də tam təmin etməyə nail olub. Biz işğalçı Ermənistanın timsalında iqtisadiyyatı çökən, investisiya cəlbediciliyini tamam itrirən bir ölkənin forpost vəziyyətə düşməsinin, siyasi asılılığının artmasının və müstəqil qərarlar vermək imkanlarının getdikcə məhdudlaşmasının şahidi oluruq. Azərbaycan isə özünü bütün dünyaya milli maraqlarını qətiyyətlə qoruyan güclü dövlət kimi təqdim edir. Bu gün dünya miqyasında respublikamızla diktat dili ilə danışa biləcək hansısa bir güc mərkəzi yoxdur. Azərbaycan öz imkanlarını təqdim etməklə regional və qlobal əməkdaşlığa sanballı töhfələr verir və bu da beynəlxalq birlik tərəfindən yüksək dəyərləndirilir. Son 18 ilə yaxın müddət ərzində Prezident İlham Əliyev bütün səviyyələrdə ölkəmizin milli maraqlarını qətiyyətlə qoruyub. Dünyada nüfuzu getdikcə artan Azərbaycan beynəlxalq münasibətlərdə önəmli rol oynayır, qlobal iqtisadi və humanitar layihələrdə liderlik keyfiyyətləri nümayiş etdirir. Xarici ölkələrin və beynəlxalq təşkilatların rəhbərlərinin 28 May - Respublika Günü münasibətilə Prezident İlham Əliyevə təbrik məktubları ünvanlamaları respublikamızın və onun Liderinin beynəlxalq miqyasda nüfuzunun artmasını əyani şəkildə təsdiqləyir”.

R.Əliyev bildirib ki, Azərbaycanın bu kimi uğurlar qazanması dövlətimizin məqsədyönlü siyasətinin ölkəmizin reallıqlarına uyğun gələn, bütün vətəndaşların mənafeyinin qorunmasını hədəfləyən və buna görə də hamı tərəfindən qəbul olunan sağlam ideoloji əsaslara söykənməsi ilə bilavasitə bağlıdır. Milli Məclisin deputatının sözlərinə görə, Ulu Öndər Heydər Əliyevin əsasını qoyduğu və Prezident İlham Əliyevin daha da zənginləşdirdiyi azərbaycançılıq ideologiyası sayəsində ölkəmizdə unikal bir model formalaşdırıb. “Bu gün biz dünya miqyasında ksenefobiyanın, milli, dini dözümsüzlüyün şahidiyik. XXI əsrdə Avropada həyatlarını müharibələrdən, aclıqdan qorumaq üçün gələn miqrantların qarşısına çəpər çəkilməsinin, onların odun-alovun, səfalətin içinə geri göndərilməsinin məntiqini heç nə ilə izah etmək mümkün deyil. Bütün bunlarla müqayisədə Azərbaycanda sabitlik və milli həmrəylik yüksək səviyyədədir. Ölkəmiz “dünyada multikulturalizmin gələcəyi yoxdur” deyənlərə öz həyatının rəngarəngliyini təqdim edir. Azərbaycan müxtəlif milli-dini mənsubiyyətə malik insanların vahid ailə kimi mehriban yaşadıqları bir diyardır. Biz respublikamızın mədəni, dini müxtəlifliyə malik olmasını özümüzün böyük xoşbəxtliyi sanırıq. Eyni zamanda, sosial dövlət olan Azərbaycanda ədalətli resurs bölgüsü təmin edilir. Respublikamızda qayğıya ehtiyacı olan bütün vətəndaşlar dövlət dəstəyi ilə əhatə olunub. Azərbaycan dövləti daim öz vətəndaşlarının yanında olmaq nümunəsi sərgiləyir. Bir sıra çətinliklərlə müşayiət olunan qlobal pandemiya şəraitində Azərbaycan dövləti vətəndaşların sağlamlığını qorumaq, əhalinin sosial müdafiəsini təmin etmək üçün geniş əhatə dairəsinə malik proqramlar reallaşdırdı. Dövlətimizin apardığı belə xəlqi siyasət isə öz növbəsində, vətəndaş məmnunluğunu artırır. Bu gün ölkəmizin hər bir vətəndaşı çətin günlərdə ona arxa, dayaq duran, milli maraqlarımızı qətiyyətlə qoruyan, cəmiyyətdən gələn sosial sifarişləri icrasını təmin edən dövlətimizin, Prezidentimizin yanındadır”, - deyə R.Əliyev bildirib.

R.Əliyev qəzetimizə açıqlamasında onu da xüsusi olaraq nəzərə çatdırıb ki, azərbaycançılıq ideologiyası bütün ümummilli məsələlərdə xalqımızın dövlətlə yüksək həmrəyliyini, səfərbər olunmasını təmin edir. Ötən il sentyabrın 27-dən noyabrın 10-dək davam edən Vətən müharibəsində bütün dünya Azərbaycan cəmiyyətinin monolitliyinin şahidi oldu. Məlumdur ki, müharibənin ilk günlərində mənfur düşmən ölkəmizdə yaşayan xalqlar arasında nifaq salmaq üçün müəyyən cəhdlər etdi və sosial şəbəkələrdə dövriyyəyə guya “respublikamızda ön xəttə azsaylı xalqların təmsilçilərinin göndərildiyi” barədə şayiələr buraxdı. Lakin düşmənin mənfur niyyəti bu dəfə də baş tutmadı, belə feyk məlumatlar Azərbaycan cəmiyyətinin həmrəyliyinə zərrə qədər də olsun təsir göstərmədi. Rəşadətli Silahlı Qüvvələrimiz müharibədə düşməni tam kapitulyasiyaya məruz qoydu və tarixi ədaləti, özünün ərazi bütövlüyünü təmin etdi. Azərbaycanın 44 günlük müharibədə qazandığı tarixi qələbəyə ölkəmizdə yaşayan bütün xalqların təmsilçiləri öz töhfələrini verdilər.

Milli Məclisin deputatı R.Əliyevin sözlərinə görə, sadalanan bu kimi faktlar ölkəmizin inkişafında mühüm rol oynayan azərbaycançılıq ideologiyasının həmişəyaşarlılığına dəlalət edir: “Dövlətimizin gücünü artıran azərbaycançılıq ideologiyası sağlam zəminə əsaslanır. Ulu Öndər Heydər Əliyev bu ideologiyanı müstəqil Azərbaycan dövlətinin ideoloji əsası kimi müəyyənləşdirərkən ölkəmizin reallıqlarına, xalqımızın milli-mənəvi dəyərlərinə, əsrlərin dərinliyindən gələn ənənələrinə istinad etmişdi. Mən yenə də Avropa ilə Azərbaycanın müqayisəsini aparacam. Bu gün Avropada dəyərlərin aşılandığının şahidiyik. Bir sıra cəmiyyətlərdə yaşlı insanlar, yumşaq desək, çıxdaş edilirlər. Azərbaycan cəmiyyəti isə sözün yaxşı mənasında, mühafizəkar cəmiyyətdir, özünün ənənələrinə hörmətlə yanaşır, tarixi yaddaşını qoruyur və kələcəyini layiqli keçmişi üzərində qurmağa üstünlük verir. Bu kimi amillərə istinad olunmaqla müəyyənləşdirilən azərbaycançılıq ideologiyasının həmişəyaşalığı da elə bununla bağlıdır. Azərbaycançılıq kosmopolit bir ideologiya deyil, bu, özündə xalqımızın tarixi-milli xüsusiyyətlərini əks etdirən və buna görə də həyat qabiliyyəti kifayət qədər yüksək olan bir ideologiyadır”.

Mübariz ABDULLAYEV

Yeni Azərbaycan.- 2021.- 8 iyun.- S.7.