“CTV-nin hədəfi dünyaya yayımlanmaqdır”

Ötən 3 ildə CTV tamaşaçılarımızın kanalı olmağa çalışıb. Buna da, fikrimcə, nail olub. Hər halda, həm tamaşaçı zəngləri, həm də ünvanımıza gələn məktublar bunu deməyə əsas verir. Onu da qeyd edim ki, tənqidlərə açıq olan CTV həmişə sosioloji sorğular nəticəsində işləyir və öz fəaliyyətini tamaşaçının istəkləri, arzuları əsasında qurur.

Bu yaxınlarda ölkəmizin üçdə bir hissəsində yayımlanan və Cənub bölgəsinin yeganə televiziya kanalı olan “Cənub” televiziyasının (CTV) 3 yaşı tamam oldu. Az zaman kəsiyində bölgələrdə yaşayan vətəndaşların sosial problemləriniişıqlandırmaqla, canlı verilişlər hazırlamaqla böyük tamaşaçı ordusu toplamış CTV ilə bağlı bizi maraqlandıran suallarla bu qurumun icraçı direktoru Eltən Qədimbəyliyə müraciət etdik.

- Geridə qoyduğunuz üç ildə hansı nailiyyətlərə imza atdınız?

- Ötən 3 ildə CTV tamaşaçılarımızın kanalı olmağa çalışıb. Buna da, fikrimcə, nail olub. Hər halda, həm tamaşaçı zəngləri, həm də ünvanımıza gələn məktublar bunu deməyə əsas verir. Onu da qeyd edim ki, tənqidlərə açıq olan CTV həmişə sosioloji sorğular nəticəsində işləyir və öz fəaliyyətini tamaşaçının istəkləri, arzuları əsasında qurur. Cünki onların fikirləri bizim üçün önəmlidir. Təbii ki, CTV-nin əsas funksiyalarından biri zövqü formalaşdırmaqdır, amma insanlar sizi özününkü kimi qəbul edəndə, sizi özününkü kimi dinləyirlər. Bizim fəlsəfəmiz də, strategiyamız da tamaşaçını inandırmaqdır ki, biz, həqiqətən, onların özlərinin kanalıyıq, onların fikirləri bizim üçün önəmlidir, vacibdir. Ötən 3 ildə biz buna nail olmuşuq. Elə bu səbəbdən də telekanalımız qısa müddətdə regionda böyük tamaşaçı auditoriyası toplayaraq, ictimai həyatın güzgüsünə çevrilə bilib. Bu işdə, təbii ki, kollektivin hər birinin özünəməxsus əməyi olub. Hazırda ölkənin 12 rayonuna yayımlanan CTV internet üzərindən “onlayn” yayımına başlayandan, daha doğrusu, daha geniş tamaşaçı kütləsi qarşısına çıxdıqdan sonra özünə daha çox tamaşaçı kütləsi toplaya biləcək. Mən buna da əminəm.

- Digər televiziyalardan fərqli olaraq hansı layihələri həyata keçirirsiniz?

- Bizə yaxın və yaxın olmayan müxtəlif ölkələrin telekanallarını izləyirik və müəyyən monitorinqlər aparırıq. Onların buraxdığı səhvləri görürük, bir peşəkar kimi yanlışlıqları təkrarlamamağa çalışırıq. 22 veriliş istehsal edən CTV-nin özünəməxsus bir neçə proyekti də mövcuddur. Bunlardan “Xalq nəzarəti” layihəsini misal göstərə bilərik. Bu layihədə sırf istehlakçının hüquqları qorunur. Ölkəmizin teleməkanında belə bir telelayihə yoxdur. Əhalinin maarifləndirilməsi istiqamətində “TV ensiklopediya” layihəmiz fəaliyyət göstərir. Uşaqlar üçün “Bil-bilməcə” adlı telelayihəmiz isə kloun və aktyorların aparıcılığı ilə məlumatlar verən bir layihədir. Bunun kimi 10-a yaxın layihələrimiz mövcuddur ki, tamaşaçılar onları yalnız CTV-dən izləyə bilərlər.

“Etimadı doğrultmağa çalışırıq”

- Bu 3 ildə üzləşdiyiniz ən çətin anınız və ən yaddaqalan gününüz barədə nə deyə bilərsiniz?

- Biz CTV-ni qurmağa başlayanda çox böyük çətinliklərlə üzləşdik. Belə ki, kadr, texniki problemlərlə baş-başa qaldıq. Amma həvəsdən düşmədik. İşimizə daha ürəkdən bağlandıq. Nəticədə qısa bir vaxtda bu kimi problemlərin öhdəsindən gəldik. Mən o günləri çətin anlar kimi dəyərləndirərdim. Ən sevindirici əlamətdar gün isə möhtərəm Prezident İlham Əliyev cənablarının bizim yeni binanın açılışını etməsi olub. Prezidentin xeyir-duası ilə fəaliyyətə başlamaq hər kanala nəsib olmur, ona görə bu, bizə ayrı bir qürur verir. Biz işimizlə onun etimadını da doğrultmağa çalışırıq.

- Məhz Lənkəranda belə bir televiziya kanalını açmaq ideyası necə formalaşdı?

- Hər şey zərurətdən başlayır, zərurət olmazsa, heç bir şey yaranmır. Bildiyiniz kimi, bu region hər mənada ölkəmiz üçün strateji cəhətdən çox vacib bir məkanda yerləşir. Son illər regionların sosial-iqtisadi inkişafı Dövlət Proqramı əsasında bu bölgənin də gündən-günə inkişaf etməsi, onun digər imkanları ilə yanaşı, turizm potensialının artması burada belə bir televiziya kanalının açılması üçün münbit bir şərait yaratdı. Buranın gələcəkdə çox gözəl turizm məkanı olacağına inanırıq. Onu da deyim ki, biz bu bölgənin bütün iqtisadi potensialını, təbii ki, həm də Azərbaycan həqiqətlərini dünyaya da çatdırmaq niyyətindəyik. Bu mənada gələcəkdə CTV dünyaya yayımlanmaq hədəfindədir. Onu da deyim ki, bu ilin ikinci yarısında televiziyanın peyk vasitəsilə yayımlanması nəzərdə tutulub. Bu isə CTV-ni təkcə respublikada deyil, dünyanın istənilən yerindən izləmək imkanı yaradacaq.

- Bəs hansı yeni layihələriniz var?

- Hazırda CTV 22 veriliş istehsal edir. Biz əldə olunan nailiyyətlərlə kifayətlənmək fikrində deyilik. Yeni-yeni layihələr üzərində işləyirik. Yaxın vaxtlarda tamaşaçıların görüşünə daha bir neçə maraqlı proqramla gələcəyik. Onu da deyim ki, CTV Regional Televiziyanın digər kanalları ilə də layihə mübadiləsi həyata keçirir.

- Eltən müəllim, CTV-nin nəzdində hansı studiyalar fəaliyyət göstərir

- Hazırda CTV-də Təlim-Tədris Mərkəzi fəaliyyət göstərir. Burada kanalımız üçün texniki işçilər hazırlanır. “Uşaq studiyası”, eləcə də “Gənclər studiyası” vasitəsi ilə gələcəyin televiziya əməkdaşlarını yetişdirməyə, həm də tapmağa çalışırıq.

- Bəs reklam bazarınız formalaşıbmı?

- Bilirsinizmi, bizdə reklama münasibət birmənalı olmayıb. Halbuki inkişaf etmiş ölkələrdə reklam həm istehlakçının, həm də istehsalçının bilavasitə marağındadır. Çünki onlar reklam vasitəsilə informasiya əldə edir, seçim edirlər. Ümumiyyətlə, xarici ölkələrdə həyatın bir çox sahələri reklam üzərində qurulur. Mən deyərdim ki, son vaxtlar bu sahədə bizdə də bir irəliləyiş hiss olunur. Belə ki, iş adamları artıq reklamın onların fəaliyyətlərində önəmli rol oynadığını dərk etməkdədirlər. Bu prosesdə son illər onların xarici ölkələrə səfərləri, eləcə də xaricilərin bölgəmizə səfərləri əhəmiyyət kəsb edib. Halbuki əvvəllər onlar reklamı dəyərləndirə bilmirdilər.

“CTV region kanalları arasında ilk bədii film çəkmiş kanaldır”

- Eltən müəllim, xarici filmləri doğma dilimizə tərcümə edərək yenidən ərsəyə gətirən dublyaj sənəti kinonun ayrılmaz bir qoludur. Səsləndirilən hər bir yad, əcnəbi obrazın xarakterini qavramaq, hisslərini tamaşaçıya çatdırmaq xüsusi məharət tələb edir. Keyfiyyətli dublyaj isə həmin telekanalın güclü maddi-texniki bazasından, rejissor peşəkarlığından xəbər verir. Bəs dublyaj məsələsi sizdə həllini necə tapır?

- Bu sahədə problemimiz yoxdur. Belə ki, Bakıda bizim dublyaj studiyamız fəaliyyət göstərir. Biz əvvəlcədən müəyyənləşdirdiyimiz filmləri məhz orada çalışan aktyorlarımızın iştirakı ilə dublyaj edirik.

- Sənədli filmlərin istehsalında, yəqin ki, probleminiz olmaz. Bəs maddi-texniki bazanız əsasında bədii filmlər çəkə bilirsinizmi?

- Bu yaxınlarda biz “Təkamül” adlı ilk bədii filmimizi ərsəyə gətirmişik. Narkomaniyanın bəlalarından bəhs edən bu filmə televiziyamızın baş rejissoru Şamil Muradov quruluş verib. Ssenari isə Bəxtiyar Axundova məxsusdur. Onu da deyim ki, bizim CTV region kanalları arasında ilk bədii film çəkmiş kanaldır. Elə bu faktın özü CTV-nin nəyə qadir olduğunun bariz nümunəsidir. Biz bu sahədə işimizi davam etdirmək niyyətindəyik. Yeri gəlmişkən, hazırda bir neçə sənədli film çəkmək də gündəmdədir.

- İndi camaatın teleseriallara da marağı artıb...

- Hə, yaxşı yadıma düşdü. Biz yerli teleserial da çəkmək niyyətindəyik. Zənn edirəm ki, bu layihəmizi də yaxın vaxtlarda gerçəkləşdirə biləcəyik.

- Səhv etmirəmsə, siz Quba (Xəyal TV Regional Telekanalı), Xaçmazın (Şimal Regional Televiziyası) regional televiziyalarında da çalışmısınız. Bu sahənin uzmanı kimi, ümumiyyətlə, bu və ya digər bölgədə yeni kanal açılanda hansı amillərin ona yardımçı olduğunu deyə bilərsiniz?

- Ümumiyyətlə, mədəniyyət, təhsil ocaqlarının olması bu və digər bölgədə telekanalların formalaşmasında mühüm rol oynayır. Bu mənada Lənkəranda Dövlət Teatrının, Dövlət Universitetinin olması, təbii ki, işimizi günün tələbləri səviyyəsində qurmağımızda əlimizdən tutdu.

Qvami Məhəbbətoğlu

Zaman.- 2011.- 15 fevral.- S. 13.