Beyləqanlılar daim dövlətçiliyimizin keşiyində dayanıblar

Rayon sakinləri martın 18-də Konstitusiya islahatlarına səs verəcəklər

“Yeni Azərbaycan” təşviqat qrupu martın 18-də keçiriləcək referendumla əlaqədar təbliğat və təşviqat kampaniyası çərçivəsində rayonlarda görüşləri davam etdirir. Növbəti görüşlər fevralın 27-i və 28-də Beyləqan rayonunda baş tutub. İlk olaraq, rayonun Dünyamalılar kəndində keçirilən görüşdə qrupun rayon şöbəsinin sədri Rəfail Pəsiyev referenduma hazırlıqla əlaqədar Beyləqanda görülən işlər barəsində ictimaiyyətə ətraflı məlumat verib, “Yeni Azərbaycan” təşviqat qrupunun Beyləqan rayon şöbəsinin göstərdiyi fəallıqdan danışıb. O qeyd edib ki, şöbənin əməkdaşları və referendum prosesinə könüllü cəlb olunmuş rayon sakinləri yerlərdə vətəndaşlarla görüşlər keçirir, təklif olunan əlavə və dəyişikliklərin tam mahiyyəti barədə məlumat verirlər.

Daha sonra R.Pəsiyev deyib ki, dünyanın bütün demokratik dövlətlərində Əsas Qanuna dəyişikliklər ümumxalq səsverməsi yolu ilə edilir. Azərbaycanda 1995-ci ildə Konstitusiya qəbul olunarkən ümumxalq səsverməsi keçirilib və Azərbaycan xalqı bu Əsas Qanunla bağlı iradəsini ortaya qoyub. Bundan başqa, 2002-ci ildə yenə də ümumxalq səsverməsi yolu ilə Konstitusiyaya dəyişiklik edilib. Bu gün isə Konstitusiyaya növbəti dəfə dəyişikliklərin edilməsi üçün referenduma hazırlıq gedir. O Beyləqan rayon sakinlərinin daim dövlətçiliyimizin keşiyində dayandıqlarını, taleyüklü məsələlərdə hər zaman öndə olduqlarını vurğulayaraq, onları xalqımız və dövlətimizin gələcəyi üçün böyük əhəmiyyət daşıyan və martın 18-də keçiriləcək referendumda fəal iştirak etməyə çağırıb.

Yeni Azərbaycan Partiyası tərəfindən Konstitusiyaya təklif olunan əlavə və dəyişikliklərin dövlətçiliyimizin möhkəmlənməsi, inkişafı baxımından mühüm əhəmiyyət kəsb etdiyini vurğulayan R.Pəsiyev, həmçinin, qeyd edib ki, bu dəyişikliklər zamanın  tələbidir: “Azərbaycan son 15 ildə böyük inkişaf yolu keçib. Bu ayrı-ayrı sahələrin inkişafında özünü açıq-aşkar göstərir. Eyni zamanda, ölkəmizin mövcud iqtisadi potensialı, siyasi sistemin də təkmilləşməsinə, güclənməsinə imkan verib. Bu gün Azərbaycan dünyanın eneri təhlükəsizliyində, eləcə də Cənubi Qafqaz regionunun inkişafında fəal rol oynayır. Azərbaycanın təşəbbüsü və birbaşa iştirakı ilə reallaşan nəhəng iqtisadi, enerji, nəqliyyat layihələri təkcə ölkəmizin deyil, eyni zamanda, regionun inkişafına şərait yaradıb. Hazırda iqtisadi inkişaf sürətinə görə dünyada lider dövlət olan Azərbaycanla bütün beynəlxalq ictimaiyyət hesablaşır. Bu gün Azərbaycan dövlətinin sahib olduğu potensial, iqtisadi güc imkan verir ki, ölkəmiz öz vətəndaşlarının layiqli həyat səviyyəsini təmin etsin. Həmçinin, qarşımıza yeni problemlər, yeni şərtlər çıxıb. Ona görə də, bütün sahələrdə olduğu kimi, hüquq sistemində də dəyişikliklər dövrün, zəmanənin diktə etdiyi zərurətdir. Bir sıra hüquqi aktların, qanunların yenidən işlənməsinə, bəzi işlək qanunlara korrektələr edilməsinə ehtiyac yaranıb. Bunun üçün isə ilk olaraq, bütün qanunların qidalandığı Azərbaycan Respublikası Konstitusiyasına da dəyişiklik etmək vacibdir. Həmçinin, Konstitusiyaya təqdim olunan layihə də məhz bu inkişafın daha da sürətləndirilməsinə, dövlətin qüdrətlənməsinə xidmət göstərir”.

Azərbaycan Respublikasının Konstitusiyasının 1995-ci ildə Ümummilli liderimiz Heydər Əliyevin başçılığı ilə hazırlandığını xatırladan vəkil Ana Yasamızın dövlətimizin inkişafında mütərəqqi rol oynadığını bildirib. Onun sözlərinə görə, qəbul olunan qanunlarımız məhz Konstitusiyamızın maddələrinin bazasında formalaşdırılır. Ona görə də, təklif olunan əlavə və dəyişikliklər zamanın tələbinə uyğun qanunların qəbulunda da müstəsna rol oynacaq. Eyni zamanda, 1995-ci ildə qəbul olunmuş Konstitusiyamızda obyektiv səbəblərdən yer almayan bir sıra yeni nüanslar da təklif olunan Konstitusiya Aktında yer alacaq: “Təklif olunan bütün dəyişikliklər vətəndaşlarımızın sosial vəziyyətinin yaxşılaşdırılmasına, insan hüquq və azadlıqlarının möhkəmlənməsinə xidmət edir. Eyni zamanda, bu dəyişiklikləri Azərbaycanın beynəlxalq münasibətlər sistemində möhkəmlənən yeri və rolu şərtləndirir. Bilirsiniz ki, Azərbaycan hazırda Avropaya inteqrasiya edir və bu məqsədlə Avropanın böyük təşkilatlarına üzv olub. Bu da yeni münasibətlər, yeni şərtlər ortaya çıxarır. Əsas Qanunumuzun bu şərtlərə uyğunlaşdırılması vacibdir”.

Növbəti görüş isə rayonun 1-ci Şahsevən kəndində olub. Burada seçicilərlə təklif olunan ayrı-ayrı dəyişikliklər barəsində danışan “Yeni Azərbaycan” təşviqat qrupunun Beyləqan rayon şöbəsinin sədri qeyd edib ki, 17-ci maddəyə təklif olunan dəyişiklikdə uşaq hüquqlarının daha da möhkəmlənməsi, uşaqlara dövlət qayğısının artırılması, uşaq əməyinin istismarına qarşı mübarizənin gücləndirilməsi nəzərdə tutulur: “Mən hesab edirəm ki, bu, Azərbaycanın gələcəyi olacaq uşaqlarımızın daha sağlam mühitdə böyüməsinə, onların peşəkar, istedadlı kadr kimi yetişməsinə şərait yaradacaq. Bundan başqa, dəyişikliklər sırasında 18-ci maddəyə təklif olunan əlavələr də var. Burada göstərilir ki, insan ləyaqətini alçaldan və ya insanpərvərlik prinsiplərinə zidd olan dinlərin və dini cərəyanların yayılması və təbliği qadağandır. Əgər nəzərə alsaq ki, bu gün bir sıra dini cərəyanlar hansısa təhlükəli fəaliyyətlərlə məşğul olmaq niyyətindədir, onda belə bir dəyişikliyin nə dərəcədə əhəmiyyətli olduğu ortaya çıxar”.

R.Pəsiyev deyib ki, dəyişiklikləri diqqətlə təhlil etdikdə, onların hər birinin nə dərəcədə əhəmiyyətli olduğunu görmək mümkündür.

Sonda Rəfail Pəsiyev seçicilərin suallarını cavablandırıb və bütün Beyləqan seçicilərini referendumda fəallıq göstərməyə çağırıb.

Qeyd edək ki, “Yeni Azərbaycan” təşviqat qrupunun üzvləri Beyləqan rayonunun Yuxarıaran, Təzəkənd, Öyrənqala kəndlərində və rayon mərkəzində də seçicilərlə görüşüb, onlara Konstitusiyaya təklif olunan əlavə və dəyişikliklər barəsində ətraflı məlumat veriblər.

Müşfiq Səfərov - Beyləqan sakini:

- Mən Referendum Aktı ilə tanışam və bu dəyişiklikləri dəstəkləyirəm. İnanıram ki, bütün bu təkliflərin hamısı Azərbaycanın inkişafına, dövlətimizin möhkəmlənməsinə, insan hüquq və azadlıqlarının artırılmasına xidmət edir.

Əlyar Həsənov - Beyləqan sakini:

- Konstitusiyaya təklif olunan əlavə və dəyişikliklər dövlətimizin inkişafına xidmət edir. Məni dini sahədə olan problemlər həmişə narahat edib. Dünyanın müxtəlif nöqtələrində dini missioner təşkilatlar hansısa dövlətdə təxribat törədir, ya da bu dini yönümlü qurumlar kamikadzelər yaradaraq dövlətlərin əleyhinə fəaliyyət göstərirlər. Azərbaycanda bu problemlərin qarşısının alınması üçün Konstitusiyaya xüsusi bəndin əlavə edilməsi məni sevindirir. Hesab edirəm ki, digər dəyişikliklər də kifayət qədər ciddi və ölkəmizin maraqlarına uyğundur.

Gülbəniz Qasımova - Beyləqan sakini:

- Konstitusiyaya təklif olunan əlavə və dəyişiklikləri dəstəkləyirəm. Martın 18-də keçiriləcək referendumda bu dəyişikliklərin lehinə səs verəcəyəm. Çünki bu dəyişikliklər Azərbaycanımız üçün inkişaf, xoşbəxtlik gətirəcək.

Baxşeyş Şirinov - “Mil” qəzetinin əməkdaşı:

- Referendumun keçirilməsinə qeyri-adi hadisə kimi yanaşmaq doğru deyil. Dünyanın hər bir yerində Əsas Qanuna dəyişikliklər edilmək üçün ümumxalq səsverməsi keçirilir və referendum günü də xalq öz rəyini, iradəsini qutuya atdığı bülletenlə bildirir. Azərbaycan da bu normal hadisəni yaşayır və əminəm ki, xalqımız bu Konstitusiya islahatlarının lehinə səs verəcək. Çünki bu referendum Azərbaycanın gələcək inkişafı baxımından olduqca vacib mərhələlərdən biridir və əhəmiyyətlidir.

Bakir Həsənov - Beyləqan sakini:

- Biz beyləqanlılar Konstitusiyaya dəyişikliklər edilməsi təşəbbüsünü dəstəkləyirik. Çünki bu islahatlar xalqımızın güzəranının daha da yaxşılaşması, insan hüquq və azadlıqlarının möhkəmlənməsi, dövlətimizin inkişafı üçün olduqca vacib və əhəmiyyətlidir.

Nüşabə Əliyeva - Beyləqan sakini:

- Mən Konstitusiyamıza təklif olunan əlavə və dəyişikliklər layihəsi ilə tanış olmuşam və şəxsən bu dəyişikliklərin edilməsi ilə bağlı ideyanı müsbət qarşılayıram. Çünki bu günə qədər xeyli problemlərlə üzləşmişik və hüquq sistemindəki boşluqlar bu problemlərin aradan qaldırılmasına imkan verməyib.

Nazim Mirzəyev - Mədəniyyət işçisi:

- Mən bu dəyişiklikləri Azərbaycanın gücləndirilməsi, iqtisadi potensialının artırılması və insanlarımızın güzəranının yaxşılaşdırılması istiqamətində atılan növbəti addım kimi qiymətləndirirəm. Təklif olunan dəyişikliyə əsasən, dövlətimiz vətəndaşlarımızın sosial vəziyyətinin daha da yaxşılaşdırılmasını bir ali məqsəd kimi müəyyənləşdirib və bu istiqamətdə fəaliyyətini daha fəal şəkildə davam etdirəcək.

Aqşin ŞAHİN

Yeni Azərbaycan.- 2009.- 1 mart.- S.5.