“20 il ərzində haqqı müdafiə etmişik”

“İki sahil” qəzetinin 20 yaşı tamam olub. Azərbaycan Respublikası Dövlət Neft Şirkətinin (ARDNŞ) təsisçiliyi ilə nəşr olunan qəzet 1991-ci ilin iyul ayının 10-dan işıq üzü görür. Bir vaxtlar aylıq, həftəlik, indi isə gündəlik qəzet kimi çap olunan “İki sahil”in baş redaktoru Vüqar Rəhimzadə ilə görüşüb qəzetin keçdiyi yol barədə söhbətləşdik.

- Vüqar müəllim, əvvəlcə, qəzetin 20 illik tarixinə qısa ekskurs edək.

- 1991-ci ildə Azərbaycanda söz azadlığı sahəsində kifayət qədər məhdudiyyətlər vardı. Senzuranın mövcudluğu müstəqil mətbuatın inkişafına ciddi əngəl törədirdi. Qəzetlərin qeydiyyat məsələsi ciddi bir problem idi. “İki sahil”in də qeydiyyata alınması asan olmadı. Qəzetimizin adı müəyyən dairələri narahat edirdi. Mətbuat Komitəsi qəzetin adının siyasi məna daşıdığını əsas gətirərək, qeydiyyat məsələsində problemlər yaradırdı. Zaman keçdikcə bütün bu problemlər geridə qaldı. Xüsusilə də Ümummilli liderimiz Heydər Əliyevin 1993-cü ildə xalqın təkidli tələbi ilə hakimiyyətə gəlməsindən sonra bütün sahələrdə olduğu kimi, söz azadlığı sahəsində də uğurlu addımlar atıldı. 1998-ci ilin avqust ayının 6-da senzuranın ləğvi ilə müstəqil və milli mətbuat tariximizdə çox önəmli hadisə baş verdi. Bütün bunlar “İki sahil”in fəaliyyətinə müsbət təsir göstərdi. Ayda bir, sonra iki dəfə, daha sonra isə həftədə bir dəfə olmaqla öz nəşrimizi davam etdirdik. 1995-ci ildən sonra həftədə 3 dəfə, sonra gündəlik qəzet kimi oxucularımızın görüşünə gəldik

Bu gün fəxrlə deyirəm ki, “İki sahil” qəzeti müstəqil mətbuatımızın formalaşma dövründə 20 yaşını geridə qoyub. Hesab edirəm ki, “İki sahil” qəzeti o ağır dövrlərdə kifayət qədər uğurlu yazılarla çıxış edib. Xüsusilə Ümummilli liderimiz Heydər Əliyev Naxçıvanın Ali Məclisinin Sədri olduğu vaxtlarda onun sərəncam və fərmanlarını, Ali Məclisin qərarlarını mütəmadi olaraq işıqlandırmışıq. YAP-ın yaranma və təşkilatlanma dövründə qəzetimiz bir mətbuat orqanı kimi bu siyasi qurumun formalaşmasında öz yazıları ilə yaxından iştirak edib.

Prezident İlham Əliyevin apardığı uğurlu daxili və xarici siyasəti qəzetimiz mütəmadi olaraq öz səhifələrində işıqlandırır. Ölkəmizin mədəniyyət, təhsil, ordu quruculuğu və digər sahələrdə əldə etdiyi uğurlarla bağlı geniş yazılar veririk.

Eyni zamanda Heydər Əliyev Fondunun layihələrinin işıqlandırılmasına, xüsusilə milli irsimizin qorunub inkişaf etdirilməsinə, musiqi mədəniyyətimizin, tarixi ənənələrimizin dünyaya çatdırılmasına xüsusi önəm veririk.

”İki sahil” bugünkü mətbuat bolluğu şəraitində 8 min tirajla gündəlik işıq üzü görür. Hazırda redaksiyamızın 35 əməkdaşı var. Əməkdaşlarımızdan 3-ü əməkdar jurnalistdir, onların arasında “Tərəqqi” medalına layiq görülənlər, müxtəlif müsabiqələrdə qalib olanlar var.

Qəzet 20 il ərzində müxtəlif formatlarda işıq üzüb görüb, müxtəlif rubrika və yazılarla öz oxucularının görüşünə gəlib. “İki sahil” Azərbaycanda bütün səhifələri rəngli çıxan azsaylı qəzetlərdən biridir. Növbəti illərdə daha müasir və daha yüksək səviyyədə çap olunacağıq.

Ümumiyyətlə, “İki sahil”in keçdiyi yolu uğurlu hesab edirəm. 20 il ərzində haqqı müdafiə etmişik, obyektivlik nümayiş etdirmişik, əyrini əyri, düzü düz göstərmişik.

- Qəzetin adı maraqlıdır. Niyə “İki sahil”?

- Bizim devizimiz “Vahid Azərbaycan uğrunda”dır. Qəzetimiz dünyaya səpələnmiş azərbaycanlıların vahid ideologiya ətrafında birləşməsi üçün səylə çalışmaq vəzifəsini öz üzərinə götürüb. Biz ilk saylarımızda Cənubi Azərbaycanda yaşayan ziyalıların, elm adamlarının şeirlərini, müsahibələrini mütəmadi olaraq dərc etmişik. Bu illər ərzində dünya azərbaycanlılarının üz tutduğu ünvan olmaq məsuliyyətinin altına girmişik.

- Ötən 20 ildə ən çətin və ən xoş gününüzü necə xatırlayırsınız?

- Çətin günlərimiz çox olub. 1990-91-ci illərdə qəzet təsis etmək, qəzetdə işləmək, fikrini sərbəst ifadə etmək, doğrudan da çox çətin idi. O illərdə yataqxanada yaşamışam, tələbə olmuşam, gecələr oxumuşam, gündüzlər qəzet redaktoru olmuşam. Hesab edirəm ki, qəzetin nəşrinin ilk illərində bizə kifayət qədər təyziqlər də olub. O illərdə Heydər Əliyev haqqında yazılar vermək asan deyildi. O çətin, amma qürurlu günlər hesab edirəm ki, ən yadda qalan günlərimiz olub.

- 20 il əvvəlin - keçid dövrünün qəzeti və indiki müstəqil dövrün qəzeti. Bu ikisi arasında nə fərq görürsünüz?

- 20 il əvvəlki dövrdə müstəqil qəzetlərin sayı az idi. İndi isə vəziyyət xeyli fərqlidir. Azərbaycanda kifayət qədər şərait yaradılıb ki, kimliyindən asılı olmayaraq, qəzet təsis etsin və öz fikrini yaysın. Kimsə soruşmur ki, hansı qəzetdə hansı yazılar çıxacaq. O dövrdə qəzet çıxmazdan əvvəl ciddi senzuradan keçirdi və hansısa yazı kiminsə xoşuna gəlmirdisə, o yazı kənara qoyulurdu. Bu gün belə hallarla rastlaşmırıq. Redaksiyaların maliyyə imkanları yaxşılaşır, hətta bəzi qəzetlərin öz ofisləri var. Dövlətin mətbuata qayğısı yüksək səviyyədədir. 2009-cu ildə Azərbaycan Prezidenti Yanında KİV-ə Dövlət Dəstəyi Fondunun fəaliyyət göstərməsi bunun bariz nümunəsidir.

Ancaq bugünün də öz çətinlikləri var. Məsələn, jurnalistlərin özlərinin özləri üçün yaratdıqları problemlər var. Jurnalistika sahəsində bu sahəyə yad insanların sayı çoxdur. Belələri söz azadlığını söyüş azadlığı ilə qarışdırmaqla, insanların şəxsi həyatına müdaxilə etməklə jurnalistikaya xələl gətirirlər. Düşünürəm ki, zaman keçdikcə bu məsələlər öz həllini tapacaq.

- Bugünkü qəzet bolluğu şəraiində “İki sahil” qəzetinin tutduğu mövqe nədən ibarətdir?

- Birinci növbədə çalışırıq ki, yazdığımız yazılarda daxili vicdanımızı ortaya qoyaq. Bizdə obyektivlik vacib şərtdir. Bizim ən başlıca prinsipimiz dövlətçilik ideologiyasının qorunması və daha da inkişaf etdirilməsidir. Bunu vətəndaşlıq borcu hesab edirik. Eyni zamanda Prezidentimizin apardığı daxili və xarici siyasəti oxuculara çatdırmağı ali vəzifəmiz hesab edirik.

- Publisistik dilin qorunmasına nə qədər önəm verirsiz?

- Azərbaycan dilinin qorunması çox vacib məsələdir. Biz bu məsələyə çox böyük önəm veririk. Çünki dilimiz bizim milli varlığımızdır. Ona görə də redaksiyamızda 4 korrektor işləyir. Məncə, bu sahəyə diqqət yetirmək hər jurnalistin vəzifəsidir. Çalışırıq ki, dil haqqındakı bütün prinsiplərə, qaydalara bir qəzet olaraq tam riayət edək.

- Bu gün dünyada elektron media yazılı medianı üstələyir. Azərbaycanda tarixi ənənələri olan medianın elekron mediaya uduzma ehtimalını necə qiymətləndirirsiniz?

- Təkcə ölkəmizdə deyil, bütün dünyada yazılı mediaya hər zaman ehtiyac duyulub. Bu da təbiidir ki, elektron medianın fəaliyyətə başlaması yazılı mediaya öz mənfi təsirini göstərib. Amma mən düşünmürəm ki, yazılı media tamamilə sıradan çıxacaq. Ancaq bu rəqabətə yalnız samballı qəzetlər tab gətirəcək. Səriştəsiz qəzetlər öz-özünə sıradan çıxacaq.

- Təsisçiniz Azərbaycanın ən böyük şirkəti -

ARDNŞ-dir...

- Əlbəttə, bir təsisçi kimi ARDNŞ-dən razıyıq. Qəzetimiz də öz səhifələrində bu şirkətin fəaliyyətini geniş şəkildə işıqlandırır. Ölkəmizin neft sektorunda baş verən bütün hadisələri oxucularımızla bölüşməyə çalışırıq. Düşünürəm ki, on illər sonra Azərbaycanın neft tarixi ilə bağlı məlumat və ya neft-qazla bağlı bir rəqəm əldə etmək istəyənlər üçün “İki sahil”i vərəqləmək kifayət edəcək.

Biz işimizi peşəkar səviyyədə qurmağa çalışırıq. Azərbaycanın əksər bölgələrində abunəçilərimiz var. Əlbəttə, “İki sahil” neftçilərin doğma və sevimli qəzetidir.

NATIQ PƏNAHLI BAKI

Zaman.-2011.-16-18 iyul.- S.9.