“Hər addımımız Şəkinin potensialının genişləndirilməsinə xidmət edir”

Həmin tədbirlər qarşıya qoyulan məqsədlər istiqamətində yeni bir mərhələnin başlanğıcını qoydu. Yəni sənətkarlarımızın daha məhsuldar çalışmalarına bir stimul verdi. Bu tədbir Şəki sənətkarlarını respublika miqyasında tanıtdı.

- Mədəniyyət Nazirliyinin “2010-2014-cü illər Xalq Yaradıcılığı Paytaxtları” Proqramına əsasən, Şəki 2010-cu ildə “Azərbaycanın sənətkarlıq paytaxtı” elan olundu. Bu, Şəkiyə nə qazandırdı?

- Bəri başdan deyim ki, bu proqramın əsas məqsədi xalq tətbiqi sənət sahələrinin inkişaf etdirilməsindən, gələcək nəsillərə ötürülməsindən, eyni zamanda bu bölgənin turizm potensialının genişləndirilməsindən ibarət idi. İl ərzində bu proqram çərçivəsində Şəkidə bir sıra müxtəlif tədbirlər keçirildi. Zənn edirəm ki, həmin tədbirlər qarşıya qoyulan məqsədlər istiqamətində yeni bir mərhələnin başlanğıcını qoydu. Yəni sənətkarlarımızın daha məhsuldar çalışmalarına bir stimul verdi. Bu tədbir Şəki sənətkarlarını respublika miqyasında tanıtdı.

- Bəs belə tədbirlərin beynəlxalq səviyyədə təşkili nəzərdə tutulub?

- Şəki şəhərinin davamlı inkişafı üçün mədəni ehtiyatların səfərbər olması üzrə YUNESKO-nun sektorlararası layihəsinin həyata keçirilməsi planlaşdırılır. Bu məqsədlə 2010-cu ilin yayında YUNESKO-nun ilkin faktaraşdırıcı missiyası Şəkidə olub. Həmin layihə artıq YUNESKO-ya təqdim edilib. Əgər bu layihə təsdiq olunarsa, yaxın beş ildə Şəkidə bir sıra tədbirlər həyata keçiriləcək. O layihə Şəki sənətkarlarının dünya səviyyəsinə çıxmalarında da önəmli rol oynayacaq. Onu da qeyd edim ki, Şəkidə hər il bu və ya digər adda tədbirlərin keçirilməsi artıq ənənəyə çevrilib: 2006-cı ildə “İpək bayramı”, 2007-ci ildə “Sənətkarlar günü”, 2008-ci ildə “Şəki Qədim sivilizasiyalar diyarıdır”, 2009-cu ildə “Kulinariya günü”, 2010-cu ildə Şəki İcra Hakimiyyəti və Bəstəkarlar İttifaqi ilə birgə “İpək Yolu I Beynəlxalq Musiqi Festivalı.... Bu il də II İpək yolu Beynəlxalq Musiqi Festivalını keçirmək niyyətindəyik. Bu tədbirlərə ölkəmizdə fəaliyyət göstərən səfirliklərin nümayəndələri də qatılıblar. Bu isə o deməkdir ki, Şəkinin xaricilərə tanıdılmasında mühüm addımlar atılıb. Güman edirəm ki, onlar hər dəfə ölkələrinə qayıdanda Şəkidən, şəkililərdən, bu bölgənin mədəniyyətindən, sənətkarlarından, mətbəxindən də ürəkdolusu söz açırlar.

“Şəkidə Bəxtiyar Vahabzadənin də ev-muzeyi olacaq”

- Zərinə xanım, dünyadan söz düşmüşkən, Şəkidə türk dünyasının tanınmış yazarı Bəxtiyar Vahabzadənin ev-muzeyi təşkil olunacaqmı?

- Bildiyiniz kimi, hazırda Şəkidə sevimli şairimiz Bəxtiyar Vahabzadənin adına küçə var, şəhərin mərkəzində büstü qoyulub. Orta ümumtəhsil məktəblərindən biri onun adını daşıyır. Ümidvaram ki, yaxın gələcəkdə Şəkidə onun ev-muzeyi də təşkil olunacaq.

- Hazırda şəhərdə hansı mədəniyyət ocaqları yenidən qurulur?

- XVIII əsrin sonu, XIX əsrin əvvəllərində inşa olunmuş Aşağı Karvansaray Kompleksi, həmçinin Mirzə Fətəli Axundzadənin ev-muzeyi əsaslı şəkildə bərpa olunur. Bundan sonraki dövrdə bir sıra tarixi abidələrin bərpası da nəzərdə tutulub. Yeri gəlmişkən, onu da bildirim ki, artıq Nakam adına Kitabxananın təmir işləri başa çatdırılıb və yaxın günlərdə onun açılışı gözlənilir.

- Şəki hansı şəhərlərlə qardaşlıq edir?

- Hazırda Şəki Türkiyənin Giresun və Lapseki, Bolqarıstanın Qabrovo, Belarusun Sulutsk şəhərləri ilə qardaşlıq edir. Onların nümayəndələrini şəhərimizdə keçirilən genişmiqyaslı tədbirlərə də dəvət edirik.

“Problemlər həllini tapacaq”

- Bəs son illər neçə məktəb binası yenisi ilə əvəzlənib və ya əsaslı təmir olunub?

- Son yeddi ildə Şəkidə yeddi məktəb binası tikilib. Təbii ki, əsaslı təmir olunanlar da var. Amma bizim hələ uygunlaşdırılmış binalarda fəaliyyət göstərən məktəblərimiz var. Zənn edirəm ki, regionların sosial-iqtisadi inkişafı Dövlət Proqramı çərçivəsində bu kimi problemlər həllini tapacaq. Artıq bu istiqamətdə müəyyən işlərə start verilib.

- Məktəblərdə məktəbli forması ilə bağlı vəziyyət necədir?

- Bu sahədə, demək olar ki, problem yoxdur. Amma bir sira məktəblərimiz var ki, həmin tədris ocaqlarında qış aylarında bununla bağlı müəyyən problemlər yaşanır.

- Bəs Şəkinin səhiyyə sistemi ilə bağlı hansı yeniliklər var?

- Hazırda 3 il öncə cənab Prezidentimiz tərəfindən təməli qoyulmuş xəstəxananın tikintisi davam etdirilir. Onun bu ilin sonunda istifadəyə verilməsi nəzərdə tutulur. Şəhərin qoruq ərazisində olan xəstəxanalar həmin binaya köçürüləcək. Təbii ki, bu, şəhərdə səhiyyənin yaxşılaşmasına öz töhfəsini verəcək. Bütün bu keçirilən tədbirlər, görülən işlər həm də Şəkinin turizm potensialını genişləndirilməsinə xidmət edir.

Zaman.- 2011.- 8-9 mart.- S.2.