Ordubadda tarixi abidələr bərpa olunur

Ordubad şəhərində Qeysəriyyə binası (XVII əsr), məbəd (XVIII əsr), ordubadlı Mənsur Ağa və Tağı Nağıyevin tikdirdikləri abidələr (XIX əsr) bərpa işlərindən sonra istifadəyə verilib.

Ordubad şəhərində Qeysəriyyə binası (XVII əsr), məbəd (XVIII əsr), ordubadlı Mənsur Ağa və Tağı Nağıyevin tikdirdikləri abidələr (XIX əsr) bərpa işlərindən sonra istifadəyə verilib.

Ordubad Rayon Tarix-Diyarşünaslıq Muzeyinin yerləşdiyi Qeysəriyyə tarixi abidəsinin bərpa işlərindən sonra açılışı olub. Tədbirdə muzeyin direktoru Vilayət Bağırov çıxış edərək, Ordubadda həyata keçirilən quruculuq işlərindən danışıb, muxtar respublika rəhbərliyinin tarixi abidələrə göstərdiyi qayğıya görə ordubadlılar adından minnətdarlığını bildirib.

Çıxışında ulu öndər Heydər Əliyevin “Ordubad Azərbaycanın incisidir” kəlamını xatırladaraq, Naxçıvan Muxtar Respublikası Ali Məclisinin Sədri Vasif Talıbov deyib: “Azərbaycanın incisi olan Ordubadda tarixi abidələr bərpa olunur, onların gələcək nəsillərə çatdırılması təmin edilir. Hər birimiz tariximizlə qürur hissi keçirməli, bütün dünyaya göstərməliyik ki, ulu babalarımız, əcdadlarımız belə zəngin tarixə malik olublar”. Qeyd edək ki, böyük günbəzdən və ona bitişik 16 kiçik günbəzdən ibarət olan bu bina gözəl memarlıq üslubunda tikilib. Abidə bişmiş kərpicdən inşa olunub, hündürlüyü 8,5 metrdir. Bildirilib ki, Ordubad Rayon Tarix-Diyarşünaslıq Muzeyi bu binada 1991-ci ildən fəaliyyət göstərir. Muzeydə 3919 eksponat saxlanılır. Daha sonra XIX əsrin ikinci yarısında ordubadlı Mənsur Ağa və Tağı Nağıyevin tikdirdikləri yeraltı abidələrin, eləcə də qədim məbədin təmirdən sonra açılış mərasimləri düzənlənib.

Bu tədbirlərə qatılanlar bizimlə söhbətlərində uzun illər baxımsız vəziyyətdə qalan bu tarixi abidələrin bərpa edilməsini də Ordubadda tarix-memarlıq abidələrinə göstərilən qayğının nəticəsi kimi dəyərləndiriblər.

Zaman.- 2011.- 18-19 yanvar.- S. 12.