Almaniyada Azərbaycandakı demokratik inkişafı yüksək qiymətləndirirlər

Rövşən Rzayev: Azərbaycan həqiqətlərini bütün Avropaya çatdırmaq üçün səylərimizi gücləndirməliyik

Azərbaycanla Almaniya arasında əlaqələrin inkişafında hər iki ölkənin parlamentlərinin də mühüm rolu var. Bu yaxınlarda Milli Məclisin Azərbaycan-Almaniya Parlamentlərarası Dostluq Qrupu üzvlərinin Almaniyaya səfəri də münasibətlərin tərkib hissəsidir. Qeyd edək ki, Almaniyaya millət vəkilləri Fəttah Heydərov, Rövşən Rzayev, Əhməd Vəliyev, Çingiz Əsədullayev, Fuad Muradov, Nizami İskəndərov və Fazil Mustafadan ibarət nümayəndə heyəti səfər edib. Milli Məclisin Hüquq siyasəti və dövlət quruculuğu komitəsinin sədr müavini Rövşən Rzayev qəzetimizə müsahibəsində Almaniya səfərinin uğurlu olduğunu bildirib:

- Bu səfər zamanı xeyli sayda görüşlər keçirdik. Görüşlərdə məqsəd Azərbaycan parlamenti ilə Almaniya Bundestaqı arasında yaranmış münasibətləri daha da dərinləşdirmək idi. Hər bir ünsiyyət bizim üçün vacib olduğundan görüşlərin hamısında Azərbaycan həqiqətləri, ölkəmizin inkişafı, Dağlıq Qarabağ problemi haqqında ətraflı məlumatlar verdik. Nümayəndə heyətinin üzvü olan digər millət vəkilləri də bütün görüşlərdə fəallıq nümayiş etdirərək ölkəmizlə bağlı qarşı tərəfə geniş bilgilər verdilər. Eləcə də, bəzi məsələlərlə əlaqədar almanlarla geniş fikir mübadiləsi, müzakirələr aparıldı. Almaniya Avropada böyük nüfuza malik olan dövlətdir və Azərbaycanla bu ölkənin nə qədər çox sıx əlaqələri yaranarsa, bunun faydası bir o qədər çox olar. Parlamentlərarası Dostluq Qrupu olaraq səfər çərçivəsində üzərimizə düşən vəzifələri yerinə yetirmək üçün mümkün qədər çalışdıq. Qeyd etdiyim kimi, əsas müzakirə mövzusu Dağlıq Qarabağ problemi idi. Biz Ermənistanın təcavüzü haqqında almanlara ətraflı məlumat verərək problemin beynəlxalq hüquq çərçivəsində həll edilməsinin vacibliyini vurğuladıq. Eyni zamanda, qarşı tərəfin problemlə əlaqədar suallarını cavablandırdıq.

Məlumat üçün deyim ki, bizdən əvvəl Ermənistan parlamentariləri Almaniyaya səfər etmişdilər. Almaniya Bundestaqında, bütövlükdə, Cənubi Qafqaz Dostluq Qrupu fəaliyyət göstərir və ermənilər bu qrupla da görüş keçirmişdilər. Almaniya Parlamentinin Dostluq Qrupunun üzvləri bizə müəyyən suallar verdilər ki, böyük ehtimalla onlar ermənilərin məlumatlarından qaynaqlanırdı. Azərbaycanın millət vəkilləri olaraq, bu suallara aydın cavab verməklə haqqı-ədaləti işıqlandıra bildik. Maraqlı görüşlərimizdən biri də Almaniya Xarici İşlər Nazirliyində oldu. Nazirlikdə Qafqaz Qrupunun rəhbəri ilə görüşdük. Biz bildiririk ki, Azərbaycanda bütün etnik qrupların hüquqları qorunur. Amma bu, beynəlxalq hüquqda olduğu kimi, hər bir dövlətin ərazi bütövlüyü çərçivəsində olmalıdır. Heç bir etnik qrup öz müqəddəratını həll etməklə Azərbaycanın ərazi bütövlüyünə təcavüz edə bilməz. Amma ermənilər Azərbaycan torpaqlarının 20 faizini hələ də işğal altında saxlayıblar. Bu məsələdə Azərbaycan Prezidenti İlham Əliyevin qətiyyətli mövqeyini qarşı tərəfin diqqətinə çatdırdıq. Ümumiyyətlə, vurğuladıq ki, Azərbaycanın mövqeyi beynəlxalq hüquq prinsiplərinə əsaslanır və tamamilə ədalətlidir. Biz heç bir halda dövlətimizin ərazi bütövlüyünün pozulması ilə barışmayacağıq və torpaqlarımızın bir qarışını da güzəştə getməyəcəyik. Azərbaycanın dünyada nüfuzu artır və bizim haqq səsimiz daha çox eşidilməyə başlayıb. Bu mənada inanıram ki, Dağlıq Qarabağ problemi yaxın vaxtlarda ədalətli şəkildə həll olunacaq. Təbii ki, biz bu məsələ ətrafında daim işləməliyik və Parlamentlərarası Dostluq Qruplarının bu yöndə faydalı görüşləri olur. Mən inanıram ki, Azərbaycanın haqq səsi bu gün də dünyada eşidilir. Sabah daha da çox eşidiləcək. Azərbaycanın mədəniyyəti, tarixi, bugünkü inkişafı, tolerant dövlət olması haqqında həqiqətləri dünyaya çatdırmalıyıq. Hesab edirəm ki, bu, bizim əsas işlərimizdən biri olmalıdır. Biz görüşlərimiz zamanı Azərbaycanın iqtisadi inkişafı haqqında da geniş məlumat verirdik və bildirdik ki, ölkəmiz Avropanın enerji təhlükəsizliyində mühüm rol oynayır. Bu mövzuda söhbətlərimiz zamanı almanların ölkəmizdə aqrar sahəyə investisiya yatırmaq marağını da müşahidə etdik və bu yöndə işlər davam etdiriləcək.

- Almaniyada Azərbaycan həqiqətləri haqqında geniş bilgi varmı?

- Son illər görülən işlər nəticəsində Almaniya cəmiyyəti Azərbaycan həqiqətləri haqqında müəyyən bilgilər əldə edib. Bu işlərdə səfir Pərviz Şahbazov başda olmaqla Azərbaycanın Almaniyadakı səfirliyinin fəaliyyətini xüsusi ilə qeyd etməliyəm. Bilirsiniz ki, ötən il Almaniyada Azərbaycan mədəniyyəti ili keçirilib. Bu, Avropada ilk belə böyük hadisə idi. Mədəniyyət ili çərçivəsində xeyli sayda tədbirlər olub, xalqımızın mədəniyyəti, incəsənəti haqqında alman cəmiyyətinə ətraflı məlumatlar verilib. Həmin tədbirləri Almaniya mətbuatı geniş şəkildə işıqlandırıb. Təbii ki, bütün bunlar ölkəmizin tanınmasında böyük rol oynayır. Hesab edirəm ki, belə tədbirlər başqa dövlətlərdə də keçirilməlidir.

- Millət vəkili seçildiyiniz Göygöl rayonunda vaxtilə xeyli sayda almanlar yaşayıb. Həmin almanların bu bölgədə mədəni abidələri, yaşayış məskənləri var...

- Doğrudur, vaxtilə bu bölgədə xeyli sayda alman yaşayıb. Onların yaşayışını əks etdirən abidələrin qorunması istiqamətində müəyyən işlər görülüb və görülməkdədir. Göygöldə 1854-cü ildə tikilmiş alman kilsəsi var ki, o, Almaniya dövlətinin vəsaiti hesabına ötən il bərpa edildi. O zaman almanların “Şəhər günü” deyilən bayramları olub. Biz o günü də bərpa etmişik. 1919-cu ildə o vaxtkı almanlar Yelenendorf şəhərinin 100 illiyini qeyd etmişlər. Biz ötən illər orada “Şəhər günü”nü keçirmişik. Bu ilin avqust ayında Yelenendorf-Göygöl şəhərinin 190 illiyini qeyd edəcəyik. Bu tədbirlərə Almaniyadan qonaqlar da dəvət olunur. Ümumiyyətlə, bu bölgəyə gələnlər də çoxdur. Bilirsiniz ki, indiki Göygöldə vaxtilə yaşamış almanların nəticələri də səfərdə olublar. Onlar burada alman tarixinə və mədəniyyətinə xüsusi diqqəti görürlər və ölkəmizdən xoş təəssüratla qayıdırlar.

- Azərbaycanın demokratik inkişafı Almaniyada necə qarşılanır? Xüsusi ilə ölkədə keçirilmiş referenduma münasibət necədir?

- Almaniya Azərbaycanın müstəqilliyi və ərazi bütövlüyünü tanıyan ilk dövlətlərdən biridir. Bizim sıx dostluq münasibətlərimiz var. Almaniya Cənubi Qafqazda təhlükəsizlik, sabitlik və demokratiyanın inkişafında maraqlıdır. Almaniya Azərbaycanda baş verən demokratik islahatları müsbət qiymətləndirir. Onlar hesab edirlər ki, referendumun keçirilməsi və Konstitusiyaya edilən dəyişikliklər Azərbaycan xalqının müstəqil hüququdur.

- Ümumiyyətlə, referendumun nəticələri haqqında nə deyərdiniz? Bu amil ölkəmizdə seçki təcrübəsinin, mədəniyyətinin təkmilləşdirilməsində nə dərəcədə rol oynayır?

- 18 mart tarixli referendumda Konstitusiyaya qəbul olunan dəyişikliklər hüquqi dövlət quruculuğunun möhkəmləndirilməsi, dövlətin sosial funksiyalarının artırılmasına xidmət edəcək. Qarşımızda böyük işlər dayanıb. Qanunvericiliyimizin Avropa İttifaqı ölkələrinin model və konsepsiyalarına uyğunlaşdırılmasına ehtiyacı var. Bu proses bizim Avropa ölkəsi kimi inkişafımıza və əhalimizin sosial rifahının artmasına zəmin yaradacaq.

Konstitusiyaya edilən əlavə və dəyişikliklər ölkəmizin sabit və davamlı inkişafına xidmət edəcək. Konstitusiya normaları müəyyən hallarda proqram xarakteri daşıyır. Bu cür normaların təminatı üçün zaman tələb edilir. Azərbaycanın müasir siyasi-hüquqi sistemi isə bu zaman kəsiyində sosial dövlətin inkişafına zəmanət verəcək.

- Konstitusiyaya dəyişikliklər ölkəmizin inkişafına, dövlətçiliyimizin möhkəmlənməsinə nə dərəcədə təsir göstərəcək?

- Ümummilli lider Heydər Əliyev sədrlik etdiyi Konstitusiya layihəsini hazırlayan Komissiyanın üzvlərinə tövsiyə etmişdir ki, Azərbaycanın Konstitusiyasında ümumbəşəri dəyərlər, müasir demokratik dövlətlərin konstitusiyalarında olan müddəalar öz əksini tapsın. Beləliklə, 1995-ci ildə keçirilən referendum nəticəsində biz universal bir sənəd əldə edə bilmişik. Bununla bərabər, hər bir ölkə inkişafının müəyyən bir mərhələsində keçdiyi yolu qiymətləndirir və bu inkişafa vasitələr yaradır. Azərbaycan xalqı da Əsas Qanuna təklif olunan əlavə və dəyişikliklərin əhəmiyyətini anlayaraq referendumda onlara səs verdi.

Konstitusiya çox əhəmiyyətli hüquqi və ideoloji funksiyalar daşıyır. Onun ictimai münasibətlərə müsbət təsiri var. Konstitusiyanın əsaslarını təşkil edən dövlətin - demokratik, hüquqi rejiminin təminatı üçün hüquqi mexanizmlər çoxdur. İnsanlarımız tezliklə bu vasitələrdən istifadə etmək bacarığını əldə etdikcə, Azərbaycanda demokratik mühit daha da inkişaf edəcək, dövlət isə möhkəmlənəcək.

Nardar BAYRAMLI

Yeni Azərbaycan.- 2009.- 15 aprel.- S.6.