Çingiz Abdullayevin 50 illik yubileyi qeyd olunub

Dünən Azərbaycan Yazıçılar Birliyində (AYB) dünya şöhrətli yazıçı Çingiz Abdullayevin 50 illik yubileyi qeyd olunub. SİA-nın məlumatına görə, tədbiri giriş sözü ilə açan AYB-nin sədri, yazıçı Anar bildirib ki, Ç.Abdulllayev barədə çox deyilib və yazılıb. “O, Azərbaycan ədəbiyyatına gəlişi ilə necə tüğyan etdisə, 20 ildir bu zirvəni saxlaya bildi”, - deyə yazıçı Anar əlavə edib. Daha sonra tədbirdə Özbəkistanın , Belarusun, Rusiyanın ölkəmizdəki səfirləri çıxış edətək, yazıçıya yeni əsərlər yazmağı və böyük şöhrətinə şöhrət qatmağı arzulayıblar. Ölkəmizdə fəaliyyət göstərən səfirlər Ç.Abdullayevə öz ölkələrinin yazıçılar birliklərinə məxsus diplomlar və maraqlı hədiyyələr bağışlayıblar.

Tədbirdə Musiqi Akademiyasının rektoru Fərhad Bədəlbəyli də çıxış edib. Ən böyük səadətin nə şöhrət, nə də pul olduğunu deyən professor əlavə edib ki, ən böyük xoşbəxtlik Ç.Abdullayevin 50 illik yubileyində, yazıçının anası Şəfiqə xanımım iştirak etməsidir. Daha sonra kinomatoqrafçılar adından söz xalq artisti Rafiq Hüseynova verilib. R. Hüseynov öz növbəsində yazıçını təbrik edib və yeni-yeni nəaliyyətlər arzulayıb. Bundan başqa, tədbirdə bir çox şairlər və yazıçılar da çıxış ediblər.

Xatırladaq ki, Ç.Abdullayev ədəbi fəaliyyətə tələbəlik dövründən başlayıb. 1983-cü ildən dövri mətbuatda oçerk, məqalə və detektiv janrda yazdığı hekayələrlə müntəzəm çıxış edir, rus dilində yazıb-yaradır. İngilis və italyan dillərində sərbəst danışır. Əsərləri xarici ölkə xalqlarının dillərinə tərcümə olunub. Almaniyada, İrlandiyada, Fransada, Rusiyada kütləvi tirajla buraxılmış 20 milyon nüsxədə olan 600-dən çox kitabı dünyada yayılılıb. Bütün bu kitablar onu siyasi detektiv janrında yazan ən yaxşı müasir yazıçı kimi tanıtdırıb. Xidmətlərinə görə Qırmızı Bayraq ordeni və medallarla təltif olunub. Keçmiş SSRİ Yazıçılar İttifaqının nümayəndələri tərkibində Çexoslovakiya, Yuqoslaviya (1978), Bolqarıstan (1986), Danimarka (1989) və Polşada (1989) səfərlərdə olub. Ç.Abdullayev 2009-cu il aprel ayının 7-də Prezident İlham Əliyevin Sərəncamı ilə Azərbaycanın ədəbi həyatında fəal iştirakına görə “Şöhrət” ordeni ilə təltif edilib.

Yeni Azərbaycan.- 2009.- 15 aprel.- S.8.