BDU ilə Giresun Universiteti arasında niyyət sazişi imzalanıb

Dünən Bakı Dövlət Universitetində (BDU) Türkiyənin Giresun Universitetinin rektoru, professor Osman Metin Öztürkün başçılıq etdiyi nümayəndə heyəti ilə görüş olub. Nümayəndə heyətinin üzvləri Fəxri xiyabana gələrək, ulu öndər, müstəqil dövlətimizin memarı və qurucusu Heydər Əliyevin əziz xatirəsini ehtiramla yad edib, məzarı önünə gül dəstələri qoyublar. Qonaqlar görkəmli oftalmoloq alim, akademik Zərifə xanım Əliyevanın məzarı üzərinə də gül düzüblər.

Görüşdə Bakı Dövlət Universitetinin rektoru, Milli Məclisin deputatı, akademik Abel Məhərrəmov xalqımızın Ümummilli lideri, dünya şöhrətli siyasətçi və dövlət xadimi Heydər Əliyevin BDU-nun məzunu olduğunu qürur hissi ilə bildirib.

Türkiyə ilə Azərbaycanın mehriban qardaşlıq münasibətlərindən danışan rektor ulu öndər Heydər Əliyevin "Biz bir millət, iki dövlətik" kəlamını xatırladıb. Akademik A.Məhərrəmov ölkəmizin Prezidenti İlham Əliyevin təhsilin inkişafına daim böyük önəm verdiyini diqqətə çatdırıb.

Rəhbərlik etdiyi ali məktəbin beynəlxalq əlaqələri barədə məlumat verən rektor BDU ilə Türkiyə universitetləri arasında əməkdaşlığın genişləndiyini söyləyib. Giresun Universitetinin rektoru, professor Osman Metin Öztürk müasir qloballaşma şəraitində elm, təhsil sahəsində əlaqələrimizin əhəmiyyətini vurğulayıb. Türkiyənin Azərbaycandakı səfiri Hulusi Kılıç xalqlarımızın tarixi birliyindən bəhs edib. Sonra BDU ilə Türkiyənin Giresun Universiteti arasında elm və təhsil sahəsində əməkdaşlığa dair niyyət sazişi imzalanıb. Sazişdə qarşılıqlı tələbə, müəllim mübadiləsinin aparılması, xüsusilə BDU-da magistratura və doktorantura üzrə kadrların hazırlanması nəzərdə tutulur.

Niyyət sazişini BDU-nun rektoru A.Məhərrəmov və Giresun Universitetinin rektoru O.M.Öztürk imzalayıblar. Qonaqlar Bakı Dövlət Universitetinin tədris şəraiti, laboratoriyaları ilə də tanış olublar.

Yeni Azərbaycan.- 2009.-18 fevral.- S.5.