Mingəçevir yaşıllıqlar diyarına çevrilir

Nur şəhəri kimi tanınan Mingəçevir son illər yaşıllığa qərq olub. Bu yaşıllıq onun gözəl simasına yeni təbii çalarlar əlavə edib.

Bu minvalla Mingəçevir yaşıllıqlar diyarı kimi də tanınacaq. Bu günlərdə Mingəçevirdə olarkən belə qərara gəldik.

Şəhərin belə yaşıllığa qərq olmasında Mingəçevir Şəhər Yaşıllaşdırma və Sanitar Təmizlik İdarəsinin danılmaz əməyi var. İdarənin rəisi Əli Ağamirovla görüşüb, bizi düşündürən bəzi suallara aydınlıq gətirməsini istədik. Lakin idarədən bildirdilər ki, Əli müəllimi yalnız iş gedən ərazilərdə tapa bilərsiniz. Nəhayət, onun sorağını şəhərin Dostluq parkından aldıq. Onu da qeyd edək ki, Mingəçevirdə həmsöhbət olduğumuz şəxslərin hamısı onu tanıdıqlarını bildirdilər. Bildirdilər ki, o, şəhərdə öz işi ilə hörmət qazanmış şəxsdir.

“Yaşıllıq yaratmaq, ekoloji mühitin sağlamlaşdırılmasına xidmət etmək bilirsinizmi nə qədər savabdır”, - sözləri ilə söhbətimizə körpü salan Əli müəllim, xüsusilə, Mingəçevir kimi aran şəhərində bu məsələnin daha vacib, daha zəruri olduğunu diqqətimizə çatdırdı. O, Mingəçevir şəhər rəhbərliyinin də yeni yaşıllıqların salınmasına, mövcud yaşıllıqların qorunmasına daim diqqət və qayğı göstərdiyini qeyd etdi.

Onunla söhbətdən aydın oldu ki, son aylar şəhərdəki prospekt, küçə, park və xiyabanlarda, idarə və müəssisələrə məxsus ərazilərdə yaşıllaşdırma işləri aparılıb. Minlərlə müxtəlif gül və çiçək kolları əkilib. Məlumat üçün bildirək ki, ildə bu şəhərdə 20-22 min ağac əkilir. Onun sözlərinə görə, şəhərdə əsasən çinarlara üstünlük veririk: “Son vaxtlar cökə, palıd ağacları da əkilir. Onu da deyim ki, biz həmin ağacları meşələrdən çıxarıb gətiririk. Yəni başqa yerdən almırıq. İndi parklarda mini-şitilliklər də təşkil etmişik. Əkilmiş ağaclara da nəzarət olunur. Belə ki, hər müəssisənin öz ərazisi var”. “Çalışırıq ki, Mingəçevirdə ağacsız ərazi olmasın”, - sözləri ilə söhbətini davam etdirən Əli müəllim bildirdi ki, şəhərdə 208 hektar yaşıllıq sahəsi var ki, onun da 70 hektarı küçə, prospekt, parkların payına düşür. Daha sonra ərazisi 4 hektar olan Dostluq parkında görülən işlərdən danışan Əli müəllim dedi ki, əvvəllər bu park Mədəniyyət və Turizm Nazirliyinin balansında olub. Burada uşaq şəhərciyinin salınması da nəzərdə tutulurdu. Lakin nazirlik bu işi reallaşdıra bilmədi. Mingəçevir Şəhər İcra Hakimiyyətinin başçısı Mübariz Ağayev bu işi üzərinə götürdü: “Parkın hissə-hissə təmiri nəzərdə tutulub. İyul-avqust aylarında isə park bütövlükdə sakinlərin istifadəsinə veriləcək”. Şəhərin parklarında qaçqınların məskunlaşdıqlarını bildirən Əli müəllim tezliklə bu problemin də həll olunacağını dedi: “Şəhərlər arasında bizim qədər qaçqını olan şəhər yoxdur. Hazırda şəhərdə Dövlət Proqramı çərçivəsində 10 ədəd 9 mərtəbəli bina tikilir. Zənn edirəm ki, bu da yaşanan problemi həll etməyə imkan verəcək”.

Görülən təmizlik işlərindən danışan Əli müəllim bildirdi ki, artıq şəhərdən zibil yeşiklərini də ləğv etmək niyyətindəyik: “Bu sahəyə yeni metod tətbiq edirik. Belə ki, hər səhər sakinlər məişət tullantılarını birbaşa zibil daşıyan maşınlara atacaqlar. Təbii ki, bu işdə də sakinlərin maarifləndirilməsinə ehtiyac var. Buna da müəyyən vaxt lazımdır. Onu da deyim ki, bu işin öhdəsindən gəlmək üçün kifayət qədər texnikamız da var”.

Esmira Hidayətova,

Qvami Məhəbbətoğlu

Zaman.-2011.-23-24 iyun.-S.8.