Azərbaycanla İsveçrə arasında ikitərəfli münasibətlər yüksək səviyyədədir

Prezident İlham Əliyev İsveçrənin iqtisadi məsələləri üzrə dövlət katibi Jan-Daniel Gerberi qəbul edib

Azərbaycan Respublikasının Prezidenti İlham Əliyev dünən İsveçrənin iqtisadi məsələləri üzrə dövlət katibi, hökumətlərarası iqtisadi komissiyanın həmsədri Jan-Daniel Gerberi qəbul edib.

Jan-Daniel Gerber Dünya Bankının Azərbaycan üzrə nümayəndəsi olarkən ölkəmizdə bir neçə dəfə səfərdə olduğunu bildirib, xalqımızın Ümummilli lideri Heydər Əliyevlə görüşlərini ehtiramla xatırlayıb. O, ötən dövr ərzində Azərbaycanda çox böyük  iqtisadi inkişaf proseslərinin getdiyini və əldə olunan bütün bu nailiyyətləri Ümummilli lider Heydər Əliyevin və Prezident İlham Əliyevin misilsiz xidmətlərinin nəticəsi kimi dəyərləndirib.

Dövlətimizin başçısı Azərbaycanla İsveçrə arasında ikitərəfli münasibətlərin yüksək səviyyədə olduğunu bildirib. Prezident İlham Əliyev ölkəmizin beynəlxalq maliyyə qurumları ilə, o cümlədən Dünya Bankı ilə də səmərəli əməkdaşlıq etdiyini vurğulaıb. Dövlətimizin başçısı əminliklə qeyd edib ki, Jan-Daniel Gerberin ölkəmizə bu səfəri Azərbaycan-İsveçrə münasibətlərinin  daha da genişlənməsinə öz töhfəsini verəcək.

Yeni Azərbaycan.- 2009.- 17 aprel.- S.2.