TANINMIŞ MÜĞƏNNİ VƏFAT ETDİ

Tanınmış müğənni Rüfət Mehdiyev dünən beyinə qan sızması və insultdan vəfat edib. Müğənni gecə saat 03.00 radələrində qəflətən dünyasını dəyişib.

Qeyd edək ki, Rüfət Sabir oğlu Mehdiyev 7 iyul 1969-cu ildə Bakıda anadan olub. 26 Bakı Komissarı adına Mədəniyyət Sarayının piano sinfində (1976-1986), Azərbaycan Dövlət Universitetinin geoloji coğrafiya fakültəsində təhsil alıb (1986-1992). 1989-cu ildən musiqi ilə məşğuldur. 1992-ci ildən müğənnilik edir.

Dünən müğənninin yaşadığı Məhəmməd Hadi 29/42 ünvanında olduq. Mərhumun yas mərasiminə xeyli insan, o cümlədən sənət dostları gəlmişdilər və müğənninin qəfil ölümündən sarsılmışdılar.

Müğənni Elariz Məmmədoğlu, İlqar Sail, Nazənin, Elnur Quliyev, şairə Zemfira Əlişqızı, bəstəkar Nadir Əzimov sənət dostlarının vəfatından sarsıldıqlarını bildirdilər və onun barəsində xatirələrini bölüşdülər. Sənət dostları Rüfət Mehdiyevi zarafatcıl, şən təbiətli, təmkinli bir adam kimi tanıdıqlarını bildirdilər.

Populyar müğənni olmazdan öncə Rüfət Mehdiyevlə dostluq münasibətində olduğunu bildirən Elariz Məmmədoğlu dedi ki, onun həmin gün səhhətindən heç bir şikayəti olmayıb: “Bilmirəm həmin gün havada nə vardısa, mənim də, köməkçimin də təzyiqi yüksəlmişdi. Sonra eşitdim ki, onun beyninə qan sızıb, həkimlər də xilas edə bilməyiblər”.

Bəstəkar Nadir Əzimov yaradıcılıq əməkdaşlığından başqa, R.Mehdiyevlə ailəvi dost olduqlarını dedi: “Onunla vaxtilə bir silsilə mahnılar üzərində işləyib bir musiqi albomu buraxdırmışıq. Onun ifasında ”Darıxdım" mahnısı populyarlaşıb. Rüfət ən başlıcası bir insan kimi çox gözəl xüsusiyyətlərə malik olub. Oğlu 5-ci, qızı 3-cü sinifdə oxuyur. Allah səbr versin".

Müğənni İlqar Sail də dostunun ölüm xəbərindən ağır sarsıntı keçirdiyini dedi: “Onun bir müğənni kimi də, bir insan kimi də öz dəsti-xətti vardı. Öz problemini heç kəsə deməyi xoşlamazdı. Mən hələ də şokdayam”.

R.Mehdiyev dünən saat 14.00-da “8-ci kilometr” yaşayış massivindəki qəbristanlıqda dəfn edilib.

Allah rəhmət eləsin!

S.HİLALQIZI

Yeni müsavat.- 2011.- 2 fevral.- S. 5.