Sabirabad seçiciləri Konstitusiyaya təklif olunan əlavə və dəyişikliklərə səs verəcək

Bu fikir “Yeni Azərbaycan” təşviqat qrupunun üzvlərinin rayon sakinləri ilə görüşündə bir daha bəyan olunub

“Yeni Azərbaycan” təşviqat qrupunun üzvləri rayonlarda seçicilərlə görüşlərini davam etdirir. Dünən belə görüşlərin biri də Sabirabadda baş tutub. Rayon mərkəzində ictimaiyyət nümayəndələri ilə keçirilən görüşdə çıxış edən “Yeni Azərbaycan” təşviqat qrupunun rayon şöbəsinin rəhbəri Nadir Quliyev seçicilərin ötən il keçirilmiş prezident seçkilərində olduğu kimi, referendumda da yüksək fəallıq nümayiş etdirəcəklərinə əmin olduğunu bildirib: “Sabirabadlılar hər zaman dövlətçiliyimizin möhkəmlənməsində, Azərbaycanın inkişafında bu və ya başqa formada yer alıblar. Məhz bu səbəbdən əminliklə deyə bilərəm ki, Azərbaycanda iqtisadi inkişafın yeni mərhələsini təmin edəcək, hüquqi dövlət quruculuğunda növbəti mərhələ olacaq, insanlarımızın hüquq və azadlıqlarının möhkəmləndirilməsinə xidmət edəcək və mart ayının 18-də keçiriləcək referendumda hamı bir nəfər kimi təklif olunan Konstitusiya Aktının lehinə səs verəcəklər”.

Sonra çıxış edən “Yeni Azərbaycan” təşviqat qrupunun səlahiyyətli nümayəndəsi Kərim Kərimov ilk olaraq mövcud Konstitusiyanın 1995-ci ildə Ümummilli liderimiz Heydər Əliyevin rəhbərliyi ilə ümumxalq səsverməsi yolu ilə qəbul olunduğunu xatırladıb. O, bu Ana Yasanın mükəmməl bir hüquqi baza olduğunu və beynəlxalq standartlara cavab verdiyini vurğulayıb. Lakin bununla belə, natiq vurğulayıb ki, 1995-ci ildən bu yana Azərbaycan böyük inkişaf yolu keçib: “Bu gün Azərbaycan öz inkişaf sürətinə görə, dünyada liderdir. Azərbaycan Prezidenti İlham Əliyevin apardığı məqsədyönlü siyasət nəticəsində ölkəmiz gündən-günə inkişaf edir, dövlətimizin potensialı artır. Bu gün Azərbaycanda elə bir sahə tapmaq mümkün deyil ki, orada böyük, inqilabi dəyişikliklər, islahatlar aparılmasın. Bununla yanaşı, bilirsiniz ki, Azərbaycan beynəlxalq əlaqələrini genişləndirir, Avropa Şurası və BMT kimi təşkilatların tamhüquqlu üzvüdür. Təbii ki, bu təşkilatlarla əməkdaşlıq Azərbaycanın dövlət maraqlarına xidmət edir. Amma unutmamaq lazımdır ki, ölkəmiz qarşısında açılan yeni əməkdaşlıq perspektivləri, yeni imkanlar ölkəmizin qanunvericiliyində də müəyyən islahatların aparılmasını şərtləndirir. Qanunlar isə ölkə Konstitusiyasından qidalanır, qanunların əsas bazası, söykənəcəyi Azərbaycan Respublikasının Konstitusiyasıdır. Qanunlarımızı təkmilləşdirmək, yeni tələblərə uyğunlaşdırmaq üçün Konstitusiyaya dəyişikliklər etmək zamanın tələbidir. Məhz bu səbəbdən də mən hər birinizi mart ayının 18-də keçiriləcək referendumda Azərbaycan Respublikasının Konstitusiyasına təklif olunan əlavə və dəyişikliklərə səs verməyə çağırıram. Əmin ola bilərsiniz ki, bu dəyişikliklər hər bir azərbaycanlının həyat şəraitinin yaxşılaşdırılmasına, hüquq və azadlıqlarının möhkəmləndirilməsinə, dövlətimizin inkişafına imkan yaradacaq”.

Sonra çıxış edən “Yeni Azərbaycan” təşviqat qrupunun vəkili, Milli Məclisin üzvü Rüstəm Xəlilov Konstitusiyaya təklif olunan dəyişikliklərin izahatını verib. Onun sözlərinə görə, bu dəyişikliklərin hər biri xalqımızın həyat şəraitinin daha da yaxşılaşmasına, evimizdəki övladlarımızın gələcəyinin təminat altına alınmasına yönəlib: “Məsələn, Konstitusiyanın 12-ci maddəsinə təklif olunan dəyişiklikdə deyilir ki, dövlət Azərbaycan Respublikası vətəndaşlarının layiqli həyat səviyyəsinin təmin edilməsi vəzifəsini öz üzərinə götürür. Sual oluna bilər ki, niyə məhz bu gün dövlət bu addımı atır? Cavab birmənalıdır-Mövcud Konstitusiyamız qəbul olunarkən dövlətimizin imkanları bu günümüzlə müqayisədə olduqca aşağı səviyyədə idi. Lakin bu gün Azərbaycan inkişaf etdikcə, maddi imkanları artdıqca, dövlətimiz artıq vətəndaşların layiqli həyat səviyyəsi ilə təmin olunması kimi çox ağır və böyük məsuliyyəti öz üzərinə götürür. Bu isə o deməkdir ki, hər bir vətəndaşının sosial həyatının təmin olunması dövlətin başlıca məqsədidir və dövlətimiz bu məsələnin həllini prioritet hesab edir. Bundan başqa, Konstitusiyanın 17-ci maddəsinə təklif olunan dəyişiklikdə uşaq hüquqların möhkəmləndirilməsi nəzərdə tutulur. Mən əminəm ki, bu gün gələcəyimiz olacaq uşaqlarımızın həyatı, onların böyük potensiala malik bir nəsil kimi yetişməsi hamımızı narahat edir. Dövlətimiz bu narahatçılığımızı bölüşür, uşaqların gələcəyinin təminat altına alması istiqamətində indidən əməli addımlar atır”.

R.Xəlilov digər maddələr üzrə də izahatlar verib və hər bir dəyişikliyin əhəmiyyətindən danışıb.

Görüşün sonunda təşviqat qrupunun üzvləri seçiciləri maraqlandıran suallara cavab veriblər.

Növbəti görüş isə Sabirabad rayonu Kürkəndi kəndində baş tutub. Burada da seçicilərə Konstitusiyaya təklif olunan əlavə və dəyişikliklərlə bağlı əlavə məlumat verilib. Təşviqat qrupunun səlahiyyətli nümayəndəsi Kərim Kərimov Konstitusiya islahatlarının dövrümüzün tələbləri olduğunu, bu dəyişikliklərin Azərbaycan dövlətinin inkişafına xidmət etdiyini diqqətə çatdırıb. Qrupun vəkili Rüstəm Xəlilov isə dəyişikliklər barədə ətraflı məlumat verib.

Dünən “Yeni Azərbaycan” təşviqat qrupunun üzvlərinin daha bir görüşü Qaratəpə və Nizamikənd kəndlərində olub. Tədbirlərdə yerli sakinlər bir daha əmin ediblər ki, martın 18-də keçiriləcək seçkilərdə Konstitusiyaya təklif olunan əlavə və dəyişikliklərin lehinə səs verəcəklər.

Məleykə Həsənova - Sabirabad sakini, təhsil işçisi:

- Mən Referendum Aktı ilə tanış olmuşam, demək olar ki, təklif olunan dəyişikliklər Azərbaycanın mövcud reallıqlarını, iqtisadi inkişaf tempini özündə əks etdirir. Məsələn, mən 12-ci maddəyə təklif olunan dəyişikliyi misal çəkə bilərəm. Bu maddəyə təklif olunan dəyişikliyə əsasən, dövlətimiz vətəndaşlarımızın sosial vəziyyətinin daha da yaxşılaşdırılmasını bir ali məqsəd kimi müəyyənləşdirib və bu istiqamətdə fəaliyyətini daha fəal şəkildə davam etdirəcək. Ümumiyyətlə, Konstitusiyaya təklif olunan 29 dəyişikliyin hər biri Azərbaycan dövlətinin qüdrətlənməsinə, insanlarımızın həyat səviyyəsinin yüksəldilməsinə, insan hüquq və azadlıqlarının öhkəmləndirilməsinə xidmət edir. Buna görə də, təklif olunan dəyişikliklər bir azərbaycanlı kimi məni qane edir və mən bu dəyişiklikləri dəstəkləyirəm.

Urfulla Qocayev - fermer:

- Mən Yeni Azərbaycan Partiyası tərəfindən Azərbaycan Respublikası Konstitusiyasına təklif olunan əlavə və dəyişikliklərlə tanışam və düşünürəm ki, bunların hamısı dövlətimiz üçün xeyirli dəyişikliklərdir. Bu dəyişikliklərdə evdəki, baxçadakı uşaqlarımızdan tutmuş ən yaşlı ağsaqqalımıza qədər hamının vəziyyətinin yaxşılaşdırılması, hüquqlarımızın müdafiəsi sahəsində qarşıya çıxan problemlərin daha keyfiyyətli həlli öz əksini tapıb. Mən bu dəyişiklikləri dəstəkləyirəm.
Fatma Hüseynova - Sabirabad sakini, Prezident təqaüdçüsü:

- Mən dövlətimizin bizə diqqət və qayğısından razıyam, Azərbaycandakı inkişafı görürəm, ürəyim açılır. Bu inkişafın davam etməsini istəyirəm. Ona görə də, Konstitusiyaya təklif olunan əlavə və dəyişiklikləri dəstəkləyirəm. Martın 18-də keçiriləcək referendumda bu dəyişikliklərin lehinə səs verəcəyəm. Çünki bu dəyişikliklər Azərbaycanımız üçün yeni imkanlar, yeni qapılar açacaq.

Elmdar Quliyev - Axısxa türkü:

- Hesab edirəm ki, bu referendum Azərbaycanın gələcək inkişafı baxımından olduqca vacib mərhələlərdən biridir. Ona görə də, hər bir azərbaycanlı kimi mən də bu prosesdə fəal iştirak edəcəm.

Fikrət Nuriyev - Sabirabad rayonu, Nizamikənd sakini:

- Biz təhsil işçiləri olaraq, Konstitusiyaya dəyişikliklər edilməsi təşəbbüsünü alqışlayır və dəstəkləyirik. Mənim fikrimcə, bu dəyişikliklər xalqımızın güzəranının daha da yaxşılaşması, insan hüquq və azadlıqlarının möhkəmlənməsi, dövlətimizin inkişafı üçün daha yaxşı imkanlar yaradacaq. Uşaqlarımızın hüquqları ilə bağlı nəzərdə tutulan dəyişiklikləri isə xüsusilə qeyd etmək istəyirəm.

Rahib Hüseynov - Sabirabad rayonu Qaratəpə sakini:

- Əgər bu dəyişikliklər xalqımız, dövlətimiz üçün daha yaxşı gələcək vəd edirsə, mən niyə buna qarşı çıxmalıyam. Mən bu dəyişiklikləri dəstəkləyirəm, referendum günü də gedib lehinə səs verəcəyəm.

Səxavət Cəbiyev - Sabirabad rayonu, Nəsimikənd sakini:

- Bu Konstitusiya islahatları respublikamızda həyata keçirilən böyük siyasi kampaniyalardan biridir. Mənim fikrimcə, bu islahatlar xoş mərama söykənir və dövlətimizin daha da inkişafına xidmət edəcək. Bir seçici kimi mən də 18 martda seçki məntəqəsinə gedib öz mövqeyimi bildirəcəm və dəyişikliklərin lehinə səs verəcəyəm.

Əliabbas Rzayev - Sabirabad rayonu, Nərimankənd sakini:

- Mənim Konstitusiya islahatları ilə bağlı düşüncəm müsbətdir və hətta bu dəyişiklikləri zərurət hesab edirəm. Özüm də 18 martda səsvermə məntəqəsinə gedib, bu dəyişikliklərin lehinə səs verəcəyəm.

Aqşin ŞAHİNOĞL

Yeni Azərbaycan.- 2009.- 27 fevral.- S.7.