Bərdənin siması dəyişir

Bu günlərdə Bərdədə olarkən biz də inkişafın şahidi olduq. Belə ki, Bərdə şəhəri qısa müddətdə tikinti meydançasına çevrilib desək, yanılmarıq. Hər tərəfdə tikinti, abadlıq, quruculuq işləri gedir. Şəhərin görkəminə xələl gətirən yöndəmsiz obyektlər sökülür, yeni layihələr əsasında müasir obyektlər inşa olunur. Onu da qeyd edək ki, bu şəhərin qədim və milli arxitekturasını saxlamaqla ona yeni bir görkəm verilir. Bu isə o deməkdir ki, abadlıq işlərinin müəyyən proqram əsasında həyata keçirilməsinin nişanəsidir. İndi şəhərin Nizami, Həzi Aslanov, Koroğlu küçələrində işlər elə ahənglə gedir ki... Nizami küçəsindəki yenidənqurma işlərinə rəhbərlik edən şəxs bu işlərin hər bir bərdəlini sevindirdiyini dilə gətirdi: “Sözün düzü, bu və ya digər yerdə rayonların inkişafından söz düşəndə həmişə susurdum. Yalnız Bərdənin şanlı tarixi ilə öyünməklə kifayətlənirdim. Çünki bizim rayonda abadlıq işləri aparılmırdı. Bir sözlə, Bərdənin inkişafla ayaqlaşa bilməməsi məni yaman pərt edirdi. Lakin yeni icra başçısı buraya gələn kimi Bərdənin inkişafına xüsusi diqqət yetirməyə başladı. İndi Bərdə şəhərinin, demək olar ki, hər bir guşəsi öz simasını dəyişir. Sizi inandırım, 5-6 aydan sonra bu şəhərin tanınmaz dərəcədə dəyişməyinə əsla şübhə etmirəm”.

Aparılan abadlıq, təmir-tikinti işləri ilə yanaşı, yaşıllaşdırma da diqqət mərkəzindədir. Ağacəkmə kampaniyası rayonun şəhər mərkəzində olduğu kimi, kəndlərində də davam etdirilir. Özü də belə işlərdə bərdəlilər könüllü çalışırlar. Təmizlik işlərini genişləndirmək üçün rayona əlavə kücə təmizləyən maşın da alınıb. Yeri gəlmişkən, onu da deyək ki, şəhərdə insanların asudə vaxtlarının təşkilinə də ciddi fikir verilir. Hazırda şəhərdə hündürmərtəbəli yaşayış binalarının qarşısında yeni parklar salınır. Qələbə parkında isə yenidənqurma işləri aparılır.

Su, qaz, enerji təminatı yaxşılaşdırır

Həyata keçirilən tədbirlər nəticəsində elektrik enerjisinin verilməsindəki fasilələr artıq aradan qaldırılıb. Bərdə Rayon Paylayıcı Elektrik Şəbəkəsinin baş mühəndisi Adil Əkbərovun sözlərinə görə, hazırda rayonun ən ucqar kəndində belə, sutka ərzində işıq sönmür. Rayonda istifadə müddətini başa vurmuş elektrik xətləri və dirəkləri də dəyişdirilir. İçməli su təminatı əhəmiyyətli dərəcədə yaxşılaşdırılıb. Uzun illərdən sonra rayonun 16 küçəsinə içməli su xətti cəkilib. Əvvəllər içməli suyu başqa ərazilərdən müxtəlif üsullarla daşıyan sakinlər indi öz həyətlərində rahat şəkildə su götürə bilirlər.

Kənd yollarının təmiri ilə bağlı yeni layihələr hazırlanır. Rayonun bütün yaşayış məntəqələrinin qazlaşdırılmasını ən qısa zamanda başa çatdırmaq üçün genişmiqyaslı işlərə başlanılıb. Qaz İstismar İdarəsinin rəisi Ramiz Adıgözəlovun dediyinə görə, rayonun 109 kəndi var ki, bu günə qədər 29 kənd təbii qazla təmin edilib. 2011-2013-cü illərdə regionların inkişafına dair Dövlət Proqramına uyğun olaraq, digər yaşayış məntəqələrinin mavi yanacaqla təminatı istiqamətində işlər davam etdirilir. Rayon rəhbərliyinin kəndlərdə sakinlərlə görüşləri yaranmış problemləri tez bir vaxtda aradan qaldırmağa imkan verir.

Pambıqçılığa maraq artıb

Bərdə həm də ən böyük pambıqçılıq rayonu kimi tanınıb. Hətta 1981-ci ildə Bərdədə 126 min ton pambıq yığılaraq dövlətə təhvil verilib. Bu il isə rayonda 2955 hektar sahədə pambıq əkilməsi nəzərdə tutulub. Bu isə ötənilki göstəricidən 76 faiz çoxdur. Ötən il rayonda 1678 hektar sahədə pambıq əkilib. Əhalinin bu sahəyə marağının artması isə bu məhsulun satış qiymətinin 33 qəpikdən 40 qəpiyə qədər bahalaşmasıdır. Pambıqçılıqla məşğul olanlar bildirirlər ki, əgər pambığın satış qiyməti bir qədər artırılsa, bu sahəyə maraq daha da artar.

Bəli, bu gün Bərdədə hamı onun itirilmiş şöhrətinin tezliklə bərpa olunacağını əminliklə dilə gətirir. Bu abadlıq, quruculuq işləri isə Nizami Gəncəvinin vaxtilə dediyi “Bərdə nə gözəldir, necə qəşəngdir” sözlərini yenidən gündəmə gətirəcək.

Zaman.- 2011.- 7-8 iyun. –S. 8.