İstiqlal muzeyində 31 mart soyqırımının 91-ci ildönümü ilə bağlı tədbir keçirilib

Dünən Azərbaycan İstiqlal Muzeyinin ekspozisiyasında 31 mart Azərbaycanlıların soyqırımı gününə həsr olunan sərgi-tədbir keçirilib. Tədbiri giriş sözü ilə muzeyin direktoru Fəridə Şəmsi açaraq 91 il əvvəl baş vermiş 31 mart soyqırımının Azərbaycan tarixinin gizli saxlanılan və uzun illər özünün hüquqi və siyasi qiymətini almayan soyqırımı olduğunu deyib.

Sonra BDU-nun professoru, tarix elmləri doktoru Musa Qasımlı çıxış edərək belə bir tədbirin soyuq salonlarda deyil, muzeydə keçirilməsini müsbət qiymətləndirib. Onun sözlərinə görə, 1918-ci ilin martın 31-i o vaxta qədərki tariximizdə bizə qarşı törədilən kütləvi qırğınların zirvə nöqtəsidir: “Bu əsl soyqırımı aktıdır. Ona görə ki, bir xalq, bir millət milli və dini mənsubiyyətinə görə düşünülmüş, qərəzli və sistemli şəkildə fiziki cəhətdən məhv edilib və mənəvi təqiblərə məruz qalıb. Keçmiş sovetlər dönəmində bu vətəndaş müharibəsi, sovet hakimiyyəti uğrunda mübarizə kimi qiymətləndirilərək hafizələrə yeridilib. Bu idealogiyanın təsiri altında olub. Buna sistemli yanaşmanı tariximizə ilk dəfə Ümummilli lider Heydər Əliyev gətirdi”.

Daha sonra, Dünya Azərbaycanlılarının Həmrəyliyinə Dəstək Cəmiyyətinin sədri Tofiq Əli-zadə, AMEA-nın Bakıxanov adına Tarix İnstitutunun Qarabağ tarixi şöbəsinin müdiri, tarix elmləri doktoru, professor Qasım Hacıyev və başqaları çıxış edərək soyqırımının tarixi haqqında məlumat verməklə yanaşı tədbir iştirakçılarını keçmişimizi dərindən öyrənməyə səsləyiblər.

Prezident Qvardiyasının əsgərlərinin, Heydər Əliyev adına Ali Hərbi Məktəbin, Azərbaycan Sərhəd Qoşunlarının, Azərbaycan Ali Hərbi Dənizçilik Məktəbinin müdavimlərinin iştirakı ilə keçən tədbirdə Bül-Bül adına musiqi məktəbinin şagirdləri tərəfindən hazırlanan musiqi kompazisiyası təqdim olunub. Sonda muzeyin fondunda qorunub saxlanılan sənədlər və fotoşəkillər nümayiş olunub. Fotoxronikada 1905, 1918-ci illərdə Bakıda, Şuşada və Azərbaycanın digər rayonlarında ermənilər tərəfindən dağıdılan yaşayış məskənləri, evləri əks etdirilib.

Yeni Azərbaycan.- 2009.- 1 aprel.- S.8.