Azərbaycanda yeni doğulan uşaqlara görə ödənilən müavinət artırılacaq

Hadı Rəcəbli: Maliyyə böhranı üzündən sosial layihələr dayandırılmayacaq

Gələn il Azərbaycanda yeni doğulan uşaqlar və analara ödənilən müavinətlərin məbləği artırıla bilər. APA-nın məlumatına görə, bunu jurnalistlərə verdiyi açıqlamasında Milli Məclisin Sosial siyasət komitəsinin sədri Hadı Rəcəbli bildirib.

H.Rəcəblinin sözlərinə görə, bu il sosial məqsədlər üçün nəzərdə tutulan vəsaitlərin artırılmasından söhbət gedə bilməz: “Buna baxmayaraq, gələn illər üçün analıq məzuniyyətlərinin ödənilən hissəsinin bir qədər artırılması Milli Məclisin gündəliyində durur. Bu məsələ qanun şəklində hazırlanır və gələcəkdə bunu etmək fikrindəyik”.

Qeyd edək ki, hazırda Azərbaycanda yeni doğulan uşaqlara verilən birdəfəlik müavinətin məbləği 50 manatdır.

Hadı Rəcəbli həmçinin deyib ki, “sosial məsələlərlə bağlı ayrılan büdcə vəsaitlərinə toxunulmayıb. Maliyyə böhranı üzündən sosial layihələr dayandırılmayacaq”. O, bildirib ki, büdcədə nəzərdə tutulmamış layihələrin icrasının dayandırılması mümkündür, amma büdcədə təsdiq olunmuş layihələr dayandırılmayacaq: “Qəbul olunmuş büdcə öz qüvvəsində qalır. Əvvəldən icrasına başlanılan bütün investisiya layihələri davam etdiriləcək. Sosial məqsədlərə ayrılan vəsait qəpiyinə qədər istifadə olunacaq”.

Yeni Azərbaycan.- 2009.- 17 aprel.- S.5.