İslamı qəbul etmiş məşhurlar

Jak Kusto Fransada İslam dini müxtəlif sahələrdə məşhurlaşmış insanlar arasında sürətlə yayılır. Artıq xristianlığı tərk edib, İslamı qəbul edən fransızların sayı yüz min nəfəri keçib. Fransız katolik kilsəsinin Paris arxiyepiskopu bu rəqəmi rəsmi şəkildə təsdiqləyib. İslamı seçənlər arasında sadə fransızlarla yanaşı, görkəmli şəxslərə də rast gəlmək mümkündür..

Böyük fransız alim və okeanoqrafı, dəniz və okean dərinlikləri üzrə tədqiqatçı, akvalanq və ixtiraçı, bir çox məşhur kitab və filmlərin müəllifi Jak Kusto dünyanın məşhur və görkəmli şəxslərindən biridir. Lakin çox az adam bilir ki, bu dahi şəxsiyyət ömrünün son illərində İslam dinini qəbul edib və müsəlman olaraq dünyasını dəyişib.

Kusto Cəbəlüttariq boğazında tədqiqat işləri apararkən bir-biri ilə təmasda olan Atlantik okeanı ilə Aralıq dənizi sularının arasında maneənin olduğunu və onların sularının qarışmadığını kəşf etmişdir. Okeanoloq burada iki cür suyun bir-birinə qarışmamasını və onların duzluluq səviyyəsinin, temperaturunun, fauna və florasının müxtəlif olduğunu aşkarlamışdı. Kusto müxtəlif quruluşlara malik olan bütün dənizlərin birləşmə nöqtələrində həmin su əngəllərinin mövcud olduğunu elmə sübut etmişdir. Bu kəşfi haqqında İslam dinini qəbul edib, müsəlman olmuş fransız alim Moris Bukaya dedikdə, gözləmədiyi bir cavab almışdı. Kustonun alim dostu onun bu kəşfi haqqında müsəlmanların müqəddəs kitabı Qurani-Kərimdə məlumat olduğunu deyir. Qurani-Kərimin “Rəhman” surəsinin 19-20-ci və “Furqan” surəsinin 53-cü ayələrinin tərcüməsini oxuyan Kusto, həqiqətən, bu kəşf barədə ondan qabaq - 1400 il əvvəl müqəddəs kitabda yazıldığına əmin olur. O, öz xatirələrində qeyd edir: “Müasir elmdən 1400 il qabaqda olan Quran insan sözü ola bilməz, bu kitab, həqiqətən, Allahın kəlamıdır”.

Lev Tolstoy

Rus ədəbiyyatı və tarixinə böyük töhfələr vermiş məşhur rus yazıçısı və mütəfəkkiri Lev Tolstoyun Allah haqqında fəlsəfi fikirlərini özündə ehtiva edən traktatları, əsərləri dünyada çox az bilinir. Həyatın mənasını dərk etmək, mövcud işgəncəli sosial, mənəviyyatsız ümumi həyat qanunları yazıçının bütün həyat və iş tərzinə təsir etmişdir. Tolstoy artıq ölüm, günah, tövbə barəsində daha çox fikirləşməyə başlamışdır.

Onun tamamilə qeyri-adi düşüncə tərzi Rusiya cəmiyyətində birmənalı qarşılanmırdı. Onun kilsə haqqındakı fikirləri: “Kilsəni təmsil edən dünya istədiyini edirdi. İstənilən hər bir şey Məsihin inancına uyğunlaşdırılırdı və bununla da bütün xristianlar Məsihin inancına zidd yaşamış sayılırdı. Nəticədə Allahsız bir dünya daha da pis vəziyyətə düşdü. Buna baxmayaraq, kilsə bu “yeni” mühiti müdafiə edir və Məsihin inancının məhz bu olduğunu iddia edirdi.”

Müsəlman bir kişi ilə evli olan E. Vəkilova məşhur yazıçıya məktub yazır. Məktubunda qadın uşaqlarının İslam dinini qəbul etmək istədiklərini və bu məsələdə məsləhət istədiyini bildirir. Yazıçının xanıma cavabı: “Çox təəccüblü olsa da, ən ali xristian təhsili almış bir şəxs kimi mənim üçün, heç şübhəsiz, müsəlmanlıq pravoslav kilsə inancından müqayisə olunmaz dərəcədə yüksəkdir. Əgər bir insan pravoslav kilsə inancı ilə müsəlmanlıq inancı arasında seçim qarşısında qalarsa, o zaman hər şüurlu normal insan, əlbəttə ki, ikincini seçərdi. Belə ki, Allah və onun Rəsuluna inam, üç müqəddəs, bağışlanma, müqəddəslər və onların şəkilləri və çətin ibadət formasına malik inancdan daha üstün və məntiqlidir.”

Yazıçının fəlsəfi düşüncələri və fikirləri dostları, yaxınları, ailəsi tərəfindən də bəyənilmirdi. Lev Tolstoy öz xatirələrində yazır: “Əgər siz mənimlə eyni bir inancda olsaydınız, mən çox şad olardım. Həyatın bir çox uğurları - zənginlik, şan-şöhrət mənim həyatımda yoxdur. Dostlarım, hətta ailəm məndən üz döndərir. Liberallar məni Qoqol kimi kəmağıl, dəli; inqilabçılar və radikallar boşboğaz, zəvzək; dövlət xadimləri qatı inqilabçı kimi qəbul edir, pravoslavlar isə şeytan hesab edirlər. Etiraf edirəm, ki, mənə çox çətindir... Buna görə xahiş edirəm məni mehriban bir müsəlman kimi qəbul edin, onda hər şey yaxşı olacaq”.

Məhəmməd Əli

Əsl adı Kassius Kley olan Məhəmməd Əli 18 yaşında Olimpiya çempionu, 22 yaşında isə artıq dünya çempionu idi. Qəzetlərdə onun haqqında belə yazılırdı: “O, kəpənək kimi süzür, arı kimi sancır”. Müsəlman dinini qəbul edib, adını Məhəmməd Əli olaraq dəyişdirməsi böyük əks-səda doğurmuşdu. 1974-cü ilə qədər Məhəmməd Əli 25 titullu boks döyüşünün qalibi olmuş super ulduz idi. 1981-ci ildə Əli boksdan getdiyini elan etdi. Bir müddətdən sonra məlum olur ki, o, parkinson xəstəliyinə tutulub.

Məhəmməd Əlinin İslam haqqında müsahibəsi:

- Həyatınızda peşman olduğunuz bir şey var?

- Əlbəttə, var. Əgər mənə yaşamaq üçün yenidən şans verilsəydi, mən 10 yaşında müsəlman olardım. Bundan başqa Co Frezerə oyundan qabaq “eybəcərlər çempion olmur” dediyimə görə çox peşmanam. 30 ildən sonra ondan bu sözümə görə üzr istədim, o da qəbul etdi.

- Ən böyük uğurunuz?

- İslamı qəbul etməyim. İlk vaxtlar müxbirlər mənim yeni adımı qəbul etmirdilər və mənə Kassius Kley deyə müraciət edirdilər. Mən də hər dəfə adımın başqa olduğunu onlara bildirirdim. Sonradan hamı bu ada alışdı. Hal-hazırda məni bütün dünyada Məhəmməd Əli kimi tanıyırlar.

BƏYLƏR MƏCIDOV

Zaman.- 2011.- 10-12 sentyabr.- S.3.