Neft, neft məhsulları və təbii qaz ixracın 95%-ni təşkil edir

Ölkəmizdə ixracın həcmi idxalı dəfələrlə üstələyir. Dövlət Statistika Komitəsinin açıqladığı sonuncu hesabatında göstərilir ki, xaricə satdığımız məhsulların dəyəri aldığımız məhsulların dəyərindən 2,9 dəfə çoxdur. Belə ki, cari ilin yanvar-aprel ayları ərzində dünyanın müxtəlif ölkələrinə 8 milyard dollar dəyərində məhsul satılıb. Xarici ölkələrdən isə 2,7 milyard dollar dəyərində məhsul alınıb.

Neft və qazdan sonra xarici ölkələrə ən çox yağ satmışıq

Əvvəlki illərdə olduğu kimi, cari ildə də xarici ölkələrə ən çox neft və neft məhsulları, həmçinin təbii qaz satılıb. Dövlət Gömrük Komitəsinin açıqladığı statistik məlumatlara istinadən apardığımız hesablamalar göstərir ki, 2011-ci ilin ilk 4 ayı ərzində xarici ölkələrə 6,9 milyard dollar dəyərində xam neft satılıb ki, bu da ümumi ixracın 86,2%-ni təşkil edir. Xaricə satılan neft məhsullarının dəyəri isə 458,1 milyon dollar (5,6%) təşkil edib. Neft və neft məhsullarından sonra xarici ölkələrə ən çox təbii qaz ixrac edilib ki, onun da dəyəri 257,3 milyon dollara (3,1%) bərabər olub. İxrac olunan məhsulların sıralamasında neft və qazdan sonra bitki və heyvan mənşəli yağlar gəlir. Cari ilin 4 ayı ərzində xarici ölkələrə 74,7 milyon dollarlıq yağ satılıb. Bundan başqa, ixrac edilən məhsullar arasında qara metallar (58,1 milyon dollar), kimya sənayesi məhsulları (23,8 milyon dollar), elektrik enerjisi (9,1 milyon dollar) və digər məhsullar üstünlük təşkil edib.

Dörd ay ərzində xaricdən 45,9 milyon dollar dəyərində dərman və digər əczaçılıq məhsulları idxal olunub

Cari ilin ilk dörd ayı ərzində xarici dövlətlərdən ölkəmizə ən çox maşın, mexanizm, elektrik aparatları, avadanlıqlar və onların hissələri gətirilib. Satın aldığımız bu məhsulların ümumi dəyəri isə 805,6 milyon dollar təşkil edib. Bu, ümumi idxalın 30%-nə bərabərdir. Eyni zamanda ilk 4 ay ərzində 494,8 milyon dollar (18,1%) dəyərində nəqliyyat vasitələri və onların hissələri idxal edilib. Qara metallar və onlardan hazırlanan məmulatlar (341,7 milyon dollar və ya 12,6%) idxal malları arasında üçüncü sırada yer alıb. 2011-ci ilin yanvar-aprel aylarında 384,6 milyon dollar dəyərində ərzaq məhsulları gətirilib ki, bunun 118,9 milyon dolları taxılın, 49,1 milyon dolları şəkərin, 47,8 milyon dolları isə yağların payına düşüb. Eyni zamanda əczaçılıq məhsulları da ən çox satın alınan məhsullar sırasında olub. Bu məhsulların ölkəmizə gətirilməsi üçün 45,9 milyon dollar ödənilib.

İxracın 36,2%-i İtaliyanın payına düşür

2011-ci ilin ilk 4 ayı ərzində ölkəmizdən ən çox İtaliyaya məhsul ixrac olunub. Yanvar-aprel ayları ərzində bu ölkəyə 2,8 milyard dollar dəyərində məhsul (neft və neft məhsulları) ixrac edilib. Xaricə satılan məhsulların 36,2%-i İtaliyanın payına düşüb. Bundan başqa, Fransaya 1,2 milyard, ABŞ-a 561 milyon, Rusiyaya isə 398 milyon dollar dəyərində məhsul satılıb. Ən çox məhsul satılan ölkələrin sıralamasında növbəti yerlərdə Belarus (363 milyon dollar), Ukrayna (331 milyon dollar), Malayziya (321 milyon dollar) və digər dövlətlər gəlirlər. Cari ilin yanvar-aprel ayları ərzində ən çox məhsul Rusiyadan alınıb. Bu ölkədən alınan məhsulların dəyəri 488,5 milyon dollar təşkil edib. Rusiyadan sonra ən çox Türkiyədən və ABŞ-dan məhsul gətirilib. Bu ölkələrdən müvafiq olaraq, 323 milyon və 278 milyon dollarlıq məhsul idxal edilib. Ən çox məhsul aldığımız ölkələrin sıralamasında isə növbəti yerləri Çin (197 milyon dollar), Ukrayna (185 milyon dollar), Fransa (136 milyon dollar) və digər dövlətlər tuturlar.

Zaman.-2011.- 23-24 iyun.-S.4.