Şərəfli peşə sahibi

Azərbaycanda kitabxanaların inkişafı Ulu Öndər Heydər Əliyevin adı ilə bağlıdır. Dahi rəhbər kitabxanaya möhtəşəm məbədgah kimi baxırdı. Milli Kitabxanada olarkən onun kitabxana xalq, millət üçün müqəddəs bir yer, mənəviyyat, bilik, zəka mənbəyidir deməsi həmin münasibətin təzahürü idi.

Əlbətdə, alim də, aqil də məhz kitabxanadan bəhrələnən kəslər olmuşdur. Mirzə Fətəli Axundov adına Azərbaycan Milli Kitabxanası isə tam ali təhsil ocağını xatırladır. Elə savad da, bilik də məhz bu kitabxanadan başlayır. Ölkəmizin hər yerində olduğu kimi Milli Kitabxanada da yeniliklər çoxdur. Burada fərqli iş prinsipi vardır ki, bunlar da ayrı-ayrı şöbələrdə həyata keçirilir.

Belə önəmli şöbələrdən biri Analitik Elektron Məlumat Bazasının Təşkili (AEMBT) şöbəsidir. Şöbənin müdiri Sadıqova Dilşad Şaban qızıdır. Milli Kitabxananın ən layiqli, hörmətli, işinin öhdəsindən lazımınca gələn, peşəsini sevən ziyalı bir xanımdır.

O. 1955-ci ildə Ağsu rayonunda ziyalı bir ailədə dünyaya gəlib. Əslən Şamaxı şəhərindən olan Dilşad xanım Bakı şəhərində böyüyüb, boya-başa çatmışdır. 1972-ci ildə 199 saylı orta məktəbi əla qiymətlərlə bitirib. 1974-1979-cu illərdə BDU-nun kitabxanaçılıq fakültəsində ali təhsil alıb. BDU-da o, zaman Partiya Təşkilatı Komitəsində Aslan Aslanovun yanında çalışıb. 1978-ci ilin fevral ayından isə aldığı təhsillə bağlı M.F.Axundov adına Milli Kitabxanada işləməyə başlayıb.

Dilşad xanım qayğıkeş ana, sevimli həyat yoldaşı, nəvələrini sonsuz məhəbbətlə sevən cavan bir nənədir. Onun iki oğlu, dörd nəvəsi var. Övladları Emil bəy və Zaur bəy ixtisasca ali təhsilli mühəndisdirlər. Emil bəy reklam şirkətində işləyir. Zaur bəy isə AMEA-nın Respublika Seysmoloji Mərkəzində Tikinti Bərpa İşləri üzrə şöbənin müdiridir. Ömür-gün yoldaşı Nazim bəy isə AMEA-nın Geologiya İnstitutunda direktor müavinidir. Əməkdar mühəndisdir. Nəvəsi Məhərrəm Atatürk adına liseyin 4-cü sinfində oxuyur. Gözəl rəsmlər çəkir. Onun incəsənətə meyli çoxdur. Amma böyüyəndə həkim olmaq arzusundadır. Fərid bala isə H. Əliyev adına lise-yin 3-cü sinfində oxuyur. Çox ağıllı, sözü bütöv, lakin çox dələduz uşaqdır. Nuray ilə Fidan isə hələ körpədilər. Dilşad xanım duyğusal bir insandır. Uşaqlıqdan incəsənətə, poeziyaya vurğun olan Dilşad xanımın çox səmimi şeirləri də vardır. Onun şerlərini dinləyərkən bu bir neçə misranın sətiraltı mənaları diqqətimi cəlb etdi.

Pisə yaxşı deməzdim,

Düzə əyri deməzdim.

Çox acizəm, bilməzdim

Görünməyən işdi bu.

Sel gəldi nə apardı?

Yel qayanı qopardı.

Pis yaxşıya atardı,

Görünməyən işdi bu.

Tarın simi köklənib,

Gücüm, qüvvəm tükənib.

Dağ qayaya söykənib,

Görünməyən işdi bu.

Əyri düzə şər atır,

Söz bilməyən söz satır,

Şirinə zəhər qatır,

Görünməyən işdi bu.

Lalənin bağrı qandı,

Kövrək qəlbim talandı,

Deyilənlər yalandı,

Görünməyən işdi bu,

Gəl meydana çıx indi,

Şər dediyin bilindi.

Pislik qəlbdən silindi,

Görünməyən işdi bu.

Tapmacanı tapmışam,

Söz sərrafın tapmışam.

Öz-özümə yadmışam,

Görünməyən işdi bu.

Görünməyən iş nədir?

Kəsilməyən baş nədir?

Duyduqlarım hiylədir?

Danışmasam yaxşıdır

Yaxşı pisin naxşıdır.

Bu şeir parçasının hər bəndində, hər sətrində nə isə demək istəyən bu xanım əvvəllər Ölkəşünaslıq və milli biblioqrafiya şöbəsində baş kitabxanaçı, 2006-cı ildən Mədəniyyət üzrə informasiya şöbəsində müdir, 2009-cu ildən isə Analitik Elektron Məlumat Bazasının Təşkili şöbəsində müdir vəzifəsində çalışır. Ona tapşırılan şöbənin işini məsuliyyət və bacarıqla yerinə yetirir. Dilşad xanımın rəhbərlik etdiyi Analitik Elektron Məlumat BazasınınTəşkili şöbəsi M.F.Axundov adına Milli Kitabxananın müstəqil şöbəsi olaraq mədəniyyət, incəsənət, iqtisadiyyat, səhiyyə və digər sahələrdə soraq-informasiya xidməti ilə məşğul olur. Şöbə öz fəaliyyətində Azərbaycan Respublikasının qüvvədə olan qanunvericilik aktlarını, Mədəniyyət və Turizm Nazirliyinin əmr və sərəncamlarını, Milli Kitabxanamızın əsasnaməsini, Milli Kitabxana üzrə olan əmr və sərəncamları rəhbər tutur. Şöbə öz işini iki dildə -Azərbaycan və rus dilində yerinə yetirir. Şöbədə iki bölmə fəaliyyət göstərir. Analitik məlumat bazasının yaradılması bölməsi və tam-mətinli analitik yazıların veb-portalda yerləşdirilməsi bölməsi. Şöbə vəzifəsini VTLS-VİRTUA sistemi üzrə həyata keçirir.

Ümumiyyətlə şöbənin başlıca məqsədi və vəzifəsi kitabxanamıza daxil olan dövri mətbuat səhifələrindən respublikamıza aid ən dəyərli-Azərbaycan və rus dillərində olan məqalələri, respublikanın ictimai-siyasi və mədəni həyatında baş verən hadisələri, əlamətdar günləri, elmin müxtəlif sahələrinə, iqtisadiyyatına və s. sahələrə aid materialları araşdırıb ən yeni təsvir qaydasından istifadə edərək VİRTUA sistemində analitik yazılışını və tam mətnini "Elektron kataloq"da yerləşdirməkdir. "Elektron kataloq"da topladığı materiallar əsasında şöbədə ayda bir dəfə "Mədəniyyət, incəsənət və turizm haqqında yeni ədəbiyyat aid cari biblioqrafik informasiya göstəricisi hazırlanır. Göstərici vasitəsi ilə Mədəniyyət və Turizm Nazirliyinin rəhbər işçiləri, mədəniyyət sahəsində aparıcı mütəxəssislər və kitabxana oxucuları Azərbaycan mədəniyyəti və incəsənəti haqqında Milli Kitabxanaya daxil olan çap məhsulları əsasında məlumatlandırılır. Hər ay respublikanın ictimai-siyasi və mədəni həyatında baş verən hadisələrlə, əlamətdar günlərlə, yubileylərlə əlaqədar olaraq dövrü mətbuatda öz əksini tapan materialları isə ayrıca başlıq altında toplayaraq göstəricidən istifadəni asanlaşdırır. Məs: "Humanitar Əməkdaşlıq üzrə I Azərbaycan-Rusiya Forumu", "Bəhram Mansurov -100", "Eurovision" -2011, "Muğam aləmi" adlı İkinci Beynəlxalq Muğam Festivalı, "Ümumdünya Mədəniyyətlərarası Dialoq Forumu" və s. Göstəri-cidə tam mətnli məqalələrin qarşısında ulduz (*) işarəsi qoyulur" Burada əks olunan məqalələrin tam elektron mətninin Milli Kitabxananın saytı (www.anl.az <http:// www. anl.az>) və elekton kataloqu vasitəsilə açılıb oxunması tam təmin edilir. Oxucuların göstəricidən istifadəsi və bundan məmnun qalması əlbəttə ki, bir kitabxanaçı kimi məni sevindirir. Mən isə doğrudan da peşəmdən zövq alıram. Hərdən zamanın necə tez keçdiyindən belə xəbərim olmur. İşə o qədər aludə oluruq ki, deyir Dilşad xanım.

Dilşad xanım həm də Milli Kitabxanada Gender bərabərliyi və Qadınlarla iş Komissiyasının sədridir. O, Milli Kitabxananın həmkarlar təşkilatının xətti ilə əlillərə, kimsəsizlərə, və azyaşlı uşaqların cəzaçəkmə məntəqəsində maddi və mənəvi yardım göstərən xeyirxah bir işin icraçılarından biridir. Əməkdə fəallığına və M.F.Axundov adına Milli Kitabxananın ictimai-siyasi həyatında xidmətlərinə görə Dilşad xanım Sadıqova 90-cı illərdə kitabxana rəhbərliyi tərəfindən Fəxri Fərmanla təltif olunmuşdur. Arzu edirik ki, Fəxri Fərmanlarınızın sayı bundan da çox olsun. Sizə şəxsi həyatınızda, çalışdığımız bu möhtəşəm məbədgahda uğurlar arzu edirik.

Nəzmiyyə Hicran

Yeni liqa.- 2011.- 18-24 may.- S. 10.