İsmayıllıda maraqlı gün - tarix yazan tarix müəllimləri...

“Zəfərdən yaşıl düşüncəyə” aksiyası: aqronom sahəsində dronlardan istifadə - mediatur təəssüratları

Oktyabrın 14-də Təhsil Nazirliyi tərəfindən İsmayıllı rayonuna mediatur təşkil edilib. Mediatur çərçivəsində İsmayıllı Dövlət Peşə Təhsil Mərkəzində israilli mütəxəssislər tərəfindən dronların idarə edilməsi ilə bağlı keçirilən təlim prosesi ilə tanışlıq olub, 44 günlük Vətən müharibəsində iştirak edən rayonun təhsil işçiləri ilə görüş keçirilib.

Mediaturda rayon icra hakimiyyətinin başçısi Nahid Bağırov, təhsil nazirinin müavini Firudin Qurbanov, Peşə Təhsili üzrə Dövlət Agentliyinin direktoru Valeh Mirzalıyev, media qurumlarının rəhbərləri də iştirak ediblər.

Mediatur iştirakçıları ilk öncə İsmayıllı Dövlət Peşə Təhsil Mərkəzinin maddi-texniki bazası, yaradılmış şərait, ixtisas otaqları ilə tanış olub, mərkəzdə “Dron idarəedilməsi və dəqiq aqronomluq” üzrə təlimləri izləyiblər.

Dronların idarə olunması üçün İsraildən İsmayıllıya mütəxəssis gətirilib

Daha sonra təlim iştirakçıları tərəfindən açıq sahədə dronların uçuşu həyata keçirilib, drondan istifadə qaydaları, qarşıya qoyulan məqsədlər barədə təqdimat edilib. Bildirilib ki, təlimlər Peşə Təhsili üzrə Dövlət Agentliyinin və “STEAM Azərbaycan” layihəsinin təşkilatçılığı ilə İsraildən olan mütəxəssis tərəfindən keçirilir. Qeyd edilib ki, 10 və 30 litr su tutumu olan bu dronlar dərmanlama, xəritələmə və torpağın tərkibinin müəyyən edilməsi və gübrələrdən istifadə olunması ilə bağlı məlumatların toplanması işlərini görə bilir. Hazırda İsmayıllıda təlimçilər hazırlanır, gələn ildən peşə tədris mərkəzində dronların idarə edilməsi üçün operatorların hazırlanması üzrə pilot olaraq yeni ixtisasın yaradılması nəzərdə tutulur. Bu dronlar süni intellektlə idarə olunur, insan əməyindən 10 dəfə üstündür, dəqiq aqronomluğu həyata keçirir, bir hektar sahəni 10 dəqiqə ərzində dərmanlaya bilir. Yaxın vaxtlarda kənd təsərrüfatı sahəsində çalışan fermer və sahibkarlar bu dronların fəaliyyətindən bəhrələnə biləcəklər. Bunun üçün ölkəmizdə mütəxəssislər hazırlanır.

Bundan əlavə, azərbaycanlı gənclər bir neçə il əvvəl Türkiyədə dronların idarə olunması təlimlərində iştirak ediblər. Həmin gənclər hazırda ölkəmizdə təlimçi kimi çalışırlar.

İsraildən xüsusi olaraq təlimlər üçün Azərbaycana dəvət olunan Düdik Kaufman dronların xeyli üstünlüyünün olduğunu vurğulayıb:

“Dronların idarəolunmasını öyrənmək prosesi o qədər də çətin deyil.

Dronların qiyməti ölçüsündən asılıdır. Bu texnikanın minlərlə fəaliyyəti var. Artıq 4 gündür ki, burdayam, düşünürəm ki, azərbaycanlı təlimçilərin götürmə bacarığı çox yüksəkdir və qısa zamanda bütün prosesi öyrənəcəklər".

Həmçinin qeyd edilib ki, oktyabrın 19-dək davam edəcək bu təlimlərə peşə təhsili müəssisələrində çalışan və STEAM dərslərini tədris edən, ümumilikdə, 15 müəllim qatılıb. Bildirilib ki, kənd təsərrüfatı dronları əkinçiliyin müxtəlif sahələrində istifadə edilir. Bu texnologiyanın tətbiqi nəticəsində işlərin sürəti və məhsuldarlıq faizi dəfələrlə artırıla bilər.

“Zəfərdən yaşıl düşüncəyə”

Mediatur iştirakçıları səfər çərçivəsində İsmayıllı şəhərinin mərkəzində ümummilli lider Heydər Əliyevin abidəsini ziyarət edib, önünə çiçəklər düzüblər. İştirakçılar torpaqlarımızın bütövlüyü uğrunda şəhid olan İsmayıllının qəhrəman övladlarının məzarlarını ziyarət edib, xatirələrini ehtiramla anıblar.

Daha sonra Şəhidlər Xiyabanı, həmçinin İsmayıllı şəhər 3 nömrəli məktəb-liseyin tarix müəllimi, şəhid Famil Əhmədzadənin məzarı ziyarət edilib.

Sonra mediatur iştirakçıları şəhər 3 nömrəli məktəb liseydə birinci və ikinci Qarabağ müharibələrində şəhid olan məktəbin 15 məzununun xatirəsinə tikilən guşəni ziyarət ediblər. Burada məktəblilər Vətənə, şəhidlərə həsir olunan şeirlər söyləyiblər. Təhsil Nazirliyi tərəfindən start verilən və “Zəfər Günü”nə həsr edilən “Zəfərdən yaşıl düşüncəyə” ağacəkmə kampaniyası çərçivəsində şəhid müəllim Famil Əhmədzadənin xatirəsinə onun çalışdığı 3 nömrəli məktəb liseyin həyətində ağac əkilib.

“Dərsliklərlə bağlı problem yoxdur” - nazir müavini

İsmayıllı Rayon Mədəniyyət Evində təhsil nazirinin müavini Firudin Qurbanov mediatur iştirakçılarına son illər ölkəmizdə peşə təhsilinin inkişafı istiqamətində görülən işlər barədə ətraflı məlumat verib.

Daha sona nazir müavini jurnalistlərin suallarını cavablandırarkən dərsliklə bağlı məsələyə də toxunub:

“Mən deməzdim ki, məktəblərdə dərsliklər çatışmır. Təhsil Nazirliyinin dərsliklərlə bağlı xüsusi planı var”.

Onun sözlərinə görə, çapı yenidən tələb olunan dərsliklər vaxtında çap edilir:

“Hansı dərsliklər yararsız vəziyyətə düşərsə qanunvericiliyə əsasən onlar 3-4 ildən sonra yenilənir. Bu istiqamətdə işlər daim davam edir”.

Nazir müavini qeyd edib ki, dərsliklər şagird sayına görə tirajlanır:

“Dərsliklərin hazırlanması ciddi prosesdir. Çünki vəsaitlərin hazırlanması üçün mütəxəssislərin rəyi nəzərə alınır. Prosesdə həm ali təhsil müəssisəsi, həm Dövlət İmtahan Mərkəzi, Azərbaycan Milli Elmlər Akademiyası iştirak edir. Hər bir fənnə aid dərsliklərin hazırlanmasnda həmin sahənin mütəxəssisləri iştirak edir və nəticədə dərslik ciddi ekspertizadan keçirilir”.

Vətən müharibəsində tarix yazan müəllimlər

Sonra İsmayıllıda yerləşən Mədəniyyət evində 44 günlük Vətən müharibəsində iştirak edən müəllimlərlə və gənclərin çağırışaqədərki hazırlıq fənni müəllimləri ilə görüş keçirilib. Görüşdə qazi müəllimlərin Vətən müharibəsində keçdiyi yoldan söz açılıb, onların qayğılarının daim diqqətdə qalması yönündə işlər görülməsi müzakirə edilib, qazi müəllimlərin xatirələr toplumunun yaradılması haqda təkliflər bildirilib. Qeyd olunub ki, 44 günlük Vətən müharibəsi başlayan gündən İsmayıllı rayonun xeyli sayda müəllimi ön cəbhəyə yollanıb, ən qızğın döyüşlərdə iştirak edib. Onların arasında şəhid olanı da var. Bu, tanınmış tarix müəllimi Famil Əhmədzadədir. Görüşdə şəhid müəllim Famil Əhmədzadə də daxil olmaqla bütün şəhidlərin xatirəsi 1 dəqiqəlik sükutla yad edilib.

44 günlük Vətən müharibəsi iştirakçısı, İsmayıllı rayonu Müdrü kəndi tam orta məktəbinin tarix müəllimi Surət Şıxızadə keçdiyi döyüş yolu haqda “Yeni Müsavat”a danışıb:

“Bu il ilk dəfə olaraq 9-cu sinif şagirdlərinə Zəfər tarixini tədris etməyə başlamışıq. Zəfəri yazan və onun tarixini tədris edən də yenə də biz müəllimlərik. Bu çox qürurvericidir”.

Ötən ilin sentyabrın 29-dan döyüşlərə yollanıb, Ağdərə-Tərtər istiqamətində gedən döyüşlərdə iştirak edirdim. Bir tarix müəllimi olaraq çiyinlərimdə məsuliyyətli bir yük var idi. Döyüşlərə yollananda biz bilmirdik ki, qarşıda nələr olacaq. Qarşımızda bir məqsəd var idi - işğal olunan torpaqlarımız artıq azad olunmalıdır və nəhayət ki, 30 illik ağrı acımızı yox etməli idik. Çox şükür ki, biz bu arzumuza nail olduq.

Tərtərə qəhrəman şəhər deyirlər. Orada olmaq hər an mina mərmisi ilə qarşılaşmaq demək idi. Lakin bu bizi qorxutmurdu. Hər dəfə dostlarımız şəhid olanda düşmənə nifrətimiz daha da artırdı və biz daha da irəli gedirdik.

Bildiyiniz kimi bizim rayonumuzun ən çox sayılıb-seçilən tarix müəllimi Famil Əhmədzadə Vətən müharibəsində şəhid olub. Onun itkisi, həmçinin gözümün qabağında əsgər yoldaşlarımın şəhid olması çox ağır idi. Lakin torpaqlarımızın geri qayıtması, Zəfər qazanmağımız bu ağrını qismən də olsa azalda bildi".

Surət Şıxızadə bildirib ki, arxa cəbhədə müharibə bitsə də, tarix müəllimi kimi ön cəbhədə mübarizəsi davam edir:

“Biz indi daha məsuliyyətli şəkildə şagirdlərimizi elinə-obasına bağlı şəxsiyyət kimi yetişməyə çalışır və bu yolda əlimizdən gələni edirik...

Müharibədən artıq geri dönmüşdüm. Bir müddət sonra yenidən təhsilə qayıtdım. Sinfə daxil olanda stolumun üstündə bir kağıza rast gəldim. Şagirdlərim mənim üçün belə bir məktub yazmışdılar: “Müəllim sizin üçün çox darıxmışıq”. Bu məni çox təsirləndirdi və həmin kağızı hələ də stolumun sürməsində saxlayıram".

45 yaşını qeyd edib döyüşlərə yollanan şəhid müəllim il mərasimində anıldı

Təhsil Nazirliyinin təşkil etdiyi mediatur çərçivəsində nazirlik və media nümayəndələri şəhidimizin şəhadətinin bir ilində onu anıblar.

Şəhid müəllimin evində keçirilən il mərasimində təhsil nazirinin müavini Firudin Qurbanov, İsmayıllı rayon İH-nin başçısı Nahid Bağırov, müxtəlif media təmsilçiləri iştirak ediblər.

Şəhidin yaxınları qeyd edib ki, uzun müddət 3 saylı məktəb-liseyində tarix müəllimi işləyən Famil Əhmədzadə həm də ictimai fəal, torpağını hər şeydən üstün tutan vətən övladı olub. O, ötən ilin sentyabrın 23-də 45 yaşını qeyd edib. Cəmi 4 gün sonra, Vətən müharibəsi başlayan tarixdə cəbhəyə yollanıb. Döyüşlərdə də cəsurluq nümayiş etdirən Famil Əhmədzadə oktyabrın 14-də şəhid olub.

Qeyd edək ki, Famil Əhmədzadə Vətən müharibəsində şəhid olan 20 müəllimdən biridir. O, Prezidentin sərəncamı ilə “Vətən uğrunda”, “Döyüşlərdə fərqlənməyə görə” və “Suqovuşanın işğaldan azad olunmasına görə” medalları ilə təltif olunub.

Şəhidin anası Sənubər Əhmədovanın sözlərinə görə Famil Əhmədzadə 3 dildə sərbəst danışırdı: “Çox savadlı müəllim idi. Həm məktəbi, həm də universiteti əla qiymətlərlə, qırmızı diploma bitirmişdi. Özünün çox sayda əlyazmaları var idi. Müharibəyə gedəndə həmin əlyazmaları da özü ilə aparmışdı. Çox istərdik ki, həmin əlyazmaları toparlayaq. Lakin təəssüf ki, onlarən hamısı müharibədə itdi”.

Təhsil nazirinin müavini Firudin Qurbanov Famil Əhmədzadənin çox dəyərli müəllim olduğunu deyib. Nazir müavini təklif edib ki, F.Əhmədzadə barəsində kitab çap olunsun.

Nazirliyin mətbuat xidmətinin rəhbəri Cəsarət Valehov bu təklifin çox təqdiredici olduğunu deyib: “Bu, çox yaxşı təklifdir. Ümumiyyətlə, belə bir fikirimiz var ki, 44 günlük vətən müharibəsində şəhid olan 20 müəllimimiz barədə və eyni zamanda qazi müəllimlərin xatirələrindən ibarət yaxın vaxtlarda kitab çap etdirək.

İsmayıllı rayon İH-nin başçısı Nahid Bağırov isə vurğulayıb ki, Famil Əhmədzadə çox ictimaiyyətçi insan idi. O, rayonumuzun demək olar ki, bütün tədbirlərində yaxından iştirak edirdi. Hər zaman gələcək nəsillər onu yad edəcək.

Şəhidin atası Ağaəhməd Əhmədov il mərasiminə gələn hər kəsə təşəkkürünü bildirərək qeyd edib ki, Təhsil Nazirliyi heç zaman onların ailəsini diqqətdən kənar qoymur, onların qayğıları ilə maraqlanır.

Gəray Xalidə

Yeni Müsavat.- 2021.- 16 oktyabr.- S.3.