Şabran zəngin tarixi-arxeoloji abidələri ilə turizmin inkişafınamühüm zəmin yaradır

“Regionların sosial-iqtisadi inkişafı Dövlət Proqramı”nın Şabran rayonu ilə bağlı müddəalarının uğurla icra olunması digər sahələrdə olduğu kimi, mədəniyyətin, turizm sahəsinin inkişafına da təkan verib. Rayonda turizmin inkişafı üçün böyük potensial da var. 2007-ci ilin avqust ayında ölkə başçısı İlham Əliyev Şabranda olarkən rayonun çox geniş turizm potensialına malik olduğunu bildirib, rayonun ərazisində turizmin inkişafı ilə əlaqədar bir sıra ərazilərə baş çəkib.

Qeyd edək ki, tarix-diyarşünaslıq muzeyində qədim Şabranın tarixini əks etdirən və turistlər üçün də maraq kəsb edəcək çoxlu eksponatlar var. Abidələrə gəlincə, ümumilikdə, Şabran rayonunda 150-dək tarixi abidə var ki, onlardan ən möhtəşəmi qədim Şabran və Çıraqqala abidələridir. Son illər bu abidələrin həm mədəni irs nümunəsi, həm də turizm potensiallı məskən kimi təbliği yönündə müəyyən işlər görülür.

Rayon mərkəzinin şimal girəcəyində Şabranın qədim tarixini özündə əks etdirən və maraqlı kompozisiyaya malik “Şabran”, “Çıraqqala” kompleksləri diqqəti cəlb edir. Şabran şəhərinin cənub girəcəyində isə yeni mədəniyyət obyekti - “Poeziya evi” inşa olunub. “Poeziya evi”nin qarşısında klassik şairimiz Xəqaninin heykəli qoyulub. Şabran şəhərində Xəqaninin heykəlinin qoyulması heç də təsadüfi deyil. Çünki bu klassik şairimizin kəşməkəşli həyatının müəyyən dövrü Şabranla bağlı olub. Görülən bu işlər rayona turist cəlbinə də əlavə zəmin yaradır.

Qeyd edək ki, Şabran rayonu turizm üçün əlverişli zonadır. Həm yay, həm də qış istirahəti üçün coğrafi imkanlar var. Relyefi müxtəlif olan rayon şərqdə Xəzər sahilləri ilə qovuşur, düzənliklər tədricən təpəliklər, daha sonra meşələr, sonra dağlarla əvəzlənir. Buranın sıx meşəsi, sıldırım qayalar arasından axan çayı və müalicəvi əhəmiyyətə malik olan kükürdlü su bulaqları var. O cümlədən Çıraqqala da təkcə tarixi abidə kimi deyil, həm də qoynunda səfa qaynağı olan bulaqları ilə turistlər üçün cəlbedici məkan ola bilər. Bir sözlə, qədim Şabran şəhəri zəngin tarixi-arxeoloji abidələri ilə turizmin inkişafına mühüm zəmin yaradır.

Zaman.- 2011.- 29-31 dekabr.- S. 3.