Ermənilər indi də Xocalı soyqırımı barədə uydurmalar yayırlar

AzərTAc xəbər verir ki, Xocalı faciəsi ildönümünün yaxınlaşması erməniləri təşvişə salıb. Onlar törətdikləri soyqırımını ört-basdır etmək və dünya ictimaiyyətini çaşdırmaq, faciəyə başqa don geydirmək məqsədi ilə təbliğat kampaniyasına başlayıblar. Ermənilərin Parisdə fransız dilində nəşr olunan gündəlik mətbuat orqanında "Qarabağ" rubrikası altında dərc edilmiş yazının ruhundan görünür ki, yalanlarını doğru kimi qələmə verməkdə mahir olan ermənilər Azərbaycanın internet saytlarında, xüsusilə də Heydər Əliyev Fondunun saytında Xocalı soyqırımı ilə bağlı materialların, o cümlədən faciənin dəhşətlərini əks etdirən fotoşəkillərin yerləşdirilməsindən bərk narahatdırlar. Onlar Azərbaycan həqiqətlərini, o cümlədən Xocalı soyqırımını bütün dünya xalqlarına çatdırmaq sahəsində mühüm işlər görən Heydər Əliyev Fondunun fəaliyyətinə kölgə salmaq üçün iftiralar üzərində qurulmuş təbliğatı gücləndirirlər. Fransız oxucularını aldatmağa çalışaraq, guya bu soyqırımın azərbaycanlılar tərəfindən törədildiyi barədə cəfəng fikirlər uyduran müəllif bunların doğruluğuna inam yaratmaq üçün qondarma "Dağlıq Qarabağ Respublikası"nın xarici işlər nazirliyi" tərəfindən Xocalı hadisələri ilə bağlı buraxılmış kitabdakı məlumatlara istinad etdiyini bildirir. Soyqırımı ilə bağlı Azərbaycan saytlarında yerləşdirilən və insanları dəhşətə gətirən fotoların Xocalıda deyil, Kosovo münaqişəsi zamanı çəkildiyini iddia edir. Hətta həyasızlığı o dərəcəyə çatıb ki, oxucunu inandırmaq üçün həlak olanların geyimlərinin azərbaycanlılara məxsus olmadığını, belə fotoların serb forumunda, digər qaynar nöqtələrlə bağlı təşkil edilmiş sərgilərdə nümayiş etdirildiyini yazır.

Erməni təbliğatından hər şeyi gözləmək olar. Yazı müəllifinin 1992-ci il fevralın 25-dən 26-na keçən gecə baş vermiş hadisədən iki ay əvvəl "humanist" ermənilərin Xocalıda döyüş əməliyyatları aparacaqları barədə Azərbaycan rəhbərlərini xəbərdar etdikləri, hətta Xocalı faciəsinin hakimiyyəti ələ almağa çalışan müxalifət tərəfindən törədildiyi, 1993-cü ilə qədər Ağdamla Xocalı arasındakı ərazinin azərbaycanlıların nəzarəti altında olduğu barədə sayıqlamaları buna bariz nümunədir.

Hiss olunur ki, Azərbaycanın regionun lider dövlətinə çevrilməsi, iqtisadi və hərbi gücünün artması, dünyada mövqelərinin möhkəmlənməsi, habelə informasiya müharibəsindəki uğurları bütövlükdə dünya ermənilərinə rahatlıq vermir. Qoy olsun, bizim də istədiyimiz budur.

Yeni Azərbaycan.- 2009.- 17 yanvar.- S.6.