“Bu gün cəmiyyətə biliklərini həyatda tətbiq etməyi bacaran vətəndaşlar lazımdır”

Təltif olunanlar arasında Ağdaşdakı M.Şeyxzadə adına Texniki, Humanitar və Təbiət Təmayüllü Gimnaziyanın direktoru Şəhla Hacıbalayeva da var. O, ölkə başçısının sərəncamı ilə “Tərəqqi” medalı ilə təltif olunub.

Bir neçə gün öncə ölkə başçısı İlham Əliyevin Ağdaş və Yevlax rayonlarının sosial-iqtisadi və mədəni həyatında xidmətləri olan bir qrup şəxsə fəxri adların verilməsi və medallarla təltif edilməsi haqqında imzaladığı sərəncamlar barədə məlumat vermişdik. Təltif olunanlar arasında Ağdaşdakı M. Şeyxzadə adına Texniki, Humanitar və Təbiət Təmayüllü Gimnaziyanın direktoru Şəhla Hacıbalayeva da var. O, ölkə başçısının sərəncamı ilə “Tərəqqi” medalı ilə təltif olunub. Bu münasibətlə Şəhla xanımı təbrik edərkən, ona bir neçə sualla da müraciət etdik.

Yüksək mükafata layiq görüldüyündən qürur hissi keçirdiyini vurğulayan Şəhla xanım mükafatı Ağdaş təhsilinə verilən qiymət kimi dəyərləndirdi. Onun sözlərinə görə, son illər ölkəmizdə təhsil sahəsində görülən işlər bu rayonun məktəblərinin göstəricilərinə də müsbət təsir göstərib. Son illər ölkə başçısı İlham Əliyevin və onun xanımı Mehriban Əliyevanın təhsil sahəsinə göstərdiyi qayğıdan ətraflı söz açan Şəhla xanım bütün bunların təhsilimizin daha uğurlu sabahından xəbər verdiyini bildirdi.

2006-2007-ci tədris ilində Ağdaş rayonu, M. Şeyxzadə adına Şəhər İnternat Məktəbinin bazasında texniki, humanitar və təbiət fənləri təmayüllü gimnaziya təşkil olunduğunu vurğulayan həmsöhbətimiz bunun “Xüsusi istedada malik olan uşaqların (gənclərin) yaradıcılıq potensialının inkişafı üzrə Dövlət Proqramı (2006-2010-cu illər)” çərçivəsində həyata keçirildiyini vurğuladı. “Bu gün cəmiyyətə təkcə müəyyən bilikləri mənimsəyən gənclər yox, həm də bunları həyatda, əməli fəaliyyətdə tətbiq etməyi bacaran, dərin idraka malik, fəal, müstəqil mövqeyi olan vətəndaşlar lazımdır”, - sözləri ilə söhbətini davam etdirən təcrübəli pedaqoq Şəhla xanım qeyd etdi ki, bildiyiniz kimi, gimnaziya tipli məktəblər xüsusi istedada malik uşaqlar üçün nəzərdə tutulub: “Çox yaxşı haldır ki, məktəbimizdə “internat” tipi də qorunub saxlanılıb. Yəni burada imkansız ailələrin uşaqlarının oxuması üçün hər cür şərait var. Məlumat üçün onu da bildirim ki, gimnaziyamızda 22 sinif komplektində 513 nəfər şagird təhsil alır. Hər cür şərait və rahatlığı olan 160 nəfərlik yataqxana imkansız ailələrin istedadlı uşaqlarının istifadəsindədir. Şagirdlərin təlim-tərbiyəsi ilə 65 müəllim, 45 tərbiyəçi məşğul olur. Onlardan 50-si ali, 49-u isə pedaqoji ortatəhsillidir. Məktəbin yeməkxanasında 463 nəfər şagird gündə 3 dəfə keyfiyyətli yeməklərlə təmin olunur”. Onun sözlərinə görə, rəhbərlik etdiyi tədris müəssisəsinin zəngin kitabxanası, internet otağı, fənn kabinetləri, idman zalı da var. Məktəbin binası mərkəzləşdirilmiş istiliklə təmin edilib.

Ötənilki uğurlardan söz açan Şəhla xanım dedi ki, 9-cu sinif sagirdi Əhmədiyyə Tağıyev kimya fənni üzrə respublika olimpiadasında birinci yerə layiq görülüb. 10-cu sinif şagirdi İsmayıl Şərifov isə Ətraf Mühitin Mühafizəsi - INEPO Avrasiya Beynəlxalq Layihə Olimpiadasında ikinci yeri qazanıb.

Qeyd edək ki, bu təhsil müəssisəsinə şagird qəbulu Ağdaş, həmçinin ətraf rayonlardan müsabiqə yolu ilə qəbul edilir

Vüqar Nəbiyev

Zaman.- 2011.- 20-21 yanvar.- S. 12.