“Aramızda qalsın” yaddaşlarda da qalacaq”

Yanvarın 12-dən “Xəzər” TV “Aramızda qalsın” adlı televiziya serialını tamaşaçılara təqdim edir. Artıq serialın 8 seriyası nümayiş olunub. Ailə-məişət mövzusunda olan bu filmin bəzi səhnələrinin çəkiliş prosesini “Xəzər” TV-nin “Azərbaycan” nəşriyyatındakı pavilyonunda izlədik. Fasilələrdə isə bizi düşündürən suallarla yaradıcı heyətin bir neçə üzvünə müraciət etdik.

Əvvəlcə, monitor arxasında oturmuş teleserialın rejissoru Rüfət Şahbazova yaxınlaşdıq. Teleserialın adına işarə edərək, “Niyə məhz “Aramızda qalsın?” sualını ona ünvanladıq. Rejissor yarızarafat, yarıgerçək: “Bu söhbətimizin heç bir detalının aramızda qalmasını istəməzdim”, - sözləri ilə cavabına giriş verərək dedi: “Hər bir ailədə, ailə üzvlərinin arasında anlaşılmazlıqlar olur. Bu anlaşılmazlıqların danışıqlarla, daha doğrusu, mədəni formalarda həll edilməsini, aradan qaldırılmasını və onların ailə üzvlərinin arasında qalmasını tamaşaçıya təqdim etmək həm yumor, həm də dramatik janrda çəkilən teleserialımızın əsas qayəsidir. Cəmiyyətdə, ailə daxilində baş verən hadisələr əsasən teleserialın baş qəhrəmanı Mehman və onun ailəsinin dilindən tamaşaçıya təqdim edilir. Onu da deyim ki, Mehman keçmiş adət-ənənələri mühafizə edən bir obrazdır. Onun həyat yoldaşı Yeganə isə, əksinə, müasirliyin tərəfindədir. Bu üzdən ər-arvad arasında tez-tez mübahisələr düşür. Lakin onlar öz aralarında danışaraq bu məsələləri həll edirlər. Bir sözlə, bu cütlüyün arasında baş verən münaqişələrdən övladları, ata-anaları belə hali olmurlar. Elə filmin adı da bu məntiqə əsaslanaraq, “Aramızda qalsın” adlandırılıb”. Həmsöhbətimiz bu ideyanın “Xəzər” TV-yə məxsus olduğunu söylədi.

“Tənqid yaxşı şeydir...”

“Aramızda qalsın” serialı, demək olar ki, Türkiyə kanallarında yayımlanan “Çocuqlar duymasın” teleserialının “kopirovka”sıdır” kimi fikirlərə aydınlıq gətirən rejissor bildirdi ki, tənqid yaxşı şeydir və o da tənqidlərə müsbət yanaşır: “Tənqid işimizin xeyrinədir. O olmasa, inkişaf olmaz ki... Məhz belə fikirlər işimizə daha məsuliyyətlə yanaşmağımızı birə-beş artırır. Amma unutmayın ki, “Aramızda qalsın” efir məkanımızın ilk sitkomudur. Onu da deyim ki, sitkom dedikdə, filmlə teatrın sintezi, başqa sözlə, onların ortaq məxrəci başa düşülür. Bir də, yeniliyin bu şəkildə qəbul olunması, zənnimcə, təbiidir. Amma gün gələcək bu filmə yeni çəkiləcək teleseriallarla müqayisədə üstünlük veriləcək. Əbəs yerə deyilməyib ki, hər şeyin zamana ehtiyacı var. Söhbətarası rejissor Elxan Cəfərovdan dərs aldığını və “Bacanaqlar”, “Qonşular” teleseriallarında ikinci rejissor kimi çalışdığını vurğulayan R. Şahbazov daha sonra dedi: “Bilirsinimi, sənət aləmi həmişə öyrənməyi tələb edir. Özü də bu öyrənmək beynəlxalq səviyyədə olanda daha effektli olur. Bu mənada türklər də “Çocuqlar duymasın”ı xaricdən - Fransadan götürüblər. İndi deyək ki, “kopirovka”dır? Bu aspektdən çıxış etsək, bizim film də heç “kopirovka” deyil. Əvvəla, ona görə ki, teleserialımızın mövzusu sırf Azərbaycanla bağlıdır. Filmimizdəki iştirakçıların sayı da çoxdur, tamaşaçıya çatdırmaq istədiyimiz mesaj da başqadır. Zənnimcə, oxşarlıq yalnız onların hər ikisinin də sitkom janrında olmasındadır”. Bu janrda ilk teleserialın onun tərəfindən çəkildiyini vurğulayan, çəkiliş prosesində müəyyən çətinliklərin yaşanmasını təbii sayan rejissor aktyor seçiminin xarakterlərə görə aparıldığını və bu prosesdə yanılmadıqlarını dilə gətirdi: “Yəni biz məşhurların axtarışında olmadıq. Məsələn, serialda psixoloq surəti var. Biz həmin rola elə psixoloq çəkdik”. Teleserialın neçə bölümdən ibarət olacağına gəlincə, o bildirdi ki, bu barədə danışmaq hələ tezdir. Onun 80-dən çox bölümünün olacağı gözlənilir.

“Aramızda qalsın”ın “Antikvar”ı

Musiqili Komediya Teatrının aktyoru Əzizağa Əzizov “Aramızda qalsın”da Əjdər - Yeganənin atası rolundadır. Qızının yanına tez-tez gələn Əjdər danışanda hər şeyi şişirdir. Hər işə baş qoşmaq istəyir, ancaq heç nə alınmır. Ona görə də həyat yoldaşı Dilbər xanım (əməkdar artist Səidə Quliyeva) ona hirslənəndə “Antikvar” deyir. Əzizağa müəllim bizimlə söhbətində elə həyat yoldaşı Aybəniz xanımın da bu filmə qədər də ona belə müraciət etdiyini dedi: “Bu mənada mənə həvalə edilən rol təbiətimə çox yaxındır, odur ki, onu sevə-sevə tamaşaçılara çatdırmağa çalışıram”. Dediyinə görə, 52 yaşlı sənətkar aktyor heyəti arasında ən qocaman aktyordur.

Hələ ki...

Dilbər xanım - Akademik Milli Dram Teatrının əməkdar artisti Səidə Quliyevaya: “Deyəsən, bir qadın kimi, bu Antikvarın öhdəsindən gələ bilmirsiniz?” sualı ilə müraciət etdik. O: “Hələ ki...”- dedi və əlavə etdi: “İnşallah, gələcəyəm, unutmayın ki, qadınlar həmişə qalib gəlirlər”. Sonra gülə-gülə pıçıldadı: “Amma bu sirr aramızda qalsın a...” O, bu rolun indiyədək yaratdığı obrazlara bənzəməməsi üçün bütün aktyor imkanlarından istifadə etdiyini bildirdi. Çəkiliş zamanı da biz onun dediklərinin şahidi olduq. Qeyd edək ki, Səidə xanım indiyədək “İtkin gəlin” və “Susmuş vicdan” teleseriallarınada çəkilib.

Kamilə xanıma “arzumuz”

“Sizə aparıcı, müğənni, yoxsa aktrisa kimi müraciət edək?” sualımızı “Yeganə” rolunu canlandıran Kamilə Babayeva belə cavablandırdı: “Aparıcılıq mənim fəaliyyətimin ana xəttini təşkil edir. Müğənnilik xobbimdir. Aktrisalığa gəldikdə isə, mən ilk dəfə Tofiq Tağızadənin “Bağ mövsümü” bədii filmində Firuzə roluna çəkilmişəm. Bu yaxınlarda Ülviyyə Könülün “Vəkil əhvalatları” kinokomediyasında Vəkil obrazını yaratmışam. Bu seriala isə yaradıcı heyət tərəfindən dəvət olunmuşam”.

Qeyd edək ki, teleserialda Yeganə həyat yoldaşı Mehmanı (Qurban Məsimov) çox sevsə də, onu geridə qalmaqda ittiham edir. Hətta onu daş dövründən qalma adam adlandırır. Hərdən isə ona zarafatca Betman deyir. Kamilə xanımın sözlərinə görə, “Aramızda qalsın”ın Yeganəsinin xasiyyəti ilə onun xasiyyəti arasında çox fərq var. Buna baxmayaraq, bu rolun öhdəsindən gəlmək onun üçün çətin deyil. “Bəs teleserialın “Zəif bəndi” kimdir? sualına: “Bu heyətdə zəif bənd yoxdur”, - dedi. Bir vaxtlar aparıcısı olduğu “Zəif bənd”ə öz möhürünü vurduğunu bildirən Kamilə xanım bu filmə də öz möhürünü vuracağını əminliklə dilə gətirdi. Daha sonra əlavə etdi: “Mənim intuisiyam güclüdür. Bütün deyilənlər bir yana, “Aramızda qalsın” efir məkanında öz möhürünü vuracaq və yaddaşlarda da qalacaq”. “Sizə elə Mehman kimi həyat yoldaşı arzulayırıq!” sözlərimizə isə o, belə reaksiya verdi: “Deyəsən, Mehman kimi mənə hərdən Biganə deməklə qıcıqlandırmaq istəyirsiniz axı? Amma pis olmaz. Bir şərtlə... aramızda qalsın a...”

Bəzən özünü Mehman kimi aparır

“Aramızda qalsın”ın baş rolunun ifaçısı “Simsar” Teatr Studiyasının aktyoru Qurban Məsimov yaratdığı obraza olduqca məsuliyyətlə yanaşdığını dilə gətirdi. Cəkilişlərdən sonra belə uzun müddət bu rolun təsirindən çıxa bilmədiyini vurğuladı. Bildirdi ki, hətta evində bəzən özünü Mehman kimi aparır: “Bu mənada evimiz də artıq mənim üçün çəkiliş meydançasına çevrilib. Amma onu da deyim ki, Mehmanın əsəbi olması artıq Qurbana da sirayət edib...” Sonra nə düşündüsə əlavə etdi: “Son fikrimi yazma a... düzgün başa düşməzlər. Sadəcə, aramızda qalsın...”

Qvami Məhəbbətoğlu

Zaman.- 2011.- 12-14 fevral.- S. 4.