Qurtuluşdan başlanan yol

Yeni Azərbaycan Partiyasının təşkilatçılığı ilə 15 İyun - Milli Qurtuluş Gününə həsr olunmuş konfrans keçirilib

İyunun 13-də “Hyatt Regency” otelində Yeni Azərbaycan Partiyasının təşkilatçılığı ilə 15 İyun - Milli Qurtuluş Gününə həsr olunmuş “Qurtuluşdan başlanan yol” adlı konfrans keçirilib. Tədbir iştirakçıları əvvəlcə Fəxri Xiyabanda Ümummilli lider Heydər Əliyevin məzarını ziyarət ediblər.

Konfransı giriş sözü ilə açan Yeni Azərbaycan Partiyasının Sədr müavini-İcra katibi, millət vəkili Əli Əhmədov öncə tədbir iştirakçılarını bayram münasibətilə təbrik edib. O, 15 iyun tarixinin xalqımızın və dövlətimizin həyatında əhəmiyyətindən bəhs edərək bildirib ki, Milli Qurtuluş Azərbaycanın yeni mərhələdə milli dövlət quruculuğunun ideya əsası kimi çıxış edir. Onun sözlərinə görə, Azərbaycanın milli dövlətçilik ənənələrinin bərpa edilməsi və milli dövlətçiliyin möhkəmləndirilməsi istiqamətində atılan addımların qurtuluş məfkurəsinə istinad etməsi heç də təsadüfi deyil. Bu, Azərbaycanda 1990-cı illərin əvvəllərində yaranmış tarixi şəraitdə milli dövlət quruculuğunun üzləşdiyi spesifik xüsusiyyətlərlə və tarixi şərtlərlə bilavasitə əlaqədar idi.

YAP-ın Sədr müavini - İcra katibi Əli Əhmədov məhz Ulu öndər Heydər Əliyevin xilaskarlıq missiyası nəticəsində Azərbaycanın təhlükələrdən qurtulduğunu qeyd edib. 15 iyunun Azərbaycan tarixində tutduğu yerdən danışan millət vəkilinin sözlərinə görə, bu gün xalqımızın taleyində dönüş anı olub: “Hər bir xalqın tarixində onun taleyinin dönüş nöqtəsi funksiyasını yerinə yetirən günlər olur. Azərbaycan xalqının tarixində belə günlərdən biri Ulu öndər Heydər Əliyevin tarixi qayıdışından başlayan Milli Qurtuluş Günüdür. Qurtuluş məfkurəsi təkcə Azərbaycanın 1990-cı illərin əvvəlində düşdüyü bəlalardan xilas olması ilə ifadə olunmur. Heydər Əliyevin Azərbaycanda hakimiyyətə qayıdışını həm arzu edən, həm də təkidli tələbini Heydər Əliyevə ünvanlayan Azərbaycan xalqı ilk növbədə faciələri sovuşdurmaqdan ötrü Onun qətiyyətinə ehtiyac duyurdu. Amma Heydər Əliyev öz missiyasını təkcə Azərbaycanın bu bəlalardan xilas olmasında görmürdü. Ümummilli liderimiz Heydər Əliyevin hakimiyyətə qayıdışı ilə başlayan qurtuluş məfkurəsi ilk növbədə Azərbaycanı faciələrdən xilas etməklə yanaşı, ölkəmizin sürətli dinamik inkişafının da çox etibarlı təməlini yaratdı. Bu mənada, qurtuluş təkcə Azərbaycanın yaxın tarixinin keçmişi deyil, həm də Azərbaycanın bu günüdür. Azərbaycanda bugünkü sabitlik və əmin-amanlıqdır. Bundan da əhəmiyyətlisi qurtuluşun Azərbaycanın sabahı olmasındadır. Azərbaycan vətəndaşının öz gələcəyinə nikbin baxması üçün etibarlı zəminin yaranmasıdır. Qurtuluş Azərbaycanın müasir tarixinin dönüş nöqtəsi olmaqla yanaşı, həm də hər bir Azərbaycan vətəndaşının taleyində dönüş nöqtəsi olub. Ümummilli lider Heydər Əliyevin xalqımızın təkidli tələbi ilə hakimiyyətə qayıdışı müstəqil dövlətçiliyimizi anarxiyadan, parçalanmaq və məhv olmaq təhlükəsindən, iqtisadi tənəzzüldən, beynəlxalq təcriddən xilas etdi. Milli Qurtuluş Günü Azərbaycanın indiki reallıqlarının və xoşbəxt gələcəyinin rəhnidir. Ulu öndərin işləyib hazırladığı müstəqil dövlət quruculuğu konsepsiyası müasir Azərbaycan dövlətinin uğurlarının bünövrəsində dayanaraq gələcək inkişafın, misli görünməmiş uğurların əsasını qoyub”.

Əli Əhmədov Ulu öndər Heydər Əliyevin əsasını qoyduğu siyasətin bu gün Prezident İlham Əliyev tərəfindən uğurla davam etdirildiyini diqqətə çatdırıb. O qeyd edib ki, hazırda Azərbaycanın dünya birliyi tərəfindən etiraf olunan dinamik inkişafı ilk növbədə vətəndaşlarımızın maddi rifah halının yaxşılaşmasına xidmət edir, paytaxtla bərabər, regionlar da sürətli tərəqqi yolu ilə inamla addımlayır.
Konfransda Baş nazirin birinci müavini, YAP Siyasi Şurasının üzvü Yaqub Eyyubov “Qurtuluş günü” mövzusunda məruzə ilə çıxış edib. XX əsrin sonlarında xalqımızın başına gətirilən müsibətləri xatırladan Y.Eyyubov qeyd edib ki, o ağır illərdən əvvəl Azərbaycan tarixinin taleyüklü məsələlərlə dolu bir dövrü də xalqımızın müdrik oğlu Heydər Əliyevin adı ilə bağlı olub. Azərbaycanda ilk dəfə 1969-1982-ci illərdə hakimiyyətdə olan Ulu öndər xalqımızı zamanın ən çətin sınaqlarından çıxararaq, ölkənin iqtisadi, siyasi və mədəni tərəqqisinə nail olub, geniş vüsət almış inkişaf proseslərinə təkan verib. Ümummilli liderin ömrü boyu Azərbaycan xalqının rifahı naminə çalışdığını vurğulayan məruzəçi deyib ki, Heydər Əliyev keçmiş sovet dövründə dövlət təhlükəsizliyi orqanlarında ən yüksək vəzifə tutmuş və general rütbəsi almış ilk azərbaycanlı idi. Ulu öndər Heydər Əliyev hansı sahədə çalışmasından asılı olmayaraq, bacarığı, qabiliyyəti, fitri istedadı ilə diqqəti cəlb edib.

Ümummilli lider Heydər Əliyevin milli kadrların yetişməsinə həmişə böyük qayğı və diqqətlə yanaşdığını qeyd edən Baş nazirin birinci müavini, öz timsalında Ulu öndərin gənclərə münasibətinin canlı şahidi olduğunu xatırladıb. Onun sözlərinə görə, Ümummilli liderimiz milli kadrların hazırlanmasını xüsusi diqqətdə saxlayır, onların sonrakı inkişafını da izləyirdi. Məhz Heydər Əliyevin rəhbərliyi altında 13 il ardıcıl olaraq keçmiş SSRİ-nin keçici Qırmızı Bayrağına layiq görülmüş Azərbaycan geridə qalmış kənd təsərrüfatı respublikasından qabaqcıl sənaye ölkəsinə çevrildi.
Ermənistan-Azərbaycan, Dağlıq Qarabağ münaqişəsinin də Heydər Əliyev hakimiyyətdən məcburi uzaqlaşdırıldıqdan sonra baş verdiyini xatırladan Y.Eyyubov vurğulayıb ki, xalqımızın müdrik oğlu vəzifədə olarkən heç kim bu barədə danışmağa belə cürət edə bilmirdi: “1990-cı ilin yanvarında xalqımıza qarşı törədilən qanlı faciəyə dözə bilməyən Heydər Əliyev hadisələrin gərginliyinə, müxtəlif təhlükələrə baxmayaraq, Azərbaycanın Moskvadakı Daimi nümayəndəliyinə gələrək, sovet rəhbərliyinə qarşı kəskin bəyanatla çıxış etdi. Onun həmin tarixi çıxışı Azərbaycanın siyasi həyatında yeni dövrün başlandığını göstərən ilk çağırış idi”.

Onun sözlərinə görə, Ulu öndər Heydər Əliyevin qayıdışı Vətənin xilası, xalqın qurtuluşu idi. Baş nazirin birinci müavini qeyd edib ki, Ümummilli liderimiz hakimiyyətə qayıdandan cəmi bir il sonra - 1994-cü ildə dərindən düşünülmüş neft strategiyasının reallaşdırılmasını təmin edən “Əsrin müqaviləsi”nin imzalanmasına nail oldu. Bu müqavilə ölkəmizin tarixində yeni dövr açaraq, dinamik inkişafın təməlini qoydu. Müstəqilliyimizin iqtisadi bünövrəsinin möhkəmlənməsinə və Azərbaycanın bu gün dünyada bənzəri olmayan sürətlə davamlı inkişafına zəmin yaratdı.

Ulu öndər Heydər Əliyevin siyasətdə, iqtisadiyyatda və mədəniyyətdə qoyduğu izlərin heç vaxt silinməyəcəyini deyən Y.Eyyubov vurğulayıb ki, Azərbaycan xalqı unudulmaz rəhbərin xoşbəxt gələcəyimiz üçün açdığı yolla qətiyyətlə addımlayır. Məruzəçi qeyd edib ki, bu gün də mövcud iqtidarın monolit birliyi nəticəsində Ümummilli liderimizin qurub-yaratdığı azad, müstəqil, demokratik Azərbaycan Onun müəyyən etdiyi strateji xətlə inamla irəliləməkdə, inkişafını davam etdirməkdədir. Bu xətti əzmlə, dəyanətlə irəli aparan isə, Ulu öndərin siyasi varisi, praqmatik dövlət xadimi, bütün dünya miqyasında böyük hörmətə və nüfuza malik Prezident İlham Əliyevdir.

Baş nazirin birinci müavini vurğulayıb ki, dövlətimiz və xalqımızın həyatı üçün ən mühüm əhəmiyyət kəsb edən prinsipial məsələlərdə Prezident İlham Əliyev də Heydər Əliyevə xas olan möhkəm iradə və qətiyyətli mövqe nümayiş etdirir, Azərbaycan dövlətinin qüdrətini, sarsılmaz təmələ malik olduğunu öz məhsuldar fəaliyyəti ilə sübut edir: “Prezidentimizin apardığı dərin düşünülmüş, uzaqgörən daxili və xarici siyasət, Onun xalqa olan səmimi məhəbbəti və doğma Vətənimiz naminə səmərəli fəaliyyəti hər birimizdə qürur hissi oyadır. Xalqımızın firavan gələcəyinin təminatına hesablanmış praqmatik siyasi strategiya sayəsində Azərbaycan regionun lider dövlətinə çevrilib, ölkəmizin nüfuzu daha da artıb. Prezident İlham Əliyevin səriştəli idarəetmə qabiliyyətinin nəticəsidir ki, indi respublikamız iqtisadi inkişaf tempinə görə dünyanın ən qabaqcıl ölkələrindən biridir”.

Konfransda Heydər Əliyevin müəyyənləşdirdiyi neft strategiyasının həyata keçirilməsi və bu strategiyanın qazandırdığı uğurlar barədə məruzə ilə çıxış edən sənaye və energetika naziri Natiq Əliyev bildirib ki, dünya siyasət tarixinə adı əbədi həkk olunmuş Ulu öndərimizin dövlət quruculuğunun hər bir sahəsindəki səmərəli və məhsuldar fəaliyyəti xalqımıza yaxşı məlumdur: “Heydər Əliyev müdriklik, uzaqgörənlik, zəngin təcrübə və ölkə iqtisadiyyatının bütün sahələrinin müqayisəli təhlili əsasında Azərbaycanın iqtisadi dirçəlişi üçün neft sənayesinin inkişafı yolunu seçdi. Bununla da, müstəqil Azərbaycanın iqtisadiyyatı sürətli inkişaf yoluna qədəm qoydu”.

Nazirin sözlərinə görə, “Əsrin müqaviləsi”nin imzalanması heç də asan olmayıb. Sazişin imzalanmasından sonra Heydər Əliyevə qarşı xarici və daxili təzyiqlərin artmağa başladığını deyən N.Əliyev o dövrdə ölkədə sabitliyi pozmağa da cəhd göstərildiyini xatırladıb: “Sazişin həyata keçirilməməsi üçün bütün qüvvələr çalışdılar. Sazişlərin beynəlxalq səviyyədə tanınmaması üçün Xəzər dənizinin hüquqi statusu məsələsi ortaya atıldı, guya Azərbaycanın neft ehtiyatlarının tükənməsi və s. haqqında şayiələr yayılırdı. Lakin Ulu öndər Heydər Əliyev neft strategiyasının xalq üçün əhəmiyyətli və dövlət müstəqilliyini qoruyub saxlamaq üçün mühüm amil olduğunu nəzərə alaraq yolundan dönmədi və qalib gəldi. Azərbaycan hazırda bu siyasətin bəhrəsindən faydalanmaqdadır. Neft strategiyasının uğurları ilk növbədə Ümummilli lider Heydər Əliyevin yorulmaz və fədakar əməyinin nəticəsidir. Strategiyanın mərhələlərlə həyata keçirilməsi və Azərbaycanın Xəzər-Qafqaz regionunda sürətlə artan rolu ölkəmizin beynəlxalq neft mərkəzlərinin birinə çevrilməsilə nəticələnib. Cəsarətlə deyə bilərik ki, milli maraqlara söykənən neft strategiyası xalqın öz milli sərvətlərinin sahibi olmasının rəmzidir”.

Nazirin sözlərinə görə, hazırda neft strategiyası Prezident İlham Əliyev tərəfindən uğurla davam etdirilir: “Son 5 il ərzində Azərbaycan misilsiz nailiyyətlər qazanıb. Dünya ölkələri qlobal böhrana məruz qalıb. Bizimlə qonşu olan ölkələrdə sənaye istehsalı aşağı düşür, xarici maliyyə yardımlarına böyük ehtiyacları var. Prezident İlham Əliyev tərəfindən həyata keçirilən qabaqlayıcı tədbirlər nəticəsində ölkəmizdə böhranın təsiri güclü müşahidə olunmadı. Beynəlxalq təşkilatların hesabatlarında Azərbaycan iqtisadiyyatı böhrana davamlı ölkələrin sırasındadır. Azərbaycanın xarici şirkətlərlə bağladığı 30-a yaxın hasilat-pay bölgüsü sazişləri çərçivəsində indiyədək neft sənayesinə 25 milyard ABŞ dollarından artıq sərmayə qoyulub. Bunun nəticəsində Azərbaycanda neft və qaz hasilatının həcminin kəskin artımına nail olunub. Azərbaycan qısa zamanda həm maliyyə baxımından, həm də yerli resurslar baxımından özünü təmin edən ölkəyə çevrilib”.

“Şahdəniz” yatağının hazırda işləndiyini deyən N.Əliyev qeyd edib ki, 2012-ci ilədək “Şahdəniz” yatağından ildə təxminən 9 milyard kubmetr qaz və gündə 40 min barel kondensat çıxarılması gözlənilir. Hazırda isə bu yataqdan gün ərzində 4 quyu vasitəsilə 23 milyon kubmetr qaz və 6 min ton kondensat hasil olunur. 5-ci quyu bu yaxınlarda istismara veriləcək.

N.Əliyev, həmçinin, vurğulayıb ki, 2006-cı ildə istismara verilmiş Bakı-Tbilisi-Ceyhan (BTC) kəmərindən Ceyhan limanına bugünədək 80 milyon ton neft ötürülüb. Nazirin sözlərinə görə, BTC-nin gündəlik nəqletmə gücü 1 milyon bareldir: “Texniki və texnoloji tədbirlər sayəsində BTC-nin ötürücülük qabiliyyəti 20 faiz artırılıb və hazırda kəmər vasitəsilə gün ərzində 1,2 milyon barel neftin nəqli üçün imkan yaranıb. Vaxtilə bu layihə qiymətləndirilərkən 1 milyon barel həcmində götürülürdü. O vaxt rəqiblərimiz deyirdi ki, Azərbaycan bu kəməri doldura bilməz. Amma biz sübut etdik ki, Heydər Əliyev siyasəti qalib gəldi. Gələn il isə kəmərin nəqletmə gücü 1,6 milyon barelə çatdırılacaq”.

Milli Məclisin Regional məsələlər komitəsinin sədri, YAP İdarə Heyətinin üzvü Arif Rəhimzadə məruzəsində ötən əsrin 90-cı illərinin əvvəllərində Azərbaycanda gedən prosesləri xatırladaraq, səriştəsiz insanların hakimiyyətə yiyələnməsi nəticəsində baş verənləri konkret faktlarla göstərib. A.Rəhimzadə vurğulayıb ki, məhz bu cür siyasət o zamankı iqtidarı iflic vəziyyətə saldı, ölkədə vətəndaş müharibəsi başladı. Səriştəsiz rəhbərlik nəticəsində müstəqilliyimiz süquta uğramaq təhlükəsi ilə üzləşdi. Xaos və anarxiyadan cana doymuş xalqın səbir kasasını dolduran son damla isə Gəncə hadisələri oldu. Bu, AXC-Müsavat hakimiyyətinin məntiqi süqutunu yaxınlaşdıran hadisə idi.

Gəncədə baş verən faciənin təfərrüatı haqqında ətraflı məlumat verən məruzəçi qeyd edib ki, tarixin bu böhranlı məqamında xalq gözünü böyük oğlu, daim qəlbində və yaddaşında yaşatdığı Heydər Əliyevə dikmişdi: “Hamı başa düşürdü ki, xalqı bu fəlakətdən yalnız Heydər Əliyev xilas edə bilərdi. Ulu öndərin hakimiyyətə gətirilməsinin legitim yolu haqqında düşünən ziyalılar Ona yeni yaradılacaq siyasi partiyaya rəhbərlik etməyi təklif etdilər. Canı qədər sevdiyi Vətəninin və xalqının taleyinə biganə qala bilməyən Ulu öndər bu çağırışa müsbət cavab verdi. 1992-cü ilin noyabrında Naxçıvanda təsis konfransı keçirilən Yeni Azərbaycan Partiyasının digər rayonlarda təşkilatları görünməmiş sürətlə yaranırdı. Ölkədə mövcud olan vəziyyət Ulu öndərin hakimiyyətə qayıdışını və xalqın qurtuluşunu təmin etdi”.

Onun sözlərinə görə, Ümummilli liderimizin böyük uzaqgörənliklə müəyyən etdiyi strateji xətt bu gün Azərbaycanı regionun lider dövlətinə çevirib. Məhz bu xəttin uğurla həyata keçirilməsi nəticəsində respublikamızda aparılan islahatlar sürətlə davam etdirilir, paytaxtla yanaşı rayonlarda da böyük quruculuq işləri aparılır.

“Milli Qurtuluş: xaosdan sabitliyə” adlı məruzəsində Mili Məclisin Aqrar siyasət komitəsinin sədri, YAP Siyasi Şurasının üzvü Eldar İbrahimov 15 İyun - Milli Qurtuluş Gününün mahiyyəti, onun müstəqil Azərbaycan dövlətinin formalaşmasında və inkişafında rolu barədə geniş danışıb. E.İbrahimov böyük qayıdışı doğuran səbəbləri, həmin vaxt cərəyan edən hadisələrin siyasi mahiyyətini açaraq vurğulayıb ki, Ulu öndər Heydər Əliyev öz liderlik keyfiyyətləri ilə dünyanın siyasi elitasının ən uca zirvəsində duran nəhəng şəxsiyyətlərdəndir. Bu zirvədən bütöv bir xalqın - Azərbaycan xalqının dünəni, bu günü və sabahı görünür. Bu dahi şəxsiyyətin fəaliyyətinin hər səhifəsi Azərbaycanın son yarıməsrlik tarixinin mərhələləri ilə üst-üstə düşür. Ona görə də, ən yeni tariximizi Ümummilli lider Heydər Əliyevdən ayrı təsəvvür etmək mümkün deyil.
Milli Qurtuluş Günündən sonra Ümummilli lider Heydər Əliyevin hüquqi, demokratik və dünyəvi dövlət quruculuğu yolunu tutmasından, buna qədər Naxçıvanda Ali Məclisin sədri olarkən həyata keçirdiyi islahatlardan danışan komitə sədri bildirib ki, Ulu öndər demokratik Azərbaycanın gələcək inkişaf istiqamətlərinin əsasını məhz bu qədim torpağımızda başlamışdı: “Blokada şəraitində olan, heç kimdən yardım və kömək almayan, öz taleyi ilə baş-başa qalıb həddindən çox ağır şəraitdə yaşayan Naxçıvanda Heydər Əliyev gələcəyə nur kimi işıq saçmağa başladı. İlk növbədə, Naxçıvanın müdafiəsini təmin etmək məqsədi ilə Onun rəhbərliyi altında Müdafiə Komitəsi yaradıldı və erməni hücumlarına tutarlı cavablar verildi. Respublikada ilk dəfə olaraq sovet ordu hissələri bütün əmlakını qoyaraq muxtar respublikanın ərazisini tərk etdi. Qonşu Türkiyə və İranla münasibətlər normallaşdırıldı, əlaqələr genişləndirildi, Sədərəkdə “Ümid körpüsü” inşa olundu. Muxtar respublikada siyasi və iqtisadi sabitlik bərpa edildi. İlk dəfə məhz burada torpaq islahatlarına və bazar iqtisadiyyatının ayrılmaz atributu olan dövlət əmlakının özəlləşdirilməsinə başlanıldı”.

E.İbrahimov Ulu öndər Heydər Əliyevin hakimiyyətə qayıtdıqdan sonra həmin islahatları daha geniş çərçivədə tətbiq etdiyini, məhz bunun nəticəsində də bu gün ölkəmizin qüdrətli dövlətə çevrildiyini vurğulayıb.

Azərbaycanın gələcəyinin daha işıqlı və firavan göründüyünü qeyd edən natiq bunun Ulu öndərin siyasi xəttinin ardıcıl və davamlı şəkildə həyata keçirilməsi sayəsində əldə olunacağını qeyd edib.

Konfransı yekunlaşdıran YAP-ın Sədr müavini-İcra katibi Əli Əhmədov vurğulayıb ki, hakimiyyətə qayıtdıqdan sonra həyata keçirdiyi islahatlar, yeritdiyi siyasət nəticəsində Azərbaycanı bütün dünyaya tanıdan Ümummilli lider xalqımızın öz seçimində yanılmadığını sübut edib: “Sevindirici haldır ki, Ulu öndərin əsasını qoyduğu ideyalar bu gün Prezident İlham Əliyev tərəfindən uğurla həyata keçirilir, Azərbaycan xalqı Onun rəhbərliyi altında xoşbəxt gələcəyə doğru qətiyyətlə addımlayır. Qurtuluş məfkurəsi də Azərbaycan tarixində daim yaşayacaq”.

Nardar BAYRAMLI

Yeni Azərbaycan.- 2009.- 17 iyun.- S.3.