Mənsurə Rəsulzadə: “Heyvanları sevən, insanlara pislik etməz”

Sahibsiz heyvanlarla mübarizə dedikdə, ağlımıza, ilk növbədə onların məhv edilmələri gəlir. Yəqin bu da ona görədir ki, ölkəmizdə “sahibsiz heyvanlarla mübarizə” adlı bir qurum fəaliyyət göstərir və çox qəribədir ki,

Sahibsiz heyvanlarla mübarizə dedikdə, ağlımıza, ilk növbədə onların məhv edilmələri gəlir. Yəqin bu da ona görədir ki, ölkəmizdə “sahibsiz heyvanlarla mübarizə” adlı bir qurum fəaliyyət göstərir və çox qəribədir ki, bu qurumun əsas işi məhz sahibsiz itləri öldürməkdən ibarətdir. Rəsmi məlumatlara görə, bu qurumun əməkdaşları təkcə 2009-cu ildə 53 min sahibsiz heyvanı məhv ediblər.

ALYANS - Canlı Aləmin Mühafizəsi Ekoloji Birliyinin sədri Mənsurə Rəsulzadə isə qəti şəkildə bunun əleyhinə çıxır. M. Rəsulzadənin sözlərinə görə, sahibsiz heyvanlarla mübarizə onları məhv etmək yox, onlara sahib çıxmaq olmalıdır. Qeyd edək ki, ALYANS artıq bu istiqamətdə müəyyən işlər görür və hazırda bu təşkilatın sığınacağında 100-ə yaxın sahibsiz it məskunlaşıb: “Heyvanları saxlama mərkəzlərimiz var. Orada atılmış heyvanları toplayırıq. Baytar həkimlərimiz onlara quduzluq əleyhinə vaksinlər vururlar”.

“Heyvanları sevən, insanları ondan da artıq sevər”

“Heyvanlara sevgi göstərmək lazımdır”,-deyən Mənsurə xanım bildirdi ki, humanist, ziyalı insanların bir çoxu onlara bu işdə dəstək verir: “Bizi başa düşən insanların sayı kifayət qədərdir. Onlar bizi dəstəkləyir, təşəkkür edirlər. Amma bəzən söz atıb, “bu nəyə lazımdır?” deyənlər də olur. Lakin buna görə narahat olmuruq və bildiririk ki, heyvanlara qayğı göstərmək insanlara yaxşılıq etməyin qarşısını almır. Əksinə, fikrimizcə, heyvanı sevən, insanları ondan da artıq sevər”.

“Heyvanların insanlara hərtərəfli xeyri var”

Dünyanın bir çox ölkələrində atılmış heyvanlara sahib çıxan, onları bir yerə cəmləyib qeydinə qalan təşkilatların fəaliyyət göstərdiyini deyən müsahibimiz ölkəmizdə də qarşıya qoyduqları məqsədə çatacaqlarına ümidvar olduğunu qeyd etdi: “Belə bir söz var ki, əgər millətin mənəvi keyfiyyətini öyrənmək istəyirsənsə, onların heyvanlarla necə davranmalarına diqqət et. İnsanlar bilməlidirlər ki, heyvanların onlara hərtərəfli xeyri var. Bəzən deyirlər, heyvandan insana xəstəlik keçir. Ancaq mən bununla razı deyiləm. Əksinə, həyətində heyvanı, tutaq ki, evində pişiyi olan insanda xəstəliyə qarşı immunitet yaranır. Mən bunu bir həkim kimi deyirəm”.

“40 min imza toplamalıyıq”

Təşkilat sədri digər problem kimi, ölkəmizdə heyvanların hüquqlarının müdafiəsinə yönəlik qanunların olmamasını vurğuladı: “Heyvanlarla qəddar rəftarın qarşısının alınması üçün dünyanın bir çox ölkələrində qanunlar qəbul olunub. Bizdə də belə bir qanun qəbul olunmasına, orada heyvanlara zorakılıq edənlərə qarşı məsuliyyətin müəyyənləşdirilməsinə ehtiyac var. Bu məqsədlə biz belə bir qanun layihəsini Milli Məclisə təqdim etmişik, amma geri qaytarılıb. Hazırda sözügedən qanun layihəsinin müdafiəsi ilə bağlı imzatoplama kampaniyasına başlamışıq. Ümumilikdə 40 min imza toplanılmalıdır. Oxucularınızdan da bu məsələdə dəstək gözləyirik”.

“Təlim keçmiş itlər görmə qabiliyyətini itirənlərə kömək edəcəklər”

Mənsurə Rəsulzadə deyir ki, əsas məqsədlərindən biri də atılmış heyvanları müalicə edəndən sonra onları xidməti işlərin təliminə yönəltməkdir: “Bizim xüsusi təlimçilərimiz var. Onlar itlərə təlim keçirlər, öyrədirlər və s. Bununla biz həm də göstərmək istəyirik ki, insanların dəyərləndirə bilmədikləri, yararsız saydıqları itlər əslində çox şeylərə yaraya bilərlər. Məsələn, biz düşünürük ki, təlim keçmiş itlərdən görmə qabiliyyətini itirmiş insanlara kömək məqsədilə istifadə edilə bilər. Bundan əlavə, biz uşaq evlərində canlı guşələr yaratmaq istəyirik ki, körpələr heyvanları görsünlər, sevsinlər və s”.

“Xeyriyyə bazarı təşkil olunacaq”

Mənsurə xanım bir çox planları məhz maliyyə çatışmazlığı ucbatından həyata keçirə bilmədiklərini də söylədi. O, gələcəkdə sahibsiz, atılmış heyvanlar üçün klinika açmağı planlaşdırdıqlarını dedi. Müsahibimiz heyvanlara qayğı ilə yanaşan, onları sevən insanları martın 12-də keçirəcəkləri xeyriyyə aksiyasında iştiraka çağırdı. Onun sözlərinə görə, tədbirdən əldə olunacaq məbləğ şəhərimizdə sahibsiz dolaşan heyvanlar üçün sığınacağın tikintisinin tamamlanmasına və bu məqsəd üçün digər vacib işlərə xərclənəcək: “İnanırıq ki, sığınacaqsız, sahibsiz və ac heyvanat probleminin aktuallığını hər kəs anlayır. Bu işdə bizə köməklik etmək istəyənlərin dəstəyinə arxalanırıq. Bu məqsədlə martın 12-də (İçəri şəhər, Asəf Zeynallı küçəsi 22 (Kiçik Karvansara) ünvanında, “Art Garden” sərgi salonunda) saat 10.00-dan 17.00-a kimi xeyriyyə bazarı təşkil edəcəyik. Bizimlə əməkdaşlıq etmək istəyənləri bu bazarda öz məhsullarını satışa çıxarmağa çağırırıq. Məhsullar müxtəlif növ ola bilər: suvenirlər, kitablar, əl işləri, bəzək əşyaları, aksessuarlar, kosmetika, paltar, oyuncaqlar və s. Mallar həm yeni, həm də istifadə edilmiş ola bilər.

Həmçinin biz arzu edənləri, onların ailələrini bu bazarda alıcı və ziyarətçi qismində görmək istərdik. Və yaxud arzu edənlər evlərində lazımsız bildikləri əşyaları gətirib təqdim edə bilərlər ki, biz məhz onların hesabına heyvanat üçün sığınacağın tikintisini başa çatdıra və ya xeyriyyə məqsədi ilə istifadə edə bilərik”.

Nicat İntiqam

Zaman.-2011.- 5-7 mart.-S.8.