ŞAHİN AĞABƏYLİNİN 35 YAŞI QEYD EDİLDİ

Anım törənində jurnalistin ailəsinə mənzil verilməsi və “Şahin Ağabəyli mükafatı”nın təsis edilməsi müzakirə mövzusu oldu

Bu gün mərhum jurnalist, “Milli Yol” qəzetinin və Poliqon İnformasiya Agentliyinin (pia.az) baş redaktoru Şahin Ağabəylinin 35 yaşı tamam oldu. Ölümündən düz 3 ay sonraya təsadüf edən bu günü qeyd etmək üçün düzənlənən tədbirə aparıcı qəzetlərin rəhbərləri, mərhumun digər jurnalist həmkarları qatılmışdı. Tədbirdə çıxış edənlər Şahini xoş xatirələrlə andılar, onun ölümünün böyük itki olduğunu qeyd etdilər.

Öncə mərhumun ruhu bir dəqiqəlik sükutla yad edildi. Daha sonra tədbiri açıq elan edən “Xural” qəzetinin baş redaktoru Əvəz Zeynallı Şahinin keçdiyi şərəfli ömür yolundan danışdı: “O, bizim hamımız üçün əziz dost və qardaş idi. Amma eyni zamanda işini bilən, jurnalistikaya hörmət edən və etdirən qələm adamı idi. Təbii ki, mən qarışıq, heç kim Şahinin dünyasını dəyişməsinə inana bilmir. Biz Şahinin adının yaşaması üçün əlimizdən gələni əsirgəməməliyik. Bunu üçün bir araya gəlib Şahin Ağabəyli mükafatı təsis edə bilərik. Onun ailəsinə KİVDF-nin inşa edəcəyi binadan ev almaq üçün müraciət edə bilərik. Şahinin adını əbədiləşdirmək bizim borcumuzdur”.

Daha sonra söz alan “Yeni Müsavat” qəzetinin baş redaktoru Rauf Arifoğlu Şahinin ad günündə cəmi bir dəfə iştirak etdiyini deyir: “Şahinlə çox yaxın olmağıma baxmayaraq, cəmi bir dəfə onun ad günündə iştirak etmişəm. 2003-cü ildə biz aclıq aksiyası keçirirdik; yanvarın 27-də, doğum günündə Şahin gəldi və bizə qoşuldu...

Azərbaycanlılar itkilərə öyrəşiblər; bizim hamımız müharibədən çıxmışıq, ölüm-itim görmüşük və ön hazırlığımız var... Amma belə görürəm ki, mən Şahinin ölümünə heç hazır deyiləmmiş... Biz özümüzdən gənc olan dostlarımıza bu cür baxırıq: bizdən sonra onlar barəmizdə xatirə yazıb, danışacaqlar...Lakin budur, mən Şahin barədə xatirə danışıram... Yaxşı ki, bu gün o doğuldu, bizim dostumuz olaraq yaşadı... Yerində, yolunda və yurdunda qalanlara Allah səbr və güc versin...” Rauf Arifoğlu da “Şahin Ağabəyli mükafatı” təsis etmək ideyasını dəstəklədi: “Hesab edirəm ki, hər il yanvarın 27-də bu mükafat sahiblərinə verilə bilər”.

“Azadlıq” qəzetinin baş redaktoru Qənimət Zahid də Şahinin ölümünə inanmayanlardandır: “Qara xəbərini eşidəndə inanmadım, yenə zarafat edirlər sandım. Amma xəbər dəqiqləşəndə düşündüm ki, həyatda neçə adam var ki, “öldü” xəbərinə inana bilmirsən, inanmaq istəmirsən. Şahin barəsində düşünəndə həmişə elə bilirdim ki, o məndən sonra dünyasını dəyişəcək. 10 il əslində o qədər də böyük zaman deyil, amma biz Şahinə bu zaman ərzində o qədər isinişmişdik ki, şəxsən mən onun yoxluğuna özümü inandırmadım. Mənim onun ruhu qarşısında borcum var. Bu borcu necə ödəyəcəyimi bilmirəm. Lakin çalışacağam, ödəyəm. Şahin çox maraqlı və enerjili adam idi, hətta onun yorğunluğunda da enerji vardı. Bu, çox az adamda ola bilər. Mən də o fikrə qatılıram ki, biz Şahinin adını əbədiləşdirməliyik”.

Jurnalistlərdən Eldəniz Elgün, Razi Abbasbəyli, Fikrət Fərəməzoğlu, Anar Niftəliyev, Sərdar Əlibəyli də səslənən fikirlərə qoşuldular, Şahin haqqında öz xatirələrindən danışdılar. Yazıçılardan Seymur Baycan və Qan Turalı Şahin Ağabəylinin ən müstəqil, demokrat redaktorlardan olduğunu bildirdilər.

Sonra çıxış edən “Milli Yol” qəzeti və pia.az saytının redaktoru Anar Gəraylı ölümün başqa bir həyatın başlanğıcı olduğunu dedi: “Bizə elə gəlir ki, Şahin 35 yaşında dünyasını dəyişdiyinə görə, onu bu qədər çox sevirik. Amma bu hadisə 65 yaşında da olsaydı yenə bu qədər üzüləcəkdik. Şahinin bu gün bura yığdığı adamları heç bir siyasətçi yığa bilməzdi. Bu baxımdan Şahin çox önəmli idi...”

Mərhumun qardaşı Azər Qaramanlı deyilən fikirlərə qatılaraq tədbirdə iştirak edən jurnalistlərə öz təşəkkürünü bildirdi. Sonda KİVDF-nin jurnalistlər üçün tikdirdiyi binadan mərhumun ailəsinə də mənzil verilməsi ilə bağlı müzakirələr oldu. Bu məsələ ilə Rauf Arifoğlunun məşğul olacağı bildirildi. “Şahin Ağabəyli mükafatı”nın təsis edilməsi üçün isə işçi qrupunun yaradılması qərara alındı.

Elmin BƏDƏLOV

Yeni musavat.- 2011.- 28 yanvar.- S. 6.