Mədəniyyət və Turizm şöbəsi milli dəyərlərimizi təbliğ edir

Ağstafa rayonu Azərbaycanın ən qədim elm və mədəniyyət mərkəzlərindən biridir. Bu, özünü rayondakı tarixi-mədəni abidələrin zənginliyində də göstərir. Bu müstəvidə də son illərdə Ağstafa Mədəniyyət və Turizm şöbəsi milli mədəni dəyərlərimizin qorunmasında xüsusi önəm daşıyan tədbirlər həyata keçirməkdədir. Onu da deyək ki, Ağstafa Mədəniyyət və Turizm şöbəsi nəzdində 13 mədəniyyət evi, 25 klub, 49 kitabxana filial, bir 7 illik uşaq musiqi məktəbi, 3 muzey, 1 Dövlət Rəsm Qalereyası fəaliyyət göstərir.

Şöbə öz işini milli-mədəni dəyərlərimizin qorunması, inkişaf etdirilməsi, uşaq və yeniyetmələrin musiqi biliklərinə yiyələnməsi, tarix və mədəniyyət abidələrinin, məişətimizə aid qədim eksponatların qorunaraq gələcək nəsillərə çatdırılması istiqamətində qurub. Qeyd edək ki, mədəniyyət evlərində fəaliyyət göstərən qruplar və ansamblların bəziləri nəinki Azərbaycanda, həm də xarici ölkələrdə tanınır. Onlara misal olaraq “Dastan” aşıqlar ansambılı və “Ləman” rəqs qruplarını göstərmək olar. Adları çəkilən ansambllar ölkəmizi xarici ölkələrdə də layiqincə təmsil ediblər.

Onu da deyək ki, “Dastan” aşıqlar ansamblı 1986-cı ildə fəaliyyətə başlayıb və qısa müddətdə respublikamızın hər yerində məşhurlaşıb. Belə ki, “Dastan” aşıqlar ansamblı dəfələrlə respublikamızın rayonlarında, o cümlədən də qonşu respublikalarda qastrol səfərlərində olublar. Bundan əlavə “Dastan” aşıqlar ansamblı tez-tez Ceyrançöl qışlaqlarında, sərhəd zonalarında, hərbi hissələrdə və məktəblilər qarşısında maraqlı proqramlarla çıxış edirlər. Ansambl bir çox respublika müsabiqəsində uğurla çıxış etmişlər. 2010-cu ildə keçirilən Aşıq Şəmşir adına gənc aşıqların V Respublika müsabiqəsində ansamblın gənc üzvü Əfsanə Kərimli I-ci yerə layiq görülüb.

“Dastan” aşıqlar ansamblının hal-hazırda 20-dən artıq üzvü vardır. Kollektivin tərkibinə ustad və həvəskar aşıqlarla bərabər məzəli əhvalatlar, qaravəllilər, bədii qiraət söyləyənlər daxil edilmişdir.

Onu da xatırladaq ki, “Dastan” aşıqlar ansamblının bədii rəhbəri Aşıq Hüseyn Əzizoğludur. Ansamblın repertuarını aşıq havaları, qəhrəmanlıq və məhəbbət dastanları təşkil edir. Ansamblın üzvlərinin əksəriyyəti Azərbaycan aşıqlar birliyinin üzvüdülər.

“Ləman” rəqs qrupu 2009-cu ilin sentyabr ayında Ağstafa rayon Mədəniyyət evi nəzdində fəaliyyət göstərməyə başlayıb. Rəqs qrupunun rəhbəri Xaliq Əliyevdir. Fəaliyyəti dövründə “Ləman” rəqs qrupunun repertuarında “Yallı”, “Azərbaycan suitası”, “Vals”, “Duy-duy”, “Sabirabadı”, “Cobanlar”, “Naz eləmə”, “Vağzalı” kimi rəqslər üstünlük təşkil edib. “Ləman” rəqs qrupu rayonda keçirilən tədbirlərdə də fəal iştirak edir. Qrup 2010-cu il fevral ayının 27-də Mingəçevir şəhərində keçirilən “Çal oyna-2010” adlı zonalar üzrə müsabiqədə iştirak etmişdir. Sakarya şəhər Mədəniyyət və Turizm Mərkəzinin dəvəti ilə isə rəqs qrupu 2011-ci il aprel ayının 17-dən 27-nə kimi Türkiyədə keçirilən “Beynəlxalq Uşaq Xalq Rəqs Açıq Festival Həftəsi”ndə iştirak etmişdir.

Zaman.-2012.-19-20 aprel.- S.6.