“Azərbaycan turizmdən milyonlar qazanacaq”

Mütəxəssislər hesab edirlər ki, əlverişli coğrafi mövqeyi, flora və faunasının zənginliyi, dəniz sahilində yerləşməsi, mədəni-tarixi irsi, ləziz mətbəxi, yüksək qonaqpərvərlik ənənələri ölkəmizdə turizmin inkişafı üçün böyük perspektivlər yaradır. Onların fikrincə, 2011-ci ilin “Turizm ili” elan edilməsi bu sektorun inkişafında mühüm rol oynayacaq ki, bu da ölkəmizin milyonlar qazanmasına gətirib çıxaracaq

Prezident İlham Əliyevin təşəbbüsü ilə 2011-ci il ölkəmizdə “Turizm ili” elan edilib. Dövlət başçısı deyib ki, bu sektoru inkişaf etdirməklə ölkəmizə yeni investisiyaların cəlbi, minlərlə, onminlərlə yeni iş yerlərinin açılması mümkündür. “Elə etmək lazımdır ki, 2011-ci ildə turizmin inkişafına böyük təkan verilsin, bu sahədə böyük və gözəl nəticələr görək”,-deyə dövlət başçısı qeyd edib. Məlumat üçün qeyd edək ki, bu il Bakıda beşulduzlu 5 otel istifadəyə veriləcək. Millət vəkili Nizami Cəfərov deyir ki, əlverişli coğrafi mövqeyi, doqquz iqlim qurşağı, flora və faunasının müxtəlifliyi və zənginliyi, dəniz sahilində yerləşməsi, mədəni-tarixi irsi, ləziz mətbəxi, yüksək qonaqpərvərlik ənənələri ölkəmizdə turizmin inkişafı üçün böyük perspektivlər yaradır. Respublika Turizm və Ekskursiyalar Şurası sədrinin müavini Sabir Rəhimov isə hesab edir ki, birinci növbədə mükəmməl turizm infrastrukturu yaradılmalıdır. “Caspian Travel” şirkətinin daxili turizm şöbəsinin müdiri Fuad Rəsulov isə deyir ki, 2011-ci ilin “Turizm ili” elan edilməsi ölkəmizdə bu sektorun inkişafında mühüm rol oynacaq. Onun sözlərinə görə, Azərbaycanda bu sahəni inkişaf etdirməklə digər sektorların da inkişafına nail olmaq mümkündür: “Turizm sektoru inkişaf etsə, Azərbaycan milyonlar qazanacaq, yeni-yeni iş yerləri açılacaq”. 1SOSİAL HƏYAT 05

Prezident İlham Əliyevin 2011-ci ilin “Turizm ili” elan edilməsi təklifi, yəqin ki, bundan sonra da müzakirə obyekti olacaq. Ən azı ona görə ki, bu sektoru inkişaf etdirməklə ölkəmizə yeni investisiyaların cəlbi, minlərlə, on minlərlə yeni iş yerlərinin açılması mümkündür. Dövlət başçısı deyib ki, bizim gözəl təbiətimiz var, Xəzər dənizimiz, gözəl dağlarımız, çaylarımız, meşələrimiz bizim böyük sərvətimizdir. Elə etməliyik ki, 2011-ci ildə turizmin inkişafına böyük təkan verilsin, bu sahədə böyük və gözəl nəticələr görək.

Bəs Azərbaycanın turizm ölkəsinə çevrilməsi üçün hansı işlərin görülməsinə ehtiyac var? Mövzu ilə bağlı jurnalistlərin suallarını cavablandıran millət vəkili Nizami Cəfərov deyib ki, “Mədəniyyət haqqında” qanunda çox ciddi dəyişikliklər edilməlidir. Onun sözlərinə görə, bu gün Azərbaycan təbiətinin çox gözəl olduğu elə yerlər var ki, orada tarixi abidələr bərpa olunmalıdır. Məsələn, Azərbaycanın Kür-Araz sahillərində çox böyük tarixi hadisələr baş verib ki, onlar dünyanın böyük tarixçilərinin əsərlərində əksini tapıb. Ona görə həmin yerlərdə qazıntı işlərinin aparılması, orada tarixi abidələrin ortaya çıxarılması, onların dünyaya təqdim edilməsi lazımdır”. N.Cəfərovun sözlərinə görə, bir çox rayonlarda bu cür işlər görülüb, amma bu yetərli deyil: “Elə regionlar var ki, orada dağ, çay yoxdur, amma qazıntılar aparılsa, müxtəlif mədəniyyət abidələri üzə çıxar. Azərbaycan nadir təbii, mədəni, milli, etnoqrafik obyektlər kompleksinə malikdir. Əlverişli coğrafi mövqeyi, doqquz iqlim qurşağı, flora və faunasının müxtəlifliyi və zənginliyi, dəniz sahilində yerləşməsi, mədəni-tarixi irsi, ləziz mətbəxi, yüksək qonaqpərvərlik ənənələri ölkəmizdə turizmin inkişafı üçün böyük perspektivlər yaradır”.

“Görüləcək işlər hələ çoxdur”

Respublika Turizm və Ekskursiyalar Şurası sədrinin müavini Sabir Rəhimov isə hesab edir ki, respublikamızda turizm sahəsini daha yüksək səviyyəyə qaldırmaq üçün görüləcək işlər hələ çoxdur. Onun sözlərinə görə, birinci növbədə mükəmməl turizm infrastrukturu yaradılmalıdır, xüsusilə də kütləvi turizmə üstünlük verilməlidir: “Qiymətlər münasib olsa, kütləvi turist axını da olar. Maddi imkanı olanlar həmin qiymətə Türkiyə, Kipr, Yunanıstana üz tuturlar. Çünki oralarda xidmət səviyyəsi daha yüksəkdir. Turizmin inkişafı üçün 2 və 3 ulduzlu hotellərin sayını artırmaq lazımdır”. Ekspert deyir ki, turizm marşrutlarına daxil olan abidələrin mühafizəsi gücləndirilməli, bir çox tarixi abidələrin konservasiyasına və bərpasına diqqət yetirilməlidir. S. Rəhimov deyir ki, regionların tanıdılmasına xidmət edən bukletlər, xəritə-sxemlər çox azdır, ya da heç yoxdur: “Yeni tikilmiş obyektlər haqqında məlumat isə yox dərəcəsindədir. İxtisaslı mütəxəssislər çatışmır, ekskursiya bələdçiləri, təlimatçılar, yerləşmə və qida müəssisələrində peşəkar xidmət personalı olduqca azdır”. Ekspertin bildirdiyinə görə, ölkəmizdə həm yay, həm də qış turizminin inkişafı üçün əlverişli imkan var.

“Caspian Travel” şirkətinin daxili turizm şöbəsinin müdiri Fuad Rəsulov isə deyir ki, Bakıya gələn turistlərin böyük hissəsi Suraxanıdakı Atəşgaha, həmçinin Qobustana gedirlər. Onun sözlərinə görə, ölkəmizə gələn turistlər əsasən tarixi-mədəni abidələri ziyarət etməyə meyillidirlər: “Şəki şəhərindəki qədim Kiş məbədinə, Qax rayonundakı Hamam pirinə mütəmadi gəzintilərimiz olur. Həmçinin Quba rayonunun Xınalıq kəndinə və İsmayıllı rayonunun Lahıc qəsəbəsinə təşkil etdiyimiz etnoqrafiq turlar da turistlərin çox xoşuna gəlir”. Müsahibimiz turistlərin marağını cəlb etməsi baxımından Şəki şəhərinin bir çox cəhətlərdən üstünlüklərinin olduğunu vurğuladı.

“Turizm ili” bu sektorun inkişafında mühüm rol oynayacaq

Fuad Rəsulov da bir çox tarixi abidələrin restavrasiyasına ehtiyac olduğunu düşünür: “Məsələn, vaxtilə Albaniya dövlətinin paytaxtı olmuş qədim şəhərin hazırda bir hissəsi uçub-dağılıb, bir qismi isə torpağın altında qalıb. Qəbələ şəhərinin hazırkı turizm imkanlarını nəzərə alsaq, onun beş addımlığında yerləşən bu qədim tarixi məkanın acı görüntüsü, sadəcə, təəssüf doğurur”.

Fuad Rəsulov da hesab edir ki, 2011-ci ilin “Turizm ili” elan edilməsi ölkəmizdə bu sektorun inkişafında mühüm rol oynacaq. Onun sözlərinə görə, Azərbaycanda bu sahəni inkişaf etdirməklə digər sektorların da inkişafına nail olmaq mümkündür: “Turizm sektoru inkişaf etsə, Azərbaycan milyonlar qazanacaq, yeni-yeni iş yerləri açılacaq”.

Dövlət qurumlarının qarşısına yeni vəzifələr qoyulub

Sonda onu da qeyd edək ki, bir müddət öncə Prezident İlham Əliyevin imzaladığı sərəncamla “Azərbaycan Respublikasında 2010-2014-cü illərdə turizmin inkişafına dair Dövlət Proqramı” təsdiq olunub. Proqramda qeyd olunur ki, ölkəmizdə fəaliyyət göstərən mehmanxana və mehmanxana tipli müəssisələrin sayı 370-ə çatıb: “Hazırda respublikada 123 turizm müəssisəsi lisenziya əsasında fəaliyyət göstərir”. Sənəddə bildirilir ki, turizmin inkişafı və turizm sektorunun ölkə iqtisadiyyatının aparıcı sahələrindən birinə çevrilməsi ən mühüm vəzifə olaraq qarşıda durur və dövlət proqramı buna yönəlib. Onu da bildirək ki, proqramda dövlət qurumlarının qarşısına müəyyən vəzifələr qoyulub. Məsələn, sənədə əsasən, turizm sahəsində kiçik və orta sahibkarlığın təşviqi üzrə tədbirlərin həyata keçirilməsi (2010-2014) İqtisadi İnkişaf, Mədəniyyət və Turizm nazirliklərinin qarşısına vəzifə kimi qoyulub.

Ölkəyə gələn və ölkədən gedən turistlərin sayı, məqsədləri və xərcləri barədə statistik məlumatların əldə edilməsi (2010-2014) Dövlət Statistika Komitəsinə, Dövlət Miqrasiya Xidmətinə, Mədəniyyət və Turizm Nazirliyinə və İqtisadi İnkişaf Nazirliyinə həvalə olunub.

NİCAT İNTİQAM

Zaman.-2011.-8-9 fevral.- S.5.