Rəssamımız fransızlara karikatur dərsi verəcək

Bu günlərdə tanınmış karikaturçu, yüzdən artıq beynəlxalq karikatur müsabiqəsinin qalibi Seyran Cəfərli Çinin Fujion şəhərində keçirilən Asiya Beynəlxalq Animasiya, Karikatura və İnformasiya Texnologiyaları Sərgisindən qayıdıb.

Bu tədbirdə Asiya ilə yanaşı, digər qitələrin nümayəndələri də iştirak ediblər. Tədbir çərçivəsində yeni bir təşkilatın - Beynəlxalq Karikatur və Animasiya Federasiyasının (FICA) təşkilinə qərar verilib. Azərbaycan, Almaniya, İran, Braziliya və Çinin tanınmış karikaturçularının daxil olduqları idarə heyətinin ilk toplantısında çinli Liuyi Vang bu qurumun prezidenti, Seyran Cəfərli isə vitse-prezidenti seçilib. Seyran Cəfərlinin sözlərinə görə, təşkilatın baş ofisi Çində fəaliyyət göstərəcək: “Baş ofisin Azərbaycanda da nümayəndəliyinin təşkili nəzərdə tutulub”.

Daha sonra FICA-nın gələcək fəaliyyəti barədə ətraflı məlumat verən Seyran Cəfərli bildirdi ki, FICA ilk planlarını da açıqlayıb: “Artıq beynəlxalq müsabiqənin təşkili gündəmdədir. Bu müsabiqə tarixi Böyük İpək yolu üzərində yerləşən ölkələrə həsr olunacaq. Belə ki, həmin ölkələrin hər birində karikatur sərgiləri təşkil olunacaq, o dövlətlərdə yaşayan elm adamlarının İpək yolu ilə bağlı düşüncələri toplanacaq. Toplanacaq vəsaiti 20 cildlik kitaba yerləşdirmək və nəşr etmək niyyətindəyik. Bildiyiniz kimi, İpək yolu bizim eranın birinci minilliyindən başlayaraq ikinci minilliyin ortalarına qədər Avropa və Asiyadan çarpaz şəkildə keçən marşrutlar şəbəkəsini əks etdirir. İpək Yolunun əsas hissəsi öz başlanğıcını Çinin paytaxtı Çanqandan (Xian) götürür və sonra Orta Asiyada Təkləməkan səhrasından keçən şimal və cənub marşrutlarına ayrılır, sonra isə yenidən birləşərək İranın yaylalarını kəsib keçir və Antiox və Tire şəhərlərində qurtarır. Ümumiyyətlə, bu yolun üzərində 30-dan artıq ölkə yerləşir”. O, qurumun iki ayda bir dəfə jurnalının da işıq üzü görəcəyini bildirdi. “Bir sözlə məqsədimiz dünya karikaturasını yeni biçimdə, yeni tərzdə bəşəriyyətə çatdırmaqdan ibarətdir”, - sözləri ilə söhbətini davam etdirən Seyran Cəfərli bu müsabiqələr zamanı animasiya filmlərinin də diqqət mərkəzində olacağını vurğuladı.

Növbəti səfərləri ilə bağlı ünvanladığımız suala isə rəssam belə cavab verdi: “Cari ilin dekabr ayında İspaniyada uşaq hüquqlarına həsr olunmuş beynəlxalq karikatur sərgisində iştirak edəcəyəm. O sərgidə mənim 8 əsərim də nümayiş olunacaq. Gələn ilin yanvar ayının 16-23-də isə Fransada təşkil olunacaq beynəlxalq karikatur festivalına rəsmi qonaq kimi dəvət olunmuşam. Bu tədbirin əsas mövzusu internet və karikatur olacaq. Onu da qeyd edim ki, həmin tədbir çərçivəsində bir qrup Fransa gəncinə karikaturdan master dərsləri də verəcəyəm”.

Qeyd edək ki, nə qədər qəribə olsa da, rəssamlıq sənətimizi dünya miqyasında ləyaqətlə təmsil edən Seyran Cəfərli hələ Azərbaycan Rəssamlar İttifaqının üzvü deyil.

QVAMI MƏHƏBBƏTOĞLU

Zaman.-2011.-20-21 oktyabr.- S.12.