Gərək kitabı sevdirə biləsən

(ƏVVƏLİ ÖTƏN SAYIMIZDA)

Dünənki yağışdan sonra günəş yenə gülümsəyirdi. İlyas müəllim avtobusun pəncərəsindən Gədəbəyin dağlarına ilk qarın ələndiyini görüb dedi ki, bu tədbirdən sonra sizi kənddəki evimə dəvət edirəm; getsəniz, geri dönmək istəməyəcəksiniz... O, dağlara baxdıqca uşaq kimi sevinirdi. Mənə elə gəldi ki, artıq şair xəyalən o yerlərdədir: dağların sinəsindəki bulaqlarla, məhsulu şirəli alma ağacları ilə, qocaman palıdlarla və onun yolunu həmişə gözləyən insanlarla dərdləşir.

Bayraq meydanında görüş

Tovuz şəhərinin girəcəyindəki Bayraq meydanında böyük canlanma vardı. Bazar günü olsa da, meydan məktəblilərlə dolu idi. Axarlı-baxarlı meydan qısa müddətdə bəzədildi. Amma Rayon Mədəniyyət və Turizm Şöbəsinin müdiri Aydın müəllim nədənsə əsəbi görünürdü. Millət vəkili İlyas İsmayılovun və Tovuz Rayon İcra Hakimiyyətinin başçısı Tofiq Zeynalovun tədbirdə iştirak etmələri kitab sərgisinin daha mütəşəkkil keçməsinə səbəb oldu. Onlar təqdim olunan kitablara maraqla baxdıqdan sonra mikrofona yaxınlaşdılar. İlyas İsmayılovun çıxışı qısa oldu. O, üzünü uşaqlara tutaraq, sadəcə, çoxlu kitab oxumağı tövsiyə etdi. Rayon İcra Hakimiyyətinin başçısı T. Zeynalov isə Azərbaycanın dövlət müstəqilliyinin bərpasından keçən 20 ildə xalqımızın keçdiyi çətin və şərəfli yoldan söhbət açdı və qarşıdan gələn bayram münasibətilə tədbir iştirakçılarını təbrik etdi. Tofiq Zeynalov çıxışının sonunda bildirdi:

- Əziz balalar, müstəqil Azərbaycanın gələcəyinə siz cavabdeh olacaqsınız. Bunun üçün, ilk növbədə, biliklərə hərtərəfli yiyələnməlisiniz. Biliyin əsas mənbəyi isə kitabdır. Bu kitab sərgisi də elə həmin məqsədə xidmət edir. Nəşriyyatlarımız tərəfindən çap olunaraq rayon kitabxanalarına hədiyyə kimi təqdim edilən bu kitabları gətirən səyyar sərginin təşkilatçılarına da təşəkkür edirik.

Firudin bəy Köçərli adına Respublika Uşaq Kitabxanasının direktor müavini Zahirə xanım xatırlatdı ki, biz keçən il uşaq kitablarına olan marağı və ehtiyacı öyrənmək məqsədilə on bir payonda monitorinq aparmışdıq. Bu tədbir də həmin monitorinqin nəticələrinə görə keçirilir. Mədəniyyət və Turizm Nazirliyinin dəstəyi ilə keçirilən “Kitab karvanı: İpək yolu ilə” səyyar kitab sərgisində paytaxtımızda fəaliyyət göstərən “Təhsil”, “Turan”, “Altun”, “Beşik”, “Çinar-çap”, “Kitab klubu” və digər nəşriyyatların son illərdəki məhsulları təqdim edilir. Kitab karvanının keçəcəyi 6 rayonun hər birinin mərkəzi kitabxana sisteminə təqribən 600-1000 kitab hədiyyə olunacaq. Ümidvarıq ki, məktəbli balalarımız həmin kitabları maraqla oxuyacaqlar.

Tovuzun Ermənistanla sərhəd kəndlərindən olan Muncuqluda ədəbiyyat müəllimi işləyən Gülnar xanım tədbirin daha canlı keçməsi üçün vətənpərvərlik mövzusunda yazdığı şeirlərdən də bir neçəsini oxudu. Qeyd edək ki, Gülnar Səma çox gənc olsa da artıq iki şeirlər kitabının müəllifidir. Gözəl şairimiz İlyas Tapdıq onun şeirləri barədə xoş sozlər söylədi və Gülnara uğurlar arzuladı.

Tədbiri Aşıq Əsəd adına Tovuz Musiqi Məktəbinin “Misri” sazçalanlar ansamblının, gənc aşıqlar Nazlı Məmmədova, Elman Dumanoğlu və başqalarının çıxışları daha da rövnəqləndirdi.

Biz kitab sərgisinin iştirakçısı olan məktəblilər arasında yay tətilində və son günlər hansı bədii kitabları oxumaları ilə bağlı sorğu keçirdik. Bozalqanlı və Dönükqırıxlı kəndlərindən olan məktəblilər sorğuda daha fəal iştirak etdilər. Onlar oxuduqları kitabların adlarını saymaqla yanaşı, həmin əsərlər barədə ətraflı məlumat verdilər.

Bu eldə hər kəs söz sərrafıdır

Ağstafa Rayon Mədəniyyət və Turizm Şöbəsinin müdiri Gülgün Kərimov kitab karvanı üzvlərini köhnə tanışlar kimi qarşıladı. Söz-sənət xiridarı olan Gülgün müəllim şair İlyas Tapdığı görən kimi çiçəyi çırtladı:

- Ağrın alım, ay qağa, başının dəstəsiylə xoş gəlmisən. Hüseyn qağamın ( Xalq şairi Hüseyn Arif nəzərdə tutulur-red.) iyini indi səndən alıram.

Gülgün müəllim sonra iş otağındakı kitabları göstərib: - Hər gün ən azı bir saat şeir oxumasam rahat ola bilmirəm. Bir daha xoş gəlmisiniz.

Kitab sərgisi Ağstafanın girəcəyindəki yaşıl meydanda inşa olunmuş geniş Heydər Əliyev Mərkəzində keçirildi. Mərkəzin böyük zalı da, foyesi də kitab həvəskarları ilə dolu idi. Foyedə məktəblilər Firudin bəy Köçərli adına Kitabxananın Məlumat və biblioqrafiya şöbəsinin müdiri Sevil xanım Əhmədovanı dövrəyə almışdılar. Sevil xanım yeni kitablar və onların müəllifləri barədə uşaqlara məlumat verirdi. Kitabxananın Elmi metodika şöbəsinin müdiri Nailə xanım Həşimova isə rayon kitabxanaçılarına öz tövsiyələrini çatdırırdı. Bu arada rayonun Dağ Kəsəmən kənd 1 saylı məktəbin ikinci sinif şagirdi Aysu Məmmədzadə “Tumurcuq”dan əzbərlədiyi bir şeiri çox gözəl söylədi və qəzetin hədiyyəsini qazandı. Tədbirin aparıcısı son aylar Ağstafa rayonunda keçirilən mədəni-kütləvi tədbirlər barədə söhbət açdıqdan sonra “Ləman” rəqs qrupunu meydana dəvət etdi. Sonra respublika müsabiqəsinin qalibi gənc aşıq Əfsanə Kərimli şaqraq səsi ilə qəlbləri coşdurdu. Xanzadə Əsgərov isə “Sarı bülbül” xalq mahnısını məharətlə ifa etdi. Yeri gəlmişkən deyək ki, bu yeniyetmə əsl istedaddır.

Qazaxda kitab karvanını, belə demək olarsa, böyük söz sərkərdəsi, sevimli şairimiz Səməd Vurğun qarşıladı. Səyyar kitab sərgisi də elə şairin əzəmətli heykəli ucalan meydanda keçirildi. Sərgiyə məktəblilərlə yanaşı, kitabxana və təhsil işçiləri, valideynlər, sözü, sənəti sevən çoxlu sayda soydaşımız qatıldı. Rayon Mərkəzi Kitabxana Sisteminin müdiri Solmaz Babanlı səyyar kitab sərgisi iştirakçılarını salamladı. Şair İlyas Tapdıq, əvvəlcə, hər kəsi müstəqilliyimizin bərpasının 20 illiyi münasibətilə təbrik etdi, sonra Qazax torpağının yetişdirdiyi söz-sənət və elm adamları barədə danışdı:

- Əziz uşaqlar, 20 ildə müstəqil Azərbaycan sürətlə inkişaf edib, böyüyüb, ucalıb, dünya dövlətləri sırasında layiqli yerini tutub. Qədim Qazax ölkəmizin ən böyük mədəniyyət mərkəzlərindən biridir. Mən hər dəfə Qazaxa gələndə yeniləşmə, inkişaf görürəm və sevinirəm. Siz bu torpağın gələcək qurucuları olacaqsınız. Bu gün heykəl kimi qarşımızda dayanan Xalq şairi Səməd Vurğun, Xalq yazıçısı Mehdi Hüseyn, Xalq şairi Osman Sarıvəlli, Xalq yazıçısı İsmayıl Şıxlı və başqa ədiblərimiz bu torpaqda yetişiblər, ədəbiyyatımızı, elmimizi zirvələrə qaldırıblar. Ümid edirəm ki, sizlərdən də gözəl şairlər, yazıçılar çıxacaq. Qazax böyük ziyalı potensialına malik rayondur.

İlyas müəllim daha sonra əlavə etdi ki, şairlər də, alimlər də böyük uğurları kitabla dostluq etdiklərinə görə qazanıblar. Buna görə siz də kitabla dost olmalısınız. Kitabla dostluq etsəniz, arzularınıza tez çatarsınız, xalqımıza daha çox xeyir verə bilərsiniz.

İlyas müəllim məktəblilər üçün yeni şeirlərini də oxudu. Sonra uşaq yazıçısı Gülzar İbrahimova, Qazax Rayon Mədəniyyət və Turizm Şöbəsinin müdiri Valeh Vəliyev çıxış etdilər. Məktəblilər isə hazırladıqları şeir və mahnı çələngini təqdim etdilər....

Biz Qazaxdan da böyük təəssüratla ayrıldıq.

Kitab bizi də dost etdi

İnamla demək olar ki, “Kitab karvanı: İpək yolu ilə” layihəsi uğurla həyata keçirildi. Altı günlük səfərdən karvanla yola çıxanlar da böyük zövq aldılar. Bu uğur, ilk növbədə, səfər yoldaşlarımız - Firudin bəy Köçərli adına Respublika Uşaq Kitabxanasının fədakar xanımlarının adı ilə bağlıdır. (Yeri gəlmişkən deyək ki, bu layihənin müəllifi kitabxananın direktor müavini Zahirə Dadaşovadır). Çünki onlar özləri kitabı çox sevdikləri kimi, başqalarına da kitabı sevdirə bilirlər. Dəfələrlə şahidi olduq ki, bu xanımlarla söhbət edən hər bir məktəbli və valideyn aldıqları məlumata görə sevinir və onlara təşəkkür edirdi. Kitab karvanı səfərə çıxanları da bir-birilə dost etdi. Güman edirəm ki, bu karvanın keçdiyi rayonlarda tədbir iştirakçısı olan məktəblilərin kitaba marağı müəyyən qədər də olsa artacaq. Bu düşüncədəyəm ki, kitab karvanı yaxın vaxtlarda yurdumuzun başqa bölgələrinə də üz tutacaq və uşaqları sevindirəcək. Onu da deyim ki, biz getdiyimiz rayonlarda yalnız tapşırılan işlə məşğul olmurduq. Eyni zamanda vaxt tapan kimi həmin şəhərlərdəki mədəniyyət ocaqlarının fəaliyyəti ilə də tanış olmağa çalışırdıq. Kitab karvanı həm də bölgələrimizdə istedadlı məktəblilərin üzə çıxarılması üçün də bir vasitə oldu.

Səməd Məlikzadə,

“Tumurcuq “ qəzetinin redaktoru.

Zaman.-2011.-11-12 oktyabr.-S.13.