Bütün olumlar ölümlərdən başlayır

- Ucqar bir kənddə yaşamağa məcbur olsaydınız, dolanışığınızı necə çıxarardınız? - Torpağa təzim edərdim, elə təzim edərdim ki, torpaq məni qaldıra bilsin.

Ədalət Əsgəroğlu,şair,

Azərbaycan Yazıçılar Birliyinin mətbuat katibi

- Sizə görə həyatda ən asan və ən çətin şey nədir?

- Ən asan şey insanları bədbəxt eləmək, ən çətin şey xoşbəxt eləmək. Tanrı öz bəndəsindən bu çətinliyə qatlaşmaq umur.

- Ucqar bir kənddə yaşamağa məcbur olsaydınız, dolanışığınızı necə çıxarardınız?

- Torpağa təzim edərdim, elə təzim edərdim ki, torpaq məni qaldıra bilsin.

- Keçdiyiniz ömür yoluna baxanda ən çox nəyə üzülür, nəyə sevinirsiniz?

- Üzülürəm ki, niyə Haqqa tapınmamışam, niyə dirilikdən ayılmamışam. Sevinirəm ki, gec də olsa, bu yolu özümə şükranə bir Tanrı eşqi kimi təqdim etdim.

- Valideyn və müəllimlərdən başqa özünüzü kimlərə borclu bilirsiniz?

- Əsas özümə, sonra mənə yaxşılıq edənlərin hamısına. Yaxşılığı urvata mindirmək lazımdır. Yaxşılıq ayaq açıb gəzir, həmişə canlıdır, hərəkətdədir.

- Uğrunda hər şeydən keçə biləcəyiniz varlığın adı?

- Vətən... Üzü mübarək Vətən...

- Özünüzü hansı peşədə daha yaxşı ifadə edə bilərdiniz? İndiki işinizdən razısınızmı?

- Hərbidə. Bu arzum həmişə öz taxtındadır. İrfançılıq indiki işimə mane olmur.

- Üzr istəmək sizə ağır gəlmir ki?

- O yerdə ki, əzab çəkirəm üzr istəmək niyə ağır gəlməlidir ki...

- Sabir deyir: “Ağladıqca kişi qeyrətsiz olur”, siz necə düşünürsünüz?

- Könlüm ağlamaq istəyirsə, onu niyə məyus eləməliyəm ki... Amma hər dəqiqədənbir ağlayan könül də mənə lazım deyil.

- “Kaş ki ... ölkədə doğulaydım, ... xalqın nümayəndəsi olaydım” dediyiniz olurmu?

- Azərbaycan, canım mənim. Vətəndaşlıq şairin vicdan sənədidir.

- Evinizdə inciklik olurmu? Olursa, birinci kim barışır?

- Evimin ağası da, nökəri də mənəm. İncikliyi də aradan götürməyə hazır olmalıyam. Barışda həyat eşqi, Tanrı alqışı var.

- Özünüzü kimin qarşısında günahkar bilirsiniz və kiminsə günahını bağışlamısınızmı?

- Bu gün yaşanan günahların mənim də payıma düşməsi təbiidir, çünki bu dövrün yazarıyam. Nə öz günahlarım, nə də başqalarının günahlarını bağışlamıram.

- Sizcə azadlıq, istədiyini eləməkdir, yoxsa istəmədiyini?

- Azadlıq... Bu insanın daxilən azad olması deməkdir. Bəşəriyyətin, dünyanın azadlığı bundadır. Əxlaq bu istəyi yoluna qoymalıdır.

- Sevgi nədir: ümid, qorxu, ya xoşbəxtlik?

- Bu, xoşbəxtlikdir, insanın azad olmasına stimul verən İlahi gücdür.

- Ən çox nə zaman utanırsınız?

- Ürəyim deyən sözü deməyəndə və yaxud ürəksiz söz deyəndə.

- Ölüm nədir?

- Olumların şahı, bəlkə də, ölümdür. Bəlkə də, bütün olumlar ölümlərdən başlayır, özünü dərk edən insan ölümə pir kimi baxır.

Olum, ölüm Haqq işidir,

O da gözəl, bu da gözəl.

- Çoxlu pulunuz olsa, hara xərclərdiniz?

- Özüm də daxil olmaqla kitablarını dərc etdirə bilməyən şairlərə.

- “Mən almasam, bir başqası alacaq, mən olmasam, başqası olacaq” düşüncəsi nəyi ifadə edir?

- Əzab çəkməsin deyə özünə bəraət qazandırmaqdır. Hələ vaxt var deyə özünə bəraət qazandırmaq isə günahdır.

- Həyatda ən böyük təsəlliniz?

- Tanrı eşqi... Təsəllim hamıya sadiq dost olan Tanrıdır. Göydən üzülməsəm, yerdə heç kəs məni üzə bilməz.

- Sizə hansı mövzuda sual verilməsini heç arzulamırsınız?

- Dünyanın faniliyi haqqında verilən sual. Dünyanın vəfalı, etibarlı olmasını duymamaq nadanlıqdır.

- Yubiley və ad günlərində özünüzü necə hiss edirsiniz?

- Sevincimi bölürəm, daha da çoxaldığına sevinirəm. Kədərimi paylaşmaqdan çox, sevincisi paylaşmağa meyilliyəm.

- Dünyanın hər yerindən görünən uca bir lövhəyə iki-üç kəlməlik nəsihət yazmağı xahiş etsələr, nə yazardınız?

- İnsanlarda sabaha həyat eşqi yaratmağa çalışın.

- Sizə görə insanda ən yaxşı və ən pis xarakter hansılardır?

- Səmimiyyət və qeyri-səmimiyyət.

- Nə vaxtsa hansısa müğənniyə, sənətçiyə heyran, ya da aşiq olmusunuzmu?

- Aşiq olduğum Ulu Tanrıdır.

- Övladlarınız sizi atsalar, onlara nə deyərdiniz?

- Əgər atıb firavan yaşaya bilərlərsə, narazılığım olmaz.

- Ən çox sevdiyiniz və sevmədiyiniz sözlər?

- Hamarlı-tumarlı sözləri sevmərəm. Həqiqəti qandıran sözlər acı olsa da, sevimlidir.

- Fürsət olsa, ölümqabağı nə vəsiyyət edəcəksiniz?

- Həmişə ayaqları üstündə ölənləri dəstəkləmişəm. Mənim də arzum belə ölməkdir. Vəsiyyət cibimdə dördqat bükdüyüm ağ-təmiz kağızdır. Yaza bilmədiklərim ordadır.

- Ən çox nədən qorxursunuz?

- Ucalıqdan yıxılmağı, yəni miskin ölümü.

- Xoşbəxt olmaq üçün nəyiniz çatmır?

- Yaltaqlığım, yəni bədbəxtliyim.

- Sizin kimlərə və nə kimi xeyriniz var?

- İnsanlarda xoş əhval-ruhiyyə yaratmaq məndə peşəyə çevrilib. Bir də özümə qıymadıqlarımı başqalarına qıymıram.

- Bu dünya bir insan şəklində qarşınızda dursa, ona nə deyərdiniz?

- Bir könüldən min könülə ancaq sənə aşiqəm.

- Həyatınızda sizə təklif edilmiş nədənsə imtina etmisinizmi?

- Çox olub, ziyan gətirən işlərdən uzaq durmuşam.

- Gənclik hansı yaşda bitir?

- Könül yaşamdan bezəndə.

- Dostlarınız çoxdurmu? İnsanlar niyə dost olurlar?

- Yoxsul olmasınlar deyə.

Zaman.- 2011.- 19-21 mart.-S.19.