“Təhsilin inkişafi üçün bütün imkanlardan istifadə edirik”

“2010-2011-ci tədris ilində Goranboy rayon təhsil şöbəsi ümumtəhsil məktəblərində təlim-tərbiyənin daha da yüksəldilməsi, məktəblərin maddi-texniki bazasının möhkəmləndirilməsi istiqamətində məqsədyönlü iş aparmış və bu məsələlər hazırda davam etdirilir. Son illər ölkə iqtisadiyyatı ilə yanaşı elm, təhsil və mədəniyyət də geniş inteqrasiya proseslərinə cəlb olunub. Güclü iqtisadiyyatı olan ölkənin güclü təhsili olmalıdır”. Bu sözləri bizimlə söhbətində Goranboy rayon təhsil şöbəsinin müdiri İlham Hüseynov dedi. O qeyd etdi ki, ölkə başçısı digər bölgələr kimi Goranboy rayonununda təhsilin inkişafını xüsusi diqqət mərkəzində saxlayır. İlham Hüseynov: “Elm və təhsil sahəsində rayonumuzun məktəblərində uğurlu addımlar atılır.

Azərbaycan Respublikası Regionlarının 2009-2013-cü illərdə Sosial-İqtisadi inkişafı dövlət proqramının icrası ilə əlaqədar 2010-cu ildə Rus Borisi kənd tam orta və Qurbanzadə kənd ümumi orta məktəbləri, Azad, Xəsədərili və Şahməmmədli kənd ibtidai məktəbləri üçün yeni məktəb binaları tikilib istifadəyə verilmiş, Bəşirli kənd ümumi orta məktəbi üçün 80 şagird yerlik əlavə tədris korpusu inşa olunmuşdur. Qaradağlı və Yuxarı Ağcakənd kənd tam orta, Abbasqulular kənd ümumi orta məktəbləri isə əsaslı təmir olunmuşdur

2011-ci ildə isə Goranboy şəhər 3 saylı tam orta məktəbi üçün 420 şagird yerlik yeni bina tikilmiş, 360 şagird yerlik Tatarlı kənd tam orta məktəb, 220 şagird yerlik Səmədabad kənd tam orta məktəb, 180 şagird yerlik Şadılı kənd tam orta məktəb inşa edilmişdir. Bundan əlavə, Goranboy şəhərinin mərkəzində müasir standartlara cavab verən Şahmat Uşaq Gənclər məktəbi tikilib istifadəyə verilib. Buna paralel olaraq Faxralı kənd tam orta məktəbi üçün yeni məktəb binasının tikintisi nəzərdə tutulmuşdur”,-dedi.

İlham Hüseynov olimpiadalarda qazanılan uğurlardan da ağızdolusu danışır. O deyir ki, şagirdlərimiz müntəzəm olaraq fənn olimpiadalarında yaxşı nəticələr göstərirlər: “2011-ci ildə Goranboy ümumtəhsil məktəblərinin 6 nəfər şagirdi respublika fənn olimpiadasında və digər respublika müsabiqəsində yaxşı nəticə göstərmişlər. 2011-ci ildə ali məktəblərə qəbul zamanı 9 nəfər məzunumuz 600-dən yuxarı bal toplayıb. Bu da 2010-cu ildəkindən 2 nəfər çoxdur.

Təhsilin informasiyalaşdırılması, İnformasiya-Kommunikasiya Texnologiyalarının (İKT) tətbiqi məsələsinə diqqət artırılmış, məktəblərin kompyuterlə təminatı əsaslı surətdə yaxşılaşdırılmışdır. Məktəblərdə kompyuterlər internet şəbəkəsinə qoşulmuşdur”.

İlham Hüseynov qeyd etdi ki, qazanılmış uğurlarda məktəblərdə nizam-intizam və icra intizamının gücləndirilməsi, tədrisin vəziyyətinin yaxşılaşdırılması, ən asası kurrikulum islahatlarının qarşıya qoyduğu vəzifələrin yerinə yetirilməsi, şagirdlərə vətənpərvərlik hisslərinin aşılanmasının böyük rolu olub: “Bu müstəvidə də rayonun müəllimləri üçün təhsil nazirliyinin xətti ilə təlim kursları təşkil edilmiş, dərs ilinin sonunadək 400 nəfər müəllim ixtisas və peşə hazırlığını artırmaq üçün kurslardan keçərək sertifikatlar almışlar. 2011-ci ildə rayonun Səfikürd kənd tam orta məktəbinin müəllimi, Əməkdar müəllim İsgəndər Səklikov, “İlin ən yaxşı müəllimi” müsabiqəsinin qalibi olmuş Goranboy rayon 1 saylı tam orta məktəbin sinif müəlimi Kəmalə Həsənəliyeva “Tərəqqi medalı” ilə təltif olunmuşdur”.

Təhsil şöbəsinin rəhbəri bütün bunlarla yanaşı bəzi problemlərin də olduğunu bildirdi. O, təhsil müəssisələrinin istilik təminatının arzu edilən cəviyyədə olmadığını vurğuladı: “Rayonun qaz xətti olan məntəqələrində yerləşən ümumtəhsil məktəblərində istilik qazanxana sistemləri olmadığından onlara qaz verilməsi tamamilə dayandırılmışdır. Həmin təhsil müəssisələri odun yanacağı ilə qızdırılır ki, bu da mövsüm ərzində bir sıra çətinliklərin və problemlərin meydana çıxmasına şərait yaradır. Qaldı ki, məktəblərin yüksək ixtisaslı kadrlarla təmin olunmasına, bu sahədə məktəblərimizdə kadr çatışmazlığı yoxdur. Amma dağlıq ərazilərdə yerləşən məktəblərimizin bir neçəsində kadr çatışmazlığı mövcuddur. Həmin məktəblərdə ingilis dili və coğrafiya müəlliminə böyük ehtiyac var. Biz bu problemi aradan qaldırmaq üçün bir sıra tədbirlər həyata keçiririk. Bir sözlə, uşaqlarımıza yüksək bilik və savad verilməsi və rayonumuzda təhsilin daha da inkişaf etdirilməsi üçün bütün imkanlardan istifadə edirik”.

Zaman.-2012.-21-23 aprel.- S.3.