“EUROVİSİON” QALİBİNİN ATASI “YENİ MÜSAVAT”a DANIŞDI

Pərviz Qasımov: “Allah özü əmr edir ki, Eldar musiqi karyerasını davam etdirsin”

“Eurovision-2011” müsabiqəsinin qaliblərindən olan Eldar Qasımov barədə mətbuat az-çox məlumatlıdır. Amma qalibi bir dəfə də atasının dilindən tanımaq istədik. Dünya üçün, Azərbaycan üçün o, sadəcə bir qalibdir. Bəs atası Pərviz Qasımov üçün necə?

Buyurun, Pərviz bəyin suallarımıza təvazökar və səmimi cavabları ilə özünüz tanış olun. O, öncə sevincini paylaşdı:

- Təbii ki, sevincimiz hələ də davam edir. Təkcə mənimçün yox, ümumən bütün ölkə üçün. Bu qələbənin masştabı çox genişdir. Bunu qəbul etmək lazımdır.

- Qələbəni gözləyirdinizmi?

- Təbii, ümid edirdim ki, o qalib gələcək. Bunu özünə də deyirdim. Müsabiqədən əvvəl danışanda deyirdim sənin qalib gəlməni arzulayıram, ləyaqətlə çıxış edəcəyinə inanıram. Eldar çox qətiyyətli oğlandır. Qarşısına məqsəd qoyanda ona mütləq çatır. Məktəbi əla qiymətlərlə, Bakı Slavyan Universitetini qırmızı diplomla qurtarıb, magistraturaya qəbul olub. Xarici dil mənimsəmə qabiliyyəti yüksəkdir. Bir neçə dil bilir. Gözəl musiqi duyma qabiliyyəti var. Ona görə də bilirdim ki, bu işin öhdəsindən layiqincə gələcək. Amma birinci yer... Düzü, çox gözəl xəbər oldu.

- Müsabiqəni evdə izləyirdiniz?

- Bəli, evimizdə televizordan izləyirdik. Ailədən heç kim onu müsabiqədə müşayiət etməmişdi. Mən gedə bilmirdim. Evdə təmir gedirdi, başqa işlər də vardı. Sona 3 ölkə qalanda artıq bilirdim ki, biz qalibik. Amma yenə də həyəcanlı idim. Öncə azərbaycanlı, ikinci də ata kimi.

- Qələbə xəbərini televizordan aldınız, sonra dərhal özü ilə danışdınız, eləmi?

- Dərhal danışa bilmədik. Çünki orda mətbuat konfransı oldu. Müəyyən təşkilati məsələlər yoluna qoyulandan sonra telefonla danışdıq. Bir neçə saat keçdi. Danışanda da ilk sözü bu oldu ki, “biz bunun öhdəsindən gələ bildik”. Mən sevincimdən ağlayırdım.

- Bəs Eldar bu müsabiqəyə qatılma barədə necə qərara gəldi? Sizinlə məsləhətləşdimi?

- Özü qərar verdi. O, uşaqlıqdan oxuyub. Evdə o qədər tərifnamələri var ki. Hər il hansısa beynəlxalq müsabiqədə iştirak edirdi. Düzdür, professional musiqi müsabiqələri deyildi, amma həmişə birinci yeri tuturdu. Uşaq xorunda da iştirak edirdi. Ötən ilsə “Eurovision” üçün seçim turları başlayanda sənədlərini verdi və seçildi. Məncə, elə ilk gündən o, bir çoxlarının xoşuna gəlməyə də başlamışdı.

- Yəni müstəqil qərar verdi, tura qatıldı və seçildi. Ailəsinin bu məsələdə hər hansı iştirakı olmadı?

- Xeyr, o, bu qərarı verdi, bizə də dedi. Sonra da dediyim kimi, turdan keçdi. Eldar həmişə müstəqil qərarları, qətiyyətli, əzmkar hərəkətləri ilə seçilib. İstəyib, çalışıb, sonra da məqsədinə çatıb.

- Dediniz ki, məktəbdə yaxşı oxuyub. Bəs necə uşaq olub? Sakit, dalaşqan, yoxsa...?

- Çox sözəbaxan, yaxşı uşaq olub. Heç vaxt məni incitdiyini deyə bilmərəm. Özündən kiçik bir qardaşı da var. Balaca olanda anam Firəngiz xanım üçün tamaşalar hazırlayardı. 2-3-cü sinifdə oxuyurdu. Anama deyirdi, sən bu otaqdakı kresloda otur. Özü o biri otaqda hazırlaşırdı, hər iki divardan pərdə asırdı. Bəzən pərdənin bir ucunu mən, o biri ucunu qardaşı tuturdu. Çıxıb tamaşasını oynayır, alqışdan sonra da baş əyib gedirdi. Balaca tikiş maşını vardı, orda özü üçün səhnə paltarları tikirdi. Çox maraqlı uşaq idi...

- Oğlunuzun həyatı, karyerası ilə bağlı gələcək üçün nə kimi planlarınız var? Yəqin ki, artıq bu barədə oturub danışmaq imkanınız olub...

- Təbii ki. Eldar musiqi karyerasını davam etdirmək istəyir. Əgər Eldar Avropadakı musiqi yarışmasında birinci yer tutubsa, Allah özü əmr edir ki, o, bu işin arxasınca getsin. İxtisasına görə Bakı Slavyan Universitetinin beynəlxalq əlaqələr fakültəsini bitirib. Amma hər halda, qərar özünündür.

- Oğlunuzun musiqi karyerasını Azərbaycanda davam etdirməsini istəyərdinizmi?

- Əlbəttə, öz doğma vətənində davam etdirməsini istəyərəm. O, artıq Avropadakı yarışmada qalibdirsə, deməli, Azərbaycanda da bu sahədə uğurlu bir yolla davam edə bilər.

- Oğlunuz dövlət başçısı İlham Əliyevlə artıq görüşüb. Təəssüratları necədir?

- Çox isti təəssüratları var idi. Onun yaşındakı bir insan üçün böyük bir hadisə baş verib. O da hazırda bu qələbənin sevinci ilə yaşayır. Amma düzünü deyim ki, gələndən sonra mən onunla çox da uzun müddət görüşə bilməmişəm. Çünki indi işləri, görüşləri çoxdur. Məsuliyyətli bir işin öhdəsindən gəlib, bunun da yükünü çəkməlidir.

- Eldar üçün dövlət səviyyəsində nələr ediləcək? Ev, fəxri ad... verilməsi nəzərdə tutulubmu?

- Düzü, mən məsələnin bu cür qoyuluşunu qəbul etmirəm. O, bu qələbəni qazanıb. Birincisi, özü üçün, özünün musiqi zövqü üçün edib. Çünki Eldar musiqi ilə yaşayır. İkincisi də bunu bizim hamımız üçün edib. Ürəyindən gələn şeyi edib. Siz bizim ailəni, nəsli yəqin ki, tanıyırsınız. Bizim nəsildəki məşhurlar bu işi nəyə görə görüblər, bu sənəti niyə icra ediblər? Kimsə onları tərifləsin, kimsə onlara nəsə versin deyə? Yox. Onlar bu sənətlə nəfəs alıb. Eldar da onlar kimi. Bu sənəti seçib, icra edib, gənc yaşında bu cür uğura imza atıb. Onun fikirlərində, arzularında da belə şey yoxdur ki, kimsə ona nəsə versin, hansısa formada mükafatlandırsın. O, ən böyük mükafatını artıq alıb. Müğənni olmaq istəyirdi və oldu.

- Sizin nəsil haqqında bilənlər bilir. Amma bilməyənlər üçün mümkünsə bir az daha detallı məlumat verin. Eldar kimin nəvəsi, kimin nəticəsidir?

- Eldar Firəngiz Şərifovanın nəvəsidir. Firəngiz xanım da xalq artistidir, özü də xalq artistləri Abbasmirzə Şərifzadə və Mərziyyə Davudovanın qızıdır. Eldarın babası, yəni mənim atam, Firəngiz xanımın da yoldaşı Balağa Qasımov ötən il rəhmətə gedib. O da bütün həyatı boyu Musiqili Komediya Teatrının direktoru olub, Gənc Tamaşaçılar Teatrına da rəhbərlik edib. Eldar belə bir ailədən gəlib.

- Eldarın son üç ildə xaricdə təhsil alması ilə bağlı məlumatlar da vardı yanılmasaq...

- Yox, o, xaricdə yaşamayıb son 3 il. Sadəcə olaraq, DRT adlı alman təşkilatı var. Eldar alman dilini öyrənmişdi, amma bu təşkilatın filialı onun alman dilini daha da inkişaf etdirməsi üçün bir müddət Almaniyaya göndərdi. Siz onun ingilis dilində necə danışdığını eşitdiniz. Eldar almanca ingilis dilindəkindən də yaxşı danışır.

- Pərviz bəy, oğlunuz müsabiqədə El adı ilə təqdim edildi. Atası olaraq buna münasibətinizi bilmək istərdik. Sizin qoyduğunuz adla - Eldarla çıxış etsəydi, daha doğru olardımı, sizcə?

- Buna mən qərar vermirəm. Əgər bu müsabiqəyə gedirsənsə, onu da bilməlisən ki, orada qaydaları diktə edəcəklər. Futbolda necədir? Konkret qaydalar var və hamı ona tabe olur. Məncə, bu ad məsələsində də düşünülmüş bir qərar verilib. Hər şeydən əsas odur ki, ortada nəticə var. Fərqi nədir, onu Eldar adı ilə qazanıb, yoxsa El adı ilə? Onlar bu qələbəni Azərbaycana gətirib. Nigar da, Eldar da qəlbən, ruhən azərbaycanlıdır, Azərbaycanı təmsil edib, onun adını yüksəldiblər. Məncə, əsas məsələ budur.

- Gələn il bu müsabiqə Azərbaycanda keçiriləcək. Eldarın atası olaraq sizin üzərinizə hansı funksiya düşəcək?

- Düzü, mənə heç bir tapşırıq və ya təklif gəlməyib. Amma məndən asılı nə varsa, etməyə hazıram. Nigarı da Eldardan ayırmıram, ikisi də mənim balalarımdır. Dövlət məndən nə kömək istəsə, məmnuniyyətlə əlimdən gələni edərəm.

- Pərviz bəy, bayaq valideynlərinizdən danışdıq, amma sizin məsləyi soruşmadıq. Siz də incəsənət adamısınız?

- Xeyr, mən həkiməm. Həmişə də idarəetmə sahəsində çalışmışam. Amma bunun detallarına varmaq istəmirəm. Bacım da mənim kimi həkimdir. Bir məsəl var ki, təbiət övladlarda dincəlir. Mən gen informasiyalarının daşıyıcısı olmuşam (gülür).

- Eldar hələ gənc olsa da artıq fanatları yaranıb, onu sevən qızlar da yəqin ki, çoxdur. Evlənmək planı varmı yaxın vaxtlarda? Ailəsi bununla bağlı nə fikirləşir?

- Məncə, bu barədə Eldar özü fikirləşməlidir, ailəsi yox (gülür). Amma hesab edirəm ki, hələ o barədə düşünməsi üçün tezdir. Yenə də deyirəm, onun qərarlarına hörmətlə yanaşıram. Kimi sevsə, evlənəcəyi qız kimi gətirib bizimlə tanış etsə, biz ona can-başla razılıq verəcəyik. Biz valideyn olsaq da yalnız müəyyən məsələlərdə məsləhətlər verə bilərik, diktə etmək olmaz nəyisə.

Sevinc TELMANQIZI

Yeni Müsavat.- 2011.- 18 may.- S. 3.