“Allahın bəndəsi olmaq ən gözəl
nemətdir”
O,
bu personajı ilə təkcə məmləkətimizdə
deyil, onun hüdudlarında da tanınır. Bəhram
Bağırzadənin belə tanınmasında hansı amillərin
əsas rol oynadığının oxucularımız
üçün maraqlı olacağını
düşünərək, onu redaksiyamıza dəvət
etdik
Bəhram
Bağırzadəni
məmləkətimizdə
kiçiklər
də yaxşı tanıyır, böyüklər
də... Onu belə
tanıdan, şübhəsiz,
həm “Bakılı
Oğlanlar” Şən
və Hazırcavablar Komandasında,
“Planet Parni iz
Baku” KVN Teatrında
və “Hər
şey yaxşılığa
doğru”, “Yuxu”,
“Milli bomba” filmlərində
oynadığı yaddaqalan rollar,
həm də
bir rəssam
kimi çəkdiyi tablolardır. Onun “Bakılı
Oğlanlar”dakı
azərbaycanlı obrazı
isə hər
birimiz üçün doğmadır. O, bu
personajı ilə təkcə
məmləkətimizdə
deyil, onun hüdudlarında
da tanınır. Bəhram Bağırzadənin
belə tanınmasında
hansı amillərin
əsas
rol oynadığının
oxucularımız
üçün maraqlı
olacağını düşünərək, onu
redaksiyamıza dəvət
etdik. Beləliklə, qəzetimizin
“Bizim qonaq” rubrikasının qonağı
Bəhram Bağırzadədir.
-
Bəhram bəy, maşallah, gümrahsınız. Belə gümrah olmağınızın sirri
aktyorluğunuzda, rəssamlığınızda, yoxsa futbola
fanatlığınızdadır?
-
Deyərdim ki, Allaha sığınmağımda - ibadətə
gəlməyimdə. 12 il bundan qabaq ibadətə
başlamışam. 2001-ci ildə isə Həcc
ziyarətində olmuşam. Allah hamıya
nəsib etsin.
-
Ailənizdə dindar olubmu?
-
Atam, anam imanlı insanlar olsalar da, ibadət etməyiblər. Amma onların babaları ibadət əhli olublar.
Hətta nənəmin atası Şamaxı məscidinin
əfəndisi kimi fəaliyyət göstərib.
-
Bəs birdən-birə sizin ibadətə üz
tutmağınızı yaxın ətrafınız necə
qarşıladı?
-
Sözün düzü, ilk illər mənim üçün
bir qədər çətin oldu. Amma bunu
büruzə vermədim. Hətta
haqqımda müxtəlif söhbətlər də uydurdular.
Belə ki, bəziləri namaz əhli
olmağımı dəblə ayaqlaşmağım kimi
yozmağa çalışdılar. Amma
sonradan gördülər ki, Allaha sığınmaq artıq
Bəhramın həyat tərzinə, həyat çərçivəsinə
çevrilib. Beləcə, söz-söhbətlər
də getdikcə aradan qalxdı.
- İbadətə başlayandan sonra özünüzdə
hansı dəyişikliklər hiss etdiniz?
-
Düz 12 ildir ki, lüzumsuz işlərə baş
qoşmuram. Siqaretdən, içkidən
uzağam. Əgər baş
qoşsaydım, başqa yolun yolçusu olardım. Bir sözlə, Allah-Təalanın Quranda
buyurduğu qanunlara ciddi riayət etməyə
çalışıram. Buna görə mən
Yaradana borcluyam. Bir də, ən əsası bu ibadətdən
elə rahatlıq tapdım ki... Hərdən
düşünürəm ki, kaş 16-17 yaşımdan ibadətə
başlayaydım. Əgər
başlasaydım, daha çox uğurlara imza ata bilərdim.
Vaxtımı boş şeylərə sərf
etməzdim.
-
Sizdən ibrət götürən olubmu?
-
Onu deyə bilmərəm. Mən özümə cavabdehəm...
Bu yolu mən özüm müəyyənləşdirmişəm.
Bu, artıq mənim yolumdur. Güman
edirəm ki, kimsəni bu yola çəkməyə
ixtiyarım yoxdur.
“Səni Bormanın
sürücüsünün gününə salaram a...”
-
Bəhramın yetişməyində, onun belə
tanınmağında atanız - rəhmətlik Arif kişinin
əziyyətləri çox olub?
-
Bəri başdan deyim ki, atam polis polkovniki idi. Siyasi
şöbədə fəaliyyət göstərib. Onun da yazmağa, şəkil çəkməyə
marağı böyük olub. Bir neçə
kitabı çap olunub, mənimlə birgə sərgiləri
keçirilib. Aktyor kimi 6 filmə çəkilib.
Sərbəst güləş üzrə SSRİ
çempionatında üçüncü yeri tutub. Hətta o, Rəssamlar İttifaqının,
Yazıçılar Birliyinin üzvü olub. O ki
qaldı konkret suala... Bəli, atamın mənim
üzərimdə əziyyəti çox olub. Üstəlik,
anamın da... Bunu faizlə göstərsək,
deyə bilərəm ki, Bəhram kimi yetişməyimdə
anamın 70%, atamın 30% əziyyəti olub.
-
Bölgü ədalətsiz olmadımı?
-
Yox… Atam 100% şərait yaradıb ki, anam mənim tərbiyəmlə
ciddi məşğul ola bilib də... Yəni
anam məni o dərnəkdən bu dərnəyə, bu dərnəkdən
o dərnəyə aparıb... O vaxtlar çox dərnəklərə
gedərdim: üzgüçülük, rəqs, musiqi,
basketbol, həndbol...
-
Uşaqlıqda dəcəl olmusunuz?
-
Hə, çox dəcəl olmuşam. Milisə
də düşəndə deyirdim ki, nə istəyirsiniz
edin, 15 sutka verin, amma məni atamın əlinə verməyin.
Onu da bildirim ki, atam həmişə mənə acıqlananda
deyərdi ki, səni “Baharın 17 anı” filmindəki
Bormanın sürücüsünün gününə
salaram a... Amma heç vaxt atam tərəfindən
döyülməmişəm. Onun elə
baxışı var idi ki... O, baxışları ilə məni
döyərdi. Bir xoşagəlməz hərəkət etmək
istəyəndə də onun həmin baxışları gəlib
dururdu gözlərim önündə... Hərdən indi bir iş
görəndə düşünürəm: görəsən
atam buna necə reaksiya verərdi?
- İndi Bəhram Bağırzadə də
uşaqlarını baxışları ilə cəzalandırır?
-
Yox, uşaqların təlim-tərbiyəsi ilə
xanımım məşğul olur. Yəni
xanımım evdə elə şərait yaradıb ki, mənim
baxışlarıma daha ehtiyac qalmayıb. Yeri gəlmişkən,
iki övladım var. Ötən il 8
yaşlı qızım Tahirə Sankt-Peterburqda 10
yaşlılar arasında keçirilən dama üzrə
dünya çempionatında 8-ci yeri tutdu. Hətta
ilk yerlərdən birini tutmadığına görə bir qədər
təəssüfləndi də. Dedim, qızım, Allah
qoysa gələn il udarsan... Qızım
həm də rəssamlıqla məşğuldur. Babası kimi solaxaydır. 7
yaşlı oğlum Cavid isə rəqslə məşğuldur.
-
Onlardan bir övlad kimi umacağınız nədir?
-
Onlardan dünya şöhrətli rəssam, rəqqas, yaxud
akademik olmalarını tələb etmirəm. İstəyirəm
ki, onlar, ilk növbədə, insan olsunlar. İkinci növbədə, öz işlərində
peşəkar olsunlar və nəhayət, əsl vətəndaş
kimi yetişsinlər. Zənnimcə, bu və ya digər
şəxsdə bu keyfiyyətlər olmalıdır ki, sabah millətinə, vətəninə bir xeyir
verə bilsinlər də...
-
Uşaqlığınızla bağlı hansı kadrlar
yaddaşınızda əbədi həkk olunub?
-
1988-ci il idi. O vaxt da “Nizami” kinoteatrında
Vaqif Mustafayevin çəkdiyi “Yaramaz” filmi nümayiş
olunurdu. Mən də o filmə baxmaq fikrinə
düşdüm, lakin bilet tapa bilmədim. Sonradan
eşitdim ki, bəs “Kubinka”nın
uşaqları biletin birini 10 manata satırlar. Məndə
isə cəmi 6 manat var idi. Dedim, bəs mən necə
edim? Çox fikirləşmədən öz
halal zəhmətimlə aldığım velosipedimi “Kubinka”da
satıb, həmin filmə bilet aldım. Sözün
düzü, məhz həmin film sonradan mənim həyat
yolumun müəyyənləşməsinə, daha doğrusu,
rejissorluq fakültəsinə daxil olmağıma təkan verdi.
-
Amma nədənsə Bəhram bəy sonradan bu sahədə
özünü sınamadı…
-
Niyə ki? Sınamışam. İndiyədək sənədli filmlər, kliplər
çəkmişəm.
“Milyonçu olsaydım…”
-
Bəhram bəyin Bakıya, özü də, necə deyərlər,
köhnə Bakıya xüsusi simpatiyası var... Bu onun verdiyi müsahibələrdə də
özünü açıq-aydın göstərir.
-
Bu, belə olmalıdır da... Mən Bakıda
doğulmuşam. Şəhərimi sevməliyəm də...
-
Elə köhnə Bakının fotolarını
toplamağınız da bu sevgidən irəli gəlir?
-
Bəli, məndə Bakının qədimliyini özündə
əks etdirən çoxlu fotolar var. O fotolar da XIX əsrin
tanınmış dünya fotoqrafları tərəfindən
çəkilib. O vaxt bizim milyonçular dünyanın ən
güclü fotoqraflarını Bakıya dəvət edərdilər
ki, şəhərin şəkillərini çəksinlər.
Yermakov da belə dəvətlə gəlib.
Mişon gəlib Bakıya, filmlər çəkib və s.
Sovet vaxtı Breqvadze dəvət olunmuşdu. Sonra İsay
Rubençik, Lev Şvarts... Bakını çəkiblər.
Onu da deyim ki, Bakının ilk fotosu fotoaparatın
ixtirasından 12 il sonra, yəni 1861-ci ildə
çəkilib. 1849-cu ildə isə fotoaparat
çıxıb. Nə yazıq ki,
bugünkü Bakı peşəkar fotoqraflar tərəfindən
çəkilmir. Halbuki bu gün də bu
şəhərə dünyanın müxtəlif ölkələrindən
fotoqraflar dəvət olunmalıdırlar. Milyonçu
olsaydım, dünyanın peşəkar fotoqraflarını məmnuniyyətlə
Bakıya dəvət edərdim.
- Əgər sirr deyilsə, həmin fotoları necə əldə
etmisiniz?
-
Kolleksionerlərdən almışam. Gələcəkdə
bir arzum var - Bakıda Foto muzeyi açmaq və orada həmin
ağ-qara fotoları sərgiləmək.
-
Bir halda ki, söhbət bu istiqamətə yan aldı, bəlkə
Bəhramın yaxın aylardakı planları ilə də
- Əvvəla, onu deyim ki, bu ilin mayında ilk fərdi sərgimi
təşkil edəcəyəm (Məlumat üçün
bildirim ki, indiyədək atamla birgə bir neçə sərgi
təşkil etmişik). Bu sərgidə təxminən 80-ə yaxın
karikatur janrında çəkdiyim işlərim
nümayiş olunacaq. Elə həmin sərgi çərçivəsində
yeni nəşr olunacaq “İ snova salam”
kitabının təqdimatı da keçiriləcək. Bu sərgim İçərişəhərdə
açıq səma altında reallaşacaq. Bir də,
aprel ayında Heydər Əliyev adına sarayda “Planet Parni iz
Baku” KVN Teatrının 10, “Bakılı Oğlanlar” Şən
və Hazırcavablar Komandasının isə 20 illiyinə həsr
olunmuş konsert proqramında iştirak edəcəyəm. O
konsert proqramında bu dəfə tam bir fərqli rolda- mədəniyyət
işçisi rolunda görünəcəyəm. Bunlardan başqa “Azərbaycan yeməkləri”
kitabının istehsalına da başlamışam.
-
Deyəsən, karikatur aləmində də öz
sözünüzü deməkdə israrlısınız?
-
Məqsədim dünyanın 100 karikaturçusundan biri
olmaqdır.
-
Kitabınızın rus dilində nəşr
olunacağını söylədiniz? “Qorod moy molodosti” (“Gəncliyimin
şəhəri”) kitabınız da rus dilindədir...
-
İmkanım olsaydı, həmin kitabı türk, ingilis və
dünyanın digər dillərində də nəşr etdirərdim
ki, daha çox adam oxusun. Məncə,
bu, məmləkətimizi tanıtmaqda da mühüm rol
oynayır. Bir də, fikrim informasiya
blokadasını yarmaqda yardımçı olmaqdır.
-
Bəs hansısa filmə çəkiləcəksiniz?
-
Ötən il Ülviyyə
Könülün “Vəkil əhvalatları” filmində
cangüdən rolunda çəkilmişəm. Bu
yaxınlarda onun premyerası olacaq. Güman
edirəm ki, o filmdə oynadığım rol da
tamaşaçıların ürəyincə olacaq. Bu il Vaqif Mustafayev Avropanın hansısa ölkəsinin
sifarişi ilə bir film çəkəcək. Məni də dəvət edib. Demişəm
ki, bir kiçik rol bəsimdir. Çünki
vaxtım yoxdur.
İmansızlıq...
-
Bəhram bəy, sizi ən çox narahat edən nələrdir?
-
İnsanların Allahsızlığı...
imansızlığı... İmansızdan nə
istəsən gözləmək olar. İnsanların
savadsızlığı... Savadsızlıq
bizi uçuruma apara bilər. Bizim cavanlar
Avropada oxumalıdırlar. Sonradan orada
öyrəndiklərini məmləkətimizdə tətbiq
etməlidirlər. Avropadan bura müəllim gətirməklə
heç nəyə nail ola bilmərik. Yəni
işi iş yerində öyrənmək daha
yaxşıdır. Ruslar bunu 200 il əvvəl
- I Pyotrun dövründə etdilər və faydasını da
gördülər. Məncə, məhz belə
təhsilli, üstəlik, imanlı insanlar yaşanan problemləri
çözə bilərlər. Bir də,
məni narahat edən hələ də ermənilərin
tapdağı altında olan torpaqlarımızın taleyidir.
Nə vaxtsa o torpaqlar qaytarılmalıdır e... Bu, belə qala bilməz. İstərdim
ki, bu məsələ tez həll olunsun. Gələcəkdə
övladım deməsin ki, atam o vaxt bu məsələni qoydu
bizim çiynimizə... Bu, bizim vaxtımızda
baş verib və onu biz həll etməliyik. Hansı yolla? Bunu deyə bilmərəm:
danışıqlar yolu ilə, yoxsa hərbi yolla? Zənn edirəm ki, bunu həll etmək
üçün də iman və savad vacibdir. Hansı yolla həllindən asılı olmayaraq, mən
Bəhram Bağırzdə bu prosesin ön sıralarında
olacağam.
-
Deputat Natiq... sizin “Planet Parni iz
-
Heç bu barədə düşünmürəm də... Söz vermişəm ki, heç vaxt dövlət
işində işləməyim.
-
Niyə?
-
İşləyənləri gördüm də... Vəzifələrindən
çıxarılanda onlarla heç əməlli-başlı
sağollaşmadılar da... Mənim aləmimdə
rəsmi titulların da bir anlamı yoxdur. Allahın
bəndəsi olmaq ən gözəl nemətdir.
“Allah haqqı yoxumdur!”
-
Pul ilə aranız necədir? Şirkətiniz,
dükanınız varmı?
-
Heç nəyim yoxdur. Allah mənə
ağıl verib onunla hərəkət edirəm.
-
Amma deyirlər var axı...
- İnanmayın. Allah haqqı yoxdur. Nə vaxtsa ola
bilər, o da Basqalda... Orada -təbiətin
qoynunda “Bəhramın qonaqları” adlı kafe açmaq niyyətim
var.
-
Bəs dolanacağınızı nədən
çıxarırsınız?
-
Sənətdən...
-
Getdiyiniz toylarda, yəqin iki, sizi tost deməyə dəvət
edirlər? Tostla, yaxud tamadalıqla aranız necədir?
-
Tamada olmamışam. Heç tost da demirəm.
-
Darıxanda kimə, nəyə, hara üz tutursan?
-
Son vaxtlar darıxmağa vaxtım olur ki?
- İndiyədək ən böyük
mükafatınız nə olub?
-
Həcc ziyarətinə getməyim.
-
Ruzi və bərəkətlə bağlı sizin fikirlərinizi
bilmək maraqlı olardı...
-
Allah hər adama- imanlıya da, imansıza da ruzi göndərir.
Amma hər adama bərəkət göndərmir,
imanlıya göndərir. Adam var,
milyonları var, amma bərəkəti yoxdur. Mən hər gün Allaha dua edirəm. Hər gün deyirəm ki, Allahım, heç bir
kişini işsiz qoyma. Qoy 10-15 manat
qazansın, öz yoldaşının, uşaqlarının
yanında heç bir kişini pərt eləmə.
-
Sizin sənətiniz qarşısında baş əyənlərə
münasibətiniz?
-
Belə şeyləri qəbul etmirəm.
-
Sənətinizi kimlərə isə öyrədirsiniz?
-
Müraciət edənlər olanda, təbii ki...
- Əgər dünyanın rəsmini çəkmiş
olsanız, ən önəmli detal kimi nəyi ön plana
çəkərdiniz?
-
La ilahə illəllahı...
- İndi “satışdan çıxarılır”, təkrar
emala göndərilir, “yandırılıb” kimi ifadələrə
tez-tez rast gəlmək olur.
Səlahiyyət sahibi olsaydınız, mədəniyyət
aləmimizdən nələri, kimləri
çıxarardınız?
-
Bizim bir müəllim var idi. Ona mürəkkəb sual verən
kimi deyərdi ki, bala, bu suala cavab verə bilsəydim, Nobel
mükafatı alardım ki... Yəqin ki, bu
misalla sualınızı cavablandırmış oldum.
- Bəhram Bağırzadə kimi
tanınmağınızda aktyorluğunuz, rəssamlığınız
mühüm rol oynayıb.
Bəs belə populyarlığınızda
bunlardan hansının rolu çox olub?
- İstedadlı insanlar var, amma onlar onu ortaya çıxara
bilmirlər. Yaxud
onu üzə çıxarmağa tənbəllik edirlər.
Mənə elə gəlir ki, hər uğurun
başında zəhmət dayanır. Bu mənada istər
rəssam ol, istər bəstəkar, əsas məsələ
zəhmətdədir e... Yaradan da görür
ki, bəndəsi zəhmətə qatlaşır, ona ürəyincə
verir.
“Bəlkə, bundan sonra nəsə etdim”
-
Bəhram bu gün deyə bilərmi ki, həyatda nəsə
edib?
-
Doğrudur, tamaşaçıların yaddaşlarında
qalmışam. Ancaq bu gün 39 yaşlı Bəhramın həmin
yaşda olan bəzi soydaşları ilə müqayisədə
nə iş görməsini götür-qoy edəndə,
sözün düzü, “nəsə edib” deməyə dilim gəlmir.
Elə götürək 22 yaşında bu millətin
yolunda canından keçmiş Milli Qəhrəmanımız
Mübariz İbrahimovu. Belə
misalların sayını da artırmaq olar. Yəni belə insanlarla müqayisədə, demək
olar ki, mən heç nə etməmişəm. Bəlkə, bundan sonra nəsə etdim.
-
Mənim fikrimcə, yaddaşlarda qalmağınızın əsas
faktorlarından biri sizin oynadığınız rollarda Azərbaycan
sözlərindən istifadə etməyiniz olub.
-
Hər şeydən əvvəl, mən azərbaycanlıyam. Oynadığım bütün obrazlarımda
respublikamızla qürur duyduğumu qabartmağa
çalışmışam. Yarışlara
gedərkən obrazlarımla, zarafatlarımla “Bakılı
Oğlanlar”ın azərbaycanlı etiketini daşımağa
çalışmışam. Başımda
kepka, azərbaycansayağı hərəkətlərlə
etdiyim zarafatlarda əksər hallarda Azərbaycan dilində
sözlər işlədirdim. Bununla da kim
olduğumuzu göstərirdim. Demək istəyirdim
ki, bəli, mən rus səhnəsində rus dilində
danışmağıma baxmayaraq, Azərbaycan mədəniyyətini
təbliğ edirəm, azərbaycanlı balası kimi
düşünürəm. İndi də
bu missiyanı yerinə yetirirəm. Onu da
deyim ki, KVN-ə ilk dəfə belə yeniliyi, yəni öz
zarafatlarımıza Azərbaycan dilində əlavələr
etməyi mən gətirmişəm. Mənə
qədər belə şey olmayıb. Məlumat
üçün onu da deyim ki, KVN-nin aparıcısı
Aleksandr Vasilyeviç Maslyakov hər il məni
MDB yığmasına dəvət edir və mən də bir
azərbaycanlı kimi ölkəmizi o yığmada təmsil
edirəm.
- “Başımda kepka” dediniz.
O kepkanın bir özəlliyi varmı?
-
O kepka 1957-ci ildə tikilib. Özü də o,
şəkili bir dostumun atasının idi. Onu
indi də ən qiymətli hədiyyə kimi qoruyuram.
-
Bu və ya digər tənqidlərə görə sonradan
başınız ağrımayıb ki?
-
KVN heç kimi təhqir etmir, həqiqəti göstərir. Heç kimin əleyhinə çıxmırıq,
demirik ki, bu, pisdir, bu, yaxşıdır, biz bunu göstəririk.
Deyirik ki, belə bir problem var da…
“Mən hara
düşmüşəm?”
-
Siz həm də futbol azarkeşisiniz. Futbolla bağlı xatirələrinizi
də bizimlə bölüşərdiniz... İlk
dəfə futbolu meydançadan nə vaxt izləmisiniz?
-
1979-cu ildə. O zaman 7 yaşım hələ tamam
olmamışdı. Atamla birgə “Neftçi”nin
oyununa baxdım. O gün heç yadımdan çıxmır.
Hətta əyləşdiyim sektor da xatirimdədir.
Milislərlə bir cərgədə
oturmuşdum. Atam milis işçisi idi də.
Hə, rəqibin qapısının
qarşısında gərgin vəziyyətlər yarananda mən
də yerimdən qalxırdım. Qazon,
yamyaşıl meydança mənə qəribə gəlirdi.
Öz-özümə deyirdim ki, mən hara
düşmüşəm? Meydançaya
ikinci gedişim anamla şəhərə çıxanda olub.
Onda da 11-12 yaşım olardı. Metronun “Gənclik”
stansiyasından keçəndə anam mənə 30-40 qəpik
pul verdi. Dedi ki, mən evə lazım olan
şeyləri almağa gedirəm, səni də 90 dəqiqədən
sonra burada gözləyəcəyəm. Getdim e... Səhv etmirəmsə “Neftçi” Kutaisinin “Torpedo”
komandası ilə oynayırdı. Həmin oyunda top
tablonun arxasına düşdü. Onu
götürmək mənə nəsib oldu. Düz on il o topu özümdə saxladım.
- Bəs nə vaxtdan əsl
azarkeş oldunuz?
-
Elə o illərdə azarkeşə çevrildim. Sonradan Bakıda “Fanklub” təşkil olundu. Hətta 1985-ci ildə gənclər arasında
keçirilən dünya çempionatı da
yadımdadır. Bakı qrupunda Meksika qalib
gəlib, növbəti mərhələyə
çıxdı.
“İçimdə yanıram”
-
O illərin xatirələrini unutmayan Bəhram, son illər
stadionlarda az görünür...
-
Bəli, mən bugünkü futbolumuza azarkeşlik eləmirəm,
futbola baxmıram, futbola getmirəm... Amma milli
komandamız oynayanda, görəndə ki, 11 nəfər azərbaycanlı
uşaq meydançada nəsə eləmək istəyir, onda
azarkeşlik edirəm. O ki qaldı klublara, komandalara... Mən onlara artıq azarkeşlik etmirəm. Əcnəbilər gəlib oynayırlar
klublarımızda, özləri üçün para
qazanırlar. Allah başlarından töksün! Amma yenə deyirəm, mən artıq onlara
azarkeşlik eləmirəm. Mənə maraqlı deyil
ki, hansısa futbolçu Anqoladan, yaxud başqa ölkədən
gəlsin, “Neftçi”də, yaxud başqa klubumuzda
oynasın...
-
Belə çıxır ki, komandalara legionerlərin
alınması sizi futboldan soyutdu?
-
Bəli, soyutdu... Balam, legioner olar bir nəfər, iki nəfər,
3 nəfər, daha 11 oyunçunun 9-u yox da... Deyəndə ki,
kubok sahibi olmuşuq, bir qədər gülməli
çıxır da... 7 nəfər əcnəbi futbolçu
oynayır orada... Biz də sevinirik ki, qalib gəldik.
-
“Qarabağ” futbol komandası azərbaycanlılardan təşkil
olunub...
-
Bəli, buna sevinirəm. Sevinirəm ki, Rəşad
Sadıqov da qayıtdı yenidən o kluba.
-
Bəs bayaqdan deyirdiniz daha azarkeşlik etmirəm?
-
Alə, deməyimə baxma, içimdə yanıram... “Qarabağ”ın baş məşqçisi Qurban
Qurbanova hər ay mesaj göndərirəm, uğurlarına
sevinirəm, “Neftçi”də də 7-8 azərbaycanlı
oynayır, bunları görəndə təzədən
azarkeş oluram.
“Mənə desələr ki…”
-
2003-cü ildən futbolun inkişafı bizdə yeni mərhələyə
daxil oldu. Bu inkişaf sizi qane edir?
-
Edir! Amma bu sahədə görüləsi
işlər çoxdur.
-
Bəlkə, fikirlərinizi bir qədər
açıqlayasınız?
-
Mən belə düşünürəm ki, hər bir futbol
klubunun öz uşaq məktəbi olmalıdır. Əks halda, Azərbaycanda futbol olmayacaq. Bəli, işə uşaq futbol məktəblərindən
başlamaq lazımdır. Özü də
belə futbol məktəblərini hər rayonda
açmağa lüzum yoxdur. Məsələn,
mənim əslim-köküm şamaxılıdır. Mənə desələr ki, orada futbol məktəbi
açaq? Mən deyərəm ki, yox.
Niyə? Çünki
şamaxılılar futbol oynaya bilmirlər. Onlarınkı
güləşdir də... Yəni orada
uşaqlar üçün güləş məktəbi
açmaq daha doğru olardı. Amma Gəncədə
futbol məktəbi olmalıdır. Gəncə
uşaqları futbol oynamağı, mən deyərdim ki,
braziliyalılar kimi bacarırlar. Maşallah
Əhmədov, Sergey Kramarenko və digər
futbolçularımız məgər Gəncədən
çıxmayıblar? Bilmirəm bu nə
ilə bağlıdır? Suyundanmı,
havasındanmı? Lənkəran, Şəmkir,
Tovuz zonalarından da yaxşı futbolçular çıxa
bilər. Ona görə oralarda regional futbol məktəblərinə
ehtiyac var. Məktəb olmasa, futbolumuzda inkişaf olmaz e...
“Problem Foqtsda deyil”
-
Sizcə, millimizin baş məşqçisi Berti Foqts
futbolumuza nəsə qazandıra biləcək?
-
Problem Foqtsda deyil e.. Problem o
22 nəfərdədir ki, Foqtsu başa düşmürlər.
Yəqin deyəcəksiniz necə? Mən
Moskvaya gedəndə Maslyakov Aleksandr Vasilyeviç mənə
“cexov” deyəndə deyirəm: “Anton”. “Puşkin” deyəndə
deyirəm: “Aleksandr Sergeyeviç”. O da deyir ki, Bəhram azərbaycanlı
ola-ola predmetimizi bilir. Berti Foqts “Bismark” deyəndə
bizim futbolçular deyirlər ki, bu Bismark kimdir axı? Yaxud “Van Qoq” deyəndə deyirlər ki, o kimdir?
Bir də onu deyim ki, o insan uğur qazanır ki, ətrafı
uğurlu olsun. Nə
demək istəyirəm. “Barselona”dan gəzintiyə
çıxan futbolçu ispan arxitekturası ilə, ispan incəsənəti
ilə nəfəs alır. O ən azı 90 dəqiqəyə
qazandığı 30 min pulun məsuliyyətini anlayır. O
bilir ki, min bir əziyyətlə pul qazananlar 30-40 avro verib,
bilet alırlar. Alırlar ki, gəlib Puyolun,
Messinin oyununa baxsınlar, zövq alsınlar, istirahət etsinlər.
Odur ki, futbolçular da onların ümidlərini
doğrultmağa çalışırlar. Yeri gəlmişkən, mən Messinin deyil, Puyolun
oyunundan ləzzət alıram. Puyol elədiyi şeyi
heç kim indi eləmir e... Bu adam meydanda “paxat” eləyir e... Bir
sözlə, futbolçu təkcə futbola bağlanmalı
deyil. Heç olmasa, onlar
teatrlarımıza getsinlər, konsertlərə, baletlərə
baxsınlar, muzeylərimizdə görünsünlər.
Yenə deyirəm, bu məsələdə
Foqtsda günah axtarmaq lazım deyil. Günahı
o 22 nəfərdə axtarmaq lazımdır. Gərək öncə futbolumuz Foqtsun səviyyəsinə
uyğunlaşsın ki, sonra ondan nəsə istəyə bilək.
Mən dediyim məktəblər olsa... Təbii
ki, buna zaman lazımdır.
QVAMİ MƏHƏBBƏTOĞLU
Zaman.-2011.-5-7
mart.-S.4-5.