Moskvada Azərbaycan mədəniyyəti gecəsi keçirilib

Azərbaycan xalqının Ümummilli lideri Heydər Əliyevin anadan olmasının 86-cı ildönümü münasibətilə Rusiya Federasiyası Hökuməti yanında Maliyyə Akademiyasında “Azərbaycan mədəniyyəti” gecəsi keçirilib.

Ölkəmizin Moskvadakı səfirliyinin, Rusiyanın Azərbaycanlı Gənclər Təşkilatının (RAGT) və Heydər Əliyev Fondunun RF-dəki nümayəndəliyinin dəstəyi ilə akademiyanın Azərbaycan Klubu tərəfindən təşkil olunmuş tədbirin əvvəlində ulu öndər Heydər Əliyevin həyat və fəaliyyətindən bəhs edən sənədli film nümayiş etdirilib.

Sonra “Rush Style” rəqs qrupu “Avroviziya-2009” mahnı müsabiqəsinin azərbaycanlı iştirakçıları Aysel və Araşın repertuarına daxil olan “Always” kompozisiyasını təqdim edib. “Dostluq” ansamblının ifasında Azərbaycan milli rəqsləri, muğam triosunun çıxışı, müğənni İmranın ifasında unudulmaz Müslüm Maqomayevin repertuarından nümunələr və Bakı haqqında mahnılar səslənib.

Akademiyanın Azərbaycan klubunun sədri Anar Məmmədov ali məktəbin rəhbərliyinə və gecənin təşkilatçılarına təşəkkür edib.

Maliyyə Akademiyasının prezidenti Alla Qryaznova ulu öndərimiz Heydər Əliyevlə görüşləri və söhbətləri haqqında xatirələrini bölüşüb, əmin olduğunu bildirib ki, bütün sahələrdə inkişaf edən müasir bir ölkədə yaşayan, zəngin tarixi və mədəni ənənələrə malik olan istedadlı, qonaqpərvər, xoşniyyətli dost Azərbaycan xalqını qarşıda gözəl günlər gözləyir. O, məmnunluq hissi ilə qeyd edib ki, əsası böyük Heydər Əliyev tərəfindən qoyulmuş, Azərbaycan Prezidenti İlham Əliyev tərəfindən uğurla davam etdirilən və təkmilləşdirilən siyasi və iqtisadi sabitlik xətti gələcəyə inamla baxmağa əsas verir.

Yeni Azərbaycan.- 2009.- 15 may.- S.3.