Çox istərdim ki, davamçılarım olsun

 

Əməkdar artist Suğra Bağırzadə bu günlərdə Yeni Zelandiyanın Aukland şəhərində keçirilən Ümumdünya Floristlər Şurasının 27-ci sammitində iştirak edib. Onun təbii güllərdən hazırladığı əl işləri bu tədbirdə iki sertifikata layiq görülüb.

Suğra Bağırzadə sənət aləmində hələ ötən əsrin ortalarından - Moskvanın Böyük Akademik Teatrında Qəmbər Hüseynlinin Cücələrim mahnısı ilə çıxış edəndən tanınır. Sonradan onun ifasında bu mahnı dünyanın çox ölkələrində dolaşdı. Bu istedadlı gənc qız Azərbaycanfilm kinostudiyasında dünya kinosunun neçə-neçə qəhrəmanını doğma dilimizdə səsləndirdi. İxtisasca mühəndis olan Suğra xanım sonradan 10-a yaxın filmə çəkildi. Ulduz filmindəki Yetər obrazı onu daha da məşhurlaşdırdı. Kino aləmində durğunluq yarananda isə o, anasının çox sevdiyi güllərə bağlandı. Az sonra bu güllər onun düşüncələrini, dünyaya baxışını ifadə etmək üçün bir vasitəyə çevrildi. Güllərdən ibarət mürəkkəb kompozisiyaların ərsəyə gəlməsində ona peşəsi - mühəndis kimyaçı olması yardımçı oldu. Beləcə, o, ölkəmizdə ilk florist-rəssam kimi tanındı. Fransa, Malayziya, Sinqapur, Latviya, Rusiyada keçirilən müxtəlif beynəlxalq sərgilərdə, mötəbər tədbirlərdə iştirak edərək, ölkəmizi təmsil etdi. 2003-cü ildən isə Ümumdünya Floristika Şurasının Azərbaycanı təmsil edən ilk yeganə üzvüdür.

Bu günlərdə Əməkdar Artist florist Yeni Zelandiyanın Aukland şəhərində keçirilən Ümumdünya Floristlər Şurasının 27-ci sammitindən qayıdıb. Onunla zəngləşib səfər təəssüratlarını oxucularımızla bölüşməsini xahiş etdik.

27-ci sammitin sentyabr ayının 27-dən 30-dək davam etdiyini vurğulayan Suğra xanım bu tədbirdə dünyanın 27 ölkəsindən tanınmış floristlər dizaynerlərin iştirak etdiyini bildirdi: Sammitin şərtlərinə görə, nümayiş etdiriləcək əsərlər hər iştirakçının öz diyarına aid olmalı idi. Mən bu tədbirə ölkəmizdə yetişdirilən güllərdən hazırladığım Çəmənlik, Xoşbəxtlik səbəti Qohumlar adlandırdığım əsərlərimlə qatılmışdım. Bu əl işlərim sammitdə iki sertifikata layiq görüldü - biri sammitdəki iştirakıma görə, digəri qeyri-adi dizaynlı işlərimə görə. Onu da deyim ki, güllərlə işləmək heç asan deyil. Belə ki, mən onların hər birinin üzərində iki il çalışmışam. Suğra xanım bu səfərdə ona Bakı Şəhər Mədəniyyət Turizm İdarəsinin yardımçı olduğunu dilə gətirdi.

Ölkəmizin yeganə floristi olan Suğra Bağırzadə sammit çərçivəsində toplantılarda respublikamızın florası, həmçinin paytaxtımızda keçirilən Gül bayramı haqqında məlumat verdiyini söylədi. Dediyinə görə, belə bir bayramın keçirilməsi sammitdə böyük marağa səbəb olub. Yaxın illərdə Ümumdünya Floristlər Şurasının belə bir sammitin ölkəmizdə keçirilməyi planlaşdırılırmı? sualını cavablandıran Suğra xanım bildirdi ki, hələ bu barədə söz açmaq tezdir. Dediyinə görə, Ümumdünya Floristlər Şurasının növbəti sammiti Londonda keçiriləcək. O həmçinin ölkəmizdə bu sahə üzrə ciddi çalışanların olmadığını dilə gətirdi. Əlavə etdi ki, əgər şərait yaradılsa, o, bu sənətin sirlərini gənclərə sevə-sevə öyrədər: Çox istərdim ki, davamçılarım olsun. Hətta mən sammitin təşkilatlarına müraciət edib, ölkəmizi təmsil edəcək iştirakçıların sayını artırmağı da xahiş etmişəm. Özü ilə Yeni Zelandiyadan müxtəlif güllər gətirdiyini bildirən Suğra xanım bu səfər təəssüratlarını məhz onlarla əbədiləşdirmək niyyətindədir.

 

 

QVAMİ MƏHƏBBƏTOĞLU

 

Zaman.- 2010.- 14-15 oktyabr.- S. 8.