Beynəlxalq təhsil sərgisinə maraq böyükdür

QVAMI MƏHƏBBƏTOĞLU

Sentyabrın 24-25-də (saat 13:00-da) Bakıda - “Hyatt Regency” otelində Türkiyənin “Akare” Xaricdə Təhsil Sərgiləri Şirkəti (“Akare International Education Fairs”) beynəlxalq təhsil sərgisi keçirəcək.

Sərgiyə Avstraliya, Birləşmiş Ərəb Əmirlikləri, İngiltərə, Quzey Kıprıs Türk Cümhuriyyəti, Türkiyə, ABŞ, Avstriya, Malayziya, İsveçrə, İspaniya, Almaniyanın təhsillə bağlı 50 müxtəlif qurumu qatılacaq. Sərgidə tələbələrə xaricdə sertifikatlaşdırılmış təhsil, MBA proqramları və dil kursları haqqında ətraflı məlumatlar veriləcək. Həmçinin burada xarici ölkələrin məktəblərində təhsil almaq şərtləri, nəzərdə tutulmuş güzəştlər, gündəlik xərclər və s. məsələlərlə bağlı suallar cavablandırılacaq. Onlar sərgini təşkil edənlərlə birbaşa təmasda ola biləcəklər. Buraya gələn hər kəs sərgi ilə yanaşı, həmin salonda Azərbaycan və ingilis dillərində təşkil olunacaq seminarlara da qatıla biləcək. Xatırladaq ki, sərgiyə giriş pulsuzdur.

Şirkətin beynəlxalq marketinq üzrə əlaqələndirici meneceri Emrah Koknarın qəzetimizə verdiyi məlumata görə, belə bir təhsil sərgisi ölkəmizdə bu il ikinci dəfədir ki, təşkil olunur (Qeyd edək ki, bu ilin aprel ayının 9-10-da belə bir tədbir keçirilib). O, bunu gənclərimizin xaricdə təhsil almaq istəklərinin çox olması ilə izah etdi. Onun sözlərinə görə, məhz bu amil sərgiyə qatılmaq istəyən qurumların sayını artırıb: “2010-cu ildə təhsil sərgimizə 32 qurum qatılmışdı. İndi isə onların sayı 50-yə çatıb. Yaxın gələcəkdə sərgiyə qatılan qurumların sayının daha da artmasına nail olacağıq”. Qeyd edək ki, ölkəmizdən bu sərgiyə yalnız “Qafqaz” universiteti qatılacaq. Azərbaycanlı gənclərin hansı ölkələrin ali təhsil müəssisələri ilə daha çox maraqlanmalarına gəlincə, müsahibimiz belə dedi: “Azərbaycanlı gənclər ən çox İngiltərə, Amerika, Avstraliya, Kanada və Türkiyənin ali təhsil müəssisələri ilə maraqlanırlar”. Həmsöhbətimiz iki gün davam edəcək bu sərgiyə 6 minə yaxın şəxsin qatılacağının gözlənildiyini bildirdi. Sərgidə diplomatik korpus nümayəndələrinin və dövlət rəsmilərinin iştirakı da nəzərdə tutulur. Emrah bəy növbəti sərginin gələn ilin mart ayının 10-11-də keçiriləcəyini bildirdi.

Emrah Koknar dedi ki, sərgidə iştirak etmək üçün heç bir maneə yoxdur. Hətta maraqlananlar “a2student. com” saytına daxil olmaqla “onlayn” dəvətnaməsi ilə sərgimizə qatıla bilərlər. Daha sonra o, bu ilin avqust ayından İçərişəhərdə (Sabir küçəsi, 3) fəaliyyətə başlayan “Azeredu” Xaricdə Təhsil Mərkəzi barədə məlumat verdi: “Qeydiyyatla bağlı hər cür məlumatlar, həmçinin bu və ya digər ölkədə təhsil alarkən qalacaq yerlərin seçilməsi, təyyarə biletinin təminatı kimi məsələlər bu qurum tərəfindən həyata keçirilir”. Söhbətinin sonunda təhsilimizlə bağlı fikirlərini bizimlə bölüşən həmsöhbətimiz bildirdi ki, Azərbaycanda təhsilə yüksək dövlət qayğısı göstərilir. Prezident İlham Əliyev azərbaycanlı tələbələrin xaricdə təhsil almalarına xüsusi diqqət yetirir. Yeri gəlmişkən, İlham Əliyev dəfələrlə bəyan edib ki, biz neft kapitalını insan kapitalına çevirməliyik. Azərbaycanda bu istiqamətdə mühüm işlər həyata keçirilir”. O, keçirdikləri Beynəlxalq təhsil sərgisini də bu sahəyə bir kömək kimi dəyərləndirdi.

Qeyd edək ki, bu sahə üzrə kifayət qədər təcrübəsi olan “Akare” Xaricdə Təhsil Sərgiləri Şirkəti 2001-ci ildən Türkiyə, Azərbaycan, Qazaxıstan, Suriya, Misir və Mərakeşdə çox müvəffəqiyyətli təhsil sərgiləri təşkil etməkdədir.

Zaman.- 2011.- 22-23 sentyabr.- S.12.