ERMƏNİSTAN SİLAHLI QÜVVƏLƏRİNİN QARADAĞLI KƏNDİNİ İŞĞAL ETMƏSİNDƏN 17 İL KEÇİB

Ermənistan hərbi birləşmələrinin Xocavənd rayonunun Qaradağlı kəndini işğal etməsindən 17 il keçib.

APA-nın məlumatına görə, Dağlıq Qarabağda yerləşən Ermənistan hərbi birləşmələri, Rusiya Silahlı Qüvvələrinin Xankəndidə dislokasiya olunan 366-cı motoatıcı alayının hərbi texnikasının və canlı qüvvəsinin dəstəyi ilə 1992-ci il fevral ayının 15-dən başlayaraq, rayonunun azərbaycanlılar yaşayan Qaradağlı kəndinə hücum ediblər. İki gün çəkən döyüşdən sonra mühasirəni qıran ermənilər fevralın 17-də kəndi işğal ediblər. İşğal zamanı Qaradağlı kəndi tamamən dağıdılıb, dinc, əliyalın, günahsız əhaliyə, uşaqlara, qadınlara və qocalara amansızcasına divan tutulub. Faciə nəticəsində Qaradağlıdan girov götürülən 117 nəfər kənd sakinindən 80-ə yaxınını xüsusi amansızlıqla qətlə yetirilib, 6 nəfər itkin düşüb, 9 nəfərin isə şahid ifadələrinə əsasən, əsir götürüldüyü sübut olunub. Şahid ifadələrinə görə, əsir götürülən azərbaycanlıların 43 nəfəri Xankəndinin 2 kilometrliyində güllələnib. Sonra isə onların bəzilərinin başları kəsilib.

Qeyd edək ki, əsir və itkin düşmüş, girov götürülmüş vətəndaşlarla əlaqədar Dövlət Komissiyasının 2008-ci il dekabrın 1-ə olan məlumatına görə, əsir, itkin düşmüş və girov götürülmüş şəxslərin sayı 4.210 nəfərdir. Onlardan 3.401 nəfəri hərbçi, 802-si isə mülki şəxsdir (7 nəfərin hərbçi və ya mülki olduğu məlum deyil). Mülki şəxslərdən 47 nəfəri itkin düşərkən yetkinlik yaşına çatmamış uşaq (16 nəfər azyaşlı qız), 256 nəfər qadın, 355 nəfər yaşlı şəxsdir (152 nəfər qadın). Əsir, itkin düşmüş 4.210 nəfərdən 783 nəfərin əsir və girov götürülməsi barədə məlumatlar daxil olub, şahid ifadələri alınıb. Əsir və girovluqdan 1.396 nəfər azad edilib. Dövlət Komissiyasına daxil olan materialların təhlili zamanı 550 nəfərin əsir və girovluqda qətlə yetirildiyi və ya müxtəlif səbəblərdən vəfat etdiyi müəyyən edilib.

Yeni Azərbaycan.- 2009.- 18 fevral .-S.4.